letschte WK

letschte tag

dani — Thu, 23 Sep 2010 14:02:22 +0000

letschte tag

am letschte tag hät sich s militär nomal vo de beste siete zeigt.

bim z'morge hät s kei nutella me gä. bim AV sind mir genau drü vo eusem zug gsi. und nach em AV han ich mich uf em Kp büro nach minerer entlassig erkundet. deht händ s vo nüt gwüsst. de kadi isch im urlaub gsi. de kadi stv isch aber über d entlassig informiert gsi. immerhin das. was aber us minem disziplinarverfahre wird, hät er aber nid gwüsst. er hät gmeint, ich söll emal go abrüste und am mittag am eis wieder cho. am achti isch alles erlediget gsi. bis am nüni han ich probiert z läse. bin aber z müed gsi. bin denn no go fertig packe und denn wieder go aneliege. gschlafe han ich nid, aber no chli podcast gloset.

irgendwenn isch es mittag gsi und es hät mittagesse gä. aschlüssend bini nomal uf s Kp büro gange. weder kadi no kadi stv sind ume gsi. gwüsst hät aber niemert öppis. grad wo ich use bin und s mir a de sunne gmüetlich gmacht hät, isch de kadi cho und hät gseit, ich sölli inere viertelstund i sis büro cho.

deht händ er und en protokollschrieber mich zu de ereignis vo vorgester nacht befräged. alles isch protokolliert worde, ich han s protokoll müesse läse und unterschriebe. denn han ich no e kopie übercho und müesse de ruum verla.

paar minute später bini wieder inegrüeft worde. s urteil isch erchlärt und begründet worde: en verwies. de kadi hät sich also nomal vo sinere liebe siete zeigt. schlussendlich also s ganzi tamtam nur de formalität z lieb. aber de kadi hät kei anderi wahl gha, da de fall ja bi de MP registriert und protokolliert gsi isch.

churz druf abe hät er mich und no en andere us em dienst entla, per handschlag und mit de beste wünsche. am drü isch s appezölle bähnli denn in richtig zivilläbe gfahre.

dani Thu, 09/23/2010 - 16:02

Tags

letschte WK

Add new comment

2. letschte tag

dani — Wed, 22 Sep 2010 21:29:39 +0000

2. letschte tag

am morge am viertel ab siebni isch eine im zimmer gstande und hät gmeint, mir müessed as AV. da söll no eine drus cho!?

e chli später sind mir denn deht gstande. als nächsts isch denn ?e rasurkontrolle uf em programm gsi. denn händ die, wo gester macht vo de MP kontrolliert worde sind, no füre stah dörfe ?total 22 händ s verwütscht. anschienend no 13 anderi. schlussendlich hät das ganzi AV-prozedere wiet über e halbstund druured. anschienend händ mir ja nüt gschieders z tue.

aschlüssend isch waffeinspektion uf em programm gstande. da einigi uf üebig sind, händ di awesende eifach "irgendwelchi" gwehr müesse usenand nä, putze, vorzeige, fette und zämesetze. so bin ich a minem letschte richtige militärtag au nomal i de zwiefelhafti gnuss cho. sogar zwei gwehr han ich inspiziere la dörfe.

so nach de zehne isch das denn erlediged gsi und ich han ziit gha, zum s sechsehalbi mit enere stellignahm zum vorabig schriebe chönne. dezue han ich no d bundesratswahle gluegt.

uf di zwei isch es denn wieder uf st. galle gange. letschte mal. das mal isch es bizeli öppis glaufe. es telefon hät nüme tue. wil d dräht chli sehr wiet abisoliert gsi sind, händ s anenad cho chönne und es hät en churze gä. das isch schnell behobe gsi. chli später isch no eine cho fräge, ob mir ihm hälfe chönned es kabel z verlege. es hät es telefon vo einem im es anders Zimmer verlege welle. es sind zwar nid telefon vo euesm system gsi, aber mir händ ja susch nüt z tue gha.

vom halbi vieri bis öppe am halbi sechsi bini chli anegläge. denn hät s z'nacht gä. ich weiss nid warum genau, aber im st. galle isch d nachtessensziet super frühe. 17:15 bis 18:15. denn han ich amig no gar kei hunger gha! und hüt hät s nid emal bis am 18:15 was gä, wil ne vorher s esse usgange isch. zum glück bini für mini verhältnis frühe dra gsi.

