usa 2010

JFK -> ZRH

dani — Fri, 27 Aug 2010 23:11:08 +0000

JFK -> ZRH

de letschti tag isch de chürzisti und de längsti glichziitig gsi.

de letschti tag in new york isch ziemlich churz usgfalle. de super shuttle hät üs scho am mittag am eis welle abhole. so sind mir nüme wiet cho. genau gno nur no bis in 5th avenue apple store wo s souvenirs für mich gä hät. de zruggwäg is hotel han ich aber denn glich nid ganz direkt gno. ich bin no e chli entlang de madison avenue, de schickste ichaufsstrass vo new york. deht händ sich calvin klein, dkny, hermes, graff, chanel und so wieter anenand greiht. usser dass d sicherheitslüt e schale statt enere uniform treit händ und s wiet und breit kein starbucks gha hät, isch es aber nid gross andersch gsi, als anderi strasse in new york.

bi de 65. strass bin ich denn wieder abboge und dur de central park. da das aber e richtigi strass wo quasi dur en grabe dur de park gange isch, gsi isch, isch es nid so s erhoffti vergnüege gsi.

denn isch es wieder an flughafe gange. de abschied isch üs dur de erschti (und einzigi) rege wo mir uf de ganze reis gha händ, chli erliechtered worde.

da de flug en nachtflug gsi isch und mir am morge am 8i wieder z züri gsi sind, isch us em churze new-york-tag en super-lange tag worde. wo ich am abig mit zwei ITL-kollege um de griefesee skatet bin, isch das scho mini 30. schlaflosi stund gsi..

dani Sat, 08/28/2010 - 01:11

Tags

usa 2010

Add new comment

new york, tag 3

dani — Thu, 12 Aug 2010 04:28:54 +0000

new york, tag 3

di ersti station vom hütige tag isch nur es paar "blocks away" from hotel gsi: s time warner center. es riesigs, recht nobels ichaufszentrum.

denn isch es z fuess em boradway entlang gange, bis mir am times square acho sind. ich weiss nid, aber irgendwie hett ich mir das chli spektakulärer vorgstellt. und vor allem edler. (zu) viel blinkendi und lüchtendi werbige und azeige chömmed mir eifach eher wie billigs rotliecht-viertel vor, als de hauptplatz vonere weltstadt.

wieter isch es in richtig central station gange. die han ich ja scho mal agluegt, jetzt han ich si aber au no so z'säge "benutzt": mir sind deht uf d subway zu de city hall, em rathuus vo new york. denn sind mir über d blooklyn bridge glaufe. nid über di ganzi, aber bis id hälfti. und denn wieder zrugg.

üsi tour hät üs denn am united states court house verbi, am rand dur china town und knapp a little italy verbi gfüert. deht händ mir wohl d hauptstrass genau um eini verpasst, aber zum nomal zrugg z laufe sind mir einersiets z müed gsi und anderersiets hät s denn doch au nid so sehr spektakulär meh usgseh.

de washington square händ mir denn usglah und sind mit de u-bahn bis zum empire states building gfahre. deht händ mir d uswüchs vom kapitalismus und s wort "zweiklassegsellschaft" in reinkultur erlebe chönne: zu üsem vorteil. d empire states building tickets wo mir online bueched händ, sind express päss gsi und händ s dopplete vo de normale tickets koschted. defür händ mir würklich a keinere einzige schlange müesse astah. für d express-pass-chunde hät s en eignige sicherheits-check und überall en weg rund um d schlange ume gä. im erschte lift, wo bis in 80. stock gange isch, sind mir sogar nur s zweite gsi!

vom 86. stock us händ mir denn chönne uf s i de dämmerig liegende und nächtlichi new york abe luege. es fantastisches liechtermeer! s einzige was nid super gsi isch, isch d mengi a lüt wo sich uf de bsuecherterrasse drängt hät. mä hät immer müesse warte, bis es paar vor einem stehendi lüt wieder wäg gange sind, bis mä abeluege hät chönne. stellewies isch au fasch keis durecho me gsi. so hät mä s nid richtig gnüsse chönne. trotzdem händ es paar glungeni schnappschüss und viel schöni erinnerige debi uselueged.

