kapstadt, 18. august bis 18. oktober 2001

ein monet später

dani — Sun, 18 Nov 2001 22:42:35 +0000

ein monet später

sid genau eim monet bin ich wieder i de schwiiz. so lang häts also dured, bis ich de kapstadt-teil vo miner website fertig gmacht han.

d bricht han ich alli, usser em letschte, in cape town gschribe. am afang han ich no zwei mal i de wuche ziit gha, eu z verzellä, was bi mir so lauft, spöter han ich mich uf eimal beschränke müesse. di hei han ich s jetzt nomal duregluegt, bilder igsetzt, verlinkt und korrigiert. natürlich han ich s nid inhaltlich korrigiert. nur uf rechtschriebefähler und all zu schwerfälligi und unverständlichi formulierige bin ich igange. es sötti ja en erlebnis bricht si, möglichst "live" und nid mit de einiges chüelere und distanziertere asicht vo jetzt.

natürlich han ich nid en ganze monet brucht, nur zum die paar brichtli nomal z läse. i de gallery han ich au gwürkt. sogar hauptsächlich eeht! jetzt findsch dö, ufteilt i drü kapitel, fasch 100 schnapschüss vo miner ziit im South Africa. han chli selektioniere müesse, da ich über 250 fotene gmacht han. aber au bis me 100 bilder agluegt hät (und comments gschribe!) dureds es wili. vorallem wenn me e langsami leitig hät...

au chartene vo cape town mit sea point, wo ich gwohnt han und id schuel bin, wie au vom ganze cape peninsula hät s gä. eigentlich wäred die ja scho planet gsi, bevor ich abgreist bin. aber d ziit hät denn nüme für ganz alles glanget. jetzt sind s aber da, und ihr chönnd eu no über d wäg wo ich zrugg gleit han und d lag wo ich gsi bin, (näch, sehr, sehr näch am meer) informiere.

au e link-sammlig zum thema cape town isch uf bestem wäg. allerdings muess ich de bereich zersch überhaupt emal no eröffne. wird aber demnächst de fall si!

jetzt isch aber fertig blablabla. möcht dich ja nid no länger uf d foltere spanne! stürz dich i die bricht und erleb mit mir nomal chli cape town! da isch dis virtuelli flug-ticket!

dani Sun, 11/18/2001 - 23:42

Tags

kapstadt, 18. august bis 18. oktober 2001

Add new comment

be back

dani — Thu, 18 Oct 2001 18:13:24 +0000

be back

letschti wuche, letschte tag, letschti stund, letschti minute und de rückflug...

eigentlich han ich eu scho am letschte sunntig wellä e nachricht hinderla. aber sowohl am sunntig als au am mäntig han ich vo cape town us nüm uf mini siete zuegriffe chönne. hät immer gheisse, "server not found" und sonigi spässli. so bin ich jetzt mittlerwile dihei (siehe ä statt ae, ö statt oe, ü statt ue) und tun mit hilf vo mim "diary" no vo mine letschte täg und stunde brichte, bevor ich tot müed i mis bett falle.

i de letschte wuche han ich vorallem die sache nomal wellä mache, wo ich vorher oft gmacht han und gnosse han. so bin ich im ganze no drü mal gsi go pool spiele. s letschti mal am letschte mäntig, am nomittag, da ich ja kei schuel me gha han. han au nomal de sunset gluegt (und gfötelet), am mäntig vo de 8te wuche.

vo de 8te wuche muss ich wohl d afternoon-classes no bsunders erwähne: am zeischtig bin ich de einzigi schüeler gsi, so bin ich mit de susan, de lehrerin, eifach an beach gange. mir händ deht chli greded und sind denn uf di drü wider zrugg id schuel. heisst ja conversation class, oder. :-)

am dunnschitg sind mir mit de nomittags-klass nach stellenbosch gfahre, händ üs mit me feine mittagässe verwöhne lah (han springbock gha) und nacher händ mir no uf zweine "wine-farms" d wi probiert.

am fritig nomittag han ich gar kei schuel me gha, da d "schuel" am dunnschtig ja wesentlich me als nur 2 stund dured hät, händ mir das am fritig "kompenisert". han so am nomittag id waterfront chönne und han mir no e "springbok nude girls"-CD kauft. vo dene sind mir ja am samschtig voher am konzert gsi.

am samschtig, mim letschte wuchenend in cape town also, sind mir nomal an cape point und as cape of good hope gfahre. und das mal sind mir beides gfahre. nid vom eine zum andere glaufe, was ich recht schad gfunde han. in simon's town sind mir natürlich au nomal gsi, go pinguin aluege. also nomal, me muss da viellich no säge, dass ich de einzigi gsi bin, wo nid s erschti mal deht gsi isch. aber au in simon's town änd mir nid so glück gha. mir sind um d mittagsziit deht gsi. es hät fasch me touriste als pinguin gha. ich chann nur de früeni abig empfehle: denn häts (viellich) weniger touriste aber sicher me pinguin. die chömmed denn zum übernachte an land.

zrug in cape town sind mir i me guete restuarant gsi go ässe. für mich häts wieder springbok gä. dasmal aber warm, kocht. isch chli weniger guet gsi, als s rohi fleisch in stellenbosch. vorallem viel weniger zahrt. nach em ässe sind mir uf de signal hill ue gfahre und händ cape town by night bewundered. au da hät gulte: für mich isch s nid s erschti mal gsi, für di andere scho...

am sunntig isch nomal "flea market" agseit gsi und aquarium. ebefalls nueme zum erschte mal fuer mich. mir sind sogar no rechtziitig zum "shark feeding" deht gsi. aber die haie händ eifach kei hunger gha. isch also nid so spektakulär gsi. nacher hät s no e haferundfahrt gä, ebefalls recht unspektakulär, und denn no e shopping-tour i de victoria wharfe, em hauptgebäude vo de waterfront.

