sport

berlin marathon 2022: doppelstart

dani — Sun, 09 Oct 2022 12:36:08 +0000

berlin marathon 2022: doppelstart

dani Sun, 10/09/2022 - 14:36

aller guter dinge sind drei, han ich denkt, und en dritte doppelstart versuecht. ob's klapped han i natürlich nid gwüsst, nach schwieriger vorbereitig (schlüsselbeibruch, corona und andere friktione) und de enttüschende laufziit vo letscht jahr, bin ich einiges vorsichtiger gsi und han mini erwartige tüf ghalte. d hoffnig uf e skating-ziit unter 1:14 und me lauf unter 4 stund isch natürlich insgeheim bliebe.

wie i so vielne jahr, hät me au das mal am start vom skating-marathon nid gwüsst, welli rädli z montiere sind: nieselräge möglich, trochni strass ebefalls. wo ich mini vereinsgspänli troffe han, deht wo immer, hät's au ganz und gar nid guet usgseh. es hät tröpfled, mir sind chli under gstande und händ d skates nur zögerlich azoge. bald hät s tröpfle wieder nahla, dafür de nächsti schock: sie händ üs nüm go ifahre la. schöni ziite gsi, wo mir no d siegessüüle händ chönne umrunde, bis üs trümmlig wurde isch. einzige vorteil: ich han mir kei vorwürf für de chaltstart mache müesse, öpis wo ja gar nid mis isch.

denn isch los gange, natürlich viel z schnell für mich - viellielich sött ich mich glich mal in startblock C zruggversetzte lah. nach scho nur de lange startgerade han ich de versuech, mit z halte, abbroche. mit me chline grüpli sind mir denn aber erstuunlich lang unterwegs gsi, bis mir vo de erste us em C-startblock überholt worde sind. das sind au nur wenigi gsi. churz druf abe isch denn e grossi gruppe cho. mit dere sind mir denn mit. allerdings nid bis is ziel. das isch vielliech en fehler gsi. mit de spätere gruppe sind di letschte 10km denn nüm ganz so astrengend gsi wie me vo me renne erwarte chönnti. und im ziel hät denn au fasch e halbi minute zur "zfriedeheit" gfehlt. aber es hät ja no en tag zwei gä...

wo ich a dem ufgstande bin, han ich keinere inline-sekunde meh nahtruured. ich han ziemlich schweri bei gha, sogar d wädli han i gspürt, öppis wo ich vom skate susch nid kenne. das hät mich dezue verleitet, entgege de plän und de wetterprognose, d kompressionssocke a z ziehe. hät aber gnützt! bis ich im startgländ acho bin, händ sich d bei wieder einigermasse normal agfühlt.

de "game plan" isch das mal bewusst genau andersch gsi als di letschte zwei mal: eher schnell starte, damit ich hine use eher en vorsprung verteidige als en rückstand wett mache soll. zudem hät s erneut schöne wetter mit warme temperature am schluss nid so für en progressive lauf gsproche. guten mutes bin ich also mit öppe me 5:35er los. und ich han bald es gspänli gha: es isch mir eini ufgfalle, wo e jubilee-startnummere aber es migros-t-shirt gha hät. d lösig: e dütschi, wo mittlerwile i de schwiiz wohnt, aber no vorher ihri berlin-marathon-karriere gstartet hät.

d kilometer sind wie im nu verfloge: 10, de ersohti gel. 14, bereits ein drittel. churz vor 20 hät sie uf's wc müesse. aber ich bin deswege nid ällei gsi: es hät mich bald eine agsproche und gfräged, ob ich mis gspänli verlore heigi. ab deht bin ich mit ihm grennt. bim halbmarathon anderthalb minute vorsprung uf s 4-stunde-ziel, bald de zweiti gel, aber es isch denn bald e chli astrengender worde. so um 28 kilometer isch de blick uf d uhr nüm so motivierend gsi, ich han aber vom skate gwüsst, es gaht liecht durufe und wird bald besser. spätischtens bi 30 kilometer isch es aber richtig härt worde. ich han denn au mis gspänli und pace-maker verlore. d verpflegigsständ sind bald au pause-pünkt mit geh-anteil worde. und ich bin mängisch chli im dilemma gsi: söll ich bim nächste getränkestand scho wieder trinke und somit fasch ahalte, wenn i gfühlt ersch grad min rythmus gfunde han? andersch ume händ d bei natürlich nach pause gschroue. e chli später han i gmerkt, dass ich min gel vergässe z näh han und überhaupt han i auch chli buchweh gha. ich han mich denn bewusst für e richtigi pause entschiede: ahalte, gel konsumiere und wasser trinke. chum isch es langsam wieter gange, han ich mis gspänli vom afang wieder gseh! sie hät also wieder ufgholt, und ich e motivation gha, zum wieter renne. jetzt zwar nüm so würklich mit ihre, aber immer wieder han ich si gseh. und denn au vo wietem s dach vom sonycenter. de potsdamer platz isch s nächste ziel gsi. ab deht chunnt s ziel in griffnächi! eifach isch es nid gsi.aber irgendwie gange. am potsdamer platz nomal trinke, und denn es letschts mal de schritt vom gehen is laufe mache. mit unterstützig vom publikum isch es gange. und me violette migros-t-shirt chli wieter vorne au. chann ich sie nomal ihole? jawohl! bi kilometer 40 han ich sie sogar überholt. en blick uf d uhr seit, dass es es wunder für unter 4h bruchti, dennoch isch es aber ab deht recht guet fürschi gange, au wenn jede schritt weh tue hät. unter den linden d ITL-gspänli am strasserand (danke!) denn durch's brandenburger tor (nach exakt 4 stund) und is ziel.

