daniel donatsch

berlin marathon 2024

dani — Tue, 01 Oct 2024 20:48:53 +0000

berlin marathon 2024

dani Tue, 10/01/2024 - 22:48

nach dem ich letscht jahr es persönlichs jubiläum gha han mit de teilnahme 19 und 20 hät das jahr de berlin marathon es offiziells jubiläum gfiired: sini 50. usträgig. es hät aber für d skater no meh änderige gä. d strecki isch nüm di originali, sondern jetzt au en rundkurs. sie händ, obwohl letscht jahr s erschti mal sit langem teilnehmerzahl wieder gstiege isch, gemeint, es lohnt sich nüm für d skater 42km strass z sperre. das hät für mich für das jahr s inline-renne e chli interessanter - will irgendwie neu - gmacht. dörfti aber de attraktivität vo dem alass insgesamt nid zueträglich si.

au d startziit hät gändered, das isch aber fasch eher zu minem vorteil gsi: ich han meh pause gha. und vor allem, am samschtig morgen kei ziit meh müesse totschlah und nervös werde chönne. nach em frühestücksbuffet im hotel händ mir üs bald scho parat gmacht und sind an start gange. s wetter isch chli unklar gsi, mal hät d sunne gschunne und es isch recht warm gsi, denn sind wieder wolke verbi cho und es isch chüel gsi, dezwüsche hät's sogar no es paar tröpfli gä. schlussendlich sind s aber sehr agnehmi temperature und auch absolut trocheni strasse gsi. d entscheidig im startblock C z starte hät sich au schnell als richtig usegstellt, wie scho letscht jahr. es isch nid los gange wie verruckt, aber au nid langsam gsi. ich han wohl au no chi glück gha, oder bin strategisch guet gfahre, bin immer im hauptfeld gsi und han meistens au d spitze vo dem gseh. trotzdem han i zu jedem ziitpunkt guete windschatte gha. das isch enorm wichtig gsi, will i di einti richtig händ mir zum teil brutal starche gegenwind gha. so han ich lang es ruhigs renne verbracht und mir denkt "guet! di gsparti energie chann ich morn no bruche".

wo's uf di füfti und letschti rundi gange isch, händ mir de markus ufgablet. de isch eigentlich viel schneller als ich. er hät verzählt, dass er gestürzt isch. er hetti wohl gern sofort agriffe, ich han aber gseit dass ich nid glaube, es bringi viel. ich han vier runde beobachtet, wie löcher wo's im gegewindteil gä hät, uf de ruggewindsiete immer problemlos wieder gschlosse worde sind. so hät er sich in geduld üebe müesse. gege endi vo de füfte rundi bin i churz unaufmerksam gsi, wo die hinter mir chli gschobe händ, han i nid rechtziitig reagiert und bin quasi us de gruppe use gschobe worde. de markus hät's realisiert und isch sofort zu mir cho. und i dem moment händ mir au de turbo zündet zersch sind mir i de gruppe wiet füre gfahre, denn bi de usfahrt a de siegessüüle e besseri liniewahl gha und scho isch niemer me hinter üs gsi. mir händ no drü anderi igholt, aber au die sind bald nüm mit cho. so isch es cho, dass mir bim und ab em potsdamer platz ällei unterwegs gsi sind. mir händ no öppe drü einzelni fahrer, wohl us em b-block überholt. de markus hät keis pardon kennt und isch eifach verbi zoge, ich immer hinedra hinderi. er hät paar mal gfräged "gaht's no", ich han "ja" gseit und "nei" denkt. s gfühl, die andere abghänkt z ha und jetzt di ganzi strass nur für üs z ha, isch eifach unbeschrieblich gsi! ersch uf me video vonere begleitperson han i später gseh, dass eine vo de überholte s doch geschafft hät, sich a z hänke.

im ziel hät's denn berliner gä, die wohl beste, wo ich je gässe han. und es ärgernis: ziitmässig hät nid funktioniert und ich han kei offizielli schlussziit gha. hät denn später no nahtreit werde müesse. ich bin trotzdem zfriede gsi und han mich nach enere duschi und enere guete portion perskindol a de bei scho chli uf "morn" gfreut. zersch hät's aber no e feini pizza mit de club-kollege gä.

