dies und das

bike to work 2017

dani — Sat, 01 Jul 2017 19:04:08 +0000

bike to work 2017

da ich bi mine letschte drü bricht bike to work scho erwähnt han, schrieb ich jetzt da no en ganze bitrag zu dem thema. immerhin hät's mich de ganzi letschti monet beschäftiged. im wahrsten sinne des wortes. ich bin nämlich schlussendlich fasch 54 stund im sattel ghöckled. das hät mich 756km wiet bracht und ich han total über 8300 höhemeter bewältiged und lut biketowork.ch 109kg CO2 igspart. das mit 13 mal durch's sihltal is büro z fahre, je vier mal über de albis und d buechenegg vom büro hei. es wieters mal bin i am fuess vo dene zwei berge dur en platte gstoppt worde und eimal han i de versuech unternoh mit üse berner bi sinem (eimalige) bike-to-home z unterstütze. in sursee han i aber müesse das unterfange abbreche, mir wäred nüm rechtziitg uf bern cho, dass ich no zunere "bruchbare" ziit wieder di hei gsi wäri. da's en tag unter de wuche gsi isch, bin ich vo sursee via luzern uf zug, was aber immerno über 90 km ibracht hät.

es paar "roti pünkt" hät's im kalender dennoch gä: am zieschtig bin ich direkt vom schaffe is ITL-training (usfhart über 40km) und han drum nid chönne mit em velo is büro (zu viel gepäck). dasselbe giltet für s certina inline race (fritig, 9. juni). wenn me defür die trainings (4x40km), s cir und de linthmarathon (21km+41km), sowie de zytturm triathlon (40km) irechnet, chumm ich im juni uf knapp 800 velo- und über 200 inline-kilometer. was es total vo über 1000km sport ergit. mit dere extreme schönwetterphase hät's unglaublich spass gmacht! dennoch bin ich jetzt aber nid bös, dass i nächst wuche wieder in kalifornie bin (brueflich) und z'friede sie muen, wenn i überhaupt einmal (oder zweimal?) e chli sport mache chann.

bike to work	anzahl	km	hm	Ø ziit	bestziit
sihltal	13	30.8	235	1:06.21	1:03.17
bike to home	anzahl	km	hm	Ø ziit	bestziit
albis	4	28.3	426	1:14.48	1:11.06
buchenegg	4	33.6	542	1:26.37	1:25.09
andere weg	2
total	velotäg	km	hm	ziit	CO2 gspart
	16	757.8	8330	53:24.13	109KG

dani Sat, 07/01/2017 - 21:04

Tags

sport

dies und das

Add new comment

tapetewechsel

dani — Sun, 18 Oct 2009 21:59:04 +0000

tapetewechsel

mit em skating-saisonendi hät nid nur di sportlichi pause agfange, sondern au e chli es neus läbe.

es isch scho länger es offnigs gheimnis gsi, dass es mir am vorherige arbeitsort nüme so guet gfalle hät. de erwünschti job-wechsel hät jetzt statt gfunde und no es paar wieteri veränderige und neui abentür und useforderige mit sich bracht. denn: min neue arbeitsort isch in bern! am institut für informatik und agwanti mathematik tuen ich i de "Computer Graphics Group" i de nächste ziit en neue algorithmus zum entzerre vo wietwinkel-bilder implementiere. de arbeitsvertrag isch vorerscht uf es halbs jahr usgleit, allerdings mit em hintergedanke dra aschlüssend deht e diss z schriebe. d legi und de status vom PhD-student han ich innerhalb vo de uni scho. ;-) damit ich nid jede tag vo züri uf bern und zrugg fahre muen, han ich mir in bern no e zweiti wohnig gsuecht. au i dem punkt bin ich recht erfolgriech gsi: ich han vo de füf betrachtete wohnige min favorit übercho. nid ganz 20 fuessminute vom institut entfernt und mit blick uf s bundeshuus chann ich mich ab sofort vo lange arbeitstäg erhole. natürlich hät nid alles nume vorteil. so wirde ich mich in zuekunft mit em sportangebot vo de uni bern z'friede gä müesse. chlises biespiel gfällig? cycling stunde in bern: maximal vier pro wuche. und im asvz? ällei scho i de polyterrasse bis zu vier pro tag. defür isch in bern inline skate im angebot. am meiste vermisse wird ich aber wohl d rolling frogs und di sporadische bsüech im training vo de langnau stars.

min neue arbetswäg

dani Sun, 10/18/2009 - 23:59

Tags

dies und das

Add new comment

wk, wuche 3

dani — Fri, 26 Jun 2009 21:50:35 +0000

wk, wuche 3

sunntig, 21.6.09
18:00 irucke.
20:30 abfahrt nach irgendwo. oder eher is nirgendwo. deht händs üs bi me buurehof abgsetzt. de fahrer isch natürlich wieder abghaue. mir händ uf em heubode oder sowasem üs für d nacht dörfe parat mache. aber wohl immer no besser als bivakiere, denn chum acho hät s afange regne...
22:30 ich wirde uf d wach gschickt und churz druf abe abdetachiert. z füfte fahred mir is ungwüsse. am ort acho heissts, mir füf seiged für de treffpunkt verantwortlich. ich han en wachplan müesse schriebe.