offizielli ziitmässige und rangierige
	skate	laufe	doppelstarter
5km		0:27:58
10km		0:56:02
15km		1:24:22
20km		1:52:22
halbmarathon	0:42:50	1:58:27
25km		2:20:24
30km		2:49:06
35km		3:19:54
40km		3:49:44
ziel	1:24:23	4:01:26	7:01:22
rang	493	12822	12
finisher	2201	23280	41

Tags

sport

speedskating

Race ID

berlin marathon

Race Date

2022-09-24

Distance

42.20km

Rank

493

Race Finish Time

1:24.22,00

Race Points

672

Speed

30.00km/h

Garmin ID

9667537359

Add new comment

velotour nach berlin

dani — Mon, 22 Aug 2022 20:43:31 +0000

velotour nach berlin

de felix hät di grandiosi idee gha, mit em velo ganz umweltfründlich nach berlin z fahre um deht mit guetem gwüsse as toten-hosen-konzert z gah. ich han chli bedenke gha, aber denn igwilliged. und s nie bereut! für di deheibliebene händ mir en threema-chat gemacht und ab und zue gschriebe, wo mir sind und wie's üs so gaht. da sind die nachrichte für d ewigkeit ufbewahrt...

Samstag, 13. August 2022

09:06
Guten Morgen
Felix und ich stehen in Wiesendangen bei Winterthur parat. Gleich beginnt das Abenteuer! 🎉🚴🏻‍♂️
Wir werden euch hier ab und zu ein Lebenszeichen senden. Die Gruppe ist aber ziemlich gross und nicht alle kennen alle. Das heisst für euch: Bitte auf einem persönlicheren Kanal Antworten. Danke.
Für heute sind 171km und 1150Hm bis nach Ulm geplant. Die knackigste Etappe gleich zu Beginn. 😖
Jetzt gilt "gring ache u pedale" - oder so. 🚴🏻‍♂️😊

16:43

Männer mit Störchen

19:09
Sind in Ulm angekommen. Etwas müde aber zufrieden. Auf den Gegenwind und den Platten hätten wir verzichten können. Nicht aber auf das leckere Eis in der "Zvieri-Pause". 😋

Sonntag, 14. August 2022

13:50
Gab eine Routenänderung heute: Wir sind auf dem Weg Richtung Schweiz. Schon wieder die Hälfte geschafft! Jetzt gibt's Pizza-Pause. 🍕😋

de grund für d routeänderig isch gsi, dass de felix us familiäre gründe hei hät müesse.

18:44
Wieder in der Schweiz. Genug (158km 870Hm) pedalt für heute!

Montag, 15. August 2022

19:45
Tag 3 war nach dem Motto: Back on Track!
Mit der Bahn ging's nach Nürnberg, da wo wir gestern hätten landen sollen und die heutige Etappe logischerweise startete. Sie war relativ kurz und flach (115km, 280Hm) und in einem längeren Nachmittag machbar. So bin ich nun in Coburg und bin gespannt auf die Hausspezialität: Freiland Ente mit Coburg Klösse. 😋

Dienstag, 16. August 2022

16:42
Bergetappe ✅
Wiederum eher kurz und am Ende mehr runter als Rauf, dennoch verdiente sich die Etappe ihren Namen mit teils ordentlich Steigungen in der ersten Hälfte. Der Rest war dann Ausrollen. 😊
Nun bin ich in Weimar. Hätte nicht gedacht, einmal hier zu landen, als wir früher im Geschichtsunterricht von der "Weimarer Republik" hörten. 😂

22:08

Und von wegen Weimarer Republik: Ich hatte heute noch etwas Zeit für Sightseeing. Aber keine geistige Kapazität für das Museum. Immerhin, ich hab‘s versucht...

