triathlon

zytturm triathlon 2024

dani — Sun, 23 Jun 2024 12:50:59 +0000

zytturm triathlon 2024 dani Sun, 06/23/2024 - 14:50

nach füf jahr hät's endlich mal wieder klapped mit em triathlon vor minere huustüür und uf mine trainingsstreckene. dass für jahr e langi pause isch und d routine fählt, hät sich scho vor em start bemerkbar gmacht: so nervös bin i scho lang nüm vor em start gsi. ich han jedenfalls mich i ziemlich jedi wc-schlange wo's gha hät, eimal irgreiht. au han i nid gwüsst, wie s neue startprozedere, mit individuellem start gaht. isch aber eigentlich e gueti sach. usser dass me lang uf sin start wartet und im wörtliche sinn chalti füess überchunnt. s nächsti mal wohl irgenwelche flipflop an start mitnäh.

endlich isch es los gange und ich han mich is chalte wasser vom zugersee gstürzt. wobi, mit em neoperen isch es gar nid so halt gsi, sondern ziemlich perfekt! ganz im unterschied dezue mini brülle. im hallenbad funktioniert die perfekt, isch dicht und lauft nid a. uf dene 1.5km im see han ich sie aber sicher drü mal müesse leere. ob's a de sunnecreme liet, dass si nüm dicht isch? s nächsti mal jedenfalls ohni sunnecreme starte.

mit de schwümmziit bin i nid so ganz zfriede gsi, bin s lutschte mal zwei minute schneller gsi. allerdings bin i zletscht au nid so viel am schwümme gsi. das isch drum z erwarte gsi. ganz im unterschied zum wechsel. de isch no nie mini stärchi gsi, das mal aber voll denäbed gange. han zersch de bändel vom riessverschluss nid gfunde, bin scho vor minem velo gstande, wo ich de endlich ufbracht und mich müheselig us em neuproen befreit han.

wo ich nach über vier minute us de wechselzone gsi und uf s velo gstiege bin han ich scho über drü minute rückstand uf mini ziit vo 2019 gha. so han ich mir das natürlich nid vorgstellt. nach öppe zeh kilometer hät sich no s powermeter verabschiedet. hetti doch bloss d batterie am abig vorher ufglade! usser dass ich mich chli gärgered han, hät s mi aber nid langsamer gmacht. dafür han ich no e churzi pinkelpause müesse ilege. obwohl taktisch klug gwählt, uf de ahöchi in immesee, wo ich nachher bim abefahre wieder schwung hole chann, hät s mi e minute kostet. am schluss han ich e nur um paar sekunde schnelleri veloziit als vor für jahr gha, also nid würklich chönne ufhole. au de wechsel isch nid schneller gsi.

defür bin i denn relativ schnell zum lauf gstartet. han denn aber noch zwei oder drü kilometer au 5:05 und 5:10 uf de Uhr gseh, obwohl ich mir vorgno han, e pace klar unter füf minute pro kilomenter z laufe. viellich im falsche moment uf d uhr glueged? bim füfkilometerschild han ich e laufzeit vo 23:30 gseh und mir vorgno unter 47 minute z bliebe. hät denn aber au nüm ganz gelanget. normalerweise chann ich gege de schluss nomal zuesetzte. das isch dasmal au de fall gsi, han uf em letschte kilometer no paar überholt, aber anschienend chli z spat zum di langsame kilometer um d mitti vom lauf wieder wett z mache.

so han i im ziel chli en entüschendi ziit gha, trotz nid unbedingt schlechter leistig: mit schneller wechsel und ohni d wc-pause wäri s sogar möglich gsi unter 2:30 z bliebe. so han ich en guete grund nächst jahr wieder z starte.

	ziit	rang	rückstand
gsamt	2:33.21,4	255	43:56,2
schwümme	29.07,3	190
wechsel	4.17,9	344
velo	1:09.26,7	326
wechsel	3.03,5	326
laufe	47.26,0	208

