speedskating

wic schaffhausen

dani — Sun, 15 Jun 2025 16:09:47 +0000

wic schaffhausen

dani Sun, 06/15/2025 - 18:09

für mich hät s renne denkbar schlecht agfange: mit halsweh und gwschwullne lymphdrüese. eiditügi zeiche, dass ich uf bestem weg bin, chrank z werde. bin denn aber trotzdem uf schaffhuuse, genauer neukirch greist. d bedingige für es inline-renne sind schliesslich perfekt gsi: sunne aber noni zu heiss und e grossi mengi lüt am start. einerseits em umstand gschulded, dass das renne nid nur zu de swiss skate tour, sondern au zum german inline cup, em bade würteberg cup und sogar zum world inline cup zählt hät. so sind spitzeathletinne und athlete us de ganze welt am start gsi, inklusive bart swings. andersch ume schient's au recht viel pläuschler azoge z ha. überraschend viel nachmäldige händ zu lange schlange bi de startnummereusgab gfühert und letschten endes d organisatore zwunge, de rennstart um e viertelstund z verschiebe.

dank de verspätig hät's no zu me chline warm-up glanged. wahrschienlich aber zwenig. isch mir a dem tag aber egal gsi, ich bin ja eh chrank gsi und han d sach chli gemächlicher welle agah und bin zersch mal mit me vereinsgspänli skated. han denn aber bald mal e lugge vor ihm gschlosse, zum es chlises grüppli bilde z chönne. zersch sind mir z dritte unterwegs gsi, später isch e frauegruppe, wo nach üs gstartet isch cho und hät üs überholt. dere händ mir üs aghänkt. sie händ scho zwei oder drü anderi manne im schlepptau gha, wo am afang mit üs nid mit möge händ.

vor allem zwei vo dene fraue sind sackstark gsi und händ zum grosse teil d füherigsarbeit gmacht. i de letschte stiegig bin ich denn ad spitze gange. han nid s ziel gha, d gruppe z sprenge. isch aber passiert. plötzlich sind no die zwei fraue, en andere skater und ich gsi und ich han müesse luege, dass ich i de folgende, lange liecht abfallende gerade chann dra bliebe. de ander typ hät mich denn aber dezwüsche mal abghänkt. extra oder oder dur puuri idioti vo ihm? er isch jedefalls plötzlich use gfahre, was e lugge zwüsched de fraue und mir gä hät, wo ich nid han chönne schlüsse. er isch hinter mir gsi, hät gflueched und isch denn sälber füre gfahre und hät d lugge nomal gschlosse und isch schön langsam mit de fraue devo zoge. und ich bin plötzlich ällei gsi und han müesse luege, dass di restlichi grupppe mich vo hine nid nomal iholt. es isch denn sau knapp worde, ich han's aber grad no gschafft, es paar zehntelsekunde über d ziellinie z rette.

alles i allem bin i also zfriede mit dem resultat. immerhin bin i ja chrank gsi. oder uf em weg, s zwerde. de rescht vo de wuche isch jedefalls viel bett und nur no teilziit-home-office agseit gsi...

Tags

speedskating

Race ID

klettgau skate day

Race Date

2025-06-09

Distance

38.00km

Rank

Race Finish Time

1:18.48,79

Race Points

750

Speed

28.93km/h

Garmin ID

19377076957

Add new comment

inline event lichtenstein

dani — Sun, 15 Jun 2025 15:46:58 +0000

inline event lichtenstein dani Sun, 06/15/2025 - 17:46

leider bin i recht lang nach em renne nid dezue cho, mini website z aktualisiere. darum han i nur no wenig erinnerige a das erste renne vo de de saison 2025. ich bin nid emal sicher, ob's uf de zweite oder dritte rundi gsi isch, wo ich em dani vom ITL nüme hinterher möge han. sicher isch, es hät sich nachher es ganz agnehms grüppli mit vier oder füf skater bildet. wobi immer di gliche zwei d füherigsarbeit gmacht händ. und hine dra no zwei, drü anderi mit-gsurft sind. und tatsächlich isch eine vo dene denn am schluss los gspurtet, was ich recht nervig und frech gfunde han.