am mäntig isch de abschied denn scho sehr näch cho. wie atönt han ich am nomittag nomal pool gspielt im stones. am morge bin ich nomal i de city gsi, am "pan african market". und am abig sind mir us gsi go ässe. wie überigens am zieschtig au. aber zersch bin ich am zieschtig nomittag nomal a de waterfront gsi. ich han unbedingt no wellä em "wave breaker "entlang laufe, bis as endi. d see isch aber extrem rauh gsi und ich han uf halbem wäg e duschi kassiert. total patsch nass han ich das unterfange müesse abbreche und zrugg ga, packe und mich für di letschti nacht bereit mache. zersch häts no ostrich gä (strauss) und spöter händ mir no de schluss-drink i im lieblings-cafi, em news cafe gha. natärlich han ich de abig mit me "choclate desire" beendet.

am mittwuch häts denn gheisse fertig packe und abschied nä. isch mir bsunders i eim fall schwer gfalle. aber wiehnachte chunnt bestimmt! (sorry, isch en insider...) denn isch de flug uf em programm gstande. lang (9086km) und beschwährlich. ällei d strecki johannesburg-amsterdam hät 10:30 stund beansprucht! so bin ich denn hüt morge absolut tot müed acho. aber immerhin, wohlbehalte zrugg, was nid selbstverstänlich isch, wenn me in cape town gsi isch! aber es söll ja au i andere (amerikanische) städt mängisch chlinneri (oder grösseri) zwüschefäll gä...

dani Thu, 10/18/2001 - 20:13

Tags

kapstadt, 18. august bis 18. oktober 2001

Add new comment

up's only

dani — Mon, 08 Oct 2001 17:48:37 +0000

up's only

nomal drumcafe, nomal vacca matta club, nomal todes-strand und nomal hermanus

es isch maentig abig, ich chumme grad zrugg vom "sunset watching". di letschti ganzi wuche haet bereits agfange! es isch unglaublich, wie die ziit rennt! di 7ti wuche isch sowiet mal nid nid ganz so speziell gsi, wie anderi. scho gar nid am afang. d klass isch di glichi blibe und am maentig sind mir go pool spiele, wie so oft.

am zieschtig isch s wetter hammermaessig gsi, und mir haend mit de nomittagsklass, de conversation-class, entschide, dass mir an beach goend, go usi lektion abhalte. und ich han wieder mal muesse feststelle, dass d sunne da u huere starch isch. es hat mi blaended, wie d sau. han natuerlich am morge frue no kei sunnebruelle mitgno.

nach de schuel bin ich z fuess id waterfront gange, alles em beach entlang. waeri zwar lieber mit de skates underwaegs gsi, aber anyway, es isch huere schoen gsi. i de waterfront han ich kinobillet gholt. "the wedding planer". chann nume saege: langwilig. es haet glaub genau niemer de film guet gfunde, wie sich bim aschluessende bsuech im scottish pub feststelle la haet...

am mittwuch bin ich mittlerwile zum dritte mal im drum cafe gsi. es isch soooo was vo langwilig. falls emal uf cape town gasch, chann ich das nur empfehle, aber nach einem mal het me s gseh!

am dunnschtig abig bin ich mit enere nette dame im usgang gsi, mir sind go aesse und is imax. bin no nie vorher im imax gsi. de film isch so naja gsi, aber es isch scho no es erlebnis, die risigi lienwand.

am fritig sind mir mit usere afternoon-class id stadt. de tobi hetti e id stadt muesse und di ander wo no i usere klass gsi isch, isch gar nid cho. also sind mir grad mit de lehrerin und no em sebastian id stadt. han no paar souvenir kauft.

am abig haets denn abschied nae vom victor gheisse. nach me gmeinsame spaghetti aesse i de students residents sind mir mit ihm a e privatparty. oeppe fuef. all andere wo no deht gsi sind, haend mir irgendwo susch id stadt gschickt. die party isch aber nid sooo de wahnsinn gsi, so sind mir denn im vatta macca club gange. deht haends ues zersch nid ine lah wellaeh, da noni alli ganz 23i gsi sind, mir sind denn aber glich ine cho. am afang haend s no gieli musig gha, ziemlich min style, aber je laenger d nacht dured haet, je schlaechter isch d musik worde, resp. s isch vo trance oder schnellem house eher so chli in lahme haenger-house oder suschtigi disco-musik ueber gange. um di drue sind mir hei...

am samschtig abig sind mir am springbok nude girls concert gsi. uf hiewies vo de susan. tja, fuer einigi haets e boesi uebrraschig gaeh. mir sind sechs luet gsi. d vorgruppe isch no easy gsi. mir eigentlich zu easy, aber me haets choenne lose. d springbock nude girls haend denn aber recht gas gaeh! ich han s no geil gfunde, bin denn aber de einzigi gsi. :-) di andere haends eher als "organisierte laerm" empfunde. isch halt amig asichtssach. ich muss aber glaub mich mal no nach enere CD umseh, scho allei wil s e richtigi SA-band isch. waeri denn scho di 5. CD wo ich mir da chauffe... (3x Ramones und ei Clash)

am sunntig sind mir nomal uf hermanus. fange also wieder vo vorne a, mit de trips. jedefalls mit de guete. und hermanus zellt zu de guete sache! mir haend au wal gse. obwohl mir au dasmal bim "todesstarand" aghalte haend, han ich choenne foeteli mache. dasmal haend mir uesi rucksaeck gnueg wiet vom wasser waeg deponiert... (-> up's and down's)

aber schweinechalt isch es gsi! bedeckt un uuu huere winidig. waerend s in cape town bi groester hitz am strand gsuuled sind, wie me so ghoert haet...

plaen fuer di (letscht!!!) wuche sind pool spiele, logisch, cape point, wenn moeglich nomal aquarium und table mountain. das sind naemlich die guete sache gsi da, und die lohned sich, zweimal go a z luege. und di meischte luet sind deht noni gsi. scho gar nid die wo mir jetzt wichtig sind (isch)...