nach em esse sind nomal drüehalb stund bliebe. s glichi telefon wo am nomittag scho mal problem gmacht hät, hät nomal nid tue. mir händ s churzerhand usgwechslet. nacher isch nüt me glaufe. ich han no paper gläse, solang s d müedigkeit zuegla hät. di letschti stund han ich no im imternetruum mit läse und e-maile verbracht. pünktlich am zehni isch üsi ablösig cho, und min letschte planete isatz isch fertig gsi!

de rückwäg händ mir das mal ziemlich direkt gno. mir händ nur no eine am strasserand abgsetzt wo i de nächi deht gwohnt hät und a de stamdardtankstell en chline boxestopp igleit. das mal isch alles guet gange.

trotzdem bini nid so sehr in fäschtluune. da ich superwenig gschlafe han, bini recht kapputt. zudem isch no die sach vo gester offe. ich mach mir chli sorge, das ich morn nid wie gwünscht scho am morge ga chann. das würdi denn min tagesplan chli durenand und wohl chli stress bringe. ?
bin ich mir nüme so sicher, ob ich morn gnueg frühe ga chann.

jetzt git s aber zersch emal e duschi und denn nomal es paar stunde schlaf uf dene luxusbetter, wo meh ruggeweh mached als erholig gänd.?

dani Wed, 09/22/2010 - 23:29

Tags

letschte WK

Add new comment

3. letschte tag

dani — Tue, 21 Sep 2010 23:25:28 +0000

3. letschte tag

am 20 vor nüni isch de zug zrugg is grüeni gfahre. s letschti mal de usgänger montiere.

zersch isch emal nüt glaufe. erscht am halbi zwei han ich mich uf st. galle fahre la. z vierte sind mir gsi. das isch natürlich viel z viel gsi. mir händ also üs ufteilt. eine isch mit mir wieder gange, in richtig säntispark, die andere händ di erschti hälfti vo de wach überno. im säntispark han ich no paar infos bim sunrise shop igholt. si hetted es iPhone 4 deht gha. aber ich han denn denkt, ich wott das ding nid nigelnage neu im militär ha. zudem git s bi bstellige im online shop zuesätzlichi 100 franke rabatt.

nach dem mir no es cola trunke händ, sind mir wieder uf de bus gange. uf em rückweg händ mir no en bsuech bi de richtstrahlschüssle abgstattet. alli lämpli grüen. denn händ mir no d igangskontrolle prüeft, i dem mir üsi uswies vertuscht händ. si händ s aber nid gmerkt.

nach dem mir no z'nacht gässe händ, sind die andere beide denn verschwunde. und sind nüme uftaucht. mir händ üsi vier stunde bis am zehni mit läse und chli plaudere umebracht. denn isch d ablösig cho.

irgendwie hät's no en absprach gä zwüsched em fahrer(?) und es paarne, wo im usgang gsi sind. jedefalls sind mir no in gossau go zwüschehalte. dummerwies sind mir denn au no e chli bliebe. und wo mir use cho sind, hät d MP scho gwartet. en töff hät üs bis vor üsi unterkunft verfolgt. denn händ alli emal in es röhrli blase dörfe. zum glück han i kei alkohol gha.

das hetti am zweitletschte tag nid unbedingt me müesse si. aber ich han au nid so viel degege mache chönne. so gseh, muss ich mir nüt vorwerfe.

dani Wed, 09/22/2010 - 01:25

Tags

letschte WK

Add new comment

4. letschte tag

dani — Tue, 21 Sep 2010 06:59:50 +0000

4. letschte tag

de tag isch mit abstand de besti gsi! ich bin di hei gsi.

s einzige militärische wo ich gmacht han, isch s wäsche vo de militär-klamotte gsi. usser eim t-shirt isch aber di ganzi wösch bereit zum wieder verruumet z werde. das eini t-shirt isch für de drittletschti tag. für die letschte beide sind d liebli scho in waldstatt.

dani Tue, 09/21/2010 - 08:59

Tags

letschte WK

Add new comment

5. letschte tag

dani — Sun, 19 Sep 2010 14:49:57 +0000

5. letschte tag

d gschicht vo dem tag isch schnell verzählt. aber doch nid ganz eso schnell wie erhofft.

