wien, 28. märz bis 1. april 2006

füfte tag, gasometer und sacher

dani — Sat, 01 Apr 2006 14:20:00 +0000

füfte tag, gasometer und sacher

de letschti tag isch de schönschti gsi. mindistens wettermässig...

s ufsta, chli früener als normal, isch nach em gestrige abig aber trotzdem dopplet schwer gfalle. nachdem mir es letschts mal s grossartige z?morge-buffet gnosse händ, händ mir packt und sind no zu de gasometer usegfahre. die vier um 1900 erbaute gasometer, wo früener wien mit gas versorgt händ (700km leitig händ s baut!), sind hützutag e eignigi chlini stadt (gasometer-city). es hät e grossi shoppingmall, es riesigs kino, unzähligi kaffis und restis, wohnige, bürorüüm und es studentewohnheim.

zrugg i de stadt bin ich nomal zum hochstrahlbrunne. ich han de nomal genauer welle studiere, da im reisefüerer bedütig vo de viele wasserstrahle beschriebe gsi isch: 365 chlini rundume, für jede tag eine. sechs chlini und e grossi insle für d wuchetäg. i de mitti 12 gross springbrünne für d mönet und 24 chlineri für d stunde am tag. uf em zruggwäg han ich no d karlsschile und s huus vom musigverein (neujahrskonzert) gseh. d olivia han ich denn im berüemte kaffi sacher troffe, si isch no nach schue go luege. mit enre ?original sachertorte mit schlagobers? händ mir denn au üse wien-ufenthalt abgschlosse.

dani Sat, 04/01/2006 - 16:20

Tags

wien, 28. märz bis 1. april 2006

Add new comment

vierte tag, schloss belvedere

dani — Sat, 01 Apr 2006 08:20:00 +0000

vierte tag, schloss belvedere

zersch sind mir mit de strassebahn zum obere schloss belvedere gfahre, was vo usse sicher zu de schönste sehenswürdigkeite vo wien ghört.

inne git?s nur de marmorsaal z gseh und e kunstgalerie. mir hät die wenig gseit, aber immerhin chan ich jetzt säge, ich heigi mal en renoir, en munch, en van gogh, en monet oder en hundertwasser gseh...

dur de schöni park, wo s leider au erscht langsam am rüschte sind für de summer, sind mir zum untere schloss belvedere cho. das hät es barok-museum beherrbergt. de bsuech hät sich definitiv glohnt. näbed enorm schöne zimmer (u.a. de goldsaal) hät s vieli baroki statue und figure enthalte. mit dene hani definitiv me afange chönne, als mit flache, zweidimensionale bilder.

just wo mir s schloss verlah händ, hät s wetter wieder mal schlechti luune gha. dur wind und räge händ mir üs am hochstrahlbrunne verbi zunere strassebahn kämpft, wo üs zum hundertwasserhuus bracht hät. deht wott ich au nid wohne! so viel touriste wo jede tag um s huus schlieched, nei danke!

denn sind mir no in prater gfahre, wo natürlich e rieseradfahrt unumgänglich gsi isch. gfolgt isch no en spaziergang uf de donauinsle.

z?nacht hät s nomal im palatschinkenpfandl gä, was definitiv s besti resti gsi isch, wo mir z wien bsuecht händ! das isch en würkliche gheimtipp, es staht nämlich i keinem reisefüerer!

nach nachtfotene vo de hofburg händ mit üs no en drink i de onyx-bar im haas haus gönnt.

dani Sat, 04/01/2006 - 10:20

Tags

wien, 28. märz bis 1. april 2006

Add new comment

dritte tag, rund um d hofburg

dani — Thu, 30 Mar 2006 21:00:00 +0000

dritte tag, rund um d hofburg

de hütigi tag hät mal endlich sunnig agfange! so isch d hofburg im beste liecht gstande.

bi nacht händ mir si ja gester scho gseh und eu au es paar bildli uf d homepage tue. bi tag gseht si mindistens so guet us! mir händ denn au no ihri schatzchammere bsuecht und üs mit me zwei-euro-audio-guide, ähnlich wie im schloss schönbrunn, einiges erkläre la. für mich sind s aber viel z viel informatione gsi! uf das abe händ mir grad e stärchig brucht: kaiserschmarrn im demel...