Tags

triathlon

Race ID

zytturm triathlon

Race Date

2024-06-16

Distance

51.50km

Rank

257

Race Finish Time

2:33.21,40

Race Points

713

race notes

1.5 / 40 / 10

Garmin ID

15935697203

Add new comment

zytturm triathlon 2019

dani — Sun, 16 Jun 2019 15:22:56 +0000

zytturm triathlon 2019 dani Sun, 06/16/2019 - 17:22

nach zwei jahr pause isch mal wieder en triathlon agseit gsi. insbesondere, da er quasi vor minere huustüre stattgfunde hät. bim istieg in nur grad 17 grad chalte zugersee han i mi scho chli gfräged, warum genau mach ich das jetzt? ich bin uf jede fall froh gsi um de neopren. und denn isch es au scho los gange! ich han aber no chli mit mir und em equipment kämpft. ich han zersch nid so richtig guet chönne schnufe und fasch nüt gseh. d brülle isch mir aglaufe und hät wasser drin gha. und das, obwohl ich am abig vorher no so spray dri tue han. nach dem di beide boye nach ca. 500m umkurvt gsi sind, hät's platz gä und ich han min rythmus besser gfunde. han aber nid s gfühl gha, ich seigi bsunders schnell gschwumme oder heigi mich übermässig agstrengt. um so meh han i gsuuned, wo ich mit einer 27er-ziit us em wasser cho bin. das hät grad en zuesätzliche motivationsschub gä.

de wechsel isch sowiet ganz guet von statte gange. weltmeister im neopren-abziehe wird i aber sicher nie. das isch aber schnell vergässe gsi, jetzt isch schliesslich pedale agseit gsi. da bin i au nid schlecht weg cho, han sogar am anfang mal no de einti oder anderi überholt. später sind denn die aber mit de ziitfahrvelo cho. han i denkt, "jaja, schwimme chönnd's nid, aber schnelli velo händ's". ich hab aber no es anders problem gha: scho wärend em schwümme han i uf's WC müesse. geht han ich's no de chalte füess id schuhe gschobe (obwohl die ja barfuess gsi sind...), uf em velo isch es aber nüme gange. ich han denn dem verlange anere guete stell nah gä. es hät zwar chli ziit kosted, aber s wieterfahre um einiges agnehmer gmacht. im hügelige teil han i paar fahrer bim ue fahre überholt, und sie mich denn bim abefahre wieder zrugg igholt. nach de letschte kurve in cham hät mi e ganzi gruppe velos überholt und ich han mich gfräged, wie das mit em windschattefahre da so isch? und churz druf abe händ mir es auto überholt, wo mit me L und me 30er uf de strass grollt isch. denn isch de see umrundet und d wechselzone vor auge gsi.

deht han i glück gha: zersch bin i mit 1:10 ziemlich z'friede gsi und denn han ich uf em relativ lange weg, wo me z fuess bis zum platz mache muen, bereits afange de helm abziehe. dörf me anschienend nid. d schiedsrichterin hät sich aber demit z'friede gä, dass ich en wieder agleit und s bendeli zue gmacht han (und mir i dere ziit sogar s velo ghebed!) ohni e straf z gä. nach dem s velo parkiert gsi isch und d schuhe gwechslet gsi sind, isch es uf d laufrundi gange.

ich han erneut mit mir und em material kämpft: d schuhe händ am afang weh tue, obwohl's en schuhe isch, wo ich scho viel brucht han. de gurt mit de startnummere isch mega lug gsi und ich han en bim laufe müesse enger mache, so gutes gange gsi isch. und irgendwie bin i mega usser atem gsi. so bin i nie me richtig uf e gueti laufgschwindigkeit cho. ich han wieder s WC-gfühl gha, aber vorerscht emal usegschobe. nach öppe füf laufkilometer, also eigentlich genau deht, wo s ziel afangt nächer cho, händ mi zwei überholt. sie sind nid viel schneller gsi, es chlises bitzeli. ich bin chli a dene dra bliebe, han denn wo's aber schwierig worde isch, nid uf zäh bisse, sondern im gegeteil nomal e pinkelpause igleit. das isch wohl en fehler gsi, es bitzeli schneller seckle hetti doch irgendwie müesse drin liege, mit zwei sotige pacemaker, oder? hätte, wäre und wenn, isch alles nid gsi. s resultat isch de langsamschti lauf vo allne mine olympische triathlons. i de summe hät's aber dennoch de schnellschti gä! so bin i alles i allem doch recht z'friede.

offizielli datasport-ziite und platzierige:

	ziit	rang	rückstand
gsamt	2:32.14,2	361	46.39,6
schwümme	27.18,7	234
wechsel	3.07,7	315
velo	1:09.57,2	413
wechsel	2.34,5	351
laufe	49.16,1	359