am sunntig isch es no chli frühener los gange, als am samschtig. vor em renne chann i aber eh nid so viel ässe, wie vor em skate. ich bin eigentlich eher chli später im startgländ gsi als denkt, aber am schluss denn doch eher frühe im startblock. und deht bin i denn, will i nomal uf s wc han müesse, uf die ander strassesiete und han debi gmerkt, dass es deht viel, viel weniger lüt hät. so han ich chönne warte, bis uf de volle strassesiete d pacemaker mit em 3:45-fähnli cho sind. und denn bin ich mit dene über d startlinie und han mich vo afang a, a si ghalte. die händ es ziemlich zackigs tempo vorgäh, han ich s gefühl gha. bi 14km sind mir öppe ei minute schneller als de fahrplan gsim bim halbmarathon sind s anderthalb minute gsi.

bi 25km han i denn denkt, es seig verbi mit de herrlichkeit: ich han uf s wc müesse und deht sogar no churz warte, bis es toitoi frei gsi isch! churz nach dem ich wieder uf d strecki zruggkehrt bin, han i aber wieder en pacemaker gseh. es hät zwei gha. weiss nid, ob de au uf s wc müesse hät. jedenfalls han ich denn wieder gueti begleitig gha. es isch aber zuenehmend härter worde. bim renne isch es eigentlich no gange, schwierig han i aber d getränkeposte gfunde. deht hät me eigentlich immer churz müesse halte, zum es becherli übercho. es hät eifach zu viel lüt gha. denn wieder los renne, und überhaupt mit dem rythmusbrecher klar z cho, isch immer wie schwieriger worde. und so isch es denn cho, dass ich bi me getränkestand nach 32km de pacemaker gah la han müesse. und ab denn isch es würklich härt worde. d bei händ weh tue und ich han mir ziel irgendwie sälber müesse setzte. leider han i nid checked, dass i bi de 35km-marke no extakt im plan für 3:45 gsi wär. bi 38km bin ich s nüm gsi und han nomal am getränkeposte en längere halt als nötig gmacht. eigentlich schad, am schluss händ 100 Sekunde gefehlt. nichtsdestotrotz: es hät e klari neui bestziit gä, vierehalb minute schneller als letscht jahr.

offizielli ziitmässige und rangierige
	skate	laufe	doppelstarter
5km		0:26:57
10km		0:53:24
15km		1:19:20
20km		1:45:19
halbmarathon	0:41:34	1:50:52
25km		2:11:45
30km		2:39:36
35km		3:06:40
40km		3:35:11
ziel	1:23:03	3:46:40	6:37:12
rang	221	15647	13
finisher	1715	35490	73

Tags

speedskating

Race ID

berlin marathon

Race Date

2024-09-28

Distance

42.20km

Rank

221

Race Finish Time

1:23.03,00

Race Points

722

Speed

30.49km/h

race notes

doppelstartwertig: 13

Garmin ID

17150235253

Add new comment

berlin marathon 2024: laufen

dani — Tue, 01 Oct 2024 20:30:27 +0000

berlin marathon 2024: laufen dani Tue, 10/01/2024 - 22:30

Tags

laufe

Race ID

berlin marathon

Race Date

2024-09-29

Distance

42.20km

Rank

15638

Race Finish Time

3:46.40,00

Race Points

543

Speed

11.17km/h

Garmin ID

17159554167

Add new comment

zytturm triathlon 2024

dani — Sun, 23 Jun 2024 12:50:59 +0000

zytturm triathlon 2024 dani Sun, 06/23/2024 - 14:50

nach füf jahr hät's endlich mal wieder klapped mit em triathlon vor minere huustüür und uf mine trainingsstreckene. dass für jahr e langi pause isch und d routine fählt, hät sich scho vor em start bemerkbar gmacht: so nervös bin i scho lang nüm vor em start gsi. ich han jedenfalls mich i ziemlich jedi wc-schlange wo's gha hät, eimal irgreiht. au han i nid gwüsst, wie s neue startprozedere, mit individuellem start gaht. isch aber eigentlich e gueti sach. usser dass me lang uf sin start wartet und im wörtliche sinn chalti füess überchunnt. s nächsti mal wohl irgenwelche flipflop an start mitnäh.