für s team-ziitfahre han ich denn müesse "fremd ga". mir wäred zwar gnueg vom ITL am start gsi, aber zu viel händ hei welle oder sich susch für de plausch nüm her gäh. schad! ich bin denn mit em letschte verbliebene ITLer und zweine vo flüss gstartet. die beide sind aber chli schneller gsi. drü vo üs händ müesse is ziel cho. da mis vereinsgspändli bald nüm möge hät und nach einere rundi usgstiege isch, isch es denn a mir gsi, no dure z hebe. die flüsser händ denn chli gholfe, und so isch es irgedendwie gange. muskelkater han i nachher aber definitiv gha. wohl me vom team-ziitfahre als vom eigentliche renne.

Tags

speedskating

Race ID

inline race lichtenstein

Race Date

2025-05-10

Distance

21.00km

Rank

Race Finish Time

41.38,16

Race Points

781

Speed

30.26km/h

Garmin ID

19082432008

Add new comment

berlin marathon 2024

dani — Tue, 01 Oct 2024 20:48:53 +0000

berlin marathon 2024

dani Tue, 10/01/2024 - 22:48

nach dem ich letscht jahr es persönlichs jubiläum gha han mit de teilnahme 19 und 20 hät das jahr de berlin marathon es offiziells jubiläum gfiired: sini 50. usträgig. es hät aber für d skater no meh änderige gä. d strecki isch nüm di originali, sondern jetzt au en rundkurs. sie händ, obwohl letscht jahr s erschti mal sit langem teilnehmerzahl wieder gstiege isch, gemeint, es lohnt sich nüm für d skater 42km strass z sperre. das hät für mich für das jahr s inline-renne e chli interessanter - will irgendwie neu - gmacht. dörfti aber de attraktivität vo dem alass insgesamt nid zueträglich si.

au d startziit hät gändered, das isch aber fasch eher zu minem vorteil gsi: ich han meh pause gha. und vor allem, am samschtig morgen kei ziit meh müesse totschlah und nervös werde chönne. nach em frühestücksbuffet im hotel händ mir üs bald scho parat gmacht und sind an start gange. s wetter isch chli unklar gsi, mal hät d sunne gschunne und es isch recht warm gsi, denn sind wieder wolke verbi cho und es isch chüel gsi, dezwüsche hät's sogar no es paar tröpfli gä. schlussendlich sind s aber sehr agnehmi temperature und auch absolut trocheni strasse gsi. d entscheidig im startblock C z starte hät sich au schnell als richtig usegstellt, wie scho letscht jahr. es isch nid los gange wie verruckt, aber au nid langsam gsi. ich han wohl au no chi glück gha, oder bin strategisch guet gfahre, bin immer im hauptfeld gsi und han meistens au d spitze vo dem gseh. trotzdem han i zu jedem ziitpunkt guete windschatte gha. das isch enorm wichtig gsi, will i di einti richtig händ mir zum teil brutal starche gegenwind gha. so han ich lang es ruhigs renne verbracht und mir denkt "guet! di gsparti energie chann ich morn no bruche".

wo's uf di füfti und letschti rundi gange isch, händ mir de markus ufgablet. de isch eigentlich viel schneller als ich. er hät verzählt, dass er gestürzt isch. er hetti wohl gern sofort agriffe, ich han aber gseit dass ich nid glaube, es bringi viel. ich han vier runde beobachtet, wie löcher wo's im gegewindteil gä hät, uf de ruggewindsiete immer problemlos wieder gschlosse worde sind. so hät er sich in geduld üebe müesse. gege endi vo de füfte rundi bin i churz unaufmerksam gsi, wo die hinter mir chli gschobe händ, han i nid rechtziitig reagiert und bin quasi us de gruppe use gschobe worde. de markus hät's realisiert und isch sofort zu mir cho. und i dem moment händ mir au de turbo zündet zersch sind mir i de gruppe wiet füre gfahre, denn bi de usfahrt a de siegessüüle e besseri liniewahl gha und scho isch niemer me hinter üs gsi. mir händ no drü anderi igholt, aber au die sind bald nüm mit cho. so isch es cho, dass mir bim und ab em potsdamer platz ällei unterwegs gsi sind. mir händ no öppe drü einzelni fahrer, wohl us em b-block überholt. de markus hät keis pardon kennt und isch eifach verbi zoge, ich immer hinedra hinderi. er hät paar mal gfräged "gaht's no", ich han "ja" gseit und "nei" denkt. s gfühl, die andere abghänkt z ha und jetzt di ganzi strass nur für üs z ha, isch eifach unbeschrieblich gsi! ersch uf me video vonere begleitperson han i später gseh, dass eine vo de überholte s doch geschafft hät, sich a z hänke.