mäntig, 22.6.09
00:00 offizielle beginn vo minere schicht. usstaffiert mit charte und funkgrät sitz ich also deht. d charte hät de vorteil, dass s "nirgendwo" en name überchunnt: schlatt. genau gno bini scho am viertel vor 12i deht gsi und han mit em alami, wo vor mir wach gha hät, plaudered. und er isch netterwies no bis am eis bliebe und hät mir gsellschaft gleisted. zum glück, denn zum läse isch es z dunkel gsi. aber es hät immerhin es dach gha.
02:15 kei ablösig erschient. uf mis nahfräge hi stellt sich use, dass de wachplan gändered worde isch und mini gruppe jetzt a) au anderi wachpöste muss übernäh und mir b) jetzt drü-stunde-schichte händ. so han ich nomal 45 minute früre und usharre dörfe.
09:00 di nächsti schicht am treffpunkt. aber die vo de igangakontrolle händ s nid im griff. statt mich am viertel vor 9i z wecke, wecked s mi gar nid und ich wache am 10 ab uf, wil einigi anderi ufgstande oder go schlafe sind. schlussendlich bini gege di halbi 10i deht gsi. ohni z'morge natürlich.
12:00 ablösig. endlich! es isch nämlich no recht chalt gsi, wenn d sunne nid gschune hät. und d wolke händ dominiert! immerhin händ es paar kollege für mich im volg posted. so hät s doch no was z ässe gä.
irgend wenn hät sich die üebig irgendwie ufglöst. mir händ s züg packt und niemer hät gwüsst, wie s wieter gaht.
16:00 abfahrt in richtig waldstatt. d lüt vo üsem standort sind i zwei gruppe iteilt worde. ich wohl i di besser, nämlich ebe i die wo zrugg hät chönne. nach enere stund fahrt bini denn no schnell am funkgrät (se 240) instruiert worde. denn isch es ziit für s nachtässe und au bald für s schlafe gsi.

zieschtig, 22.6.09
02:00 min erste isatz als uem. z funke hät s i de nacht aber nid viel gä. so unterhalted mich de blick, s iPhone (blocked, level 93) und s computer-graphics-buech (siete 200) bis am 5i.
12:15 bini ufgstande. ufgwacht bini paar mal wo anderi ufgstande oder wieder cho sind. aber am 12i isch es ziiit gsi, zum ufstah und z'mittag ässe. grad no rechtziitig, zum mitübercho, dass min zug go bade gaht. eigentlich hett ich am 2 wieder vor s funkgrät sitze müesse. jetzt aber s zweite. mit chli guetem zuerede hät er sich bereit erklärt, die schicht ällei z mache. er isch ja schliesslich en usbildete funkter.
13:10 abfahrt in säntispark. gueti zwei stund wasser, plausch und spass händ üs erwarted. han mir das bad zwar spektakulärer vorgstellt. so händ mir di einti rutschbahn halt sälber spektakulär gmacht i dem mir s zehte, oder meh, uf s mal abe sind und üs i de zwüschehalt wieder gsammled und "gstaut" händ. wo e badmeisterin cho reklamiere isch, händ mir e grad ga müesse.
16:30 abfahrt nach appezell. deht wird geld organisiert und im spunte ziit überbrückt.
18:00 füehrig dur d brennerei vom "appezeller alpebitter". sie mached aber au no diverses anders. über vodka und tequilla bis hie zu sirup und tee. a d füehrig aschlüssend hät s natürlich no e degustation gä. alpebitter isch nid so mini sach. meh de apezeller liquör. au vodkas händ s gueti gha. zum schluss sind mir in es reschti go z'nacht ässe.

mittwuch, 24.6.09
07:00 av. nur hät das vo üsem zug glaub niemert mitübercho. si händ üs am 7i zum bett usgholt. am av bin ich kei minute gstande und denn is mat mag gschickt worde. anschienend fangt s abgä vom material bereits hüt a!?
ca. 10i isch es verbie gsi mit de herrlichkeit: all händ sich uf em av-platz versammle müesse und ihres züg uslege. bis am 12i isch durchsuecht worde. es hät es rsg (Reizstoff-Sprüh-Gerät = pfefferspray) gfehlt. am 12i isch üebigsabbruch gsi. s ding wo unter de waffebefehl gaht, isch zwar nid füre cho, aber d militärpolizei hät kei ziit gha zum verbie cho... also: zämepack und go z'mittag ässe.
nomittag: betätige ich mich wieterhin im mat mag: zehlä und bündle. defür muss i nid mit an fahnetürk. so bini um mini vorussichtlich letschti fahne-abgab umecho. defür han ich no chli chönne zueluege, wie de roger federer en wietere gegner in wimbledon usenand nimmt.
19:30 av. ich stahne denn aber no unter de duschi. aschlüssend kompanie-abig. d chuchi grilliert für üs steaks, dezue git s 4 salät und brot. später no bananesplit, uf wunsch au ohni banane. am halbi 12i isch offiziell schicht.