endlich isch es los gange und ich han mich is chalte wasser vom zugersee gstürzt. wobi, mit em neoperen isch es gar nid so halt gsi, sondern ziemlich perfekt! ganz im unterschied dezue mini brülle. im hallenbad funktioniert die perfekt, isch dicht und lauft nid a. uf dene 1.5km im see han ich sie aber sicher drü mal müesse leere. ob's a de sunnecreme liet, dass si nüm dicht isch? s nächsti mal jedenfalls ohni sunnecreme starte.

mit de schwümmziit bin i nid so ganz zfriede gsi, bin s lutschte mal zwei minute schneller gsi. allerdings bin i zletscht au nid so viel am schwümme gsi. das isch drum z erwarte gsi. ganz im unterschied zum wechsel. de isch no nie mini stärchi gsi, das mal aber voll denäbed gange. han zersch de bändel vom riessverschluss nid gfunde, bin scho vor minem velo gstande, wo ich de endlich ufbracht und mich müheselig us em neuproen befreit han.

wo ich nach über vier minute us de wechselzone gsi und uf s velo gstiege bin han ich scho über drü minute rückstand uf mini ziit vo 2019 gha. so han ich mir das natürlich nid vorgstellt. nach öppe zeh kilometer hät sich no s powermeter verabschiedet. hetti doch bloss d batterie am abig vorher ufglade! usser dass ich mich chli gärgered han, hät s mi aber nid langsamer gmacht. dafür han ich no e churzi pinkelpause müesse ilege. obwohl taktisch klug gwählt, uf de ahöchi in immesee, wo ich nachher bim abefahre wieder schwung hole chann, hät s mi e minute kostet. am schluss han ich e nur um paar sekunde schnelleri veloziit als vor für jahr gha, also nid würklich chönne ufhole. au de wechsel isch nid schneller gsi.

defür bin i denn relativ schnell zum lauf gstartet. han denn aber noch zwei oder drü kilometer au 5:05 und 5:10 uf de Uhr gseh, obwohl ich mir vorgno han, e pace klar unter füf minute pro kilomenter z laufe. viellich im falsche moment uf d uhr glueged? bim füfkilometerschild han ich e laufzeit vo 23:30 gseh und mir vorgno unter 47 minute z bliebe. hät denn aber au nüm ganz gelanget. normalerweise chann ich gege de schluss nomal zuesetzte. das isch dasmal au de fall gsi, han uf em letschte kilometer no paar überholt, aber anschienend chli z spat zum di langsame kilometer um d mitti vom lauf wieder wett z mache.

so han i im ziel chli en entüschendi ziit gha, trotz nid unbedingt schlechter leistig: mit schneller wechsel und ohni d wc-pause wäri s sogar möglich gsi unter 2:30 z bliebe. so han ich en guete grund nächst jahr wieder z starte.

	ziit	rang	rückstand
gsamt	2:33.21,4	255	43:56,2
schwümme	29.07,3	190
wechsel	4.17,9	344
velo	1:09.26,7	326
wechsel	3.03,5	326
laufe	47.26,0	208