22:10		22:11

Schiller‘s Haus habe ich auch nur von Aussen gesehen. Hier soll er Wilhelm Tell geschrieben haben. Also die Geburtsstätte vom Schweizer Nationalheld!? 🤔		Und ganz unpolitisch: Goethe‘s Haus.

Mittwoch, 17. August 2022

18:16

Nach dem vielleicht schönsten Birchermüsli dass ich je gegessen habe ging’s guten Mutes los. War dann aber ziemlich zäh bis Halle, wo ich Mittagspause einplante.

18:20
Danach ging's dann irgendwann besser und ich bin je länger es dauerte desto besser voran gekommen. Statt zwei Stopps machte ich nur noch einen: 3 Kugeln Glacé mit Sahne und Schoggi-Sauce und eine Cola. 😋
Danach blieben noch 24 km und ich das Fahren fühlte sich fast wie Fliegen an. 🚴🏻‍♂️💨😊

18:21

Nun bin ich in Wittenberg und werde Garmin‘s Rat ignorieren: Bereits morgen früh stehen die letzten 100km an. 😉

Donnerstag, 18. August 2022

16:27
Geschafft!
Ich musste aber wieder einmal lernen, was das Sprichwort "Du sollst den Tag nicht vor dem Abend loben" bedeutet (oder hier eher: Die Tour ist erst fertig wenn das Velo in der Garage steht).
Bis 80km ging alles super. Nach einer Mini-Pause am Wannsee wähnte ich mich im Ziel. Weit gefehlt: Die Strasse war gesperrt, der Umweg fast 10km und als ich wieder auf dem vorgesehenen Weg war, an einer Kreuzung nicht aufgepasst. Ich musste stark bremsen und kam nicht mehr aus dem Pedal und bin langsam weggekippt. Der Klassiker! Immerhin, ich kam zwar nicht mit dem berühmten blauen Auge aber einem geschürften Knie davon.
Dann an der Siegessäule vorbei und durch das Brandenburger Tor. 🎉
Nach der vierten 🍕 in sechs Tagen geht's unter die Dusche. 😊

Freitag-Sonntag, 19.-21. August 2022

ich han extrems wetterglück gha: uf de ganze velotour isch immer schön, summerlich und heiss gsi. de räge isch ersch stunde nach mir in berlin acho!
nach me sehr erholsame und zuweile verschlafene fritig, a dem de felix mit em ICE uf berlin nahgreist isch, isch am samschtig de lohn für's ganze pedale uf em programm gsi. mit de claudia und em felix bin ich an flughafe tempelhof as toten hosen konzert. das isch super gsi und s wetter hät nomal ziemlich guet mitgmacht: nur am nomittag hät's emal chli gregnet und mir händ es trochenigs zelt gfunde für die ziit.
am sunntig isch es denn per ICE (für eimal pünktlich!) zrugg id schwiiz und in alltag gange. spätischtens denn händ d frerie und s abentür es guets endi gno.

dani Mon, 08/22/2022 - 22:43

Tags

sport

reise

Add new comment

mittelland rollt 2020

dani — Wed, 02 Sep 2020 12:31:39 +0000

mittelland rollt 2020

dani Wed, 09/02/2020 - 14:31

2020 wird wohl nid als grosses sportjahr i mine erinnege bliebe. corona hät nid nur de wettkampfkalender, sondern au mini arbeitssituation und de sport ziemlich durenand bracht.

zwei swiss skate tour renne sind am schluss no i minem kalender überig bliebe. s erschte hät aber mit me bsuech kollidiert. so bin ich vor de frag gstande: rägerenne ushalte oder s erschti mal sit 1998 agfange han e keis inline-renne bestriete. kei schöni ussichte. ich han mich für de sport entschiede.

es hät würklich a dem tag nur eimal grägnet: vom abfahre di hei bis wieder zrugg i de trochne wohnig hät‘s abegleert. und für en augustsunntig isch es extrem chalt gsi. nach em ilaufe uf turnschuhe denn sowas wie hoffnig: es isch ja gar nid so schlimm, das bitzeli räge. und chalt han i au nüm gha. aber es isch halt scho en unterschied zwisched skate und jogge. das isch au scho bim iifahre klar worde. es isch bi wietem nid so rutschig gsi wie in berlin letscht jahr, aber sicherheit isch trotzdem nid da gsi. und im startblock denn s erwartete bild: alles nur spitze-skater, niemert uf minem niveau. so isch s renne eigentlich scho verlore gsi, bevor‘s agfange hät.