dunnschtig, 25.6.09
06:00 tagwach. es isch aber es böses erwache gsi: hals- und ohreweh vom feinste. das bedüted meistens gschwullni lymphdrüese und isch en vorbote vonere chranked.
07:00 av. es git diversi wema-vorbereitige z treffe. d lüt müend in en personal-pool go warte bis es gholt werded...
08:00 ich entscheide mich, zum wieder go liege z ga. isch sowieso s besti für mini gsundheit.
12:00 mittagässe. wecker sei dank, verschlaf ich s nid.
13:30 av. nomittagsprogramm: abgä vom restliche cor mat, i minem fall de mutz und d schlafsackhülle. nach me wili dusse umesitze und ziitig läse bini denn vom 4i bis am 6i wieder anegläge. denn go z'nacht ässe.
19:30 av. wohl s letschti mal militär: gfühlt d helfti vo de kompanie hät nomal zrugg müesse, go s beret hole. denn hät s av doch no statt finde chönne. abig programm: züg putze, abgä und ilade. de rest in "pool". uf em wäg deht ane hät de kü-che de kolleg und mich id chuchi gholt. deht händ mir bis nach em 9i no gholfe abwäsche und putze. aschlüssend dusche und packe.
22:30 nachtruhe.

fritig, 26.6.09
04:30 tagwach. nach gfühlt zwei stund schlaf. bin jedefalls am viertel ab eis no wach gsi. immerhin, kei hals- und ohreweh me!
05:30 av und planeti abfahrt
06:15 effektivi abfahrt
07:40 akunft in winike bi uster. deht material ablade.
09:20 mich brucheds als eine vo de erste nüme. de wk isch jetzt also glaufe. was es no z mache git isch warte, warte und nomal warte, bis di andere fertig abglade und abgä händ, bis fertig abgrächnet isch, bis mir hei chönnd.
14:55 es chunnt bewegig id sach. de warteruum wird putzt und gruumed. s problem debi: dusse rägnet s in ströme. sold wird verteilt, eo-schii und dienstbüechli. sofort d kontrolle und d nachrechnig: 118 wk-täg sind gleisted. es bliebed no 12!
15:30 abtrette! endlich. hät ja nomal ewig dured. und de 15:39-bus hani denn au no grad verpasst. schlussendlich bini am 5i di hei.

dani Fri, 06/26/2009 - 23:50

Tags

dies und das

Add new comment

Kommentare

Gratuliere zum Abschluss vom jährliche Müehsal... Na 12 Täg, das isch zverchrafte, da gasch nächscht Jahr ja scho fasch gern! :)

Das schint ja wieder e bunti Wuche gsi si! Nachtwach, umehänge, seckle, chrank gsi, und im Hallebad bewiese, dass mir di bescht Armee vo de Wält hand. So richtig dureorganisierts und zackigs Militär...
Hauptsach, es isch jetz verbii. Gratuliere.

ja, uf s nächschti jahr, bzw. de nächschti wk freu ich mich würklich fasch scho! wobie, am allerliebste wär ich jetzt no zwei wuche länger bliebe und hätti s den für immer hinter mir!

Add new comment

wk, wuche 2

dani — Sat, 20 Jun 2009 20:37:59 +0000

wk, wuche 2

di zweiti, meist müesahmschti, wk-wuche. oder andersch ume: die total viertletscht.

sunntig, 14.6.09
23:30 irucke. info für di nächste täg: de zug wird i vier gruppe ufteilt. jedi gruppe gaht jewiels für 8 stund uf st. galle und hät nacher 24 stund frei...

mäntig, 15.6.09
5:30 tagwach
6:45 bereit für d verschiebig uf st. galle. am 7i sind mir öppe deht gsi und vor verschlossener tür gstande. es isch ziemlich genau 8i gsi, wo ich d sicherheitskontrolle passiert han. chum drinne, bini au scho wieder am penne gsi. :-)
am viertel vor 10i hani wieder ufstah müesse. es git anschienend no en wietere standort. so händ mir im strömende räge müesse material ilade. zersch aber no isch en usflug uf s dach agseit gsi, zum deht öppis z hole und di ufgstellte schüsslene z kontrolliere...
16:00 ablösig. mir chönnd vo st. galle abreise. parat im duro müend mir aber no us irrgend me grund uf d abfahrt warte.
am halbi 12i han ich mich denn uf de weg is bett gmacht. 50 siete han ich im computer-graphics-buech gläse und dennoch gnueg ziit gha zum plaudere, schlafe, smsle und so wieter und so fort.

zieschtig, 16.6.09
6:00 tagwach
7:00 en aschiss, wil anschienend es av gsi wäri. und das uf üebig!?
7:30 verschiebig uf st. galle. wäg em zuesätzliche standort hät sich üsi pause vo 24 uf 16 stund verchürzt. in st. galle acho bin ich als erschts wieder go liege. gege di 10i hät mi de wachmeister gweckt: di andere seiged im kaffi, ich müssi drum ihn vertrette. er isch uf s dach go d schüssle richte...
um d mittagsziit hät denn d vermittler-software müesse aktualisiert werde. und ich han au no uf s dach müesse. aber d schüssle isch no genau so ok gsi wie vorher...
16:30 isch denn d ablösig cho. öppe e halb stund z spat. denn sind mir zrugg uf waldstadt, wo ich endlich in ruhe han chönne läse. s total vom zieschtig: 45 siete.
19:30 av. es paar mitteilige. das war's. nächste treffpunkt: halbi 12i.
23:30 verschiebig uf st. galle. inere andere unterkunft, i de nächi vo üsem "isatzgebiet" dörfed mir jetzt übernachte. warum isch nid so klar. eini vo de lächerliche begründig für die züglete isch d benzinersparnis, wil de shuttle wäg fallt. wenn me de verschiebigsufwand und all di andere sinnlose (panzer-sprütz-) fahrte in betracht zieht...