Tags

triathlon

Race ID

zytturm triathlon

Race Date

2024-06-16

Distance

51.50km

Rank

257

Race Finish Time

2:33.21,40

Race Points

713

race notes

1.5 / 40 / 10

Garmin ID

15935697203

Add new comment

mittelland rollt niederbipp

dani — Sun, 02 Jun 2024 18:18:18 +0000

mittelland rollt niederbipp

dani Sun, 06/02/2024 - 20:18

eigentlich han ich das renne scho vor em start verlore. nid nur isch di vergangeni wuche e schwierigi und chräfteraubendi gsi, au han ich glaub nid ganz s richtige mind-set mit an start bracht. wil mit me rägerenne grechnet, obwohl d wetterprognose trocheheit vorhergseit hät, bin i mit altem material ufkürzt. di guete rädli und vor allem chugellager han ich welle spare. schlecht entscheiden gsi. denn han i nur ei rundi igfahre uf de skates. hetti wohl guet tue, chli länger z fahre, zum mich no chli meh a mini quetschende gfährt z gwöhne. churz nach em start isch e chlini abfahrt cho, wo ich i dere scho chli de aschluss verlore han, han i (vorziitig?) d sägel gstriche: mit minem material han i eh kei chance.

im unterschied zu letschter wuche, isch s renne nachher aber nid easy worde und es isch absolut au nid so gsi, dass mini zwei mitfahrer wo ich denn no gha han, nüt tue hättet. so gseh, muss i anerkänne, dass hüt wohl würklich nid min tag gsi isch und ich eifach nid parat gsi bin und wohl au nid mit de schnellere gruppe mit möge hetti wenn ich am afang de aschluss geschafft het.

Tags

speedskating

Race ID

rollserie niederbipp

Race Date

2024-06-02

Distance

23.40km

Rank

Race Finish Time

50.31,04

Race Points

703

Speed

27.79km/h

Garmin ID

15704884960

Add new comment

inline event lichtenstein 2024

dani — Sun, 26 May 2024 16:29:24 +0000

inline event lichtenstein 2024

dani Sun, 05/26/2024 - 18:29

nur ei wuche nach em unerwartete grosserfolg isch bereits e nächsti swiss-skate-tour-event abstande. das mal im liechtestei. de halbmarathon uf em flache, sehr schnelle 2.1km rundkurs isch wie fasch jedes jahr e chli e zitterpartie bezüglich em wetter gsi. aber wie meistens: s wetter hät mitgmacht. pünktlich und grad recht zackig isch es los gange. ich han mich probiert a de fahrer vo letschter wuche z orientiere. und tatsächlich han ich das irgendwie geschafft, obwohl s tempo horrend gsi isch. aber irgendwie isch es glunge dra z bliebe. uf de zweite rundi han i s gfühl gha, pendled sich alles chli i und es git es schöns zügli i dem ich mitfahre chann. mitti dritti rundi hät's en agriff gä, us mir nid ganz klare gründe. aber de wo vor mir gsi isch, hät nüm mit möge, es isch e lugge entstande. ich han wohl chli z lang gwartet, oder ghofft. im folgende kurvige teil han ich denn de versuech gestartet, d lugge z schlüsse. meh als ein kilometer lang, aber ich bin nüm entscheidend nächer cho. viellich hett ich's energischer probiere sölle, quasi no me sprinte um i chürzerer ziit ane z cho. und scho frühener reagiere. aber im nachhinein isch me immer gschieder.

ich han denn uf di nächste gwartet. unter anderem de, wo mich us de gruppe grisse hät. de hät's aber nüm is ziel gschafft. d di andere beide sind au kei all zu grossi hilf gsi. gfühlt han ich uf meh als de hälfti vo de rundi s tempo gmacht. oft händ si sogar mühe gha zum folge. ich han aber glich no immer ab und zue chönne, mich chli i ihrem windschatte usruhebe. uf de letschte rundi, han i denn aber denkt, ich bin hüt cleverer: vo dene möcht i mi nüm überspurte la. so han ich mich denn vorziitig nomal ablöse la, zum denn im kurvige schlussteil no weg cho z chönne. das hät denn klapped.

im ziel bin i no immer chli sauer und enttüscht gsi, dass i nid mit de andere mit möge han. s resultat isch aber eigentlich nid so schlecht. 10 sekunde langsamer als lutscht jahr. mit em unterschied, dass ich das jahr ziemlich zu me grosse teil s tempo gmacht han, während letscht jahr ich für di glichi ziit e grossi gruppe wo mich mitzieht brucht han. so gseh schient d fromkurve liecht ufwärts z zeige. scho nächst wuche isch di nächsti chance, das z bestätige.