im ziel hät's denn berliner gä, die wohl beste, wo ich je gässe han. und es ärgernis: ziitmässig hät nid funktioniert und ich han kei offizielli schlussziit gha. hät denn später no nahtreit werde müesse. ich bin trotzdem zfriede gsi und han mich nach enere duschi und enere guete portion perskindol a de bei scho chli uf "morn" gfreut. zersch hät's aber no e feini pizza mit de club-kollege gä.

am sunntig isch es no chli frühener los gange, als am samschtig. vor em renne chann i aber eh nid so viel ässe, wie vor em skate. ich bin eigentlich eher chli später im startgländ gsi als denkt, aber am schluss denn doch eher frühe im startblock. und deht bin i denn, will i nomal uf s wc han müesse, uf die ander strassesiete und han debi gmerkt, dass es deht viel, viel weniger lüt hät. so han ich chönne warte, bis uf de volle strassesiete d pacemaker mit em 3:45-fähnli cho sind. und denn bin ich mit dene über d startlinie und han mich vo afang a, a si ghalte. die händ es ziemlich zackigs tempo vorgäh, han ich s gefühl gha. bi 14km sind mir öppe ei minute schneller als de fahrplan gsim bim halbmarathon sind s anderthalb minute gsi.

bi 25km han i denn denkt, es seig verbi mit de herrlichkeit: ich han uf s wc müesse und deht sogar no churz warte, bis es toitoi frei gsi isch! churz nach dem ich wieder uf d strecki zruggkehrt bin, han i aber wieder en pacemaker gseh. es hät zwei gha. weiss nid, ob de au uf s wc müesse hät. jedenfalls han ich denn wieder gueti begleitig gha. es isch aber zuenehmend härter worde. bim renne isch es eigentlich no gange, schwierig han i aber d getränkeposte gfunde. deht hät me eigentlich immer churz müesse halte, zum es becherli übercho. es hät eifach zu viel lüt gha. denn wieder los renne, und überhaupt mit dem rythmusbrecher klar z cho, isch immer wie schwieriger worde. und so isch es denn cho, dass ich bi me getränkestand nach 32km de pacemaker gah la han müesse. und ab denn isch es würklich härt worde. d bei händ weh tue und ich han mir ziel irgendwie sälber müesse setzte. leider han i nid checked, dass i bi de 35km-marke no extakt im plan für 3:45 gsi wär. bi 38km bin ich s nüm gsi und han nomal am getränkeposte en längere halt als nötig gmacht. eigentlich schad, am schluss händ 100 Sekunde gefehlt. nichtsdestotrotz: es hät e klari neui bestziit gä, vierehalb minute schneller als letscht jahr.

offizielli ziitmässige und rangierige
	skate	laufe	doppelstarter
5km		0:26:57
10km		0:53:24
15km		1:19:20
20km		1:45:19
halbmarathon	0:41:34	1:50:52
25km		2:11:45
30km		2:39:36
35km		3:06:40
40km		3:35:11
ziel	1:23:03	3:46:40	6:37:12
rang	221	15647	13
finisher	1715	35490	73