dani Thu, 08/12/2010 - 06:28

Tags

usa 2010

Add new comment

niagara falls

dani — Wed, 11 Aug 2010 04:34:26 +0000

niagara falls

dass d dimensione und d distanze i de usa nomal ganz anderi kategorie sind als i de schwiiz oder gar europa hät de hütigi tag bestens zeigt.

euse tagesusflug hät am morge am 5i agfange. deht sind mir und no vier anderi abgholt und zum flughafe bracht worde. unterwägs händ mir no en platte gha, woruf abe üs de van-fahrer es taxi bstellt hät. vom flughafe JFK sind mir anderthalb stund nach buffalo gfloge wo üsi bisher sechschöpfigi reisegruppe uf 9 erwietered worde isch. zwei franzose, drü dütschi, zwei östricher und (mir) zwei schwiizer sind uf di kanadischi siete vo de niagara falls bracht worde. deht hät üs en guide abgholt, wo ursprünglich italiener gsi isch, 10 jahr i de schwiiz gschaffed hät, jetzt sit 50 jahr in kanada lebt und mit 75i no tour guide spielt.

vo ihm händ mir denn chli was über d niagara falls erfahre, so zum biespiel, dass sie di wasserrichschte wasserfäll vo de welt sind, dass es scho diversi lüt gä hät, wo sich probiert händ i ihrgend welche gfährt die fäll abe z stürze, wobi nur wenigi überläbt händ und dass i de nacht nur 60 prozent vom wasser effektiv über die wasserfäll abe gaht. die andere 40 prozent werded brucht, zum strom z erzüge.

denn isch e churzi aber abentürlichi bootstour uf em programm gstande. zersch sind alli mit regeschütz usgstattet worde, was au nötig gsi isch: de dunscht vo dem thosende ding isch enrom und me isch sich ziitewies wie i me platzrege vorcho.

zum z'mittag händ mir denn üs chönne am buffet vom hotel sheraton bediene und vo höch obe abe nomal uf d wasserfäll abe luege. aschlüssend sind mir z fuess über d brugg zrugg id usa glaufe. natürlich sind wiederum passkontrolle agseit gsi. und de zöllner hät nid chönne verstah, dass ich es visa brucht han, s mami aber nid, obwohl mir de glichi pass gha händ. ireise la hät er üs aber dennoch problemlos.

uf de amerikanische siete hät üs de amerikanischi driver wieder abgholt und no uf d insle zwüsched de beide wasserfäll bracht. aschlüssend isch es zrugg uf de flughafe gange. und wie hetti s au andersch chönne si, hät de flüger fasch ei stund verspätig gha. und wo mir denn alli drinne gsässe und agschnallt gsi sind, hät s gheisse, mir chönned jetzt doch noni flüge, wil s in new york grad e chli rush hour heiged.

endlich am JFK händ mir zersch de fahre, wo üs zrugg is hotel bringe sölle hetti, nid gfunde. i de morgendliche ufregig ab em platte händ mir vergässe de treffpunkt ab z mache. schlussendlich hät's denn aber doch no klapped und er hät sechs vo üs iglade und i die drü hotel zrugg verteilt. schlussendlich isch es 10i am abig worde, was es 17 stündigs abentür ergit.

dani Wed, 08/11/2010 - 06:34

Tags

usa 2010

Add new comment

new york, tag 2

dani — Tue, 10 Aug 2010 03:20:23 +0000

new york, tag 2

miss liberty, wallstreet und ground zero

hüt sind mir so z säge as endi vo new york gfahre. genau gno, as endi vo manhattan und no chli wieter: mit me schiff sind mir uf d liberty island gfahre, wo d freiheitsstatue staht. zum guete, guete glück händ mir d tickets online posted! d schlange vor em kassehüüsli isch lang und die für d fähre ohni spezielli abfahrtsziit no viel, viel länger gsi. wieviel stund d lüt deht gwarted händ, chönnd mir nur erahne. mir händ aber uf di 10:30 müesse deht si, zum uf d 11i-fähre z ga. und mir händ nur en bruchteil so e langi schlage gha, wie di andere.