Tags

speedskating

Race ID

inline race lichtenstein

Race Date

2024-05-25

Distance

21.10km

Rank

Race Finish Time

41.05,86

Race Points

761

Speed

30.80km/h

Garmin ID

15574447453

Add new comment

klettgau skate day und marathon SM 2024

dani — Tue, 21 May 2024 20:18:19 +0000

klettgau skate day und marathon SM 2024

dani Tue, 05/21/2024 - 22:18

alles neu macht der mai? jedenfalls gilt das für d swiss skate tour 2024: de hauptorganisator hät gwechslet und frische wind bracht, alti etappeort wiederbelebt und ganz zum afang en neue igfühert. und no meh: de neui ort hät au no grad als marathon schwiizermeisterschaft gulte. was interessiert mich das, han ich denkt, bis ich vo de elsbeth (Verbandspräsidentin) persönlich e afrag übercho han, wieso ich kei lizenz glöst han. han i denn halt no gmacht.

di neui strecki isch recht cool! überall schöne asphalt, fühert grad nach em start in e scharfi linkskurve gaht denn eher chli aber, hät en chline hügel, gfolgt vonere lange flache bis liecht abfallende passage wo mir uf de erschte runden über 40km/h gfahre sind. denn isch e längeri, bissigi stiegig cho, gfolgt wiederum vo me mehrheitlich flache stuck. denn s nerve-spiel: e liechti abfahrt mit zwei scharfe kurve. me hät ächt müesse bremse und denn uf de lange zielgerade jewiels wieder d luggene schlüsse.

vor em start di grossi frag: a wen söll ich mich halte? wer hät de summer es ähnlichs niveau wie ich? es hät sich aber sehr schnell e grossi gruppe mit sicher 12 skater bildet, debi au lüt, wo mir s letscht jahr no wiet devo gfahre sind. i dere gruppe han ich mich denn zweiehalb runde problemlos ghalte. mit de stiegig bin i besser z recht cho, als anderi, im rest vom renne han i meistens de windschatte gsuecht und gfunde und bin so ganz guet dure cho. ersch nach em dritte ufstieg bin ich ziemlich zvorderst i de gruppe gsi, han zum teil gfühert, mich denn ablöse lah und nach de abfahrt uf de gerade wieder es loch zue gfahre. ab deht bin i de vordere positione, aber nie z voderst gsi, han aber recht uf zäh biesse müesse. di langi gerade isch würklich lang werde. denn de astieg, trotz allem isch er mir guet glaufe, bis mir d fläsche abegeheit isch. zrugg ga? nei, eine chli nach mir hät si mir mitbracht. obe a de stiegig isch gruppe ziemlich wiet zerstreut gsi, ich han chli d übersicht verlore und mich eifach an nächst beste angehängt und gluegt, dass i chann dra bliebe. d gruppe isch jetzt nüm gross gsi. ob vorne no zwei oder drü weg gfahre sind han i genau so wenig gwüsst, wie wie gross de vorsprung uf die hine a üs isch. irgenwie nur no is ziel cho, mit dem drüergrüppli wo mir nach de abfahrt gsi sind. ich bin absolut zfriede gsi mit minere ziit und em rennverlauf.

was zieldurchfahrt punkto rangierig bedüted hät, han i ersch später erfahre. für d SM isch es nämlich druf a cho. de einti, wo weg cho isch, hät sich de Ü40-titel gschnapped. und mis team-gspänli, wo im ziel nur no zwei sekunde rückstand gha hät, hät mit mir no uf's podest stiege dörfe. s erschti mal i minere karriere han ich sowas erlebt. allerdings: mir sind au nur vier i dere kategorie gsi. s interessante dra: mir sind all i de gliche grosse gruppe gfahre.