bim start han i gar nid gross versuecht mit z hebe. öppert hät‘s gha, vo dem ich gwüsst han, er isch es bizeli schneller. probiere chann me ja glich. ich bin aber am start vo me andere chli blockt worde und nid a de ane cho. bi trochenem wetter hett ich‘s wohl mit me sprint probiert, aber angst vor em rutsche isch z gross gsi. so bin i bald mit dem andere ällei gsi und de hät mich denn gege s endi vom erschte ufstieg au no stah lah.

uf de erschte zwei rundene han ich no paar anderi troffe. vor allem skater vo de churzstrecki, wo mich überholt händ und zum teil no chli mit mir gfahre sind, oder au mal no eine wo s renne ufgäh hät. bereits gege s endi vo de zweite rundi hät mich de füherendi (und spötri sieger) überholt. da han i ziemlich gstuunt! später han ich no paar vo de churzstrecki überrundet. am schluss vo de dritte rundi isch mir klar gsi, dass ich jetzt no ei rundi würklich ällei fahre muen und wohl au letschte wirde. trotzdem isch im moment vo de zieldurchfahrt nüm zur debatte gstande, dass i die rundi no mache. und das hät sich glohnt. uf de lange stiegig wo churz nach em start anfangt, gseht me recht wiet vorus. und deht gsehn ich plötzlich, dass no eine vor mir isch. offensichtlich muss ich dem uf de letschte rundi nächer cho si. susch hett ich en ja scho vorher gseh. womit d jagd eröffnet gsi isch! tatsächlich han ich en nach chli meh als enere halbe rundi ihgholt. mir sind denn zäme bis fasch is ziel gfahre. nach de letschte kurve hät sich denn no en chline spurt entwickled. ich han gunne und de tag isch grettet gsi!

Tags

sport

speedskating

Race ID

mittelland rollt

Race Date

2020-08-30

Distance

34.00km

Rank

Race Finish Time

1:27.49,83

Race Points

627

Speed

23.23km/h

Garmin ID

5461452924

Add new comment

linthmarathon 2019

dani — Sun, 23 Jun 2019 18:10:34 +0000

linthmarathon 2019

dani Sun, 06/23/2019 - 20:10

de 22. linthmarathon isch mini 13. teilnahm gsi. aber gfühlt eine vo de strengste. s wetter hät super mitgmacht, mal abgseh vom gegewind wo mir uf de erschte streckehälfti gha händ. ob de, oder d form dra schuld sind, dass s renne hät gis isch, lahn i a dere stell jetzt gern mal offe.

los gange isch es wie immer zackig. und wil's nur wenig teilnehmer gha hät, sind alli erstuunlich lang zäme bliebe. ersch mitti zweiti rundi hät sich s feld afange teile und es hät sich bald es vierergrüppli bildet. i dem händ mir denn di nächste guet acht rundene zäme abgspuelt. wobie gfühlt uf de erschte vier rundene fasch nur eine füherigsarbeit gmacht hät, je länger s renne gsi isch, han ich aber grösseri teil überno und so isch es denn immer wie fairer zwüsched üs zwei ufteilt gsi. de einti hät unterwegs nid viel meh chönne, defür denn im schlussspurt brilliert - wie so oft bi ihm - de anderi hät vorher praktisch nüt für's team gmacht, isch denn aber scho endi nüti rundi weg cho, wil er enere gruppe aghänkt hät, wo üs deht überrundet hät und denn de vorsprung is ziel bracht hät. allerdings händ mir au nüm viel unternoh zum en ihole. ehrlich gseit han ich denkt, das wäri gar nid nötig, will er sowieso no igaht. isch denn aber nüm de fall gsi.

Tags

speedskating

sport

Race ID

linthmarathon

Race Date

2019-06-22

Distance

42.00km

Rank

Race Finish Time

1:27.44,22

Race Points

755

Speed

28.72km/h

Garmin ID

3773275042

Add new comment

zytturm triathlon 2019

dani — Sun, 16 Jun 2019 15:22:56 +0000

zytturm triathlon 2019 dani Sun, 06/16/2019 - 17:22

nach zwei jahr pause isch mal wieder en triathlon agseit gsi. insbesondere, da er quasi vor minere huustüre stattgfunde hät. bim istieg in nur grad 17 grad chalte zugersee han i mi scho chli gfräged, warum genau mach ich das jetzt? ich bin uf jede fall froh gsi um de neopren. und denn isch es au scho los gange! ich han aber no chli mit mir und em equipment kämpft. ich han zersch nid so richtig guet chönne schnufe und fasch nüt gseh. d brülle isch mir aglaufe und hät wasser drin gha. und das, obwohl ich am abig vorher no so spray dri tue han. nach dem di beide boye nach ca. 500m umkurvt gsi sind, hät's platz gä und ich han min rythmus besser gfunde. han aber nid s gfühl gha, ich seigi bsunders schnell gschwumme oder heigi mich übermässig agstrengt. um so meh han i gsuuned, wo ich mit einer 27er-ziit us em wasser cho bin. das hät grad en zuesätzliche motivationsschub gä.

