london, 27. bis 31. januar 2012

london, tag 4

dani — Tue, 31 Jan 2012 23:39:41 +0000

london, tag 4

scho isch de letschti tag agstande. debi hetti's doch no so viel z gseh gä!

mir sind zersch emal richtig more london go s "moderne" london aluege. paradoxerwies isch das unmittelbar gegenüber vom tower of london und näbed de tower bridge. grad wahnsinnig toll sind die moderne bürokomplex aber nid. da han i scho imposanteri moderni architektur gseh. sogar de prime tower in züri isch da imposanter. d city hall immerhin isch inne no speziell, alles us glas, so gseht me in ratssaal ine. aber si händ grad kei ratssitzig gha. alles i alles hät's mi ziemlich an reichstag in berlin erinnered. bin den drum au wenig überrascht gsi, wo'n i ghört han, dass es de glichi architekt gsi isch.

z fuess isch es denn meh oder weniger de themse entlang bis zum tate modern gange. drinne gsi sind mir, ja. aber au nid me, als zum en blick vom oberste stock uf london aber z werfe. denn isch es über d millenium's bridge gange, wo direkt zu de st. paul's cathedral fühert. um die sind mir eimal ume glaufe, händ no d londoner occupy-bewegig atroffe und üs denn gfräged, was jetzt. d olivia hät nomal öppis poste welle und ich no id kathedrale ine. so het's denn au sölle si. nur hät mir die a de kasse fründlicherwies erchlärt, dass einersiets d kupple wege restaurationsarbeite gar nid bis z'oberst begehbar isch und dass ich mindischtens e stund, besser anderthalb für d besichtigung iplane sötti. so viel ziit han i denn aber nid gha. stattdesse bin i no zu de london bridge, vowo us me e super sicht uf d tower bridge gha hät. und s wetter isch tatsächlich so fründlich gsi, dass es d sunne nomal dur d wulche drucke la hät.

d olivia han ich denn i de orangerie vom kensington palace troffe, wo's zum abschluss no en klassische (königliche?) englische "tea" gä hat. inklusive fingersandwiches, mini schoggitürtli und browniestückli. denn isch es zrugg is hotel gange und de üblichi uf-de-flughafe-ga-ichecke-und-so-wieter-stress isch cho. immerhin hät üs d swiss denn pünktlich zrugg uf züri gfloge.

dani Wed, 02/01/2012 - 00:39

Tags

london, 27. bis 31. januar 2012

Add new comment

Kommentare

Hey Dani. Offenbar hat sich der London-Trip gelohnt. Aus deinen Berichten lese ich ein abwechslungsreiches Programm und verschiedene kulinarische Abwechslung. Danke für den Bericht, ob es mich auch noch nach London verschlägt? So 4 - 5 Tage kann ich mir schon vorstellen. Dir eine gute Besserung und es Grüessli Papi

Add new comment

london, tag 3

dani — Tue, 31 Jan 2012 23:38:57 +0000

london, tag 3

de dritti tag isch eigentlich schnell verzählt: mir sind go de tower of london aluege.

endlich emal es schloss, oder ähnliches, wo me ine hät chönne. wie scho im wachsfigure museum hät me vieles durchus alange und vo nächem betrachte chönne. es hät denn aber natürlich au sache gha, uf die das nid zuetroffe hät. allem vora i de "schatzchammere", wo's diversi goldigi gschirr und d chrone vo x könige und königinne z bewundere gä hät. damit d lüt nid z lang devor stah bliebed, händ's die eifach uf es förderband wie's es a jedem flughafe au hät, gstellt. so sind mir denn quasi a de chrone und zepter verbi gfahre. rüstige hät's au no zum beäuge gha, und zwar bis zum abwinke. d gschicht vom tower sälber isch aber eigentlich ziemlich e bewegti. so hät er mal als festig, mal als schloss und mal als gfängnis dient und isch dezwüsche zu me art zoo vercho.

denn hät d olivia e stärchig brucht, bevor mir über di berühmti tower bridge spatziert sind. wil si gnueg vo musee und "aluege" gha hät, sind mir denn nid im tower ine, sondern wieder zrugg und denn uf d u-bahn in richtig "harrod's". da das aber am 6i zuegmacht hät, hät's nur no grad glanged, zum uf's wc z ga.

z'nacht händ mir churzentschlosse in hotel gässe. e gueti entscheidig: s isch s besti londoner mal gsi!

dani Wed, 02/01/2012 - 00:38

Tags

london, 27. bis 31. januar 2012

Add new comment

london, tag 2

dani — Tue, 31 Jan 2012 23:38:17 +0000

london, tag 2

als erschts isch d wachablösig vor em buckingham palast uf em programm gstande.

mir sind aber e chli z spat gsi. eigentlich hetti me aber einiges z frühe si müesse. es hät super viel lüt und chum gueti plätz: di ganzi show findet hinter de gitter, wo de palast-vorplatz vom gemeine volk trenned statt.