au wenn mir "no monument access" gha händ, hät sich s glohnt! vom boot us hät me e herrlichi ussicht sowohl uf manhatten als au uf d freiheitsstatue. und wenn me denn emal uf de insle staht, git s einem chli en idruck, wie gross die isch. de bsuech uf de ellis island ghört wohl eifach zum bsuch vo de liberty island. aber für nicht-amerikaner isch es wohl nur halbwegs spannend. im musem deht chann me sich über d immigration id usa schlau mache und so viellich öppis über sini eigene wurzle usefinde. ellis island isch es wili lang, genau wie alcatraz in san francisco, als "zwüschestation" oder "uffangbecki" für immigrationswilligi verwendet worde.

zrug im battery park in manhatten händ mir üs uf de weg in bzw. dur de finanz distrikt gmacht. d wallstreet mit de trinity church und de federall hall und natürlich em new york stock exchange als höhepunkt. churz druf abe händ mir vom "wintergarden" vom world financial center us en blick uf di riesigi baustell am und um de ground zero gworfe, was so z säge denn de tüfpunkt gsi isch. nach me churze bsuech im national 9/11 memorial und me blick uf d st. paul's chapel sind mir mit de u-bahn wieder zrugg an columbus circle. de isch ebefalls sehenswert.

nach em z'nacht han ich no es paar nachtufnahme vom schön belüchtete platz im lincoln center und de avry fisher hall (heimat vo de philharmoniker) gmacht.

dani Tue, 08/10/2010 - 05:20

Tags

usa 2010

Add new comment

new york, tag 1

dani — Mon, 09 Aug 2010 05:05:31 +0000

new york, tag 1

am morge frühe sind mir nach üsem nachtfulg in new york acho und no ziemlich tilt gsi.

im hotel händ mir zwar chönne ichecke, aber noni s zimmer bezie. das isch (natürlich) noni parat gsi. so isch "go de verlore gangeni schlaf nah hole" kei option gsi. mir händ üs i de lobby chli breit gmacht und en plan für de tag zäme gstellt. zudem han ich endlich emal chönne shorts azie. ich han s doch nid vergäbens mitgno! s gepäck händ mir im hotel chönne deponiere. denn sind mir emal los zoge in näch glegene central park. deht händ mir es paar hobby-baseballer bi ihrere sunntig-nomittag-beschäftigung zuegluegt und picknick gässe.

us em park cho sind mir im süd-östliche egge, ziemlich genau vor em apple-glas-qubus a de fifth avenue. da s aber so viel lüt gha hät, han ich de bsuech vom store verschobe. mir sind denn d fifth avenue durabe spatziert. unglaublich, die viele lüt. und alli lände händ au am sunntig selbstverständlich offe.

de einzigi lade, i de mir ine sind, isch aber de vo lindth gsi. mit schoggi ideckt isch es wieter gange bis zu de st. patrick's cathedrale. e art kölner dom in new york. mit em unterschied, das de da in mitte vo all dene wolkechratzer gar nüm gross wirkt. und d lüt drinne sind nid grad respektvoll gsi. fräget sich scho, ob me sotigi gebäude touriste überhaupt zuegänglich mache söll. jedefalls wenn d mehrheit amerikanischi touris sind. grad vis à vis isch s rockefeller center gsi. und uf das hauptgebäude hät me ue chönne. das händ mir natürlich gmacht. churz druf abe händ mir vo 206 meter obe aber uf new york chönne luege. wahnsinn! de usblick isch würklich super gsi und es hät au chli en überblick über manhattan gä.

denn hät s mami gnueg gha und ich han ällei wieter müesse. nur paar blocks wieter isch d central station gsi, mis nächsti ziel. gegenüber dene züg sind sogar di alte S16 vom flughafe nach (feld)meile no neus rollmaterial!