Tags

speedskating

Race ID

berlin marathon

Race Date

2024-09-28

Distance

42.20km

Rank

221

Race Finish Time

1:23.03,00

Race Points

722

Speed

30.49km/h

race notes

doppelstartwertig: 13

Garmin ID

17150235253

Add new comment

wic bern

dani — Sun, 18 Aug 2024 21:21:03 +0000

wic bern

dani Sun, 08/18/2024 - 23:21

Tags

speedskating

Race ID

sic bern

Race Date

2024-08-17

Distance

21.00km

Rank

Race Finish Time

53.41,13

Race Points

669

Speed

23.47km/h

Garmin ID

16789508519

Add new comment

Basel Inline Marathon

dani — Sun, 30 Jun 2024 15:35:32 +0000

Basel Inline Marathon dani Sun, 06/30/2024 - 17:35

Tags

speedskating

Race ID

basel

Race Date

2024-06-29

Distance

40.50km

Rank

Race Finish Time

1:28.21,63

Race Points

695

Speed

27.50km/h

Garmin ID

16159489586

Add new comment

mittelland rollt niederbipp

dani — Sun, 02 Jun 2024 18:18:18 +0000

mittelland rollt niederbipp

dani Sun, 06/02/2024 - 20:18

eigentlich han ich das renne scho vor em start verlore. nid nur isch di vergangeni wuche e schwierigi und chräfteraubendi gsi, au han ich glaub nid ganz s richtige mind-set mit an start bracht. wil mit me rägerenne grechnet, obwohl d wetterprognose trocheheit vorhergseit hät, bin i mit altem material ufkürzt. di guete rädli und vor allem chugellager han ich welle spare. schlecht entscheiden gsi. denn han i nur ei rundi igfahre uf de skates. hetti wohl guet tue, chli länger z fahre, zum mich no chli meh a mini quetschende gfährt z gwöhne. churz nach em start isch e chlini abfahrt cho, wo ich i dere scho chli de aschluss verlore han, han i (vorziitig?) d sägel gstriche: mit minem material han i eh kei chance.

im unterschied zu letschter wuche, isch s renne nachher aber nid easy worde und es isch absolut au nid so gsi, dass mini zwei mitfahrer wo ich denn no gha han, nüt tue hättet. so gseh, muss i anerkänne, dass hüt wohl würklich nid min tag gsi isch und ich eifach nid parat gsi bin und wohl au nid mit de schnellere gruppe mit möge hetti wenn ich am afang de aschluss geschafft het.

Tags

speedskating

Race ID

rollserie niederbipp

Race Date

2024-06-02

Distance

23.40km

Rank

Race Finish Time

50.31,04

Race Points

703

Speed

27.79km/h

Garmin ID

15704884960

Add new comment

inline event lichtenstein 2024

dani — Sun, 26 May 2024 16:29:24 +0000

inline event lichtenstein 2024

dani Sun, 05/26/2024 - 18:29

nur ei wuche nach em unerwartete grosserfolg isch bereits e nächsti swiss-skate-tour-event abstande. das mal im liechtestei. de halbmarathon uf em flache, sehr schnelle 2.1km rundkurs isch wie fasch jedes jahr e chli e zitterpartie bezüglich em wetter gsi. aber wie meistens: s wetter hät mitgmacht. pünktlich und grad recht zackig isch es los gange. ich han mich probiert a de fahrer vo letschter wuche z orientiere. und tatsächlich han ich das irgendwie geschafft, obwohl s tempo horrend gsi isch. aber irgendwie isch es glunge dra z bliebe. uf de zweite rundi han i s gfühl gha, pendled sich alles chli i und es git es schöns zügli i dem ich mitfahre chann. mitti dritti rundi hät's en agriff gä, us mir nid ganz klare gründe. aber de wo vor mir gsi isch, hät nüm mit möge, es isch e lugge entstande. ich han wohl chli z lang gwartet, oder ghofft. im folgende kurvige teil han ich denn de versuech gestartet, d lugge z schlüsse. meh als ein kilometer lang, aber ich bin nüm entscheidend nächer cho. viellich hett ich's energischer probiere sölle, quasi no me sprinte um i chürzerer ziit ane z cho. und scho frühener reagiere. aber im nachhinein isch me immer gschieder.