de wechsel isch sowiet ganz guet von statte gange. weltmeister im neopren-abziehe wird i aber sicher nie. das isch aber schnell vergässe gsi, jetzt isch schliesslich pedale agseit gsi. da bin i au nid schlecht weg cho, han sogar am anfang mal no de einti oder anderi überholt. später sind denn die aber mit de ziitfahrvelo cho. han i denkt, "jaja, schwimme chönnd's nid, aber schnelli velo händ's". ich hab aber no es anders problem gha: scho wärend em schwümme han i uf's WC müesse. geht han ich's no de chalte füess id schuhe gschobe (obwohl die ja barfuess gsi sind...), uf em velo isch es aber nüme gange. ich han denn dem verlange anere guete stell nah gä. es hät zwar chli ziit kosted, aber s wieterfahre um einiges agnehmer gmacht. im hügelige teil han i paar fahrer bim ue fahre überholt, und sie mich denn bim abefahre wieder zrugg igholt. nach de letschte kurve in cham hät mi e ganzi gruppe velos überholt und ich han mich gfräged, wie das mit em windschattefahre da so isch? und churz druf abe händ mir es auto überholt, wo mit me L und me 30er uf de strass grollt isch. denn isch de see umrundet und d wechselzone vor auge gsi.

deht han i glück gha: zersch bin i mit 1:10 ziemlich z'friede gsi und denn han ich uf em relativ lange weg, wo me z fuess bis zum platz mache muen, bereits afange de helm abziehe. dörf me anschienend nid. d schiedsrichterin hät sich aber demit z'friede gä, dass ich en wieder agleit und s bendeli zue gmacht han (und mir i dere ziit sogar s velo ghebed!) ohni e straf z gä. nach dem s velo parkiert gsi isch und d schuhe gwechslet gsi sind, isch es uf d laufrundi gange.

ich han erneut mit mir und em material kämpft: d schuhe händ am afang weh tue, obwohl's en schuhe isch, wo ich scho viel brucht han. de gurt mit de startnummere isch mega lug gsi und ich han en bim laufe müesse enger mache, so gutes gange gsi isch. und irgendwie bin i mega usser atem gsi. so bin i nie me richtig uf e gueti laufgschwindigkeit cho. ich han wieder s WC-gfühl gha, aber vorerscht emal usegschobe. nach öppe füf laufkilometer, also eigentlich genau deht, wo s ziel afangt nächer cho, händ mi zwei überholt. sie sind nid viel schneller gsi, es chlises bitzeli. ich bin chli a dene dra bliebe, han denn wo's aber schwierig worde isch, nid uf zäh bisse, sondern im gegeteil nomal e pinkelpause igleit. das isch wohl en fehler gsi, es bitzeli schneller seckle hetti doch irgendwie müesse drin liege, mit zwei sotige pacemaker, oder? hätte, wäre und wenn, isch alles nid gsi. s resultat isch de langsamschti lauf vo allne mine olympische triathlons. i de summe hät's aber dennoch de schnellschti gä! so bin i alles i allem doch recht z'friede.

offizielli datasport-ziite und platzierige:

	ziit	rang	rückstand
gsamt	2:32.14,2	361	46.39,6
schwümme	27.18,7	234
wechsel	3.07,7	315
velo	1:09.57,2	413
wechsel	2.34,5	351
laufe	49.16,1	359

Tags

triathlon

sport

Race ID

zytturm triathlon

Race Date

2019-06-16

Distance

51.50km

Rank

361

Race Finish Time

2:32.14,20

Race Points

693

race notes

1.5 / 40 / 10

Garmin ID

3752806169

Add new comment

berlin marathon 2018

dani — Sun, 16 Sep 2018 14:55:41 +0000

berlin marathon 2018

dani Sun, 09/16/2018 - 16:55

zwölfte berlin start tönt nach viel routine d emotione sind aber immer no stärcher als a jedere andere inline-veranstaltig, vor allem am start.