Tags

triathlon

sport

Race ID

zytturm triathlon

Race Date

2019-06-16

Distance

51.50km

Rank

361

Race Finish Time

2:32.14,20

Race Points

693

race notes

1.5 / 40 / 10

Garmin ID

3752806169

Add new comment

zytturm triathlon

dani — Sun, 18 Jun 2017 10:11:37 +0000

zytturm triathlon

dani Sun, 06/18/2017 - 12:11

so näch wie hüt morge, han ich's glaub no nie an start vo me wettkampf gha. und das isch au mit en grund, warum ich mich no churzfristig (bester nomittag!) zum mittmache überrede la han. scho umzoge und mit em sportgrät sälber bin ich de knappi kilometer bis an start pedalt. ich han sogar no e chili extrarundi gmacht, wil i erscht gester no de schluch vom hinterrädli sälber gwechslet han und dere sach nid so traut gha han.

d wechselzone isch denn schnell igrichted gsi und denn isch es an start gange. angesichts vom 20 grädige see und de churze schwümmdistanz (500m) han i mi gege de neopren entschiede. viellich falsch gsi, d schwümmziit vo üner 10 minute isch recht enttüschend gsi. viellich wäri i glich gnueg viel schneller gsi mit neo, als dass sich di zuesätzlichi wechselzoneziit glohnt hetti.

mit em wasser han i denn au i de wechselzone nomal kämpft, wo ich s velotrikot nid über min nasse oberkörper bracht han. mit chli würge und risse isch es denn doch gange und s velofahre hät chönne afange. han natürlich, mit mine viele bike-to-work-km mir scho chli was vo dere disziplin versproche. isch denn aber recht härt worde. vor allem uf em "zruggweg" zwüsched küsnacht und hühneberg hät's enorm gegenwind gha. zudem han i fasch uf de ganze velostrecki problem mit em buch gha. trotzdem isch es irgendwie nid gange, locker z fahre, en gang abeschalte oder so. es isch härt und "gib-alles-modus" bis zum schluss gsi.

uf de laufstrecki denn s umgekehrte bild: die bin i zwar i me für de aktuelli lauf-form-stand guete 5er glaufe. und han di ganzi ziit s gfühl gha, es wäri no chli meh drinne. han aber de schalter wieder nid gfunde und bin so die ganze 5km konstant und ohni schlussspurt grennt. im ziel bin i denn doch sehr usgnockt gsi. zwei becher cola und ziemlich viel feinsti melone händ s energie-level wieder ue bracht.

	ziit	rang	rückstand
gsamt	1:57.26,8	151	32.28,0
schwümme	10.27	82
wechsel + velo	1:18.06	174
wechsel + laufe	28.53	150

Tags

sport

triathlon

Race ID

zytturm triathlon

Race Date

2017-06-18

Distance

45.50km

Rank

151

Race Finish Time

1:57.26,80

Race Points

723

race notes

0.5 / 40 / 5

Garmin ID

1804011088

Add new comment

triathlon di locarno

dani — Mon, 08 Sep 2014 08:24:16 +0000

triathlon di locarno

dani Mon, 09/08/2014 - 10:24

nach me verregnete summer, mir gfühlt wenig velotraining hät d reis is tessin nomal sunne, wärmi und 40 schöni velokilometer bracht

am 6i ufstah isch nid so mis. immerhin isch es hell gsi, bis mir üses hotel verlah händ. mir sind frühe dra gsi und händ ziit gha, üsi plätzli i de wechselzone i z richte. s gester kaufe tüechli fiin süberlich anegleit, velo- und laufschuhe druf, s velotrikot, helm und sunnebrülle uf em göppel parat gleit, denn in neopren ine zwängt, um ihn später noma ab z zie, für uf's wc z ga.

paar minute vor em start sind mir denn am see gstande, irgendwo i de masse, im gwühel. en land-start hät's gä. komisch, wenn me zersch is wasser ine renne muen. aber isch denn trotzdem gange. hät im lido e art sandstrand. wie immer isch bim schwümme denn zersch mal ziemlich tohuwabohu gsi, bis chli alli ihres plätzli gfunde händ. und mich hät no zuesätzlich gstresst, dass i nid gwüsst han wo dure. hetted mir doch vorher d strecki no am see aglueged. es gaht weniger drum, de weg z finde, als meh chli z wüsse wieviel vo de strecki wo gschafft isch. isch am schluss denn doch irgendwie gange, au wenn i bim rechte aug wasser i de brülle gha han, wil mi eine troffe hät. d schwümmziit isch ok gsi, aber nid sehr guet. wobi s schwer isch, das ab z schätze, wil nid nur ziit im wasser, sondern au no de (fuess)weg bis id wechselzone mitgmässe wird.

