magic leap onboarding

dritti wuche magic leap onboarding

dani — Sat, 11 Mar 2017 09:58:29 +0000

dritti wuche magic leap onboarding

die dritti wuche hät für mich mit me paukenschlag agfange: mir isch mitteilt worde, dass ich mit me andere zäme s aktuelle gebiet und team verlahne und in es anders chumme. warum isch mir bis hüt nid klar. vom wüsse, wo ich im doktorat ufbaut han, chann i nur no wenig bruche, vo dem vo dacuda ziemlich gar nüt meh!

am zieschtig isch denn au scho de erschti workshop mit em neue team agseit gsi. fasch all vo dene lüt han i aber scho kennt. die zwei vo florida händ mir deht scho troffe und zwei vo drü in mountain view händ mir i de wuche vorher bsuecht gha. troffe händ mir üs in mountain view, was d nachteil gha hät, dass ich han müesse autofahre und mir i me chüele und chli müffelige sitzigszimmer glandet sind. e heissi schoggi hät gholfe. de vorteil isch gsi, dass mir s einzige mal i dene drü wuche z fuess händ chönne go z'mittag ässe!

d sitzig isch recht strukturiert gsi (han i vom vorherige team nid so kennt) und am abig sind mir gemeinsam go ässe. so hät s schnell chli team spirit gä. isch au nötig gsi: usser zwei persone sind alli andere neu (weniger als zwei mönet) im team und mir händ nur zwei täg ziit gha. denn am dunnschtig morge sind die beide vo florida au scho wieder abgreist. am mittwuch abig hät's denn, jetzt wieder mit “magic leap switzerland”, sushi zum z'nacht gä. wird wohl nie mini leibspeise, aber isch nid ganz so schlimm gsi, wie befürchtet.

dunnschtig und fritig han ich denn ä magic leap interni fortbildig zum thema deep learning gha, was mir bi minere neue ufgab wohl nützlich werde wird. am dunnschtig abig sind mir, quasi zum abschluss, nomal mit allne swiss leaper go ässe. uf vielseitige wunsch isch cheesecake factory agseit gsi (ich finde die nid speziell guet). nach ewigem warte uf en tisch hät's denn en ganz passable burger gä. de hät aber kei platz me für en cheesecake la.

ja, und jetzt sitz ich wieder im flüger uf de rückreis und probiere, möglichscht wach z bliebe, um denn defür i de schwiizer-nacht umso besser z schlafe. mit im gepäck händ mir näbed viele idrück no zwei gheimi prototype, was üs wohl no chli spass am zoll und en umweg über s büro ibringe wird. aber ohni die, wäred mir wohl nid würklich magic leap switzerland.

dani Sat, 03/11/2017 - 10:58

Tags

reise

magic leap onboarding

Add new comment

zweiti wuche magic leap onboarding

dani — Mon, 06 Mar 2017 07:22:40 +0000

zweiti wuche magic leap onboarding

di zweiti wuche da in sunnyvale hät gemächlich gstartet und isch denn immer besser worde. am afang han i no mit minem computer setup kämpft, während ich am schluss vo de wuche mini erschte chline verbesserige am magic leap code abracht han. zudem han i mi au chli as läbe da gewöhnt, abgseh vom ewige autofahre und de plastikteller i de restaurant.

de grössti erfolg vom zieschtig isch en neue threema-user gsi. am dunnschtig isch es denn sportlicher worde: ich bin am abig mit vierne uf san chose go d sharkes gege d vancouver canucks luege. isch cool gsi, mal so es NHL-spiel live z gseh! d hockey-kultur isch aber brutal andersch: sowohl s verhalte vom publikum als au s spiel sälber. es hät fasch kei päss gä, und wenn, sind's meistens nid acho. vo gepflegtem spielaufbau nüt ume, defür susch wohl eher no en zacke schneller als i de schwiizer NLA. und was me i de NHL unter hartem spiel verstaht, händ's üs mit me chline boxkampf au no grad zeigt.

inspiriert vo so viel sport bin i am fritig morge sälber uf e laufrundi gange. üses hotel isch a de gliche strass, wie de neui apple campus. so isch s ziel schnell definiert gsi. viel gseht me aber noni, wil no hinter bauabschrankige. me kriegt aber en guete idruck vo de enorme dimension vom “apple park”. ersch recht, wenn me z fuess dehte isch. am abig sind mir alli no anere pool und BBQ party gsi. s bad im heisse whirlpool isch bi de chüele temperature herrlich gsi.

am samschtig sind mir chli unorganisiert uf san francisco und am nomittag über golden gate bridge und richtig point bonita lüchtturm. mir händ unterwegs mega viel rennvelofahrer atroffe. wäri wohl e cooli velotour mit anspruchsvoller stiegig, aber bitte nid bi dem eher chüele und wetter mit immer wieder mal chli nieselräge. mir händ's leider nur zum und nüme is light house gschafft (hät grad bi üserer akunft schlosse). dennoch hät sich's glohnt: vo deht us hät me die wohl besti sicht uf san francisco, golden gate bridge und alcatraz. zrugg i de stadt sind mir di berühemte mosaikstäge i de 16th avenue ufe gstiege und händ nomal de blick uf di mittlerwile sehr wolkenverhangeni stadt abe gnosse und debi d dimension vom golden gate park chli chönne erfasse. de abig händ mir (nach enere wietere stund autofahre, denn im berüemte “san francisco premium outlet” in livermore verbracht.

am sunntig han i zwei ehemaligi mit-doktorande zu me cheesecake-factory-z'mittag troffe. sie schaffed beidi bi google in mountain view, quasi s dorf näbed dra. nachher sind mir no in apple store in palo alto, wo ich s glasdach bewundered han. hät alles bestens zu minem “silicon valley erlebnis” passt.