aschlüssend händ mir d nationalbibliothek bsuecht. gseht doch no chli besser us als d ETH-bibli, mueni zuegä... de rundgang dur di spanischi hofreitschule isch denn wieder me was für d olivia gsi. wie au di späteri shoppingtour. allerdings händ mir nur für mich was posted!

vor em poste händ mir aber no s kunst- und s naturhistorische museum gseh, allerdings nur vo usse, s maria-theresia-denkmal, s parlament, s ratshuus und d universität. zum z?nacht häts s grössti wienerschnitzel vo de welt gä: es hät nid mal uf em teller platz gha! und jetzt lieged mir mit volle büch im hotel uf em bett...

dani Thu, 03/30/2006 - 23:00

Tags

wien, 28. märz bis 1. april 2006

Add new comment

zweite tag, oper und theater

dani — Thu, 30 Mar 2006 07:22:00 +0000

zweite tag, oper und theater

am zweite tag hät de wätterbricht absolut nid ghalte, was er versproche hät. bis am abig am sechsi hät s ziemlich immer gregnet!

zersch händ mir de stephansdom besichtiged, wo vo üs us guet füf minute z fuess isch. mir sind au uf de turm ufe gstiege, gnau 343 stufe. vo deht us händ mir emal en erste blick uf s schloss belvedere werfe chönne. nach dem harte uf und abstieg händ mir üs im haas haus gstärkt.

denn sind mir mit de u-bahn zu de staatsoper gfahre und händ deht a de füerig teil gno. es hät si in dütsch, spanisch, englisch und japanisch gä. di dütschi gruppe isch wohl di chlinschti gsi. um so besser für üs.

nach dem mir üs im hotel umzoge händ, sind mir mal i di ander richtig vo de kärntnerstrass glaufe und händ festgstellt, dass es zu de opere und de nächschte u-bahnstation ja nur ein, zwei minute gaht. das isch wohl d entdeckig vom tag gsi!
di frische chleider händ mir für üse bsuech im burgtheater brucht. ?Katze auf dem heissen Blechdach? isch gspielt worde. isch nid so min fall gsi... ziemlich unvorstellbar isch gsi, dass deht emal die toten hosen gspielt händ!

uf em heiwäg hät s no fotene vo i de nacht schön belüchtete ringbaute gä. bi tag lueged mir die denn hüt a. aber zersch git?s jetzt no z?morge am luxusbuffet. :-)

dani Thu, 03/30/2006 - 09:22

Tags

wien, 28. märz bis 1. april 2006

Add new comment

erste tag, schloss schönbrunn

dani — Tue, 28 Mar 2006 20:33:00 +0000

erste tag, schloss schönbrunn

als erschts sind mir uf schönbrunn gfahre.

deht händ mir denkt, lueged mir de park a, so lang s wätter no troche isch. mir sind allerdings nid wiet cho, bis es agfange hät liecht rägele. alles i allem isch es aber e gueti entscheidig gsi, s wetter isch gege abig nämlich eher schlechter worde.

i de ?residenz? händ mir en ?habs-buger? gässe und sind aschlüssend no go d innerüüm vom schloss aluege. es hät deht e elektronisch gfüerti tour gä: mit me ding, ähnlich me handy isch me vo zimmer zu zimmer gschlendered und hät us dem ?telefon? immer s wüssenswärti erfahre.

z?nacht hät?s ?palatschinken? gäh, d östricher version vo omelette.

dani Tue, 03/28/2006 - 22:33

Tags

wien, 28. märz bis 1. april 2006

Add new comment

tag null

dani — Mon, 27 Mar 2006 22:25:00 +0000

tag null

jetzt sind mir da, im hotel astoria mitte in wien.

usser dass s boarding mindistens mit enere halbe stund verspätig erst statt gfunde hät, hät aber alles tiptop klapped. s hotel schient gar keis billigs z sie, wenn me s nid mit me internet-arrangement buecht. d zimmerpriese sind i me schrank agschriebe: 220 ? d nacht für zwei persone...

dani Tue, 03/28/2006 - 00:25

Tags

wien, 28. märz bis 1. april 2006