mittwuch, 17.6.09
am 7i hät mi s iPhone gweckt. i dere lässige unterkunft wo mir mittlerwile sind (schönau) hät s kei z'morge gä. sind denn also z fuess ad mingerstrass, wo üse "arbeitsplatz" gsi isch. deht isch d höll los gsi. i de nacht isch di einti verbindig zämebroche. d richtstrahl schüssle isch kapputt gange. de rescht vom morge händ mir mit organisiere und ustusche vo de schüssle verbracht. am 11i han i mi denn usklinkt und bin wieder go penne. am viertel vor drü händs mi gweckt. :-)
16:00 d ablösig isch cho und mir sind uf direktem wäg id badi! hät in st. galle no es schöns freibad mit me 50m meter becki. da isch de nächsti crawl-kilometer fällig worde. so han ich mir d pizza, wo mir im aschluss i de pizzaria gässe händ, redlich verdient.

dunnschtig, 18.6.09
8:00 hät üsi schicht in kp ter reg 4 wieder agfange. natürlich hät s wieder öppis neus gä: eine vo üs hät uf d eist (= einsatzstelle) müesse. nach dem eine vo üs gipfeli und schoggi posted hät, bin ich denn uf d eist. stand bim z'mittag: 2 1/2 h det, 1 telefon abgno.
14:30 endlich isch de spuck verbie: de befehl zum abbreche isch itroffe.
z'nacht hät s denn wieder in waldstat gä und (wichtig!) für mich au no e duschi.
19:00 s nächsti abentür fangt a: jetzt isch würklich chrieg. mir verschiebed uf ebnat-kappel, wo mir gfächtsmässig usstieged. zweimal bis es klapped. e wach wird ufzoge und so wieter. s ganzi nennt sich en bereitschaftsruum, i dem mir uf de nächsti isatz wartet...

fritig, 19.6.0
00:30 di nächsti wach schicht. han mir en guete poste usguecht: mit dach und liecht. s liecht hät nid so sehr viel bracht, wil ich eifch z müed zum läse gsi bin. aber s dach isch bim heftige gwitter-platzräge wo während minere zwei-stunde-schicht dure isch, ziemlich nützlich gsi.
8:30 di nächsti wach. han mir wieder de iiwiesposte am bahnhof usgsuecht. de hät es dach und ich han mir wieder ruhe zum läse erhofft. de tag dur isch aber chli meh los gsi. vor allem am "drive-in-kiosk" (isch recht erstuunlich, wieviel lüt mit em auto an kiosk gönd ihri zigis oder d ziitig go poste!). zudem bini au z müed gsi zum läse.
11:20 nach 50 minute überziit isch denn d mäldig cho, dass ich zrugg chann. mir händ de bereitschafsruum verlah und... richtig! sind zrugg uf waldstat go z'mittag ässe. schön händ mir benzin gspart!
14:00 material und mannschaft sind uf zwei 6dm verlade... nach langem warte sind mir irgendwo anegfahre. denn händ mir en gfühlt ewige halt gmacht. im strömende räge isch niemer vom laster gstiege. nach me wieli sind mir uf de mosberg wieter gfahre. im hotelresort mosberg händ mir halt gmacht. i de tennishalle schlafed mir hüt nacht. im hotel händ mir de vermittler abglade. wärend vier de ufgstellt händ, han ich mich in regemantel ghüllt und bin mit es paar andere go d richtstrahlschüsslen ufstelle. schlussendlich händ mir s zweite zwei statione ufbaut. nach em z'nacht händ mir z dritte di beide leitige zoge. und denn händ üsi füess endlich us de nasse schuhe und unter di edel tennisclub-duschi chönne.
22:00 endlich wieder schlafe!

samstig, 20.6.09
3:00 ich müssti uf d wach, ghöre aber de wecker nid...
6:45 ich verwache und stelle fest, dass ich verpennt han. han eifach s iPhone nid ghört. de hirt, de hett ich müesse ablöse, hät gmeint, ich hetti ihn sowieso nid ablöse chönne, wil e tür gschlosse gsi isch. er isch bis am 5i am morge igschlosse gsi.
10:00 bini wieder ufgwacht. nach me gmüetliche z'morge isch am 11i vermittlerwach agseit gsi. deht isch chli was glaufe. so hani chli im imfs-netz umetelefoniere chönne.
14:00 wachablösig. denn mis züg zäme packe und uf de beginn vom urlaub warte...
17:15 di ander gruppe isch us em urlaub zrugg und mir chönnd de fahrer wo s bracht hät devo überzüge, dass er üs uf gossau (sg) an bahnhof bringt.
18:19 fahrt de zug uf züri.