eigentlich han ich denkt, ich chönni bis am zehni usschlafe, denn s tenu a alege und hei ga. aber leider isch am halbi achti de zugfüherer im zimmer gstande und hät no paar lüt gsuecht, wo gwehr putzed. das chann nid ich si, da ich ja keis gwehr han, han ich denkt. schlussendlich bin s aber doch ich gsi, mit em gliche wo scho vor zwei täg mit zu de kompanie eis hätte müesse. aber wie scho am fritig isch d ufgab unterwägs gändered worde, obwohl das mal de weg sogar nur ei stege gsi isch. am mäntig, wenn ich nid ume bim, git s e inspektion und daher hät alles und überall no chli ufgruumed werde müesse. so au s tech mat mag. aschriebe händ s das züg au no welle. so bin ich e chli später im kp büro ghocked und han us de allgemeine materiallischte probiert s tech mat use z sueche und uf zettelgrössi abtippe. das ganzi hät guet anderthalb stund duured. denn hät de drucker blöd tue und so isch es zehni gsi, bis die zettel parat gsi sind. min liedensgenosse und ich händ üs denn us em staub gmacht. schliesslich sind mir 45 minute später bi strahlendem sonnenschein uf em weg an bahnhof waldstatt und wieteri anderthalb stund später planmässig in züri gsi. ?

dani Sun, 09/19/2010 - 16:49

Tags

letschte WK

Add new comment

6. letschte tag

dani — Sat, 18 Sep 2010 21:40:24 +0000

6. letschte tag

de hütigi tag hät bestens agfange: ich han bis am zwölfi chönne us- und nahschlafe. denn hät zersch emal z'mittag gä.

uf di zwei sind mir denn uf st. galle für üsi schicht. mini letschti vor em wuchenendi. wuchenendi schients au in st. galler bunker z si. mega wenig isch nur los, es paar wenigi oberst und oberst-lütnand sind ume. de chef telematik hät en stellverträtter wo wenig ahnig hät und mängisch dummi frage stellt. mir händ denn no chli "querusbildig" gmacht. das heisst, de wachmeister wo es bizeli ahnig gha hät, hät üs zwei soldate chli erchlärt. schlussendlich händ mir denn no zäme es telefon an vermittler agschlosse. isch gar nid schwirig, me muss es eifach emal gseh und gmacht ha.

di restlichi ziit isch mit paper und blick läse, halma spiele, plaudere und das mal no ässe(!) ume gange. d ablösig isch überpünktlich erschiene, so dass mir no quasi freiwillig länger bliebe sind, zum üsi halmapartie fertig z spiele.

uf em rückweg händ mir aber no müesse d richtstrahlschüssle go kontrolliere. und es hät sich glohnt: si hät kei strom me gha und nur no vo de batterie gläbt. genau wege dem händ mir müesse komtrolliere: de strom isch ebe vom wohnblock näbed dra cho. aber wie chunnt me z'nacht am halbi elfi is huus ine? en bewohner isch no wach gsi und isch cho luege, wer da i sinem garte umeseckled. er hät üs denn in cheller la, wo s problem schnell gfunde gsi isch: öppert hät de stecker uszoge. mir händ en denn wieder igsteckt und en zettel montiert. hoffentlich lönd s en jetzt.

zrug in waldstatt di nächsti unannehmlichkeit: d mp (militärpolizei) isch deht gsi. vo üs hät si aber nüt welle. aber si hät anschienend es paar im usgang verwütscht, wo nid dörfe hetted.?

dani Sat, 09/18/2010 - 23:40

Tags

letschte WK

Add new comment

7. letschte tag

dani — Fri, 17 Sep 2010 21:37:09 +0000

7. letschte tag

de hütigi tag isch wohl eine vo de schlaflosiste gsi.

zersch han ich im bunker in st. galle ewig nid ischlafe chönne. es isch sicher zwei worde, bis s sandmändli cho isch. am vieri han ich wieder ufstah müesse und eusi telefon bewache. dezue han ich gläse. d schicht isch scho gege s endi zu gange, da isch mich öpert cho fräge ob ich zwei telefon i me büro ustusche chönni. han ich zwar no nie gmacht, aber mit chli logisch überlege isch es gange. bin ziemlich z'friede a min platz zrugg cho, wo aber en oberst und en oberst-lütnand gsi sind. irgend öppis isch nid wunschgemäss gsi. de oberst isch ziemlich duregrasted, de oberst-lütnand hät d ruhe bewahrt. genau im richtige moment isch d ablösig und d fachkompetenz cho. bis mir aber denn üs effektiv us em staub mache händ chönne, isch es es wili gange. natürlich händ mir s offizielle z'morge genau verpasst und händ üs anere tankstell selber und uf eigeni choste verpflegt.