dani Mon, 10/08/2001 - 19:48

Tags

kapstadt, 18. august bis 18. oktober 2001

Add new comment

vier taeg, vier trips

dani — Sun, 30 Sep 2001 18:02:59 +0000

vier taeg, vier trips

Castle of Good Hope, Robben Island, West Coast National Park, Bloubergstrand and Sandboarding

die wuche han ich verdammt viel gmacht. eigentlich han isch scho am fritig mal wellae schriebe, dass es jetzt nid so viel uf eimal isch. aber irgendwie bin ich nid dezue cho...

de zischtig und de mittwuch sind sowiet normal verlaufe. am tag schuel und am abig usgang. am zieschtig kino ("a knight's tale", chann ich empfehle!) und am mittwuch pool (han no ziemlich guet gspielt).

am dunnschtig sind mir am nomittag mit de klass zersch dur s moslem-viertel vo de stadt glaufe (Bokaap), das isch no recht interessant gsi, wil d hueser ganz bunt sind. gar nid suedafrikanische baustiel. nacher sind mir is Castle of Good Hope. naja. isch en nette usflug gsi, aber ehrlich gseit, muss me fuer das nid uf SA cho, denn burge und schloesser han ich in europa, vorallem i de schwiiz, scho interessanteri gseh. uf em heiwaeg haend mir d Robben Island-Tour bueched und ich han no de Surfer zuegluegt. choennd ihr eu das vorstelle? hundert meter vor de "kueste" vo de stadt haets gnueg hochi waelle, dass me s riete chann. es git richtigi piplines, dur die s durefahre choennd. jedefalls di guete. ich han so lang gluegt, bis d sunne under gange isch und han so au no grad de sunneundergang mitkriegt.

am fritig sind mir denn am nomittag, logisch nach dem mir am dunnschtig bueched haend, uf d Robben Island. au die a z luege isch eigentlich nid so speziell. aber fuer SA isch es en historisch wichtige punkt. immerhin isch si es symbol fuer d apartheit, rassediskriminierig und all das wueschte zueg. au de Nelson Mandela isch verdammt lang deht gsi, zelle 5. und uese guide isch en ehemalige haeftling gsi. es isch scho no chli under d huut gange, obwohl ich nid ganz alles verstande han, wo d guide verzellt haet. aber isch viellicht au besser, dass ich s nid verstande han...

uf em heiwaeg, wiederum vo de waterfront us, han ich d surfer weider troffe und wieder bestund. und dasmal au no es paar fotene gmacht. ueberhaupt: ich han s gschaft, i 5 taeg drue film z fuelle. choennd also sicher si, dass es fruener oder spoeter no fotene i d gallery git, wo ebefalls zum thema "Kapstadt" ghoere werdet...

am samschtig haend mir wiederum es auto gmieted und sind in west coast national park gange. er isch bekannt fuer d blueme. und wil "flower-season" isch, haend mir sogar no me itritt zahlt. aber mal abgseh devo, dass mich d blueme nid sooo sehr interessiered, sind s au nid de wahnsinn gsi. isch aber trotzdem en schoene tag gsi. s wetter isch heiss gsi und mir haend diversi tier gseh, allem vora strausse. mir sind au a schoene beachs verbicho, haend a einem e pause igleit, um denn spoeter an naechste z ga. de "naechsti" isch aber en bsunders usgwaehlte gsi, wo zu uesem tagesplan ghoert haet. naemlich de "Bloubergstrand". De ghoert glaub no zu Cape Town. bin aber nid ganz sicher. jedefalls isch er bekannt defuer, das luet deht hi goend, go de sunset luege, was mir au gmacht haend. allerdings han ich de sunset nid soooo speziell gfunde. isch glich gsi, wie a de beachroad in Sea Point. aber was deht speziell gsi isch, isch dass me uf Cape Town uebere gseht. uf d city mein isch natuerlich, mit em Table Mountain im hintergrund. und das isch denn doch recht speziell. (-> picture)

huet, sunntig, sind mir gsi go sandboarde. muss saege, dass es nid so de wahnsinn isch, wenn me mal snowboard gfahre isch. klar es isch no luschtig, emal mit t-shirt und churze hose und snowboardboots ume z stah. aber das isch es denn au scho. d duene da sind z wenig hoch gsi, dass me lang fahre hetti choenne und fuerschi chunnt me au nid recht. de sand bremst viel, viel me, als de schnee. und nach jedem "run", muss me s brett neu wachse. so gseh, isch es nid so de wahnsinn gsi. aber ich weiss jetzt jedefalls no chli besser wie vorher, warum d luet zum teil vo SA saeged e welt i einem land. mir sind in etwa 1 stund gfahre, haend de table mountain no immer gseh vo wietem, und sind mitte inere chline wuesti gstande...

?? ->

dani Sun, 09/30/2001 - 20:02

Tags

kapstadt, 18. august bis 18. oktober 2001

Add new comment

cape point and cape of good hope

dani — Mon, 24 Sep 2001 13:11:19 +0000

cape point and cape of good hope

mir haend zwar starche wind trotze muesse, sind aber troztdem vom Cape of Good Hope an Cape Point "ghiked".

i de fuefte wueche (isch es tatsaechlich scho di fuefti gsi!?) isch nid so viel speziells glaufe. mir sind au de zieschtig is kino, mit em unterschied zu de andere mal, dass es dasmal ich organisiert han. am mittwuch und am fritig haend mir pool gspielt, sowiet mal alles normal.

am fritig haend mir denn leider, leider abschied naeh muesse vo de peta. das isch mit aller garantie die besti lehrerin gsi, wo mir da gha haend! sie verlaht aber Cape Town naechscht wuche und gaht uf israel. sie haet no feini, feini "sweets" bracht, wo wuerklich "yammy" gsi sind.