dani Mon, 03/06/2017 - 08:22

Tags

reise

magic leap onboarding

Add new comment

magic leap sunnyvale

dani — Mon, 27 Feb 2017 05:46:32 +0000

magic leap sunnyvale

nach enere churze nacht sind mir am dunnschtig morge am 9i bim magic leap sunnyvale office uf de matte gstande. dass mir wenig schalf gha händ, isch vorerscht nid wichtig gsi, den viel meh als üs de andere lüt vorstelle händ mir denn au nid gmacht. ich bin am spätere nomittag mit drü anderne no is mountain view office gange für e sitzig und später sind mir denn mit em ganze züri-team go z'nacht ässe. deht hät sich denn aber de fehlendi schlaf bemerkbar gmacht.

am fritig händ mir denn en vortrag über deep learning und SLAM lose dörfe und am nomittag händ mir en guete überblick übercho, über d head-pose tracking pipeline, wo magic leap hät. sowiet ich üsi rolle verstahne, werded mir (bereits ab nächster wuche?) afange s bestehende z verbessere probiere und sache vo üsem algorithmus ibaue, bzw. us probiere und vergliche. uf jede fall gseht's so us, als würded alli bi magic leap züri fände afang am head-pose tracking schaffe.

was mir mit üsem erschte wuchenendi da i de bay area afange sölled, händ mir zersch mal nid gwüsst. so sind mir eher planlos umegirrt, v.a. am sunntig denn. am samschtig sind mir zersch uf santa cruz gfahre und vo deht us de berüemti highway one durue bis san francisco. zwei mal händ mir aghalte und di würklich spezielli landschaft gnosse. und d surfer bestuunt, wo bi dene temperature is wasser sind. aber so wie ich's verstane, sind d welle im winter besser, als im summer. kalifornischi surfer müend drum hört im näh sie!

in san francisco sind mir in china town acho und händ mal richtig chinesisch gässe. s meiste hät mindestens zum probiere glanged, aber bi de “chicken feet” han i kapituliert. nachher sind mir z fuess zersch zum coit tower, denn alles abe an hafe und durch's dörtige vergnügungsviertel inklusive “seelöwe-show”, wieder steil ue zu de lombard street und denn an union square. mittlerwile isch es abig gsi, und mir sind in little italy go ässe. s erschti mal, wo sich's nach richtigen restaurant agfühlt hät.

am sunntig sind mir denn z vierte uf en “hike” im sanborn park. i dem wald hät me a vielne stelle d folge vo de unwetter und em viele rege wo's da chürzlich gha händ, chönne gseh: paar mal händ mir über umgstürzti bäum chlettere müesse und bäch überquere wo wohl meistens nid deht sind. so isch es no bitzeli abentürlich gsi und en guete kontrascht zum restliche bisherige programm. für min gschmack verbringed mir viel z viel ziit im auto oder hüüser mit wenig fenster. alles i allem isch es da z kalifornie aber besser, wie no z florida: immerhin hät s büro da fenster, au wenn en sichtschutz ziemlich viel liecht nimmt (konkurenz chönnti ja was abluege!?), s ässe dunkt mi chli gesünder und allgemein d lebensqualität höcher.

was magic leap macht, bin i no gfräged worde. weiss nid, wieviel ich dadezue überhaupt säge dörf. aber ich denke allgemein bekannt isch, dass mir es grät probiered baue, wo bim benutzer bi de wahrnemig vo sinere umwelt d grenze zwüsched de “reale” und de computer generierte welt verflüssed. mir reded drum au vo “mixed reality”.

dani Mon, 02/27/2017 - 06:46

Tags

reise

magic leap onboarding

Add new comment

magic leap

dani — Thu, 23 Feb 2017 01:51:34 +0000

magic leap

wenn viellich au nid ganz en magische sprung, denn doch wenigstens en guete karriereschritt: sit anderthalb wuche schaff ich bi magic leap.

innerhalb vo dacuda händ mir's scho länger gwüsst, klar. doch säge händ mir nüt dörfe und solang nid alles rechtschräftig gsi isch, isch es ja au nid ganz sicher gsi. so isch d erliechterig denn bi allne gross gsi, wo de schritt gschafft gsi isch und s redeverbot gfalle isch (20min). das allerdings nur beschränkt, gilt doch magic leap als eini vo de verschwiegenste firmene überhaupt.

a dem mäntig (20.2.) sind mir, s ganze ex-dacuda und neo-magic-leap-züri-team uf miami gfloge. am gestrige zieschtig und hütige mittwuch händ mir üses neue hauptquartier in fort lauderdale bsuecht. i diverse vorträg händ mir viel über üse neui arbeitsgeber erfahre und sind au in gnuss vo diverse demos vo prototype cho. das hät chli e idee gä, wo d reis vo magic leap ane ga söll. produkt händ's schliesslich no keis uf em markt. das wiederum git üs d chance bereits a ihrem aller erschte produkt mit z schaffe und quasi “vo arang a” debi z si.

vo florida sälber händ mir aber leider nüt gseh, abgseh vo zwei restaurant, eme hotel und gfühlt unendlich viel strasse, alli mindestens drü spure breit. s programm isch würklich voll gsi und am schluss vo üsem zweite tag sind mir direkt vo de letschte demo an flughafe fort lauderdale gfahre. vo deht us gaht d reis wieter uf kalifornie, wo's computer vision team vo magic leap di hei isch. deht werded mir über zwei wuche bliebe, üsi neue gspänli kenne lerne und wohl au üsi genaue tätigkeitsfelder definiere. so, dass mir nach üserer rückkehr uf züri parat sind, s schwiizer r&d center vo magic leap z starte.

dani Thu, 02/23/2017 - 02:51

Tags

reise

magic leap onboarding