wieter bin ich no zum uno-hauptsitz gange. leider sind aber di berüemte fahne nid ghisst gsi. nur unendlich viel leeri fahnestange sind deht gstande. trotzdem weiss ich jetzt, wo d "weltpolitik" gmacht wird. uf minere charte hät s no recht viel grüen gha, so han ich erwartet, dass es no e öffentlich zuegänglichi parkalag hett. wie dumm vo mir, sowas i me land z denke, wo me scho fasch zum en kaffi poste dur en metaldetektor dure und d täsche durchlüchte la muen...

uf em weg zrugg is hotel han ich erscht gmerkt, wie wiet ich fäng glaufe bin. ich han uf em weg no d diamond row bsuecht, was aber am sunntig gänzlich unatraktiv gsi isch. d boutique sind zue und d schaufenster leer gruumt gsi. vo deht a zrugg hät sich denn de weg unglaublich lang zoge. debi han ich ja nur no di 6i strass ue und denn de central park quäre müesse. aber es isch mir wie en marathon vor cho. d entschädigung im hotel isch es bad im mini-pool uf em hoteldach obe gsi.

dani Mon, 08/09/2010 - 07:05

Tags

usa 2010

Add new comment

Kommentare

Seisch NY en Gruess vo mir, wär au gern dete ;-)

S Hotel gseht mega schön us!!!

d hotel isch au ganz ok. usser dass es di nächschte drü täg wäg me "private alass" s pool-deck schlüst!?! *argh*

Add new comment

los angeles

dani — Sun, 08 Aug 2010 16:14:40 +0000

los angeles

vom santa monica pier via griffith park an flughafe.

nach dem mir üsi sache wieder packt und uschecked händ, sind mir zersch an pier abe. uf em pier händ mir üs chli i de touriste-masse gsuuled und de lüt am strand bim bade zuegluegt. so chalt chann s meer da also nüme si. aber ich han doch no jeans und es langärmligs liebli a gha!? nach dem mir gnueg "baywatch" gha händ, sind mir zrugg is hotel go s auto hole.

s nächsti ziel isch de griffith park gsi. genauer s observatory. de anzahl parkierte autos a, händ mir extrem viel lüt erwartet. mir händ no en rechte stuck z fuess ga müesse. je nach dem, ob mir grad i de sunne oder im schatte gstande sind, s wind gha hät oder nid, händ mir gfrore, gschwitzt oder es isch agnehm gsi.

s observatory isch als gebäude selber scho sehenswert gsi. d ussicht vo deht uf l.a. abe isch de hammer gsi. zudem hät me wunderbar uf de hollywood-schriftzug gseh. womit das au erlediget gsi wäri. für astronomisch interessierti hetti s es interessants museum gä. mir händ üs aber meh für d ussicht interessiert und üs nomal mit me snack gstärcht. da me herrlich uf "downtown" gseh hät, han ich au nomal di erscht wuche mit de SIGGRAPH chönne revue passiere la.

mit me chline umweg zu de pforte vo de universal studios sind mir denn richtig flughafe. s auto abgäh isch super schnell und total schmerzfei gsi, im gegesatz zum abhole. en bus hät üs zum terminal bracht wo mir di übliche prozedere händ müesse über üs erga la. ob s würklich wert isch, d schuhe bim security-check ab z zie fräg ich mich mehr denn je: s mami hät e leeri halbliterfläsche mit ine nä chönne. mir händ s schomal e absolt leeri zahpasta wäg gno, wil si emal 125ml drin gha hät. chli später hät s mami denn i ihrere handtäsche no ihri handceme und d sunnecreme gfunde, wo si vergässe hät in koffer umzpacke...

dani Sun, 08/08/2010 - 18:14

Tags

usa 2010

Add new comment

santa barbara -> santa monica

dani — Sat, 07 Aug 2010 07:12:09 +0000

santa barbara -> santa monica

old spanish days fiesta in santa barbara. aber isch das würklich old spanish?

nach dem mir us em hotel uscheckd händ, sind mir nid grad abgfahre. schliesslich hät üs en iheimische für de tag no de bsuech vom umzug nahgleit, wenn mir scho während de old spanisch days fiesta in stanta barbara sind. das händ mir denn gmacht.