wie ja i de meiste bisherige wuchene, isch de samschtig de interessantischti tag gsi. d sunne haet in Cape Town gschunne, wo mir ues am nueni troffe haend. scho um die ziit haet me im t-shirt und de shorts choenne umelaufe. mir haend es auto gmieted und ues uf de waeg in suede gmacht. underwaegs haend mir i me schoene resti zmorge gaesse, mit enere "beautiful view to the ocean". aber je wieter mir gfahre sind, desto me haets gwindet und je schlechter isch s wetter worde. richtig schlecht isch es nie gsi. naja, es haet nid graegnet. mir sind denn irgendwenn in nationalpark vom cape cho, i dem mir zersch no chli umegfahre sind. ploetzlich gsehnd mir springpocks, spoeter no strausse und e riesigi schildchrot. wie sich s fuer gueti touriste ghoert, haend mir vieli foeteli gmacht. d japaner wo mir troffe haend, sind ziemlich di einzige laebewaese gsi, wo nid fuer es "picture" anehebe muesse haend. :-)

schliesslich sind mir am Cape of Good Hope acho. und wo mir us em auto gstige sind, haend mir ues als erschts emal hebe muesse. es haet u huere starch gwindet. wie ich spoeter erfahre han, us me reisefuerer, isch es normal, dass es deht winded. so 40km/h ghoert deht zum alltag. wobi s bis zu 120km/h ga chann. es sind wohl scho nid ganz 120 gsi, aber sicher me als di uebliche 40. es paar vo ues sind nid s erschti mal deht gsi, die haend bestaetigt, dass es abnormal fest windet.

em wind zum trotz sind mir de klippe entlang zum Cape Point "ghiked". (isch wohl uf duetsch wandere...) es haet sich au glohnt, denn es isch wohl es einmaligs erlebnis, wenn me schier vom waeg waegblase wird. und d landschaft isch scho recht speziell. die berge, wo praktisch senkrecht us em wasser raged und obe flach sind... jedefalls haets au da wieder es paar foeteli gae...

am schluss, nach dem mir aber sehr lang underwaegs gsi sind, sind mir denn froh gsi, wieder im winddichte auto z sitze. mir sind en andere waeg zrugg gfahre und haend uf em heiwaeg no im Simon's Town halt gmacht. deht haets nomal es chlises natur-reservat. i dem lebt e riiiiiiiiiisigi pinguin-koloni. me chunnt sich vor, wie im zoo. aber es isch andersch ume. es sind nid d pinguin, wo im gheg sind. es sind d mensche, d touriste, wo uf ighagete waeg dur de strandabschnitt laufed. aber a es paarne orte chann me au vom waeg waeg. so hann ich frei lebendi pinguin us enre naech vo viellich 50 centimeter choenne aluge. natuerlich haend mir wieder vieli, vieli bildli gmacht, denn die sind soooooo haerzig!

nach dem sind mir denn zrugg uf Cape Town, wo mir no us sind go znacht aesse. und nach em aesse sind mir, wenn mer scho mal es auto haend, no uf de signal hill ue gfahre. vo deht us haet me en wunderbare ueberblick uber Cape Town. und bi nacht, choennd ihr eu ja vorstelle, isch de no viel, viel schoener. millione vo chline laempli. au da han ich probiert fotene z mache. aber i de nacht isch das schwirig. d belichtigsziit isch lang, ich wiess nid ob s viellich nid verwaggled sind.

am sunntig isch s wetter denn ueberraschend schlecht gsi, entgege de wetterprognose. so haend ich und de tobi di planti hafe-rundfahrt gstriche und sind eifach so chli ad waterfront. vorallem in neu eroeffnete CD-lade, wo de groessti uf de suedhalbchugle sie soell. weiss nid ob s stimmt, aber ich weiss dass er riiiiiiiiiiiiiiiiiiiiiiiiiiisig isch. aellei d pop und rock abteilig isch scho so gross, wie di groeste laede in zueri. und denn haets nomal e ebe so grossi klassik abteilig, au no eini fuer jazz und eini fuer SA-musig. mir sind sicher ueber drue stund deht gsi. han mir denn e ramones-CD kauft, fuer 70 rand... (zur ziit isch 1 rand oeppe 18.48 rappe)

i de waterfront han ich mir no es billabong-t-shirt fuer knapp 20 CHF kauft und denn sind mir hei. ich han chopfweh gah und mich nid so guet gfuehlt.

huet maentig isch da une eigentlich en "public holiday". mir haend aber normal schuel gha, nur alles anderi isch gschlosse. han no immer chopfweh und fuel mich nid ganz fit. es paar goend go pool spiele, was ich au extrem gern wuerdi. aber ich weiss noni, ob ich dass au tatsaechlich chann. denke, es waeri besser, ich wuerdi nueme ga...

dani Mon, 09/24/2001 - 15:11

Tags

kapstadt, 18. august bis 18. oktober 2001

Add new comment

table mountain

dani — Mon, 17 Sep 2001 13:14:16 +0000

table mountain

di erschte frueligstaeg in kapstadt bringed mich bereits is schwiize. wie wird das denn, wenn s da richtig warm isch?

zersch no was chli anders: i de letschte wuche haet GMX einigi problemli gha und ich han oft kei zuegriff uf d mailbox gha. so bin ich jetzt recht im verzug mit beantworte vo e-mails. "please, don't get angry with me!" ich chann wuerklich nid jede trag dahi cho und probiere, ob s jetzt tut!

de letschti zieschtig isch wohl fuer all en denkwuerdige tag gsi. nur fuer mich ehrlich gseit nid so sehr. agfange haet er sogar extrem guet. i de stunde vo de peta haend mir reglige, dass waer duetsch reded, en rand zahle muss. mittlerwile haend mir recht viel geld gsammled und es isch ziit gsi, dass mir mit dem was mached. so haend mir i de mittagspause fuer jede en feine drink (smornoff ice oder baracdi breezer) und cream-donats posted. so soetti doch d schuel immer si. naetuerlich haend mir i de schuel gaesse, waerend de stund... (-> picture us de gallery)

nacher bin ich im internet-kafi gis und han uf CNN (da heats i jedem lokal en fernseh) live mitverfolgd, wie d flugzueg crashed sind. de rest vom tag isch vor em fernseh verbi gange...