d olivia isch denn go poste und ich han gwarted, bis de spuk verbie gsi isch und sich d menschemengi chli ufglöst hät. in palast ine hät me aber nid chönne. das isch definitiv en nachteil vo de no vorhandene monarchie: sie bruched ihri schlösser no sälber.

nacher bin ich scho ziemlich durchfrore z fuess chli go d umgebig aluege. via st. james palace bin ich an trafalgar square cho. jetzt han ich ziit gha zum en aluege. aber wil de platz anschienend für e chinesisch-neujahrfiir brucht worde isch, isch er ziemlich verstellt gsi mit bühne und absperrgitter. trotzdem hät me di beide brünne, sowie d uhr wo di verbliebendi ziit bis zum start vo de summerolympiade zählt, gseh chönne. denn isch de picadilly circus dra gasi. nach em bestuune vo de überdimensionale, lüchtende werbetafle han i denn gnueg gfrore gha. ich bin mit de u-bahn paar statione gfahre. zum is wachsfiguremuseum ga. wo'n i usstiege schient d sunne. astah-ziit: 1 stund. online bueche wäri wohl agseit gsi....

die stund isch aber relativ unterhaltsam gsi und mit guet 50 minute au nid ganz so lang. d wachsfigure händ sich so einiges müesse gfalle la. ich hetti denkt, dass me die nur mit me gwüsse abstand bestuune dörf. dem isch aber nid so gsi. im gegenteil, die arme händ sich mit allne mögliche lüt i me und weniger vorteilhafte positone abliechte la müesse. das isch denn also au für viel lüt wohl de hauptgrund gsi zum cho: endlich emal uf em föteli si mit em james bond, em bruce willis, de königliche familie, de beatels, de amy winehouse oder gar em hitler(!?). dementprechend isch es für mich au wenig interessant gsi. selbstporträts sind nid ganz eifach, s iPhone hilft aber. d sportlersektion isch eher chli ghalte gsi. defür han i mi über d figure vom mubarak, en saddam hussein und ehe em hitler gwundered. und au die sind beliebti fotiobjekt gsi!

denn isch me no dur e geisterbahn, e fahrt uf me quasi londoner taxi dur d vergangeheit und es 4D kino geschleust worde. nach guet zwei stund bin i denn im souvenier-shop gstande, was s endi vom spass dargstellt hät. irgendwie han ich mir das ganzi e chli me museumsartig und weniger mini-indoor-disney-land-mässig vorgatellt.

zrugg a de chälti bin i nomal as westminster gfahre. deht isch denn de gorillapod zum isatz cho. schliesslich will man(n) ja sis photi-equipment ja bruche. knipst worde sind parlament, big ben und rieserad bi dunkelheit.

z'nacht hät's denn wieder mit de olivia bi me inder in soho gä.

dani Wed, 02/01/2012 - 00:38

Tags

london, 27. bis 31. januar 2012

Add new comment

london, tag 1

dani — Tue, 31 Jan 2012 23:37:12 +0000

london, tag 1

flüg am 10 ab 7i am morge sötted verbote si! wobie si ehrlicherwies de vorteil händ, dass me nach akunft no chli öppis vom tag hät. vor allem, wenn me denn d uhr no um 1h zrugg stelle chann.

weg em schöne wetter händ mir als erschts s london eye, s rieserad agstüred. das isch sicher e gueti entscheidig gsi. d sicht jedefalls isch prächtig gsi, so gar nid wie me sich london vorstellt.

nachher isch es im schneggetempo, wäge de viele fotistopps über d westminster bridge zum westminster palace mit em big ben gange. da me nid ine chönne hät, isch sie sach schnell erlediget gsi und mir sind, quasi um de husegge zu westminster abbey cho. i dere chile sind di meiste englische könige und königinne traut, krönt und denn au biegsetzt worde. es hät jedefalls zig altär, grabmal und gedenkstätte gha. das hät üs während enere guete stund de audio guide verzählt.

mit me moderne, rote doppelstockbus sind mir am trafalgar square verbi dur d regent street gfahre. de bus hät direkt vor em apple store ghalte. da händ mir. natürlich emal schnell ine müesse. me chann en mit einem wort beschriebe: riesig!

nach enere stärkig i me starbucks sind mir denn, durch s scho fasch nächtliche soho spatziert. läde a lädeli und umgekehrt. aber so speziell han ich das nid gfunde.

z'nacht hät's denn im jamies im westland, i de nächi vo eusem hotel. das isch eis vo de jamie-oliver-restaurant. für mich hätt's viel z'viel zwieble und chnobli am ässe gha. aber das isch eigentlich kei überraschig, wenn me scho mal i eis vo sine chochbüeher glueged hät.

dani Wed, 02/01/2012 - 00:37

Tags

london, 27. bis 31. januar 2012