denn de wechsel uf s velo. de hetti dur de chauf vo de neue "triathlon hose" e chli schneller ga sölle, han i denkt. aber weit gefehlt. was genau viel ziit kosted hät, isch mir nid so bewusst. aber über 4min zum neopren abziehe, socke, liebli, schuhe und helm aziehe, hett i doch nid denkt!

uf em velo isch es denn defür gfühlt wieder runder glaufe. han mi zwar au müesse überhole la, han aber au s gfühl gha, ich han überholt. da d strecki viel flach gsi isch, hät me meistens meh als en 30er pedale chönne. nach 15 km hät sich chli es grüppli formiert. da ich d wendi chli defensiv gfahre bin, han i das aber denn verlore und müesse zueluege, wie die wiet vor mir immer chli wieter vor mir sind. gärgered han i mi aber au, wil windschättele ja verbote isch. wo denn paar im später wieder e gruppe a mir verbi isch, han i zersch denkt, "die nimm i jetzt". han's denn aber bliebe la, wil mit em grüppli grad en schiedsrichter cho isch, wo es paarne, aber ziemlich sicher nid allne, di gäli charte zeiged hät. was das bedüted hät, weiss i nid. beidrucke la händ sie sich nid. sie sind nämlich als grüppli schön zäme wieter und mir devo gfahre...

e straf han ich sälber denn glaub au no gha. bin e chli z spat vom velo gstiege. han mi chli "verbremsed" und bin uf d linie cho. han das sälber zersch gar nid checked. aber en hälfer wo deht gstande isch, hät mir s velo ghebed, han zersch denkt, er hälfi mir, wil i mühe gha han mit usklicke, aber wo er denn was vo "30 secondi" gseit hät, hät's mir dämmered, worum's gaht. ich han die ziit gnutzt, um de schuhe ab ziehe.

bim velo anestelle han i nomal Konfusion gha. han eigentlich s velo welle umgekehrt histelle, resp. hie hänke. aber wil's alli andere andersch gmacht händ... so bin i eimal um rund ume glaufe. denn han i s liebli gsechled (wofür mi wohl jede tri-trainer schimpfe würdi) und d laufschuhe gholt. en Helfer gfräged, ob's es wc händ, wil i au de triathlon nid ohni pinkelpause gschafft han. (muss wohl weniger trinke). händ's aber nid gha, und ich bin so uf d laufstrecki gange.

s renne hät mi vo allem afang a sehr härt dunkt. mir händ d bei vo afang a uf de rücksiete weh tue. vor allem d wädli, aber au hinter em oberschenkel. so isch klar gsi, dass es kei wunderziit git. dezue isch no cho, dass i mir denn no sälber es wc vorgstellt han. nach 2:17 bin i s erschti mal dur s ziel und bin mir sicher gsi, dass i unter 2:45 und somit schneller als im uster letscht jahr bin. insgeheim han i e chli ghofft, unter 2:40 z bliebe. han aber wohl nid so guet grechnet. für das hett i en 4:30er schnitt renne müesse. was wohl chli zu optimistisch gsi isch, vor allem für de tag...

schlussendlich bin i nach 2:41.31,3 im ziel gsi, dütlich schneller als in uster, und au uf allne vo dene füf abschnitte es bizeli schneller. und wohl immer no mit e chli potential. wer weiss, für wenn und ob überhaupt. aber s wüsse, me chönnti, tuet au scho guet.

offizielli datasport-ziite und platzierige:

	ziit	rang	rückstand
gsamt	2:41.31,3	173	45.50.7
schwümme	29.18	115
wechsel	4.14	218
velo	1:17.33	197
wechsel	2.38	210
laufe	47.46	168