am mittwuch isch das tehma nummer eis gsi und d lehrer sind wohl froh gsi, dass si sich keis thema haend muesse ueberlege, wo s mit ues bespreche choennd. :-) di einzig uswirkig fuer mich isch, dass de rand nomal chli gfalle isch. vo 20.45 rappe uf 19.8 oder so. und das isch guet, denn ich han muesse geld waechsle. mini travelerchecks. mindistens ei wuche fruener, als ich mir vorgstellt han...

am abig sind mir nomal is drumcafe gange, isch wohl nid noetig, dass ich das nomal verzelle.

am dunnschtig und am fritig haend mir pool gspielt. am fritig sind mri nacher aber no is news cafe. ich liebe das! es sind 17 anderi vo de schuel deht gsi und no ei lehrerin (peta) und e fruendin vo ihre. isch huere cool gsi. spoeter sind mir no in buena vista social club. was ich denn nueme so cool gfunde han.

am samschtig isch wieder super wetter gsi. scho am fritig isch es guet worde. so sind mir am samschtig de beach road entlag spaziert, im t-shirt und haend no was drunke i me resti mit blick uf s meer. und ich han hunger gha, wie immer da, und mir e portion calamari bstellt. yammy!

am abig isch wieder news cafe und buena vista social cafe agseit gsi, aber es isch irgendwie weniger cool gsi, wie am fritig. mir sind au nur 6 luet gsi.

am sunntig haend mir uf de table mountain welle. aber wo mir ues am halbi zwoelfi troffe haend, isch s wetter nid so sehr guet gsi. mir sind denn zersch mal uf de flea market. han au ikauft, under anderem es neus ohreringli. und i dere ziit, in etwa zwei stund, haet sich s wetter ufgheitered. so haend mir glich no uf de table mountain choenne.

ue sind mir z fuess. oh maaann! s zweiti mal wo ich da sport mache. es gaht uuuu huere steil durue. und de waeg isch buechstaeblich steinig. alles anderi als schoen praeparierti wanderwaegli, wie mir s zum teil i de schwiiz haend. mir haend immer wieder pausene ilege muesse. aber es haet sich glohnt. d ussicht obe isch fantastisch. uf de eine siete gseht me di ganzi innestadt vo kapstadt. und uf de andere siete gseht me bis an cape point abe. wuerklich "great, amazing, beautiful"! abe sind mir denn aber nueme glaufe, sondern haend d "cablecar" gno. und grad zwei ueberraschige erlaebt: einerseits isch s e schiwiizer firma gsi, wo die bahn baut haet und anderseits sind mir s erschti mal i me seilbaehnli gsi, wo sich draeht haet. jawohl. d plattform inne, uf dere me staht, haet sich draeht. so haet me en wunderbare rundumblick. aber s gfuelhl isch scho chli es komisches gsi, um ehrlich z sie. hetti liber e konventionells baehnli gha...

?? ->

dani Mon, 09/17/2001 - 15:14

Tags

kapstadt, 18. august bis 18. oktober 2001

Add new comment

plettenberg bay

dani — Mon, 10 Sep 2001 15:12:22 +0000

plettenberg bay

sunneschie, bike, churzi hose und viel, viel beach!

am dunnschtig nach de schuel sind mir z sechste nach plettenberg bay gfahre. eini wo da i de schuel gsi isch, haet deht es feriehuus. fuef stund lang sind mir gfahre, und am abig am elfi tot mued acho. aber als erschts sind mir no an strand. es isch ebbe gsi und mondschii. me chann sich chum was romantischers vorstelle! mir sind es stueckli em strand entlang spaziert und denn bald go schlafe.

am fritig morge, eigentlich hetted mir ja i de schuel sie muesse, isch s wetter herrlich gsi! mir sind frue ufgstande, so um di achti und in es kafi mit absolut bester ussicht, ueber di ganzi bucht, go zmorge aesse. feini "scrambled eggs". han grad nomal nabstellt gha. :-) mir sind natuerlich uf em balkon gsaesse und scho bald nur no im t-shirt. endlich haet das wetter gherrscht, wo me sich so imm algemeine vorstellt, wenn me vo afrika reded!

nach dem feine morge aesse sind mir in es naturreservat. mir sind um di ganzi halbinsle umeglaufe. fasch scho grennt. so haend mir also "speed hiking" gmacht. debie haend mir wiederum wal, seehuend, riesigi heuguemper und natuerlich s meer gseh. a es paar stelle haet me richtig gehend chlaettere muesse, ueber d stei, a es paarne haet me guet laufe choenne. au es stueckli sandstrand haet dezue ghoert, und vili "picture stops". au fuer mich und de tobi. da ich am mittwuch e neui camera kauft han. er haet si aber wohl scho einiges me brucht, wie ich...

uf em heiwaeg sind mir no in en "liquor store" und haend bier, savanna dry, bacardi und natuerlich cola ikauft. allerdings haet sich usegstellt, das ich de einzig gsi bin, wo cuba libre em bier resp. savanna vorzoge haet. aber es isch noni grad mit de suuferei losgange. mir haend nomal en chline imbiss brucht. wiederum a dem strand, wo mir am abig vorher uese mond-nacht-spaziergang gmacht haend. deht haets naemlich au es restaurant, mit terrasse und ussicht ueber di ganzi bucht. mir haend ues nur chli fingersnacks bstellt. denn es waeri ja nur e chlini malzit dezwuesched gsi und niemert haet en grosse hunger gha. aber nach grad mal 7 minute sind alli teller, wo afangs ueberhueft gsi sind mit feine (und andere) sache, lehr gsi.

di hei haets denn e duschi gae, es sind no nachbere cho, denn haend mir pizza bstellt und spoeter nomal nabstellt. und denn natuerlich no einiges trunke. und koeksisters haets no gae. (sprich: kucksisters) e original suedafrikanischi suessigkeit. extrem suess, aber guet. hm... aber mir sind trotzdem nid all zu spat is bett!