im bett bini denn am 20 ab siebni gsi. schlafe isch aber nid so eifach gsi. es paari händ für s wuchenendi packt und liecht gmacht. am halbi elfi oder so isch es denn wieder los gange. es paar andei am packe und de zugfüherer wo no zwei persone suecht, wo id kp eis gönd go ushälfe. schlussendlich hät er druf bestande, das ich gange. er hät nämlich nur no zwei zur verfüegig gha. die zwei sind chli später mit drü andere, GT und gwehr uf herisau unterwägs gsi. mir müessed hälfe es paar gitter ufstelle, hät s gheisse. deht acho sind mir gfräged worde, ob mir folie debi heiged. nei. us gitter ufstelle isch denn ziemlich schnell fenster abchläbe worde, damit sie verdunkle chönnd. mir händ denn das erlediged. es hät aber einiges länger dured als bis am zwei. am zwei het ich eigentlich wieder in st. galle si sölle. schlussendlich bin ich aber am vieri in st. galle gsi.

in st. galle isch es im gegesatz zum morge ganz ruhig gsi. mir händ einigi halmas und mühles gspielt. au zum läse und mit em oberst-lütnand vom morge han ich no chli plaudered. nur s ässe isch erneut a eus verbie gange. so händ mir üs uf di zehni dieci pizzas bstellt, wo mir uf em weg zrugg uf waldstatt abgholt und gässe händ.

dani Fri, 09/17/2010 - 23:37

Tags

letschte WK

Add new comment

8. letschte tag

dani — Thu, 16 Sep 2010 22:11:51 +0000

8. letschte tag

wo'n'ich gester gmeint han, de tag isch fertig, isch de terror los gange.

euse kadi stv hät aglüte und gmeint mir müessed alli eusi telefon go usprobiere. die teiged nid. später, nach dem er denn persönlich erschiene isch, hät (au) er müesse igseh, dass de fehler nid bi üs liet, sondern bi dem wo alüte hät welle: er hät eifach e falschi nummere gha.

so nach de eise isch das denn klärt gsi und ich han chönne go liege. am füfi, statt am vieri, bin ich gweckt worde und han no chli müesse vor d telefon sitze. das hät sich bestens geignet, zum no chli z läse.

mit rund 20 minute verspätig isch denn d ablösig itroffe und mir sind zrugg uf waldstatt. vo öppe em achti am morge bis am zwölfi am mittag han ich gschlafe. denn bini schnell no go z'mittag ässe. de nomittag han ich denn mit paper läse und im internet surfe verbracht. hoffentlich han ich mis dateguethabe noni ufbrucht.

nach em z'nacht hät denn bim AV de kadi stv nomal chli de chef markiere müesse. de glich, wie de wo gester abig scho chli umegstresst hät. mir händ id zimmer abe müesse und si sind cho go zimmerordnig kontrolliere und vemänle. was es z beanstande gha händ isch in etwa so lächerlich gsi, wie d aktion insgesamt. aschlüssend hät s no es allgemeins usgangs- und beizeverbot gä, was mich aber nid so gstört hät.

nach enere jassrundi isch es wieder ziit gsi zum uf st. galle ga. deht händ s de isatzplan nomal gändered. das isch also mini letschti nachtschicht. bis zu de nächste änderig. aschlüssend händ mir i me büro no es telefon verschiebe müesse. wil s kabel z churz gsi isch, händ mir es neus müesse mache. isch aber au nid meh als füf minute arbeit gsi.

vo dene wo am nomittag schicht gha händ, händ mir no erfahre, dass hüt nacht am halbi zwölfi füüralarm segi. si heiged mit de füürwehr am nomittag pokered. mittlerwile isch es aber mitternacht und vo füüralarm nüt ume. defür tuet en fax nid so, wie er sött. aber da chann ich au nid viel mache. drum suech ich mir jetzt denn en liegeplatz.

dani Fri, 09/17/2010 - 00:11

Tags

letschte WK

Add new comment

9. letschte tag

dani — Wed, 15 Sep 2010 21:07:50 +0000

9. letschte tag

da ich denkt han, mir seiged uf üebig und ich müssi chli vorschlafe für di nächsti nacht, bin ich am morge eifach liege bliebe.

