münche, 10. bis 12. april 2009

bayern und griecheland in münche

dani — Sun, 12 Apr 2009 23:15:25 +0000

bayern und griecheland in münche

z'morge hät s hüt no richtig bayerisch gä: würstl mit brezen.

am 12i händ mir üs denn unter die viele tourischte uf em marienplatz greiht, zum s glückespiel am neue ratshuus z bewundere. das ganzi dured eweig, z gseh git's aber eigentich nid so viel... trotzdem ghört s aber zu me bsuech in münche!

denn isch es zum viktualienmarkt gange. im reisefüerer de tipp nummere eis. ob s das au für üs gsi wäri, wüssed mir aber nid, denn wil ostersunntig gsi isch, isch kei markt gsi. chann mir aber nid vorstelle, dass das de höhepunkt vo euesm münche-tripp sie hetti chönne.

nur es paar schritt wieter isch s jüdische zentrum gsi: moderni, grobi, chlotzigi baute, aber sehr speziell, und mindistens d synagoge isch es wert, z gseh.

wenn mir scho bim moderne sind, mached mir grad deht wieter, händ mir denkt, und sind zu de allianz arena use gfahre. di neui heimstätte vo bayern münche und em tsv 1860 münche, vo de schwiizer architekte herzog & de meuron für d wm 2006 entworfe, ghört mittlerwile zu de sehenswürdigkeite vo dere stadt. allerdings chann me das glandeti ufo nur vo usse aluege. zum dri ine ga, hetti me müesse e tour bueche, uf die mir e halb stund warte hätted müesse und 75 minute gange wäri. da sind mir denn doch lieber zrugg id stadt gfahre.

am odeon platz sind mir usgstiege und z fuess an königsplatz spaziert. unterwägs händ mir no d statue vom maximilian am wittelbacherplatz, d gedänkstätte vo de opfer des nationalsozialismus und de obelisk am karolinenplatz atroffe. denn sind mir uf em königsplatz acho, und händ üs gfühlt wie in griecheland. wieder de maximilian, hät dehte nach griechischem vorbild drü baute (glyptothek, propylöen, staatlichi antiksammlig), inklusive sülegäng und griechische relief erbaue la.

d u-bahn hät üs zrugg an marienplatz bracht, vo wo us mir nomal chli dur di ursprünglichi alststadt glaufe sind. natürlich hät ja de bsuech vo de frauechille, eigentlich "Dom zu unserer Lieben Frau", nid dörfe fähle. er isch es wahrzeiche vo münche. allerdings ziemlich uspektakulär, mal abgseh vo sinerer grössi. di beide 100 meter hoche türm han ich scho vom olympiaberg und em olympiaturm us gseh.

nach em bsuech vo de "fünf höfe", e moderni, phantasievolli ladepassage, sind mir mit me glacé uf d wiese hinter em ratshuus gsässe. denn hät s au scho bald gheisse, koffere is hotel go hole und üs in zug zrugg uf züri z setze.

dani Mon, 04/13/2009 - 01:15

Add new comment

schloss nymphenburg und olympiapark

dani — Sun, 12 Apr 2009 08:17:34 +0000

schloss nymphenburg und olympiapark

gester isch de einzigi tag gsi, wo d läde offe gha händ. drum hät d olivia natürlich welle go poste. ich han mis eignige programm gmacht.

nach me feine z'morge i de nächi vom sendlinger tor bin ich mit de u-bahn und em ersatzbus (ich wäri doch gern emal i so me tram da gfahre!) zum schluss nymphenburg usegfahre. das isch hützutag ziemlich im stadtzentrum, wo s nach 1660 mit dere summerresidenz afange baue händ, isch sie aber no usserhalb vo de stadt, umgäh vo felder gsi. 350 jahr hät sich aber einges gändered. i füf etappe isch us dem feudale gartehuus i zweihundert jahr s grössti schloss, wo ich je gseh han, baut worde. und d stadt rundume hät s, wie gseit, mittlerwile igschlosse.