isch au guet gsi, denn au de samschtig haet frue agfange. d karin isch wohl eher fruehufsteherin und ihre isch s huus und si isch uese "tour-guide" gsi. nach me markt-bsuech, wo mir au zmorge gaesse haend, haend mir ues wiederum i shorts und t-shirt gstuerzt und mit getraenk usgrueschted. denn haend mir ues bikes gmieted und sind go bike. "that was a challange!" ich saege eu, mountainbike i de schwiizer baerge isch da es schoggischlecke degegae! solang me uf de waeg blibt ohnehin! als erschts isch s emal ueber schotterbpiste gange, wo d stei fustgross gsi sind. nach de erste abfart haned d haend und d aerm bereits erschti muedigkeitserschinige zeigt. aber mir haend nid ufgaeh. d waeg sind denn zum teil au besser worde und mir sind immer wieder a ussichtspuenkt cho wo nur eis wort passt: herrlich! d waeg sind denn au besser worde, aber die viele chline aber no steile astieg sind mit de ziit glich no verdammt igfahre. jedefalls sind ziemlich alli kaputt gsi, wo mir nach oeppe drue stund uesi tour beaendet haend. aber es isch au geil gsi. ein stuck sind mir "offroad" gfahre, was heisst me oder weniger quer dur de wald. weg oder sowas gits nid. nur d spure vo de vorherige...

natuerlich sind mir nach dem usflug was feins go aesse. aber nid direkt. karin haet wiederum es guets restaurant direkt a me beach gwuesst. deht sind mir ane und zersch am stand entlang glaufe. haend allerdings nid ganz sowiet ga choenne, wie d karin planet gha haet, denn d fluet isch scho z hoch gsi. zwei sind no go bade, a dem strand. es isch au einigermasse warm gsi. und d waellae haend greizt. aber es isch nueme heiss gsi und de gedanke a de sand wo nacher a de fuess chlaebed, haet mich vom bad abghalte. mir sind schliesslich direkt aschluesend go aesse. und nach em aesse sind alli absolut tot gsi. naja, ich eigentlich nid so. und nach dem mir dihei dusched haend, scho gar nueme. haet aber au nuet gmacht, schliesslich isch de chuelschrank no voll vo fluessigkeite vom vorabig gsi...

am sunntig sind mir nach me extrem feine morgaeesse weider zrug (han "scambled eggs with salmon" gha, herrlich!) daenn hets e huusputzete gae, und mir sind losgfahre. haend in george am flughafe d karin use la, si isch vo deht us hei gfloge und mir andere fuef sind mit em auto d garden route zrugg duesed. mit em eine oder ander photo-halt.

leider kein halt haend mir uf em pass vor kapstadt gmacht. wenn me vom hinderland nach kapstadt fahrt, fahrt me so ueber en pass. uf em hiewag, wo s no tag gsi isch, haend mir uf dem pass aghalte. uf em rueckwaeg haend mir s nueme fuer noetig ghalte. di eini haet no vor em pass so als witz und me glangwielt gseit "Und hier rechts sehen Sie Kapstadt". und i dem moment wo mir kapstadt au gseh haend. isch us aller munde es einstimmigs "oooohhhhh" cho. es isch eifach herrlich gsi, das liechtermehr!

zum znacht sind mir in sea point, also dem stadtviertel wo d schuel isch, zu me italiener. han zum aperitiv en martini bstellt, was wohl nid sooo schlau gsi isch, wenn me praktisch usghungered isch...

dani Mon, 09/10/2001 - 17:12

Tags

kapstadt, 18. august bis 18. oktober 2001

Add new comment

up's and down's

dani — Mon, 03 Sep 2001 13:16:20 +0000

up's and down's

vo hoehepuenkt und tuefuepuenk: kamera, commi, wal, delfin und finger

tja, es gseht ganz so us, als hett ich dasmal recht sehr, sehr viel z verzelle. ich han mir i minere agenda notize gmacht, dass ich au sicher nuet vergisse! andersch wuerdis chum ga.

am fritig abig sind mir im usgang gsi, zersch im newscafe, hm... han feini drinks gha, denn im buena vista social cafe, was definitiv nid min style isch. aber maengisch gits ja no anderi gruend zum chli laenger im usgang z blibe oder eswo hie z ga, als nur de club oder d bar. how ever...

am samschtig haets denn frue ufsta gheisse. naja, am achti oder so. aber ich finde das isch frue. vorallem fuer en samschtig! chli spoeter haend mir ues i de student resident troffe und sind denn, s zehte mit zwei auto, uf e tour gange. s ziel isch hermanus gsi, deht chann me wal gseh. aber de waeg deht hie isch scho es ereignis gsi! s wetter, muss me a dere stell saege, isch recht guet gsi. mehrheitlich haet d sunne gschunne. im auto sind mir sogar im t-shirt gsi. de erschti stop haend mir bi me pick'n'pay igleit, isch es ichaufszentr, so wie bi ues denner oder migros oder sowas. bim usstiege us em auto han ich mich a dem pfoste ghebet, wo zwuesched de vordere und de hindere tuer isch. de tobi, wo vorne gsaesse isch, macht natuerlich genau i dem moment d tuere zue und mini finger sind nur no mantsche gsi...

mir sind mehrheitlich a de kueste entlang gfahre und haend all die luet benide, wo deht ihri schoene feriehuesli oder gar ihri feschte wohnsitz haend. irgendwenn haend mir beschlosse, eifach mal rechts use z fahre und luege. und tatsechlich sind mir a me absolute "wonderful beach" acho. en laaaaaaaaaaaaaaaaaaaaaaaaaaaaaaaaaaaaange sandstrand, fasch wiis und blaus meer. aber wellends meer. natuerlich haend alli ihri rucksaeck anegleit, und d cameras fuere gno um "take some pictures". zwei sind so wild gsi go bade. und wo alli ihri bilder gah haend und d schwuemmer sich wieder am alege gsi sind, mir eigentlich nur no chli di wunderschoeni asicht gnosse haend, isch ploetzlich e wellae cho, wo sicher sechs, siebe meter wieter ue cho isch, als alli andere. de leon, wo grad bi de rucksacke gstande isch, haet packt was er haet choenne. mine haet er aber nid verwuetscht und das isch recht dumm gsi. so haet de ganzi rucksack, wo offe gsi isch, es bad gno. alles isch volle gsi. sand, wasser und jetzt, nach dem s wasser troechent isch, salz. das waered emal: rucksack, dix, husschluessel inklusive ahaenger (sorry anita!), d fotikamera und de communicator. choennd eu ja vorstelle, wie das uf di elektrische graet gwuerkt haet. nach wenige sekunde isch s display vom commi erloescht und bisher sind kei buechstabe me erschine. und au d fotikammera isch uf guet duetsch im arsch. mit mue und not und viel glueck hand mir no de film usekriegt. immerhin das.