Tags

triathlon

sport

Race ID

triathlon di locarno

Race Date

2014-09-07

Distance

51.50km

Rank

173

Race Finish Time

2:41.31,30

Race Points

716

Speed

0.00km/h

race notes

1.5 / 40 / 10

Garmin ID

585438749

Add new comment

ironman 70.3

dani — Sun, 08 Jun 2014 10:13:37 +0000

ironman 70.3

dani Sun, 06/08/2014 - 12:13

s letschti mal, wo ich am viertel ab 5i am morge ufgstande bin, muss bestimmt im militär gsi si. wie chann me nume!? am schluss vom tag hät sich's aber glohnt.

uf em 6i-zug hät's genau zwei sorte lüt gha. die wo nach sportler usgseh händ, oder die wo uf em heiweg vom usgang gsi sind. di eine händ s letschte bier, die andere s erschte isostar trunke.

z rappi denn scho emsiges treiben. i de wechselzone händ d velo- und laufuntensilie welle richtig versorged si, denn in neopren inequetsche und no d strassechleider versorge. WC gäng, und langsam am start ga. der marsch der lemminge... de sprung is chüele, trüebe wasser, de neo füllt sich langsam demit, und denn s paddle an start. d sunne hät bereits gschunne, wo de countdown glaufe isch, denn isch es los gange. im gwühel am afang chli chaotisch und mit em eine oder andere ungewollt usteilte oder igsteckte schlag. bald aber isch s wasser klar worde und es hät platz zum schwümme gä. fasch scho en gnuss. wo ich mich s erschti mal orientiert han, sind scho 650m hinter mir gsi. denn han i afange müesse chli genauer luege. wo isch d wendi? wo gaht's dure? wo die gschafft gsi isch, isch eifach wieder gschwumme worde. mit de ziit isch es denn zwar nüme so en gnuss gsi, 1.9km chönnd doch no cheibe lang si. aber alles i allem isch es doch recht schnell gange, und ich han wieder feste bode unter de füess gha.

i de wechselzone isch min sack schnell gfunde gsi. alles mal uslehre. mit em tüechli chli abtröchne, velohose, socke und schuhe aziehe. sunnecreme dörf nid fehle. und no e zweiti schicht. es unterliebli oder nid? ja. s veloliebli drüber, esse ipacke. d ärmling bruch i glaub nid. denn? isch eigentlich no gmüetlich da uf dem bänkli i dem festzelt. aber nei, muss ja wieter. uf's velo. nur wo isch das?

de göppel mal gfunde, isch d reis wieter gange. zersch mal flach, und nach me wili sogar no herrlich em see entlang. plötzlich gaht's vom see weg und direkt in en steile ufstieg ine. schnell abeschalte. und sich für di zweiti rundi merke. überhaupt han i mir probiert alles z merke für di zweiti rundi. immer wieder isch es duruf gange, zum teil recht steil. aber es hät vor allem a de steile stelle au lüt gha, wo glueged und klatsched händ. super atmosphäre! hät spass gmacht, und mich chli ad fernsehbilder vo de tour de france erinnered. dazumal, wo ich no ziit zum fernseh luege gha han.

irgendwenn isch es denn wieder abe gange. ich han probiert mis biberli us de packig z zwinge und z ässe, bi über 50km/h, während anderi mit ihrne ärodynamische lenker a mir verbie sind. händ die en dachschade? fieserwies hät's nomal e stiegig, denn nomal abe und am see entlang uf rappi zrugg. aber ebe, nüt mit fertig, eimal um de chreisel ume, und s ganzi nomal vo vorne. obwohl d bei jetzt nüme frisch gsi sind, isch es gfühlt eher schneller gange, obwohl's objektiv gseh länger gsi isch. s wüsse, was mich erwartet hät gholfe und nach 3 stund bin ich wieder zrugg i de wechselzone gsi. wo nur muss i jetzt scho wieder s velo parkiere?