dani Sat, 06/20/2009 - 22:37

Tags

dies und das

Add new comment

wk, wuche 1

dani — Fri, 12 Jun 2009 21:37:17 +0000

wk, wuche 1

es isch min letschte ganze wk. und somit di letschti glägeheit, emal fest z halte, was mir deht eigentlich so de ganzi tag lang mached. isch es würklich so sehr nüt?

mäntig, 8.6.09
10:00 irucke, material bezie, better bezie, ipuffe...
11:45 mittagässe
13:00 besammlig. bis am zwei gemeinsam zwei theorietests löse. denn bis am abig am halbi 6i zimmerornig erstelle...
17:35 zimmerordnigkontrolle: "schuhe! schuhe müend use!" d feldweibelin und de kadi sind gange und d schuhe sind bliebe, wo s gsi sind...
nach em z'nacht hät s s erschti hv gä. 225 adas sind igruckt! aschlüssend es kadi-stündli mit infos zum WK. denn en film über integrali sicherheit (=dateschutz, i dem fall zumindest) und e superchurzi repetition über san dienst. H4 und ABCDE sind im schnelldurchlauf besproche gsi. am 9i isch de tag verbie gsi
22:30 befohleni nachtruhe

zieschtig, 9.6.09
04:30 tagwach
05:10 av. iistah i 8er-kolonne. i 4er kolonne uf de huusberg laufe, verschwitzt dobe acho und denn i de chalte morgeluft stramm stah. am 6i isch d fahneübergab gsi mit grosse worte vom nick (bat kadi)... am halbi 7i sind mir zrugg gsi und händ uf s morge-ässe am halbi 8i dörfe warte.
08:20 av. i üsem zug sind 20 vo 36 awesend gsi... aschlüssend hät mini gruppe sani dienst gha. es paar verbänd und öppe drüviertel stund später isch wieder warte agseit gsi... mir händ en computer unterstütze lehrgang über integrali sicherheit müesse mache. aber es hät z'wenig compi gha und s programm isch sicher bi jedem eimal abgstürzt und er hät nomal müesse afange. so bin ich erscht nach em 12i demit fertig worde und han so leider, leider s schuma-putze verpasst, wo uf di 11i planet gsi wäri.
13:30 irgendwie isch es denn wieter gange. nach me stückli laufe sind mir i me lagerruum acho, wo mir üsi schüssle und vermittler usprobiert händ. nach de viere isch das denn au gmacht gsi, obwohl mir fasch nüme langsamer mache händ chönne. aschlüssend bini s erschti mal id beiz i dem wk.
am abig hät de bat-kadi und de stab no e grossi red ghalte. in etwa s gliche wie letscht jahr, wie jedes jahr.
am 9i händ mir denn nomal id beiz chönne.

mittwuch, 10.6.09
6:00 tagwach, z'morge ässe.
7:00 verschiebe is breitfeld, e schüssalag. deht umestah und warte bis es los gaht. als waffelose bin ich natürlich zersch emal überflüssig gsi. denn han ich aber wenigstens no e usbildig am pfefferspray übercho. nach de 9e wäri das denn aber au verbie gsi. denn isch wieder mal s buech und chli döse dra gsi...
13:30 fach dienst isch uf em tagesbefehl gstande. am 2 isch denn de lefti cho cho säge, dass mir bis am halbi vieri mache chönned, was mir welled. angesichts vom super wäter hät sich d mehrheit für d badi entschiede. han 1km gschwumme. so öppe. isch i me 33,3m-becki no schwieriger zum zähle als i me 25m.
am viertel vor vieri sind mir denn irgendwo ane gfahre zum föteli für uswies z mache.
18:50 av und aschlüssend fak nachtässe.

dunnschtig, 11.6.09
6:00 tagwach
7:00 persone und material ilade. am 8i hätted mir im breitfeld si sölle. abgfahre sind mir am... 8i. deht acho sind mir i de fahrzüg hocke bliebe. zum glücke, denn usse isch en heftige platzräge abe. am viertel vor 10i isch de wachmeister cho und hät verkündet: am nomittag am 2 gaht d üebig richtig los. go z'mittag ässe gönd mir aber nomal zrugg uf waldstadt... unterzwüsche sind no d jass-fähigkeite zum zug cho.
13:00 erneut abfahrt. wieder in bereitschaftsruum, denn aber würklich wieter uf st. galle. deht hät s für mich denn aber au nid meh z tue gä, und so han i de nomittag wieder nur mit läse, döse und hänge verbracht.
uf s z'nacht sind mir zrugg uf waldstadt, wo mir de abig "zur freien Verfügung" gha händ: läse, basketball spiele und im spunte sitze.

friitig, 12.6.09
6:00 tagwach.
6:45 abfahrtsbereit. verschiebig uf st. galle mit me chline detachement. uftrag deht? keine. nach vier stund schlafe und läse sind mir nach de 11e wieder zrugg uf waldstadt.
12:30 wieder parat stah, das mal im usgänger und für eimal für öppis sinnvolls: bluetspände. 20 vo 120 potentielle spänder sind effektiv gange. so isch d sach schnell erlediget gsi und mir wäred frühe parat gsi, zum hei gah. aber de feldi, bzw. di feldi hät no zimmerordnig z beastande gha. hät üs ein zug, sprich ä halbstund kost. aber isch spötischtens, nach dem mir gange gsi sind, au egal gsi.
apropos gange gsi: wo öppe zwei drittel vo de kompanie gange gsi sind, nur die langsame und die wo wie ich no es cola am automat uselah händ, ume gs sind, isch de choch no mit de sanwichs und de getränk für üs ufküzt... susch isch d chuchi aber sensationell!