scho de igang hät en riesige vorpark, mit springbrunne, chiesplatz und blueme betli. de wasserkanal wo senkrecht devo wäg gaht, gaht wiet id stadt use, ich chönti mir guet vorstelle, dass früener de park so gross gsi isch.

im schloss ine bin ich nur im hauptteil gsi, im obere stock hät s en wunderbare festsaal, mit grosse glasfenster uf beide siete use, als zentrum vom schloss. de ällei isch de itritt wert gsi. di andere gemächer und diverse gemälde vom könig xy und de königin blablabla und ihrne chind händ mir z'wenig gseit. da han ich au gschicht vo bayern viel z'wenig genau kennt.

denn isch de würklichi schlosspark agstande. es unglaublichs monstrum. me chann locker en nomittag lang drinne spatziere, ohni zweimal am glieche ort verbi z cho! nach em streng geometrische erschte teil vom park, hät s wiederum senkrecht zum schloss en elend lange wasserkanal gha, wo me brunne agfange und ufghört hät. ursprünglich han ich gar nid bis a s endi vo dem kanal laufe welle, s getose vom wasserfall, wo me ab de mitti scho ghört hät, isch derart imposant gsi, dass ich denn doch bis ganz ue glaufe bin. und es hät sich glohnt!

links und rechts wasserkanal sind nach englischem vorbild eher natürlichi pärk gsi, ähnlich me wald bi üs. i dene hät s nomal je en see und diversi chlini lustschlschlössli und anderi sehenswürdigkeite gha. di rechti siete, vom schloss us gseh isch mit de padogenburg, i dere s nid viel z gseh git, wesentlich weniger interessant als di linki. deht hät s am riesige see es (en?) monopteros und di definitiv sehenswürdigi badeburg. die heisst wohl so, wil si näbed me wiederum schöne und helle festsaal tatächlich es hallebad gha hät! en pool, locker so gross wie de im summer fühener in sdfrankriech. notabene mit gheiztem wasser!

i de amalienburg han ich s erschti mal e chuchi gseh. das isch mir de ganzi tag ufgalle, dass keis vo de schlösser und schlössli sowohl badzimmer als au chuchi hät!

es isch scho füfi gsi, wo ich s schloss verlah han und in richtig olympiapark gange bin. eigentlich werded die beide alage dur de nymphenburgkanal mitenand verbunde. s wasser vom schloss flüesst also direckt in olymp! dem entlang hetti s au en weg, es isch aber en rechte stuck. so han ich mir nid s erschti mal da, es velo gwünscht und denn müesse mit em bus (stadt em tram) stadt iwärts fahre, bis ich d u-bahn krüzt han, wo zum olympia-zentrum use fahrt.

züsched de u-bahn-station und em olympiapark chunnt me no a de "BMW welt" verbi. die hät mich zwar nid interessiert, architektonsch aber extrem interessanti und spezielli gebäude!

de olympiapark, mit sine zeltdach-ähnliche überbaute isch erneut en super-schöne park! ich bin zwüsched de schwümmhalle und de olympiahalle durespatziert, han mir öppis z drinke kauft und d chance verpasst, di schwümmhalle ine z luege, wil ich mir das für "später" ufghobe han. wieter isch es zum olympia stadion gange, wo bis vor churzem au d bayern drinne tschutted händ, denn über e bruck uf di ander siete vom see. deht isch de olympiaberg gsi, en 52 meter hoche hügel, wo s us trümmer vom zweite weltchrieg errichtet händ und mit "voralpiner vegetation" (also so z säge schwiizer vegetation) begrüent händ. vo dem hügel us hät me en wunderbare überblick über de olympiapark uf de eine siete und uf d stadt uf de andere siete.

nach dem ich vom hügel abegstiege und über es anders brüggli zrugg zu de olympiaalage cho bin, isch no de olympiatrum dra cho. deht chann me vo 187m, oder meh, wiederum uf d stadt und s olympiagländ abe luege. au s neui dihei vo de bayern, d alllianz arena, gseht me vo deht us. im gegesatz zum turm in berlin, chann me z münche au uf offni plattforme use, was guet isch zum fötele und au susch s spektakel no wieter erhöht. en bsuech isch de turm in jedem fall wert!