jetzt isch s roti säckli dra gsi. laufschuhe use, liebli wechsle, au en huet dörf nid fehle und nach me wietere WC-bsuech bin i plötzlich, am renne gsi. oder wenigstens am jogge. ähnlichs bild da: ich han mir probiert z merke, wo's dure gaht, was ich gsehne und so wieter. bim erschte verpflegigsposte han i müesse feststelle, dass i bim jogge nid trinke chann. so isch d taktik schnell z recht gleit gsi: bim poste bewusst "walke", und nachher wieder renne, oder wenigstens jogge. nach öppe 8 km han i mi mal gfräged, ob ich was falsch gmacht han, wil irgendwie han ich no immer keis so es armbändeli gha. aber denn isch si no cho, d "lap control" und es hät es gäls bändeli gä. nomal en essensposte und scho bald isch de richtig ziel gange. eigentlich alles relativ mühelos. jetzt isch es aber andersch gsi, als uf em velo: plötzlich isch es nid eifacher gange, sondern schwerer. d müedigkeit han i jetzt würkich gspürt. und ich han mi chli zwinge müesse z renne. ich han mir vorgno, bis zum nächste poste dure z hebe. de isch nach de 4km marke cho. endlich wieder spatziere. wasser trinke, en schwamm mit wasser zum mich chüele und de huet neu "tränke" nach dem poste isch es denn aber lang echt schwer gsi, z renne. ich hab's nomal probiert, bin aber au en stuck eifach spatziert. ersch wo s endi vo de lange gerade under see in sicht cho sind, han i d motivation zum renne wieder gfunde. grad no im richtige moment, am nächste egge sind mini eltere gsi. gfühlt isch es ab deht nomal ganz guet gange. aber di offizielli ziitmässig hät das andersch gseh. wie au immer, ich han's nomal d stäge ue richtig schloss gschafft und denn im schatten dessen rund ume. bi de lap control s zweiti bändeli gholt (blau) und am letschte essensposte nomal zueglanged. denn ab richtig ziel. je nächer das cho isch, desto eifacher isch es gange.

nach 6h isch es gschafft gsi! obwohl i nid ei sekunde dra zwiefled han, han ich's glich chum fasse chönne. 1.9km schwümme: easy, mach i i jedem training. 90km velo: han i scho längeri toure gmacht. aber denn no en halbmarathon? so wiet z fuess, wie ich no nie vorher bin? und das nach allem andere? aber es isch irgendwie gange!

	ziit	rang
schwimme	00:37:08	834
wechsle	0:12:48
velo	02:00:06	1134
wechsle	0:07:46
laufe	02:00:06	1179

danke melanie und felix, ihr händ mir de flo is ohr gsetz!
danke simon und lisbeth für die viele schwümmtrainings.
danke allne "mine" indoor cyclerInne, für die coole velo-trainings.
danke peppo und stefi, für di so wichtige lauftrainings.
danke yasmin für de super support vor ort!

Tags

triathlon

sport

Race ID

IM70.3 rapperswil-jona

Race Date

2014-06-01

Distance

113.00km

Rank

1543

Race Finish Time

6:00.29,00

Race Points

623

Speed

0.00km/h

race notes

1.9 / 90 / 21

Garmin ID

511913838

Add new comment

uster triathlon

dani — Sun, 25 Aug 2013 21:30:10 +0000

uster triathlon

dani Sun, 08/25/2013 - 23:30

mal was neues. oder fremd gange mit guetem gwüsse. oder es loch im inline-kalender gfüllt. oder...

ich wett gar nid wüsse, wie oft ich i de letschte täg uf em wc gsi bin. sicher isch, dass ich scho lang nüme vor me wettkampf so nervös gsi bin wie vor dem. und trotz frühnem deht si, trotz guetem ziitplan, isch es nid ganz ohni stress gange (nomal wc!) . denndoch sind mir am 9:58 im neopren verpackt i de badi uster im griefesee gstande.

10:00 los gaht's abentür! scho bald aber han ich d seeüberquarig vom letschte sunntig vermisst. ab und zue mal en fuess im gsicht, oder en arm susch irgendwo. es isch ja nid so gsi, dass de see z chli gsi wäri für die triathlethe wo mit üs gstarted sind. sie sind au kei bösi gsi. aber d sicht isch sehr schlecht gsi. de see trüeb und ebeso s wetter. me hät di andere schwümmer normalerwies ersch gseh, wenn's z spat gsi isch. bi mir isch no dezue cho, dass d brülle vo afang a aglaufe isch. di erschti boije isch e grossi orangi gsi, die han i no gseh. di zweiti isch denn "plötzlich" ufaucht. deht sind mir abboge. die dritti han i nid gseh, bis i dra verbi gschwumme, und wieder abboge bin. und uf em rückwäg isch d orientierig nur no schwerer worde, da sich s feld usenand zoge hät und ich nüm so viel schwümmer um mich gha han. nach de letschte boje han i denn di einzigi richtigi (aber viel z spati!) entscheidig troffe: d brülle abziehe. seewasser brennt ja nid i de auge! mit 29:48 han ich s schwümmziel grad knapp erreicht. angesichts de orienteirigslosigkeit und em relativ lange weg wo me no z fuess hät müesse mache bis zu de zwüscheziit isch das okay gsi.