dani Fri, 06/12/2009 - 23:37

Tags

dies und das

Add new comment

Kommentare

jo also liebe gfreite daniel do, bi derä früehnä tagwach wo n ihr händ zum all das gschiide züg z mache, wo du beschriibsch, do wachst mini ehrfurcht vor de soldate und ganz bsunders vor dinem selbschtlose iisatz für's vaterland. ich druck dir de tuume, dasses au die wuche so sinnvoll wiitergaht und du denn am sunntig fascht truurig über de underbruch as ränne in züri chunnsch :-)

Ich han jetzt grad welle mathematisch korrekt berechne wie d Relation vo sinnlos zu sinnvoll verbrachter Ziet i dere WK Wuche usgseh hät, da isch min TI abgläge. Aber subjektiv gseh, gsehts schlecht fürs Militär us ;)

Add new comment

meile-züri - eifach

dani — Fri, 24 Oct 2008 22:12:59 +0000

meile-züri - eifach

mini neui adresse luutet jetzt:
Otto-Lang-Weg 5, 8044 Zürich.

&spnmittwuch, 17. september, 15:22. mis iPhone schälled. wer stört denn jetzt bim schaffe?
hallo?! - da isch fürer, abz - ... ach so, ja, grüezi. jetzt isch de zwänzger abegheit. - sueched sie und ihri schwöster immer no e wohnig? - äääh... ja, ich scho... aber... muss claudia halt emal fräge...

dunnschtig, 18. september, 16:00. wohnigsbesichtigung - ohni claudia, sie hät müesse schaffe. han mir mühe gä, alles genau a z luege. aber uf was söll me denn eigentlich luege? jedefalls isch de idruck positiv gsi. d stube und s süd-zimmer händ voll überzügt: hell für s alter vom huus und charmant. au d chuchi, s bad und s zweiti zimmer han ich okay gfunde.

fritig, 19. september, telefonischi zuesag. yuppiiiii!

mäntig, 22. september. mietergspräch uf em abz-büro. mir händ nomal alles durebesproche und e foti gmacht, dass sich üsi neue nachbere uf üs vorbereite chönnd.

mittwuch, 24. september. post bringt de mietvertrag. han en sofort gläse und unterschriebe. denn bini uf de bahnhof grennt. de flüger uf berlin warted nid!

sunntig, 28. September. während ich z berlin gsi bin isch claudia a de schlüsselübergab gsi und hät d wohnig usgmässe und hät debi di erschti überraschig erlebt: s nord-zimmer isch viel chliener als s süd-zimmer. ich han s öppe glich gross gschätzt... mir händ üs druf geiniged, dass nach 25 jahr s emal ziit isch, dass si s grosse zimmer überchunnt. s plane vom zügle hät also chönne afange.

zieschtig, 30 september. am abig nach em schaffe hani afange züg verläse und chiste packe. a de folgende äbig isch es genau so wieter gange.

samschtig, 4. oktober. zügeltag! han natürlich am fritig bis spat i de nacht no gruumed und ipackt. so isch's mir vor cho wie z'mizt i de nacht wo am morge am 8i de wecker gschälled hät. am 11i händ claudia, de thomas, de papi und ich alles is lieferwägeli iglade gha. denn isch di grossi stund vom marcel cho: er hät die fuer bi üs um di engi kurve, zwüsched muur und baustell zirklä müesse. aber für en lastwagefahrer isch das keis problem. z züri händ mir no verstärchig vom rolf und em michi übercho. so isch relativ bald alles im zweite stock obe gsi, d better, min schrank und s büechergstell ufgstellt gsi. denn sind mir no, wenn me scho es grosses auto hät, is brockehuus. tatsächlich händ mir deht en tisch mit vier passende stüel gfunde und kauft.

mäntig, 6. oktober: sechs stund ikea und 772.80 franke ergänd schuhegstell für im gang und em stägehuus, e garderobe, en chuchitisch, en duschivorhang mit samt de stange und de ringli, es bettsofa, drü lampe, chischte für under s bett und no diverse chlichram wie chrueg, tischsettli, mehrfachstecker und so wieter und so fort.

zieschtig, 7. oktober. mietvertrag chunnt vo de abz unterschriebe zrugg.

mittwuch, 9. oktober. d tür- und briefchaschteschildli chömmed. jetzt sind mir also agschriebe.

samschtig, 11. oktober. endlich bin ich emal zunere tagesziit di hei, wo me lärme mache dörf. das nutzed mir und schmeissed d bohrmaschine a. duschivorhangstange, badtüechlistange, garedobe und spiegel werded ufghänkt.