ich han denn uf di nächste gwartet. unter anderem de, wo mich us de gruppe grisse hät. de hät's aber nüm is ziel gschafft. d di andere beide sind au kei all zu grossi hilf gsi. gfühlt han ich uf meh als de hälfti vo de rundi s tempo gmacht. oft händ si sogar mühe gha zum folge. ich han aber glich no immer ab und zue chönne, mich chli i ihrem windschatte usruhebe. uf de letschte rundi, han i denn aber denkt, ich bin hüt cleverer: vo dene möcht i mi nüm überspurte la. so han ich mich denn vorziitig nomal ablöse la, zum denn im kurvige schlussteil no weg cho z chönne. das hät denn klapped.

im ziel bin i no immer chli sauer und enttüscht gsi, dass i nid mit de andere mit möge han. s resultat isch aber eigentlich nid so schlecht. 10 sekunde langsamer als lutscht jahr. mit em unterschied, dass ich das jahr ziemlich zu me grosse teil s tempo gmacht han, während letscht jahr ich für di glichi ziit e grossi gruppe wo mich mitzieht brucht han. so gseh schient d fromkurve liecht ufwärts z zeige. scho nächst wuche isch di nächsti chance, das z bestätige.

Tags

speedskating

Race ID

inline race lichtenstein

Race Date

2024-05-25

Distance

21.10km

Rank

Race Finish Time

41.05,86

Race Points

761

Speed

30.80km/h

Garmin ID

15574447453

Add new comment

klettgau skate day und marathon SM 2024

dani — Tue, 21 May 2024 20:18:19 +0000

klettgau skate day und marathon SM 2024

dani Tue, 05/21/2024 - 22:18

alles neu macht der mai? jedenfalls gilt das für d swiss skate tour 2024: de hauptorganisator hät gwechslet und frische wind bracht, alti etappeort wiederbelebt und ganz zum afang en neue igfühert. und no meh: de neui ort hät au no grad als marathon schwiizermeisterschaft gulte. was interessiert mich das, han ich denkt, bis ich vo de elsbeth (Verbandspräsidentin) persönlich e afrag übercho han, wieso ich kei lizenz glöst han. han i denn halt no gmacht.

di neui strecki isch recht cool! überall schöne asphalt, fühert grad nach em start in e scharfi linkskurve gaht denn eher chli aber, hät en chline hügel, gfolgt vonere lange flache bis liecht abfallende passage wo mir uf de erschte runden über 40km/h gfahre sind. denn isch e längeri, bissigi stiegig cho, gfolgt wiederum vo me mehrheitlich flache stuck. denn s nerve-spiel: e liechti abfahrt mit zwei scharfe kurve. me hät ächt müesse bremse und denn uf de lange zielgerade jewiels wieder d luggene schlüsse.

vor em start di grossi frag: a wen söll ich mich halte? wer hät de summer es ähnlichs niveau wie ich? es hät sich aber sehr schnell e grossi gruppe mit sicher 12 skater bildet, debi au lüt, wo mir s letscht jahr no wiet devo gfahre sind. i dere gruppe han ich mich denn zweiehalb runde problemlos ghalte. mit de stiegig bin i besser z recht cho, als anderi, im rest vom renne han i meistens de windschatte gsuecht und gfunde und bin so ganz guet dure cho. ersch nach em dritte ufstieg bin ich ziemlich zvorderst i de gruppe gsi, han zum teil gfühert, mich denn ablöse lah und nach de abfahrt uf de gerade wieder es loch zue gfahre. ab deht bin i de vordere positione, aber nie z voderst gsi, han aber recht uf zäh biesse müesse. di langi gerade isch würklich lang werde. denn de astieg, trotz allem isch er mir guet glaufe, bis mir d fläsche abegeheit isch. zrugg ga? nei, eine chli nach mir hät si mir mitbracht. obe a de stiegig isch gruppe ziemlich wiet zerstreut gsi, ich han chli d übersicht verlore und mich eifach an nächst beste angehängt und gluegt, dass i chann dra bliebe. d gruppe isch jetzt nüm gross gsi. ob vorne no zwei oder drü weg gfahre sind han i genau so wenig gwüsst, wie wie gross de vorsprung uf die hine a üs isch. irgenwie nur no is ziel cho, mit dem drüergrüppli wo mir nach de abfahrt gsi sind. ich bin absolut zfriede gsi mit minere ziit und em rennverlauf.

was zieldurchfahrt punkto rangierig bedüted hät, han i ersch später erfahre. für d SM isch es nämlich druf a cho. de einti, wo weg cho isch, hät sich de Ü40-titel gschnapped. und mis team-gspänli, wo im ziel nur no zwei sekunde rückstand gha hät, hät mit mir no uf's podest stiege dörfe. s erschti mal i minere karriere han ich sowas erlebt. allerdings: mir sind au nur vier i dere kategorie gsi. s interessante dra: mir sind all i de gliche grosse gruppe gfahre.