de erschti wechsel isch nid ganz eifach gsi. wie chunnt me am effizientischte us dem neo use? denn no d badhose gege velohose tusche (mit tüechli, da "nacktheit" gemäss reglement(!) verbote isch) brucht au sini ziit. de neo denn no in en sack z stecke, statt en eifach liege la isch wohl eher e dummheit. s ganze hät mit 5:12 i de 520. (vo 524!) wechselziit gended...

endlich uf em velo han i zersch no chli chalt gha, aber bald isch es besser worde. d strecki trügt chli, scho bi de besichtigung han i s gfühl gha, dass de teil vo uster bis uf ötwil de härtischti teil isch. und denn müssti me ja au no ässe und trinke. i de stiegig uf de gibisnüt ue han i mi wohler gfühlt und au es paar anderi radler chönne überhole. au di zweiti stiegig isch mir guet glaufe. aber wo's denn nach de forch wieder flacher worde isch, sind es paar mit de tri-lenker vo hine cho. au im flache teil vo muur bis wieder uf uster übere bin i eher überholt worde als umgekehrt. bin halt meh de chletterer als de ziitfahrer. isch aber uf de skates nid andersch. mit me biberli, me iso-rigel und me gatorade im buch (aber eimal gleerter blase) bin i nach 1:21.47 wieder i de wechselzone gsi. sehr schön! e ziit vo knapp 1:30 han i erwartet.

de zweiti wechsel isch logischerwies schneller gange. han ja nur helm und brülle abziehe und d schuhe wechsle müesse. han's mir aber nid näh la, au no s liebli z wechsle. us gründe wo da nid gnennt werde möchted.

vor em laufe han i am meiste angst gha, wil am wenigste trainiert. und di "ungliebtischti disziplin". isch aber recht guet gange. ich han di erschti rundi recht problemfrei gmeistered. s einzige wo nid gange isch, isch trinke. aber 10km gönd au ohni. erscht uf de zweite rundi hät s denn afange härt z werde. vor allem händ d blick uf mini uhr nüme di gwünschte gschwindigkeite azeigt. ich han mir zwar zu keinem einzige ziitpunkt s ziel herbie gsehnt. dennoch isch es irgendwie nid gange, mich dezue z bringe, schneller z laufe, bis paar wenige hundert meter vor em ziel. han's glich no gschafft unter 50 minute z bliebe (48.23)

im ziel hät denn scho de felix gwartet und mich mit enere herzliche umarmig empfange. er hät s grad knapp gschafft, mich z "überrunde". wenigi meter bevor d laufstrecki für di zweiti rundi resp. für is ziel sich verzweigt hät, hät er mich igholt. han di ganzi ziit uf das gwarted, wil ich en bi de wendi no gseh han. hät mi gfreut, dass er's gschafft hät und mir so doch no paar meter zäme unterwegs sie händ chönne.

offizielli datasport-ziite und platzierige:

	ziit	rang	rückstand
gsamt	2:47.56,9	360	46.11,7
schwümme	29.48	259
wechsel	5.12	520
velo	1:21.47	395
wechsel	2.45	473
laufe	48.23	320

Tags

triathlon

sport

Add new comment

Race ID

uster triathlon

Race Date

2013-08-25

Distance

51.50km

Rank

360

Race Finish Time

2:47.56,90

Race Points

724

Speed

0.00km/h

race notes

1.5 / 40 / 10

Garmin ID

364814349

Kommentare

Iidrücklich wia ehrlich und knau du dis renne beschriibsch. bim läse bin i richtig mitganga und i han miar dis renna gnau chönna vorstella. Super au, dass du das renna fertig gmacht häsch und di uf alle disziplina iigloh häsch. Jetz wünsch i diar erholig und freud über dini leischtig.
Gruass p

Hallo dani
I ha di hiwis befolgt und ha din (spannende!) bricht gläse :-)
Das hesch super gmacht, gratulier dir! Super leistig! Mol luege wies bi mir das johr am stadtlauf usgseht ;-)
Liebe gruess
Fabienne