Tags

speedskating

Race ID

klettgau skate day

Race Date

2024-05-19

Distance

40.00km

Rank

Race Finish Time

1:19.54,51

Race Points

779

Speed

30.03km/h

Garmin ID

15471089575

Add new comment

inline event locarno

dani — Wed, 04 Oct 2023 20:02:24 +0000

inline event locarno

dani Wed, 10/04/2023 - 22:02

ei wuche nach berlin nomal es inline-renne. chann das guet cho? zum glück nur en halbmarathon.

de saisonschluss vo de swiss skate tour isch in locarno gsi, uf em programm en halbmarathon und no es team-ziitfahre. s wetter isch super, sunnig und summerlich gsi, wie me sich s vom tessin erhofft. d strecki isch en kurvige, 2.1 kilometer lange, flache rundkurs, wo zwar technisch aspruchsvoll aber ziemlich schnell gsi isch.

s renne hät aber eher langsam gstartet, uf de erschte rundi isch s feld grössteteils zäme bliebe und ich han mich paar mal gfräged, ob ich nid probiere sötti statt am schluss vom feld probiere im feld z fahre. aber wo‘s denn uf de start-zielgerade vorne en gang höcher geschalte händ, isch die chance weg gsi und ob d entscheidig richtig gsi isch chli vorsichtiger z starte, wird unbeantwortet bliebe. sicher isch, dass ich i dem grüppli wo sich bildet und us füf bis siebe skater bestanden hät, de gsi bin, wo am meiste für s tempo gmacht hät. ich han gern e gueti ziit welle erreiche und kei spieli um en unbedütende platz spiele. so han i denn uf de letschte beide rundene ziemlich viel gfühert um mich denn uf de letschte guet 100 meter überspurte z lah. mit dem han i aber grechnet, und viellich darum gar nid würklich me probiert z kontere. aber ziit isch mit 41:50 grad no akzeptabel und de iisatz wert gsi.

nach enere pause vo guet einere stund bin ich mit em andere dani, em chrigel und em lukas no zum team-ziitfahre gstartet. nach me blitzstart (ach, hett i mi doch nomal chli ufgwärmt!) einere rotation mit de füherigsarbeit und em usstiege vom lukas hät de dani müller denn s zepter überno, respektive d loki gspielt. de chrigel und ich sind nur no im windschatte hinedri ghechlet. hät aber spass gmacht mit nomal zwei schnelle runden und vor allem mit (und nid gege) zwei gspänli d saison ab z schlüsse!

Tags

speedskating

Race ID

locarno inline event

Race Date

2023-10-01

Distance

21.00km

Rank

Race Finish Time

41.50,20

Race Points

773

Speed

30.12km/h

Garmin ID

12146753583

Add new comment

berlin marathon 2023: doppelstart

dani — Sun, 01 Oct 2023 20:38:53 +0000

berlin marathon 2023: doppelstart

dani Sun, 10/01/2023 - 22:38

am dunnschtig morge isch es los gange und ich bin mit erschtklasssparticket en tag is rollende büro. und ganz db-untypisch pünktlich am abig in berlin acho.

am fritig isch wieder chli meh bewegig agseit gsi, activator am morge, nach em zmorge en lade und nachher de messebsuech. nach dem di zwei startnummere im hotel deponiert gsi sind, isch s nachtässe mit „ITL and friends“ uf em programm gsi.

am samschtig bin i nomal in en lade um s warte z verchürze. denn isch es ziit worde um mich parat z mache und zum treffpunkt mit de andere ITLer z gah. ufwärme isch schwierig, sit s üs nüm bi de siegessüüle ifahre länd. debi isch das frühener perfekt gange!