so, jetzt muss ich de olivia no hälfe, ihren osterhaas sueche, damit mir au hüt no chli was aluege chönnd...

dani Sun, 04/12/2009 - 10:17

Kommentare

Hallo Daniel. Offenbar ist München eine Reise wert. Spannend, wie du die historischen Gebäude bewundern und geniessen kannst. Da könnten wir zusammen mal nach Versaille oder nach Schönbrunn. Was meinst du? Euch beiden eine gute Zeit in München. Ich war damals einfach im Weltmuseum und dann in diversen Bars - auch nicht schlecht.
Grüessli papi

Add new comment

de erschti idruck vo münche

dani — Fri, 10 Apr 2009 22:02:30 +0000

de erschti idruck vo münche

git's da denn no anders alls bier zum drinke?

für eimal isch es mit em zug id ferie gange. s hotel isch i paar wenige fuessminute vom bahnhof us z erreiche gsi und s überdimensionierti zimmer isch au scho parat gsi. nach dem mir täsche anegstellt händ, sind mir au grad wieder los zoge. nach 4h reise hät sich de hunger gmäldet. es isch aber au scho nach em 12i gsi. nach me churze stop am marienplatz mit blick uf s neue ratshuus, d marien säule und in apple store, sind mir is hofbräu haus üs go richtig bayerisch verpflege...

mit knödel und me ma? (bi de olivia) im buch isch es denn dur d maximilianstrass gange. e super-türi ichaufsmeile, à la bahnhofstrass in züri. eingetlich total unspektakulär, erscht recht wenn einem näme wie dior, gucci oder louis vuitton nüt säge.

a de ludwig-maximilian-universität verbi (s ETH-hauptgebäude isch tuusig mal schöner) via theatinerchille und siegestor sind mir in englische garte. de isch a me so sunnige tag wie hüt wohl de treffpunkt vo ganz münche, ähnlich de rente- oder de plattewiese z züri. mir händ denn deht au chli usgruebed, bevor mir dur de park spaziert sind. bim chinesische turm isch de nächschti biergarte gsi, i dem mir halt gmacht händ. erneut isch es schwierig gsi öppis anders als es ma? über z cho und au en platz z finde trotz de grössi e komplexi ufgab gsi! vom monopteros obe abe händ mir d ussicht über de park gnosse. später sind mir fasziniert a me wasserfall stah z bliebe. was die scho alles im um 1800 händ baue chönne!? am endi vom park isch s "haus der kunst" gsi, wo d olivia e usstellig über s "maison martin margiela" gseh hät welle.

de tag abgschlosse händ mir denn ganz unbayerisch, mit enere pizza inere pizzaria.

dani Sat, 04/11/2009 - 00:02

Kommentare

Super. Ich wünsche euch eine ruhige und erholsame Zeit in München. Für mich wäre ein Mass sicher auch drin gelegen. Und die Stadien der alten Olympiastadt? Wurde nicht in München während der Olympiade ein Anschlag verübt? Wir geniessen die Sonne und die Wärme mit Jäten und Rasenmähen.

Hoi Dani,

danke für deine Infos. Ich bin ja noch nie in München gewesen. Du scheinst einmal mehr mit Kultur und Baugeschichte viel anfangen zu können. Und Olivia hat's mit dem Bier und den Einkaufsstrassen... So könnt ihr hoffentlich die nötigen Kompromisse machen, damit jedes auf seine Rechnung kommt.
Ich wünsche dir und euch morgen noch einen sonnigen Tag und dann eine gute Heimreise, so schnell geht das ja leider, gell. Ich freue mich, wenn wir am Montag zusammen nach Malans fahren.
Bis dann, lieben Gruss (zum Glück schriftlich, ich bin wieder stockheiser und bringe keinen Ton heraus...) Mami