nach langem iifahre um d siegessüüle isch es in startblock gange. de ällei isch es erlebnis: so viel lüt, so gross, und extrem inszeniert. de start isch durch all das nid eifacher, was mir nid hilft. so han i scho bim vorrucke vom startblock mini vereinsgspänli verlore, also quasi scho vor de startlinie. so han i denn au nid gmerkt, wenn di schnellschte zwei ITLer weggfahre sind oder min teil vo de gruppe abbroche isch. isch au glich bzw. guet gsi nich bin nämlich so inere gruppe gsi, wo bald e schöni langi schlange gsi isch. vorne han ich d thunliners gseh und gwüsst, die bringed mich i de gwünschte ziit is ziel. glichziitig han i aber au gwüsst, dass es es risiko isch, wiet hine inere gruppe z si. es hät aber uf de nächste kilometer kei glägeheit gä, innerhalb vo de gruppe wieter füre z fahre, ohni em enorme effort leitste z müesse. viellich hett i de aber gschieder gmacht. denn irgendwo so nach 16, 17km hät öppe drü positone vor mir öpper a lugge ufriesse la. eini vor mir hät probiert d lugge zue z fahre, irgendwenn au ufgä, und denn han ich‘s no es rechts wieli probiert. paar mal han i denkt ich chämmi nächer, aber irgendwenn han ich denn de versuech doch frustriert ufgä. bin aber recht sauer gsi uf di andere wo abriesse lah händ, und nid früeziitig zeiche gä händ.

ziemlich genau bi de halbmarathon ziitmässig isch de erschti express vom C-startblock cho. han zwar denkt, die sind chli schnell für mich, aber probiere chann me‘s. es isch au gange zum mitfahre, aber i dem moment streng gsi. zweimal hät wieder öpper vor mir ufgäh s erschti mal han i verbi chönne, s zweiti mal hät‘s denn nüme glanged und ich bin nüm anecho. mini vorherigi gruppe hät mich wieder mitgno und bald druf abe isch nomal es grosses C-feld cho. mit dene händ mit üs denn glöscht und ab deht isch es s übliche berlin marathon tohuwabohu gsi. bis drü schlange näbedeneand, hochs tempo und viel chaos. jede hät s gfühl, er müsse no öpper überhole, aber eigentlich passiert i dere rennpphase sehr wenig. weg chunnt niemer me, und bis di entscheidende positionskämpf chömmed, gaht‘s no paar kilometer. aber also isch ufpasse wie verruckt agseit gsi. nur jetzt ja nüm stürze! es isch denn aber alles guet gange und ich han am schluss au no energie gha, zum vor und nach em brandenburger tor es paar positione guet z mache.

di zwei mal wo ich unverschuldet abghänkt worde bin und de langi unbelohnti versuech s eine loch zue z fahre sind wohl unter fehlendem wettkampfglück ab z bueche. aber ich han alles probiert, wo ich chönne han.

Tags

sport

speedskating

Race ID

berlin marathon

Race Date

2018-09-15

Distance

42.00km

Rank

605

Race Finish Time

1:21.09,00

Race Points

714

Speed

31.05km/h

Garmin ID

3016597485

Add new comment

bike to work 2017

dani — Sat, 01 Jul 2017 19:04:08 +0000

bike to work 2017

da ich bi mine letschte drü bricht bike to work scho erwähnt han, schrieb ich jetzt da no en ganze bitrag zu dem thema. immerhin hät's mich de ganzi letschti monet beschäftiged. im wahrsten sinne des wortes. ich bin nämlich schlussendlich fasch 54 stund im sattel ghöckled. das hät mich 756km wiet bracht und ich han total über 8300 höhemeter bewältiged und lut biketowork.ch 109kg CO2 igspart. das mit 13 mal durch's sihltal is büro z fahre, je vier mal über de albis und d buechenegg vom büro hei. es wieters mal bin i am fuess vo dene zwei berge dur en platte gstoppt worde und eimal han i de versuech unternoh mit üse berner bi sinem (eimalige) bike-to-home z unterstütze. in sursee han i aber müesse das unterfange abbreche, mir wäred nüm rechtziitg uf bern cho, dass ich no zunere "bruchbare" ziit wieder di hei gsi wäri. da's en tag unter de wuche gsi isch, bin ich vo sursee via luzern uf zug, was aber immerno über 90 km ibracht hät.

es paar "roti pünkt" hät's im kalender dennoch gä: am zieschtig bin ich direkt vom schaffe is ITL-training (usfhart über 40km) und han drum nid chönne mit em velo is büro (zu viel gepäck). dasselbe giltet für s certina inline race (fritig, 9. juni). wenn me defür die trainings (4x40km), s cir und de linthmarathon (21km+41km), sowie de zytturm triathlon (40km) irechnet, chumm ich im juni uf knapp 800 velo- und über 200 inline-kilometer. was es total vo über 1000km sport ergit. mit dere extreme schönwetterphase hät's unglaublich spass gmacht! dennoch bin ich jetzt aber nid bös, dass i nächst wuche wieder in kalifornie bin (brueflich) und z'friede sie muen, wenn i überhaupt einmal (oder zweimal?) e chli sport mache chann.