Tags

speedskating

Race ID

klettgau skate day

Race Date

2024-05-19

Distance

40.00km

Rank

Race Finish Time

1:19.54,51

Race Points

779

Speed

30.03km/h

Garmin ID

15471089575

Add new comment

inline event locarno

dani — Wed, 04 Oct 2023 20:02:24 +0000

inline event locarno

dani Wed, 10/04/2023 - 22:02

ei wuche nach berlin nomal es inline-renne. chann das guet cho? zum glück nur en halbmarathon.

de saisonschluss vo de swiss skate tour isch in locarno gsi, uf em programm en halbmarathon und no es team-ziitfahre. s wetter isch super, sunnig und summerlich gsi, wie me sich s vom tessin erhofft. d strecki isch en kurvige, 2.1 kilometer lange, flache rundkurs, wo zwar technisch aspruchsvoll aber ziemlich schnell gsi isch.

s renne hät aber eher langsam gstartet, uf de erschte rundi isch s feld grössteteils zäme bliebe und ich han mich paar mal gfräged, ob ich nid probiere sötti statt am schluss vom feld probiere im feld z fahre. aber wo‘s denn uf de start-zielgerade vorne en gang höcher geschalte händ, isch die chance weg gsi und ob d entscheidig richtig gsi isch chli vorsichtiger z starte, wird unbeantwortet bliebe. sicher isch, dass ich i dem grüppli wo sich bildet und us füf bis siebe skater bestanden hät, de gsi bin, wo am meiste für s tempo gmacht hät. ich han gern e gueti ziit welle erreiche und kei spieli um en unbedütende platz spiele. so han i denn uf de letschte beide rundene ziemlich viel gfühert um mich denn uf de letschte guet 100 meter überspurte z lah. mit dem han i aber grechnet, und viellich darum gar nid würklich me probiert z kontere. aber ziit isch mit 41:50 grad no akzeptabel und de iisatz wert gsi.

nach enere pause vo guet einere stund bin ich mit em andere dani, em chrigel und em lukas no zum team-ziitfahre gstartet. nach me blitzstart (ach, hett i mi doch nomal chli ufgwärmt!) einere rotation mit de füherigsarbeit und em usstiege vom lukas hät de dani müller denn s zepter überno, respektive d loki gspielt. de chrigel und ich sind nur no im windschatte hinedri ghechlet. hät aber spass gmacht mit nomal zwei schnelle runden und vor allem mit (und nid gege) zwei gspänli d saison ab z schlüsse!

Tags

speedskating

Race ID

locarno inline event

Race Date

2023-10-01

Distance

21.00km

Rank

Race Finish Time

41.50,20

Race Points

773

Speed

30.12km/h

Garmin ID

12146753583

Add new comment

berlin marathon 2023: doppelstart

dani — Sun, 01 Oct 2023 20:38:53 +0000

berlin marathon 2023: doppelstart

dani Sun, 10/01/2023 - 22:38

am dunnschtig morge isch es los gange und ich bin mit erschtklasssparticket en tag is rollende büro. und ganz db-untypisch pünktlich am abig in berlin acho.

am fritig isch wieder chli meh bewegig agseit gsi, activator am morge, nach em zmorge en lade und nachher de messebsuech. nach dem di zwei startnummere im hotel deponiert gsi sind, isch s nachtässe mit „ITL and friends“ uf em programm gsi.

am samschtig bin i nomal in en lade um s warte z verchürze. denn isch es ziit worde um mich parat z mache und zum treffpunkt mit de andere ITLer z gah. ufwärme isch schwierig, sit s üs nüm bi de siegessüüle ifahre länd. debi isch das frühener perfekt gange!