sunntig, 12. oktober. en bsuech in meile. scho chli komisch, i dem schöne huus nur no bsuech und nüme di hei z si. aber viel ziit zum natruure isch nid bliebe. es hät no de ganzi pultinhalt inklusive eth- und sogar no gymi-züg verläse, verrumed, entsorgt oder zügled werde welle.

mäntig, 13. oktober. uf em chreisbüro de papierchram erlediged.

zieschtig, 14. oktober. mami und papi chömmed uf bsuech. d chuchilampene werded montiert und mir finded use, dass de telefonaschluss scho tuet. d nummere isch überigens no di glich wie z meile. hani chönne us em isdn-paket use löse und mit nä. au d wöschmaschine wird emal usprobiert.

samschtig, 18. oktober. wieder zunere nagel-ischla-taugliche tagesziit di hei. s james bond bild hät also au sin platz gfunde.

dunnschtig, 23. oktober. endlich chunnt s dsl-modem und de internet-aschluss chann in betrieb gno wärde. de wlan-router (time capsule) wird au grad bstellt! zudem bini nomal i de ikea gsi. s stube-chäschtli wartet no druf, zäme baut z werde...

fritig, 24. oktober. de bricht gaht is internet, wobi mini neui adresse offiziell bekannt wäri. es fähled no vorhäng, lampene und chlichram. aber es laht sich mittlerwile recht guet da läbe. nur schad, dass ich am mäntig is militär muen...

dani Sat, 10/25/2008 - 00:12

Tags

dies und das

Add new comment

Kommentare

Eigentlich muesch mal es Foti vom Wohnzimmer ietue, so wies jetzt usgseht, richtig schön und gmüetlich ;)

Add new comment

quatico solutions ag

dani — Mon, 21 Apr 2008 09:01:29 +0000

quatico solutions ag

nach dem ich i minem letschte itrag uf d ETH-ziit zrugg glueged han, lueg ich jetzt uf s kommendi jahr füre.

am fritig isch es nämlich so wiet gsi und es isch besiegled worde, was sich scho sit längerem abzeichnet hät. ich han mit quatico ein einjahresvertrag unterzeichnet. de weg deht hi isch nid ganz "straight forward" gsi, aber das isch jetzt ja egal. ab em erschte mai schaff ich für eis jahr bi und mit ihne. offiziell lauft s ganzi unter praktikum. ich finde aber, es bezeichnet d situation nid ganz richtig. de lohn und mis tue sind variable (aber anenandknöpft, logisch). je nach dem, ob ich i me monet meh lerne möchti und weniger a ihrne projekt direkt mitschaffe, isch es eher es praktikum, und wenn ich meh mir scho bekannti sache und für sie direkt nützlichi mache, denn isch es scho eher e festastellig.

ich bin mit dere situation sehr z friede. ich glaube, s team wo ich dri chumme isch es guets, au d lag i de stadt isch fasch scho optimal. so glaub ich es umfeld z ha, wo de istieg is "richtigi" läbe klappe sötti, wo ich ohni all zu grosse lieschtigsdruck aber no vieles lerne chann und trotzdem d chance han, gnueg geld z verdiene, zum mir e eignigi wohnig z leischte, wenn ich das will.

au dass de vertrag uf eis jahr befrischted isch, find ich ganz guet. denn irgendwie isch s thema ETH noni ganz abgschlosse. viellich gratet die ja bi quatico bald in vergässeheit. anderefalls han ich aber d chance, gege endi vo dem jahr nomal über e diss nah z denke...

ps. d foti zu dem artikel isch mis offizielli bewerbigsbild gsi. es isch vom felix am 1. märz i de ETH knipst worde. und die zeile hani grad au no i de ETH-bibliothek gschriebe...

dani Mon, 04/21/2008 - 11:01

Tags

dies und das

Add new comment

Kommentare

Super, freu mi mit diar. Hoffentlich häsch en guata Start und fühlsch dich möglichscht schnell nützlich.
Ts Malans freuen sich alli, wenn du di au no zeigsch und bi allen kurz verbiluagsch. En Gruess vo Martin, Heidi und Thomy und natürli vo Nani und Neni.
papi

Lieber Daniel
Gratulation zu deinen Erfolgen. Schön, dass es so gut läuft, der Abschluss an der ETH, der neue Job und jetzt den Wohnungswechsel.
Weiterhin Glück und Gelingen bei deinen Vorhaben. Bravo!
Herzliche Grüsse aus Malans

Add new comment

ETH ade!

dani — Wed, 09 Apr 2008 11:42:30 +0000

ETH ade!

nach sechsehlab jahr isch er cho, de erhabeni moment vo de diplomfiir.

am fritig isch d diplomfiir gsi, de letschti offizielli akt a de ETH, als mathi-student. guet, studente sind mir ja scho nüme gsi, aber d diplomfiir ghört no zum studium - so isch es gmeint gsi. bim informale teil, also bim aschlüssende apéro und ässe, bin ich denn mehrmals, meh oder weniger ernscht, gfräged worde, ob ich denn no e diss machi. die frag chann und will ich da nid beantworte. über mini nächi zuekunft git's denn en eignige itrag uf dere siete. jetzt isch zersch emal de moment zum zrugg z luege.