de entscheid, im startblock C (statt B) z starte isch genau richtig gsi. au deht ganz no ganz ordentlich schnell los, so dass ich nach öppe 15km mal es loch wo paar positione vor mir ufgange isch nüm chönne (oder welle? de sunntig isch glich irgendwie im hinterchopf gsi) schlüsse han. für e churzi ziit sind mir denn i me chline grüppli chli langsam gondled, bald aber sind mir wieder teil vonere grössere und schnellere gruppe gsi. de halbmarathon unter 40 minute, das isch super gsi für mich. und mir händ s tempo au i de zweite hälfti recht hoch halte chönne, ohni dass ich nur einmal gfahr glaufe wär, nomal de aschluss z verlüre. han no ein oder zweimal müesse e lugge schlüsse, isch aber keis problem gsi. brenzlig isch es churz vor de 40km-marke gsi, wo s d strecki gänderet händ und plötzlich em U-turn vor üs gsi isch. d strass isch aber mega breit, wenn me‘s weiss und entsprechend uf de rechte siete fahrt, isch es kei unmachbari kurve. ich bin jedefalls guet dure cho und denn zügig in richtig ziel grollt. mit 1:20:15 bin i den au sehr zfriede gsi, isch min zweitschnellste berlinmarathon und am obere endi vo mine erwartuge gsi.

am sunntig isch es mittlerwile zum vierte mal uf e zweiti rundi gange. zersch aber no packe, gepäck im hotel istelle und natürlich zmorge ässe. ich bin ersch i de dritte startwelle gsi, so isch das alles problemlos gange und ich bin viel z frühe im startgländ gsi. am start han i denn recht lang gwartet, wil ich hine los laufe han welle, zum nid z viel „gwühel“ am afang z ha. ich han denn defür am afang chli überhole müesse, was vor allem uf de erschte mindestens 10km nid eifach gsi isch, wil d läufermengi recht dicht gsi isch.
ich han probiert unter 5:30min/km z laufe. das isch eifach zum rechne (25.5 min uf 5, 55min uf 10km) und realistisch. nach 5km bin i dütlich drüber gsi, nach 10 au no chli, aber scho weniger. das passt, wenn me möcht progressiv laufe. bi 15 isch denn drunter gsi, bi 20 recht dütlich. ich han probiert ab deht mini zielziit ab um ei minute abe z korrigiere um min vorsprung „mit z näh“. so han i mi vo „zwüscheziit zu zwüscheziit“ ghanglet. renne isch zwar au zuenehmend härter worde, aber mit em glaube, die nächsti zwüscheziit z erreiche chönne, isch es ganz guet gange. schwierig isch aber amig gsi, nach de getränkeständ wieder tempo uf z näh. han drum denn ein stand bi öppe 36km uslah. dass i bi 40km wieder über de 5:30-ziit gsi bin, han i gar nid kapiert, de vorsprung uf d 4h-marke isch gross gnueg gsi. irgendwie han i aber nid würklich für de schlussspurt beschleunige chönne. bis i scho unter den linden, mit brandenburgertor vor auge, no zwei fans im publikum gseh han. die high-fives händ denn doch no de turbo zündet und ich bin is ziel gfloge und han di „fehlende“ sekunde wieder usegholt. mit enere nettoziit vo 3:51:24 bin i meh als zfriede. 10min besser als im vorjahr und siebenehalb minute schneller als d bestziit vo 2019.

offizielli ziitmässige und rangierige
	skate	laufe	doppelstarter
5km		0:27:43
10km		0:55:15
15km		1:22:16
20km		1:49:20
halbmarathon	0:39:52	1:55:03
25km		2:16:39
30km		2:44:13
35km		3:12:11
40km		3:40:10
ziel	1:20:15	3:51:24	6:44:06
rang	355	16482	11
finisher	2175	28609	65

Tags

speedskating

Race ID

berlin marathon

Race Date

2023-09-23

Distance

42.20km

Rank

355

Race Finish Time

1:20.14,00

Race Points

710

Speed

31.55km/h

Garmin ID

12088672195

Add new comment

mittelland rollt 2023

dani — Mon, 04 Sep 2023 21:17:08 +0000

mittelland rollt 2023 dani Mon, 09/04/2023 - 23:17

es renne, wo sich nie als solches agfühlt hät. han gester en lange lauf gmacht (berlin marathon chunnt nächer!) und drum nüt erwartet. scho gar nid bi dere hitz. hät denn zersch aber super usgseh, händ nach ca. 1km e gruppe mit öppe 8 lüt gha. han denkt, das chönnt no was werde.