nach dem zwueschefall haet niemer me lang am schoene strand blibe wellae. all haend irgendwas gah, wo nass gsi isch. nur niemer so viel so tueri sache, wie ich.

denn sind mir uf hermanus wieter gfahre. deht haend mir a me mega-touriste-ort aghalte und mal afange uf s meer use luege. es haet so e klippe, wo wie e tribuene gsi isch. und natuerlich ueberall luet. touriste. ich han s gar nid choenne glaube, dass me da irgendwenn emal en wal gseht. und ploetzlich tauched, ganz noech sogar, es paar delphin uf! oepe sechs oder siebe. si sind so halbe us em wasser gsprunge. maaaaan! "great, wonderful!"

wo mir nach me wili hunger kriegt haend, und eigentlich scho am ga gsi sind, taucht ploetzlich no en wal uf. au ganz naeche. viellich 100 oder 200 meter vor ues. springt so halbe us em wasser und taucht wieder ab und chunnt wieder ue. ich wiess gar nid, was ich da schriebe soell. es isch eifach idruecklich gsi! eini haet e gueti kamera debi gha, die haet vielich gueti fotene gmacht. muss si denn froege, ob si si no da entwickle laht und ob ich welchi ha chann. wenn ja, choennd ihr s nach miner rueckkehr sicher bald i de gallery aluege. ;-)

nach me feine esse und me neue wili uf s meer luege, ohni grosse erfolg, sind mir zrugg gfahre. ohni grosse erfolg heisst nid, dass mir nuet gseh haend. aber d wal sind z wiet waeg gsi. me haet eifach so es graus strichli im wasser choenne gseh und ab und zue wasser wo s usblased.

wieder zrugg in cape town bin ich gschnell bim nachber gsi. han sis cellphone choenne benutze. han eifach mini sim-charte ine tue. so han ich wenigstens mal dihei saege choenne, dass ich vorerst mal nueme via SMS erreichbar bind. only e-mail now!

denn sind mir wieder in usgang, haend ues wieder i de student resident troffe und denn isch s irgend i sonen club gange, mit undefinierbarer musik. bin recht mued gsi und mit de erschte wo gange sind, bin ich mit. es haet aber no fuer zwei smirnoff ice und en cuba libre glanged. isch no luschtig gsi. was en cuba libre isch, haet die gueti dame a de bar nid gwuesst. defuer was bacardi-coke isch. aber verzeied mier s ihre, si haet defuer guet usgseh...

am sunntig isch zersch mal usschlafe agseit gsi. nacher sind mir, das sind no de tobi und de leon und natuerlich ich, a d waterfront. deht sind mir is two ocean aquarium und haend sache gseh, wo ich gar nid glaubt han, dass es das git. irgendwie so alien maessigi viecher. mit acht bei, wie spinne, aber oepe en halbe meter hoch. und no vieles anders.

de hoehepunkt isch natuerlich s becki mit de haie. so han ich jetzt also guet zwei meter grossi haifisch gseh. so naech, dass ich s alange hetti choenne, wenn kei schibe dezwuesched gsi waeri. allerdings bin ich no recht froh gsi, dass die schiebe da gsi isch...

me hetti zwar ine chonne, is aquarium. isch nid im pries inbegriffe gsi, aber fuer es guets extra haet me e taucherusrueschtig kriegt und en fuerer und denn haend s eim is haifischgheg la. wo mir deht gsi sind, sind grad drue (en fuerer mit zwei touriste) drinn gsi. naja. waeri glaub nuet fuer mich gsi.

en pjyama catshark haend mir no gseh. uberleg dir mal de name!

nach em aquarium isch es denn ziit gsi, fuer de leon z ga. er haet no am gliche abig sin rueckflug gha. *sniff*

tja, und huet ,maentig, haet d schuel wieder agfange. ohni leon und ohni laura. aber es sind ja no anderi nice people da. allem vora de tobi. vielich goend mir huet abig no go pool spiele, je nach dem, ob ich no mag.

dani Mon, 09/03/2001 - 15:16

Tags

kapstadt, 18. august bis 18. oktober 2001

Add new comment

weinfestival

dani — Thu, 30 Aug 2001 13:05:02 +0000

weinfestival

weinfestival, pool und nomal pool

mini zweiti wuche neigt sich langsam em endi entgege. es isch immerhin scho fritig. ich kenne mich langsam chli us und weiss, was ich da so mache chann. mit em tobi isch en neue schwiizer cho, wo in etwa mini waellaelaengi haet, mit dem ich mich guet verstane. mir sind i de gliche klass, am morge und am nomittag, wobi mir deht eigentlich nid viel mitenand z tue haend. defuer sind mir eigentlich jede abig zaeme im usgang gsi. und wenn s irgendwie langed, gang ich au huet no mit ihm go pool spiele. aber d ziit wird knapp. denn ich muss vo dem internetkafi hei, was in etwa 20 minute brucht, dusche, ufgabe mache, esse und wieder da ane cho. was natuerlich nomal 20 minute brucht...

am zieschtig sind mir a me wie-festival gsi. wobi, fuer di meischte me s wie-suffe als s degustiere im vordergrund gstande isch. und natuerlich haend mir no fraue agluegt. es isch no recht luschtig gsi. nacher sind mir no is buena vista social cafe. leider. hetti s newscafe, wo im gliche huus isch, bevorzugt...