es isch mir chli vorcho, wie es sechsilüüte mit mexikanische- und amerikanische uniforme. wobi, so sehr "old" sind mir die zum teil gar nid vorcho. sind gwüssi teil i de usa no so sehr zrugg bliebe, oder isch uf em "neue kontinent" old no praktisch gester? oder isch mis wohl vo hollywood prägti bild eifach falsch?

nach einere stund parade luege, sind mir denn wieter in süde gfahre. s ziel isch au praktisch s ziel vo de reis gsi, da santa monica entweder en stadtteil vo los angeles isch, oder mit los angeles zämegwachse isch. da kenn ich di politische verhältnis z'wenig.

grösseri charteasicht

uf em wäg deht hie, sind mir au no a de ständ vo malibu verbi gfahre. da hät's tatsächlich so lifeguard-hüsli und type i rote badhose und gäli "lifeguard-autos" mit surfbretter uf em dach, wie us baywatch bekannt.

im hotel han ich endlich e glägeheit zum wäsche gfunde, und während d chleider i de maschine gsi sind, bin ich im pool gsi. sicher nid de schönsti bisher atroffeni, aber es hät halt ziitlich grad so guet passt...

dani Sat, 08/07/2010 - 09:12

Tags

usa 2010

Add new comment

santa barbara

dani — Fri, 06 Aug 2010 06:34:42 +0000

santa barbara

nach dem mir drü täg meh oder weniger im auto verbracht händ, isch es guet gsi mal wieder en tag lang ohni z reise verbringe z chönne.

am mittag händ mir üs e chli übersicht über s städtli und d bucht mit enere sightseeing-tour verschafft. d rundfahrt anumfürsich isch zwar no guet und unterhaltsam gsi, di eigentlichi attraktion isch aber s fahrzüg sälber gsi: es hät de vbz-slogan "ich bin auch ein schiff" wörtlich gno. nach enere stund stadtrundfahrt isch das ding is meer gstoche und hät no e halbstund rundfahrt i de bucht gmacht. öppis wo's susch wohl nur bim james bond oder em militär git.

später han ich no es hotel-velo usglehnt und d stadt chli so erkundet und (erfolglos) e laundry gsuecht. nid ganz passend zu de spanisch-mexikanische festivitäte wo in santa barbara ufziend, sind mir zum z'nacht zu me italiener go e pizza ässe.

dani Fri, 08/06/2010 - 08:34

Tags

usa 2010

Add new comment

pismo beach -> santa barbara

dani — Thu, 05 Aug 2010 06:13:45 +0000

pismo beach -> santa barbara

kei sehenswürdigkeite bedütet nid kei abentür

wie gehabt sind mir chli vor em mittag los gfahre. und wie bisher immer, isch es denn no total "foggy" und wenig fründlichs wetter gsi. zersch händ mir müesse tanke, was es erschts chlises abentür gsi isch. was schluckt ächt üse super-sport-wage fürtigs benzin? und wie zum tüfel gaht da de tankdekel uf?

da nüt anders uf em programm gstande isch, sind mir zu me state reserve abboge. es hät oceano dunes svra gheisse. wo mir deht gsi sind, händ mir usegfunde, das svra für "state vehicular recreation area" staht und in etwa meint, sanddüne i die me mit em auto fahre chann. ob das üse super sportwage mit macht? die am igang wo di 5 dollars ikassiert hät, hät s nid gwüsst. mir händ s denn probiert, obwohl di meiste andere autos wo ine gfahre sind, wohl i d klass "geländewagen" gange isch. das isch da aber sowieso jedes zweiti auto.

sehr wiet sind mir nid cho. am afang isch es zwar super gange dem strand entlang z fahre. de sand isch härt gsi und es isch wie uf enere strass gsi. aber plötzlich isch de sand weich gsi und mir sind kein zentimenter me fürschi cho. chum usgstiege sind au es paar hilfsbereiti anderi deht gstande. alli händ gmeint "that happens to me yestarday too" oder so ähnlich. zersch händ mir denn emal d luft us de pneu uselah und e chli sand vor de redli wäggrabe. denn isch es aber recht easy gange. mir händ aber a dere stell denn trotzdem kehrt und sind zrugg, wil di andere gmeint häd, vo da werdi de sand nur no weicher. bevor me uf d strass chunnt, hät s no en stand gha, wo s einem für 1$ pro rad wieder d luft ufgfüllt händ.