de entscheid, im startblock C (statt B) z starte isch genau richtig gsi. au deht ganz no ganz ordentlich schnell los, so dass ich nach öppe 15km mal es loch wo paar positione vor mir ufgange isch nüm chönne (oder welle? de sunntig isch glich irgendwie im hinterchopf gsi) schlüsse han. für e churzi ziit sind mir denn i me chline grüppli chli langsam gondled, bald aber sind mir wieder teil vonere grössere und schnellere gruppe gsi. de halbmarathon unter 40 minute, das isch super gsi für mich. und mir händ s tempo au i de zweite hälfti recht hoch halte chönne, ohni dass ich nur einmal gfahr glaufe wär, nomal de aschluss z verlüre. han no ein oder zweimal müesse e lugge schlüsse, isch aber keis problem gsi. brenzlig isch es churz vor de 40km-marke gsi, wo s d strecki gänderet händ und plötzlich em U-turn vor üs gsi isch. d strass isch aber mega breit, wenn me‘s weiss und entsprechend uf de rechte siete fahrt, isch es kei unmachbari kurve. ich bin jedefalls guet dure cho und denn zügig in richtig ziel grollt. mit 1:20:15 bin i den au sehr zfriede gsi, isch min zweitschnellste berlinmarathon und am obere endi vo mine erwartuge gsi.

am sunntig isch es mittlerwile zum vierte mal uf e zweiti rundi gange. zersch aber no packe, gepäck im hotel istelle und natürlich zmorge ässe. ich bin ersch i de dritte startwelle gsi, so isch das alles problemlos gange und ich bin viel z frühe im startgländ gsi. am start han i denn recht lang gwartet, wil ich hine los laufe han welle, zum nid z viel „gwühel“ am afang z ha. ich han denn defür am afang chli überhole müesse, was vor allem uf de erschte mindestens 10km nid eifach gsi isch, wil d läufermengi recht dicht gsi isch.
ich han probiert unter 5:30min/km z laufe. das isch eifach zum rechne (25.5 min uf 5, 55min uf 10km) und realistisch. nach 5km bin i dütlich drüber gsi, nach 10 au no chli, aber scho weniger. das passt, wenn me möcht progressiv laufe. bi 15 isch denn drunter gsi, bi 20 recht dütlich. ich han probiert ab deht mini zielziit ab um ei minute abe z korrigiere um min vorsprung „mit z näh“. so han i mi vo „zwüscheziit zu zwüscheziit“ ghanglet. renne isch zwar au zuenehmend härter worde, aber mit em glaube, die nächsti zwüscheziit z erreiche chönne, isch es ganz guet gange. schwierig isch aber amig gsi, nach de getränkeständ wieder tempo uf z näh. han drum denn ein stand bi öppe 36km uslah. dass i bi 40km wieder über de 5:30-ziit gsi bin, han i gar nid kapiert, de vorsprung uf d 4h-marke isch gross gnueg gsi. irgendwie han i aber nid würklich für de schlussspurt beschleunige chönne. bis i scho unter den linden, mit brandenburgertor vor auge, no zwei fans im publikum gseh han. die high-fives händ denn doch no de turbo zündet und ich bin is ziel gfloge und han di „fehlende“ sekunde wieder usegholt. mit enere nettoziit vo 3:51:24 bin i meh als zfriede. 10min besser als im vorjahr und siebenehalb minute schneller als d bestziit vo 2019.

offizielli ziitmässige und rangierige
	skate	laufe	doppelstarter
5km		0:27:43
10km		0:55:15
15km		1:22:16
20km		1:49:20
halbmarathon	0:39:52	1:55:03
25km		2:16:39
30km		2:44:13
35km		3:12:11
40km		3:40:10
ziel	1:20:15	3:51:24	6:44:06
rang	355	16482	11
finisher	2175	28609	65

Tags

speedskating

Race ID

berlin marathon

Race Date

2023-09-23

Distance

42.20km

Rank

355

Race Finish Time

1:20.14,00

Race Points

710

Speed

31.55km/h

Garmin ID

12088672195