am mittwuch bin ich mit em tobi gsi go pool spiele, das isch also gester. mir haend im stones, s lokal wo me pool spielt, de salvadore troffe, mit dem ich scho am samschtig deht gsi bin. er spielt eifach verdammt guet und mir haend nur choenne stune. aber au lerne. han no mit em d mobile-nummere ustuscht, dass mir ues benachrichtige choennd, wenn mir deht sind. so chann er mich wieter "teache"...

s englisch gaht au immer besser. bruche eigentlich fasch kei duetschi woerter me. schaffes eigentlich immer, d saetz irgendwie so z formuliere, dass ich mit de englische woerter uschume, resp. drum ume rede chann.

i de schuel haend mir huet en tescht gha. dasmal isch er recht viel schwerer gsi als letscht wuche. mal luege, morn korrigiered mir en.

s wuchenendi wird wohl e eher truurigi aglaegeheit, zwei fuer mich nid unwichtigi luet goed hei (are going to leave...). aber han ja de tobi und s wetter schient au langsam besser z werde. am samschtig isch glaub de erschti september. und denn isch da offiziell frueligsafang. so wie z zueri s saechsiluete isch, gits denn au da diversi party. aber chli weniger "traditionelli". wird sicher cool!

dani Thu, 08/30/2001 - 15:05

Tags

kapstadt, 18. august bis 18. oktober 2001

Add new comment

lahmi leitig

dani — Mon, 27 Aug 2001 13:00:29 +0000

lahmi leitig

lahmi aber billigi leitig. und bessers wetter?

wie ihr am titel erkenne choennd, bin ich huet i me andere internetcafe. wobie, kafi isch s falschi wort. chasch nuet drinke. es choschted da nur 7 rand i de stund (und de rand isch uf 20 rappe gfalle!) defuer sind d leitige zum ischlafe. han mich gfroeged, warum ich nur so es fucking flash-menu gmacht han...

defuer haet s da netscape navigator und nid so gruusigi MS internet explorere!

am fritig isch vorerscht emal en normale schueltag gsi. de nomittag isch aber extrem luschtig gsi. ja, schuel chann luschtig si! da une isch s recht andersch. git kei pauseglocke und sonigs. d schuel fangt a, wenn all im zimmer sind und aendet in etwa nach 50 minute. tja. und ebe, am fritig haend mir ues z tod glacht!

nach de schuel sind mir in es naechs kafi und am abig in usgang. in es kafi oder e bar wo "newscafe" heisst. isch no cool gsi. han no was gaesse. s erschti mal was richtig feins! und denn diversi drinks. han endlich mal en "martini - shaken not spirred" probiert (und mich gfuehlt wie de james bond... was fuer double-0 agents guet isch, isch s au fuer double-u agents...) und no en "sex in the forrest" (anschienend chann me nid nur am beach sex ha. wenn ich mal barman bin, sofern ich s wirde, erfind ich en drink wo "sex in the car" heisst...)

nacher sind mir no is "buena vista social cafe" gange, oder so aenlich. bin zwar faeng mued gsi. aber egal. han no en smirnoff ice gha. es haet zwar es paar fraue zum aluege gha. aber de bsuech hetti trotzdem nueme sie muesse.

am samschtig morge bin ich denn mal uf em WC ghocked. me nennts au durchfall. d room-mate isch cho und haet d chlieder gwaesche, vo hand, laht sich verstah, und dusse ufghaenkt. si sind denn am suntnig nomal gwaesche worde, denn s isch wider cho cho regne...

aber zersch sind mir am samschtig no in usgang. mit me south-african-guy. und mir haend gmacht, was me i de schwiiz nid chann. zweimal am gliche abig de club gwechsled. di erschte beide sind a de waterfront gsi. de eint isch di bereits bekannti tequilla-bar. dasmal haet min "cuba libre" aber en andere gmixt. und er haet s nid so im griff gha. er isch recht schlecht gsi. defuer kenn ich jetzt s gheimnis vo da: sie mixed no es bizli "lemon" ine. nur ebe, am samschtig isch es z viel gsi...

um mitternacht haend mir s taxi gno, sind dur ganz green point und dur sea point gfahre, (haet 42 rand koscht, 14 fuer jede) und sind go pool spiele. hoffentlich nid zum letschte mal! es isch huere geil gsi. am schluss han ich no e gluecksserie gha. vo mir sind no drue chugle da gsi, plus di schwarz. de roman haet keini me gha. ich bin a de reihe gsi, und han grad alli versenkt. schoen eini um di ander. aber es ich wuerklich nur glueck gsi. zum teil sind s i anderi taeschene, als ich eigentlich planet han...

am sunntig, nach me lange schlafe, bin ich id waterfront. d pam haet mich bracht. und es haet gregnet. huere. aber egal. bin ja drinne gsi. han mir no es original-buech vom ian flemming kauft, vo "james bond, 007, Dr. No" in englisch, natuerlich. so chann ich jetzt au was mache, wenn s mir mal langwilig isch.

jetzt isch maentig nomittag am vieri. wie bi eu i de schwiiz au. und es isch sunnig! vielich wird s wetter jetzt besser. vom badzimmer us gsehn ich direckt uf de lionshead. das isch e bergspitze. i de schuel haends ues gseit, die seig besser als jedi wetterprognose: wenn s deht wolke haet "is it going to rain". und huet haets wiet und breit keis woelkli gha! mittlerwile isch es au scho gnueg warm zum ohni jagge dusse umelaufe. allerdings isch d wetterprognose fuer de mittwuch bereits wieder schlecht...

einigi sind nueme i de schuel, anderi sind neu cho. under anderem en schwiizer wo 6 wuche bliebt, also fasch so lang wie ich. han ja no 7 wuche.

dani Mon, 08/27/2001 - 15:00

Tags

kapstadt, 18. august bis 18. oktober 2001