Grö?ere Kartenansicht

zrugg uf de california 1 sind mir denn chli dur s hinterland und d santa ynez mountains gfahre. erscht deht wo s 1 und s 101 zäme cho sind, sind mir wieder as meer cho. deht händ mir a me "vista point" nomal en picknick-stopp gmacht. mit herrlicher ussicht uf s meer, mit drü bohrinsle, eme sich tummelnde "seal" und direkt am zuggleis, wo mir scho sit tage immer wieder näbed üs gseh händ. und oh wunder: es chunnt au eimal en zug!

vom halt us bis santa barbara isch es denn nur no paar meile gsi. defür sind langsam summergfühl ufcho: es isch am nomittag ziemlich warm. aber am abig hät s ziemlich schnell abkühled und me hät wieder langi hose, pulli und gar es jäggli brucht.

dani Thu, 08/05/2010 - 08:13

Tags

usa 2010

Add new comment

Kommentare

Das isch ja es cool Auto :D

es isch en dodge challenger. um de benieded üs glaub no es paari da. mir sind aber nid speziell begesitered devo...
jedefalls isch de eifach deht gstande, wo mir bi de autovermietig sind eis go hole. parkfeld 14 hät's gheisse. und deht isch er denn gstande. :-)

Add new comment

monterey -> pismo beach

dani — Wed, 04 Aug 2010 17:52:07 +0000

monterey -> pismo beach

de abschnitt isch wohl de längti abschnitt gsi. und zu dem händ mir am meiste infos im reisefüherer gha.

so händ mir gar nid alls aluege chönne, wo deh vorgschlage hät. in monterey hettis zum biespiel es aquarium gha, aber de bsuech vo dem ällei hetti wohl scho en halbe tag in aspruch gno. so händ mir das grad emal usla müesse und händ üse erschti stopp im dörfli carmel igleit. es isch tatsächlich e chli "heili welt" gsi deht, wie s de reisefüherer versproch hät. aber so sehr interessiert hät s üs denn au wieder nid. oder andersch gseit, me hetti wiederum chönne en halbe tag demit verbruche, i all die chline lädeli ga go luege, was es abüted. mir sind aber lieber in en market gange go es picknick und vor allem wasser poste. und nach guet enere halbe stund sind mir wieder uf em california highway 1 gsi.

im point lobos state reservate händ mir denn einiges länger ghalte. das hät sich würklich glohnt. mir händ deht en usdehnte spatziergang gmacht und üs vo de natur, em meer, seals und eichörnli entzücke la.

Grö?ere Kartenansicht

de dritti planti stopp isch im julia pfeiffer burns state park gsi. de isch viel, viel chliner gsi als de point lobos. defür hät deht d sunne herrlich gschunne und me hät en einmalige blick uf e chlini bucht mit me wasserfall gha. das wäri denn au scho alles gsi, de halt hät sich aber in jedem fall glohnt!

vorher und nacher isch es vor allem nach em motto "de weg isch s ziel" gange. d strass isch kurvig gsi und unmittelbar a de küste verlaufe. unzähligi chlini halt uf ussichtspünkt händ mir igleit und immer wieder s meer und d klippe bestuuned. au über mehreri brugge isch es gange, wobie zwei bsunders schöni bauwerk gsi sind.

so sind mir relativ spat im hotel acho. wo mir go ässe sind, isch es scho fasch dunkel gsi und mir händ nüt meh vo de mögliche ussicht uf s meer gha. au das hotel isch wiederum direkt a de küste. es hät de name shore cliff lodge würklich verdient.

dani Wed, 08/04/2010 - 19:52

Tags

usa 2010

Add new comment

Kommentare

Wow, das tönt alles eifach so traumhaft, bin scho recht niedisch grad ;-)