bike to work	anzahl	km	hm	Ø ziit	bestziit
sihltal	13	30.8	235	1:06.21	1:03.17
bike to home	anzahl	km	hm	Ø ziit	bestziit
albis	4	28.3	426	1:14.48	1:11.06
buchenegg	4	33.6	542	1:26.37	1:25.09
andere weg	2
total	velotäg	km	hm	ziit	CO2 gspart
	16	757.8	8330	53:24.13	109KG

dani Sat, 07/01/2017 - 21:04

Tags

sport

dies und das

Add new comment

linthmarathon 2017

dani — Sat, 24 Jun 2017 20:26:31 +0000

linthmarathon 2017

dani Sat, 06/24/2017 - 22:26

nach enere heisse wuche mit temperature über 30 grad und vielne bike-to-work-kilometer sind d erwartige chli gsi und denn bi wietem übertroffe worde. s wetter isch extrem agnehm gsi, wil "nur" no öppe 24 grad und liecht bewölkt.

am start han i chli d stirn grunzeld, gefühlt sehr wenig lüt. uf los gaht's los, wie immer ziemlich schnell. um d kurve und uf de hügel ue. und denn de schock. vor mir d lüt wo schneller sind, mit dene ich sicher nid mithalte chann. und hinter mit gfühlt nur no "langsami". hät's niemert uf minem niveau? doch! es hät sich denn recht schnell e grossi gruppe bildet, wo es überraschend guets tempo gha hät.

uf de zweite rundi händ mir wohl nomal en zacke zue gleit. isch au di schnellscht gsi. das hät d gruppe e chli "ussortiert". so sind mir ab de dritte rundi öppe zeh skater (und ei skaterin) gsi, wo guet harmoniert hät. es isch bald meh es zäme als es gegenand fahre gsi. so sind d rundeziite lang ganz okay gsi. ersch uf de zweitletschte isch ziit definitiv unter mini erwartige gfalle.

uf em letschte kilometer händ di erschte afange schlussspurt mache. recht frühe. ich han no chli gwartet bin denn aber au eher frühe "gange". obwohl sich's no recht zoge hät und i no chli uf zäh biesse han müesse, hät's mir glanged, zum nüm igholt z werde. aber ich han au vo dene vor mir, wo zum teil dütlich de schnuf usgange isch, niemert me hole chönne.

schlussendlich bin i aber so sehr z'friede gsi, wie scho lang nüme. bin nie würklich i de seile ghängt und han um de aschluss kämpft. aber langwielig und lahm han ich's au nie gfunde. zudem hät's sehr spass gmacht 42km freii fahrt inere guet organisierte gruppe bi ideale wetterbedingigenz gnüsse!

rundeziite
1. rundi	08:09
2. rundi	08:03
3. rundi	08:04
4. rundi	08:17
5. rundi	08:11
6. rundi	08:21
7. rundi	08:20
8. rundi	08:15
9. rundi	08:31
10. rundi	08:15

Tags

sport

speedskating

Race ID

linthmarathon

Race Date

2017-06-24

Distance

42.00km

Rank

Race Finish Time

1:22.31,55

Race Points

801

Speed

30.54km/h

Garmin ID

1816489465

Add new comment

zytturm triathlon

dani — Sun, 18 Jun 2017 10:11:37 +0000

zytturm triathlon

dani Sun, 06/18/2017 - 12:11

so näch wie hüt morge, han ich's glaub no nie an start vo me wettkampf gha. und das isch au mit en grund, warum ich mich no churzfristig (bester nomittag!) zum mittmache überrede la han. scho umzoge und mit em sportgrät sälber bin ich de knappi kilometer bis an start pedalt. ich han sogar no e chili extrarundi gmacht, wil i erscht gester no de schluch vom hinterrädli sälber gwechslet han und dere sach nid so traut gha han.

d wechselzone isch denn schnell igrichted gsi und denn isch es an start gange. angesichts vom 20 grädige see und de churze schwümmdistanz (500m) han i mi gege de neopren entschiede. viellich falsch gsi, d schwümmziit vo üner 10 minute isch recht enttüschend gsi. viellich wäri i glich gnueg viel schneller gsi mit neo, als dass sich di zuesätzlichi wechselzoneziit glohnt hetti.

mit em wasser han i denn au i de wechselzone nomal kämpft, wo ich s velotrikot nid über min nasse oberkörper bracht han. mit chli würge und risse isch es denn doch gange und s velofahre hät chönne afange. han natürlich, mit mine viele bike-to-work-km mir scho chli was vo dere disziplin versproche. isch denn aber recht härt worde. vor allem uf em "zruggweg" zwüsched küsnacht und hühneberg hät's enorm gegenwind gha. zudem han i fasch uf de ganze velostrecki problem mit em buch gha. trotzdem isch es irgendwie nid gange, locker z fahre, en gang abeschalte oder so. es isch härt und "gib-alles-modus" bis zum schluss gsi.