bevor s am schluss es happy endi gä hät, hät gschicht au a dramatik chum überbotni kappitel umfasst. langi bibliothekstäg und erfolglosi prüefige sind noni vergässe! gueti kollege, wo mir immer wieder gholfe händ, seigis mit moralischer unterstützig oder tatchräftiger nachhilf, händ mich über wasser ghalte. danke jan-andrea und michael! aber au min ehrgiz und de wille, selber entscheide z'chönne, händ gholfe. s zweiti erstuunt viellich. aber ich han nid welle nach enere nid bestandene prüefig ufghöre wärde oder gar usegrüert wärde. ich han selber welle bestimme, wenn mini ETH ziit oder s mathistudium fertig isch.

nach de siebe magere sind denn au no di siebe fette jahr cho. interessanti und verständlichi informatikvorläsige, plötzlich no paar (sehr) gueti note und e super schöni diplomarbeitsziit hälfed, d ETH in gueter erinnerig z bhalte. vor allem di letschti ziit, ohni prüefigsstress aber trotzdem mit spannende ufgabe, isch so schön gsi, das ich sofort no e zweiti diplomarbeit gschriebe hetti!

so verlahn ich d ETH mit em berüemte weinende und lachende aug. wobi, s lachende eigentlich meh es stolzes isch. oder wenigstens eis, wo z'friede uf s erreichti zrugg lueged.

update 10.4.08, 15:50 mittlerwile hät s d ETH gschafft und ihri offizielli gallery is netz z stelle. meh bildli git's also da.

dani Wed, 04/09/2008 - 13:42

Tags

dies und das

Add new comment

Kommentare

Danke für dia ehrliche Infos. Und no schöner, dass es au es lachens Aug geh hätt. Vor allem die lachende Auge sind bi miar us der Studiziit blibe und immer wenn du a Prüefig versaut häsch, sind au bi miar die mühsame Ziite mit Prüefige wieder cho. I kenna das beschtens und han öppe gliich vil Prüefige wiederholt. So bin au i froh, dass du jetzt andere Wäg suechsch und echli Distanz zu der ETH bruchsch. I wünsche diar e Stell wo du brucht würsch, wo diar gefallt und wo du frü di möglichscht wohltuendi und stärkende Ziita erläba kasch.
papi

Uh ich bin ja auch uf dem Foti ;) Wo ist Olivia? :D

Ach ja und ich bin stolz uf dich!

Add new comment

bettmeralp

dani — Mon, 11 Feb 2008 21:24:43 +0000

bettmeralp

nach drü jahr pause han ich endlich wieder mal uf d bettmeralp chönne.

di letschte drü jahr hät sich s immer ergäh, dass ich im februar, genau denn wenn de rescht vo de familie uf d bettmeralp isch, prüefige a de ETH gha han. so isch mis snobwoard jahrelang entüscht, ällei im chäller gstande. gester han ich s denn aber wieder füregholt und bin mit em uf de zug, dur de neui lötschberg tunnel und nach drüehalb stund uf de verschneite bettmeralp acho.

s erschti mal nach drü jahr bin ich hüt nonig so stilsicher uf em brett gstande. bis am übernächschte fritig, wenn mir weider hei gönd, wird sich das aber sicher gändered ha!

dani Mon, 02/11/2008 - 22:24

Tags

dies und das

Add new comment

uf zielgerade iboge

dani — Wed, 02 Jan 2008 15:01:46 +0000

uf zielgerade iboge

am zweite tag vom neue jahr scho vo de zielgerade z schriebe, isch scho chli komisch. aber de titel bezieht sich halt nid uf s jahr, sondern uf d ETH.

guet füf wuche han ich no ziit, bis ich mini diplomarbet abgäh muen und de lebensabschnitt "mathi studium" verbi isch. irgendwie chann ich das gar noni fasse und glaube! viellich han ich mich au darum bisher no praktisch nid um ziit denah kümmeret. jedefalls staht es jahr voller schwerer entscheidige mit zum teil grosser tragwieti a. aber ich freue mich druf! veränderige im läbe sind ja immer au chance.

s jahr wird mir aber nid nur im bereich vo job und wohnig neus bringe. es wird au das jahr wieder e "neui" inline-saison gä. uf die freu ich mich au, es nimmt mich wunder, ob ich vom short track training denn profitiere chann. au das wäri es novum, denn de winter isch de erschti, wo ich mich uf mit de schmale kufe uf s glattiis gwaagt han. und im hockey erwarted üs vorussichtlich neui gegner i me neu gschaffne cup. d verhandlige mit de RIHL, enere andere inline hockey liga, sind am laufe. di nächschti rundi händ mir für de 7. januar veriibart.

aber au s jahresendi wird kei truurigi aglägeheit si. erwarted üs doch en neue bond im november, erscht no eine mit schwiizer regisseur und schauspieler! und die toten hosen händ es neus album akündet. di (zueghörige?) tournee-date stönd scho fest. de erschti dezember isch drum i minere agenda scho dick agstriche, denn heisst s: machmalauter!

ich hoffe, dini ussichte uf s neue jahr sind hänlich guet. jedefalls wünsch ich dir alles gueti, glück, erfolg und e sturtzfreii inline-saison!

dani Wed, 01/02/2008 - 16:01

Tags

dies und das