sind churz druf abe an en unfall cho wo besseri (oder zumindest schnelleri) gstürzt sind. händ ghalte und gholfe. das heisst, drü vo üs. di andere sind wieter. so händ mir zersch mal mega viel ziit verlore, s renne isch also glaufe gsi, und nachher sind mir nur no z dritte gsi. und vo de andere zwei isch eine nach de vierte und eine nach de sächste rundi usgstiege.

damit i nid ällei fahre han müesse, han i eini wo üs mal überrundet hät aber flasche leer gsi isch „zoge“. die isch aber nach de für mich siebte rundi fertig gsi. es händ sich denn aber zwei vo mine dunnschtigs-trainingsgspänli erbarmt und sind no mit uf mini letschti rundi cho. so hät de tag es versöhnlichs endi gno.

Tags

speedskating

Race ID

mittelland rollt

Race Date

2023-08-20

Distance

42.00km

Rank

Race Finish Time

1:38.55,51

Race Points

650

Speed

25.50km/h

Garmin ID

11832577883

Add new comment

roll‘athlon100 2023

dani — Sun, 16 Jul 2023 16:11:07 +0000

roll‘athlon100 2023

dani Sun, 07/16/2023 - 18:11

eher churzfristig und ohni spezielli vorbereitig han ich mich nach acht jahr mal wieder i das abentür gstürzt.

frühe am morge bi blauem himmel und bereits agnehme temperature isch es los gange. und wie: grad de hügel duruf und au lang über schlechti strasse. ersch nach öppe sechs kilometer isch d strass es erschts mal besser worde. bis deht händ mis gspänli und ich scho ganzi arbeit gleistet, mir händ am afang chli de aschluss verpasst und üs denn aber wieder an e gruppe here kämpft. und das hät sich glohnt: mit dere grosse gruppe isch es lang easy gange und mir händ üs mit de ziit au eher vorne igreiht. au wichtig gsi, wil mir händ gege hine immer wieder lüt verlore. nach guet 30km händ mir wieder katastrophali strass gha, mir händ d füess afange weh tue und ich han mich gfräged, was d franzose eigentlich alles no strass nenned. han denn aber bald usegfunde, dass du di französisch mitstrieter mit dere holperpiste ihri mühe händ. chli später sind mir denn uf veloweg entlang de rhone cho. das isch mega schön gsi.

denn isch aber langsam mini fläsche leer gsi und ich han müesse probiere am verpflegigsposte neus wasser mit z näh. gar nid eifach, wenn me mit guetem tempo chunnt. aber es hät denn klapped.

immer wieder sind hindernis cho, und ich han mich amig über die übertriebene bremsmanöver gärgered. wo mir denn aber churz nach de hälfti, unmittelbar nach de überquerig vo de rhone e würklich scharfs S cho isch zum vo de strass uf de veloweg ab z büge, han ich en tatsächlich verpasst! han müsse paar schritt über d wiese zwüsched strass und weg und denn chli schneller fahre, um de aschluss ad gruppe z schaffe.

s tempo isch für mich glaub recht guet gsi: meistens hab ich easy mitfahre chönne, aber wenn‘s mängisch vorübergehendi tempoverschärfige gä hät han i au gmerkt, dass nid viel marge isch. und de zuestand hät sich als genau guet usegstellt: denn nach öppe 95km isch es ufe gange. eigentlich e langzogeni, moderati stiegig. aber mit über 90km isch si eim wie en steile berg vorcho. und us de grosse gruppe isch plötzlich ganz e chlini worde. nur no vier sind mir gsi, wo chli reserve gha händ. zum glück isch eine vo de andere drü mis gspänli gsi. so händ mir‘s gschafft, di ganze 100km zäme z skate, was s erlebnis no viel besser gmacht hät. und mit de ziit sind mit au überglücklich gsi: viel schneller als erwartet.

Tags

speedskating

Race ID

roll'athlon

Race Date

2023-06-18

Distance

100.00km

Rank

Race Finish Time

3:39.56,63

Race Points

791

Speed

27.28km/h

Garmin ID

11369402852