uf de laufstrecki denn s umgekehrte bild: die bin i zwar i me für de aktuelli lauf-form-stand guete 5er glaufe. und han di ganzi ziit s gfühl gha, es wäri no chli meh drinne. han aber de schalter wieder nid gfunde und bin so die ganze 5km konstant und ohni schlussspurt grennt. im ziel bin i denn doch sehr usgnockt gsi. zwei becher cola und ziemlich viel feinsti melone händ s energie-level wieder ue bracht.

	ziit	rang	rückstand
gsamt	1:57.26,8	151	32.28,0
schwümme	10.27	82
wechsel + velo	1:18.06	174
wechsel + laufe	28.53	150

Tags

sport

triathlon

Race ID

zytturm triathlon

Race Date

2017-06-18

Distance

45.50km

Rank

151

Race Finish Time

1:57.26,80

Race Points

723

race notes

0.5 / 40 / 5

Garmin ID

1804011088

Add new comment

certina inline race

dani — Sat, 10 Jun 2017 15:06:21 +0000

certina inline race

dani Sat, 06/10/2017 - 17:06

eis vo mine liebschte renne hät de saisonstart bildet. nid ganz gewollt, wil i bim erschte swiss-skate-tour-renne chrank gsi bin. und nid ganz ideal, wil nach de relativ wenige inline-kilometer d sicherheit uf de skates no steigerigspotential hätti.

dank bike to work und me sehr schöne april erfreu ich mich grad enere relativ guete veloform. aber ob sich das uf d skates überträge laht? scho s ufwärme hät da eher es nei, als es ja erahne lah. oder wäri d form eigentlich guet, nur d bei no chli schwer vom mittwuch und dunnschtig, mit drü rennvelfahrte?

wie au immer, de plan, mit em roman mit z halte isch vo afang a nid ufgang: ich bin am start nid richtig weg cho, anderi händ sich dezwüsche drängeled und mich au chli usbremst. zudem händ die nid mit de gruppe vom roman mithalte möge und es hät sich bald e lugge uftue. füre fahre wäri im startchaos nid eifach gsi, zudem hett i ja zersch müesse die vor mir überhole und nachher no e lugge schlüsse. das han i mir nid zuetraut.

gege s endi vo de erschte fundi sind d stellige bezoge gsi. mir sind inere grosse gruppe gsi mit allne vor und nachteil. wegcho isch es fasch unmöglichs unterfange gsi, abfalle nie e gfahr. d rundeziite zu keinem punkt zfriede stellend. so sind di wichtigste erreignis vo de rundene zwei bis füf de ärger über mitfahrer wo vor em u-turn übermässig bremst händ, zwei wo mehreri meinigsverschiedeheite während em renne usdiskutiert händ und e relativ chlini skaterin, wo technisch no potential hetti und sich mehrmals vor mir inedrängled hät.

am schluss vo de füfte rundi isch bewegig id sach cho. es hät de idruck gmacht, dass vier doch de breakaway schaffed. die chance han i mir nid entgah lah welle und han schnell de aschluss schaffe probiert. es hät klapped! und es sind au tatsächlich nur wenig mit mir mitcho. mir händ de vorsprung öppe e halbi rundi verteidiged. denn isch aber s tempo merklich ibroche dur en füerigswechsel und churz vor em letschte u-turn händ die andere de aschluss wieder gschafft. immerhin, nach de spitzcheri isch s tempo mit em ziel vor auge so hoch worde, dass es kei verschiebige me gä hät und ich im vorderschte teil vo de gruppe dur de kurvigi teil vor de zielgerade cho bin. i de zweite kurve hät eine vo hine welle füre fahre, i de kurve inne dure. hät's aber nid gschafft und es hät ihn use de kurve use gno, eimal quer dur d gruppe dure, was zwei unmittelbar vor mir fahrendi (unter anderem au die müehsam) zu fall bracht hät. wie ich's genau gschafft han, deht dra verbie cho, weiss i sälber nid. aber d wuet uf de unfallverursacher isch so gross gsi, dass es für de schlussspurt nomal unglaublichi energie freigsetzt hät und chum me mitfahrer vo vorher mithalte händ möge. so hät de abig am schluss, buchstäblich no uf (und unmittelbar vor de) zielgerade en positivi note übercho.

Tags

speedskating

sport

Race ID

certina inline race

Race Date

2017-06-09

Distance

21.00km

Rank

Race Finish Time

46.06,00

Race Points

735

Speed

27.33km/h

Garmin ID

1787657863