am halbi eis bini ufgwached und han schnell no go ässe müesse, bevor s nüt me gä hät. debi han ich erfahre, dass de mit em liege bliebe am morge nid allne freud gmacht hät. bi mir hät s nur klapped, wil ich im "falsche" zimmer gsi bin. im zimmer vo minem zug händ s d lüt zum bett isgholt und as AV gschleppt. so bin ich denn am mittag a ebe das AV gange. deht han ich erfahre, dass ich bis am nomittag am zwei no müsst go de zettel mit de notfalladressene uf em Kp-büro abgä. das han ich grad no knapp gschafft i dere halbe stund, wo ich zur verfüegig gha han. wieter hät s no gheisse, dass die wo uf chloote müend ihres züg packe sölled. da ich nid zu dene ghört han, han ich also nüt würklich z tue gha. nach dem ich usgiebig mit einem plaudered han, bin ich denn in spiessaal und han s erschti vo de zeh planete paper gläsa. s zweiti han i agfange. denn hät s scho wieder z'nacht gä.

bim AV nach em z'nacht hät s gheisse, vor em nüni nid id beiz und am elfi wieder zrugg si. susch nüt. nach dem ich mit drü andere, eine devo de leftifahrer diskutiert han, sind mir druf cho, dass mir mit em puch is nächsti dörfli fahred und denn deht id beiz gönd. chum deht acho, erscht grad bstellt gha, schälled s telefon vom fahrer de lütnand brucht ihn. so händ mir schnell usdrunke und sind zrugg gfahre. bi de unterkunft acho warted en huufe soldate vo euesm zug. de lefti hät de fahrer nur grad bstellt, zum ihn und di andere id beiz z bringe. und zwar i genau die, wo mir ebe grad no gsi sind.

so han ich e stund ziit gha i dere ich denn endlich doch no is richtgi zimmer zügled und denn no s züg für d nacht in st. galle grüschted han. wobi ich mich defür entschiede han, de schlafsack nid mit z näh.

im st. galle acho, händ mir en leere bunker vorgfunde. di höche schienend nur am tag üebig z ha. mir söll s recht si! mir händ en ablöseplan gmacht, nach dem ich vom vieri bis am sechsi wach si muen. nacher händ mir no de "orangi" bereich im bunker uskundschaftet und sind debi uf de internetruum gstosse. deht hät s sogar WLAN! das internet isch einiges schneller als edge.

dani Wed, 09/15/2010 - 23:07

Tags

letschte WK

Add new comment

10. letschte tag

dani — Tue, 14 Sep 2010 20:00:51 +0000

10. letschte tag

am sechsi händ s eus gweckt und ich han s gfühl gha, ich heigi kei minute gschlafe. es brucht eifach ei nacht, bis me sich a die umstände gwöhnt hät. euses luxus-zimmer (zwei better pro person) müend mir aber wohl wieder verl

gege di achti händ s üs denn wieder uf en lastwage verlade. nach dem mir mehrmals zwüsched de unterkunft und em tech-mat-mag hin und her gfahre sind, händ s üs uf st. galle bracht. deht hät natürlich wieder niemer en plan gha. aber di meiste händ sowieso zersch emal no müesse ihri uswies go mache. irgendwenn isch en teil, inkl. mir, uf s dach ue, go di beide richtstrahlstatione ufstelle. am 11i sind beidi gstande. die wo erscht am dunnschtig laufe hetti müesse, hät sogar scho d gegestation gha. bi dere wo hüt am zwölfi parat si hät müesse, isch es e chli schwieriger gsi. die hät denn nomal verschobe werde müesse und au das hät noni s gwünschti resultat bracht. gege di eis sind mir denn inere pizzaria go z'mittag ässe wil s üs nüt bracht händ.

am nomittag bini mit es paarne wieder uf s dach go luege wie s um d schüssle staht. bin aber sehr, sehr müed gsi und hanp dezwüsched es nickerchen gmacht.

irgendwenn hät s gneisse, ich müessi mit zwei andere zrugg uf waldstatt. wobi de wachmeister anderer meinig gsi isch und schlussendlich de fahrer ohni personal wieder hei gschickt hät. gmacht han i aber doch nüt me gschieds. uf di achti hetti denn e ablösig cho sölle und de schichtbetrieb afange. natürlich hät das nid würklich klapped und es isch nüni gsi bis mir abgholt worde sind. aber egal, schlussendlich zählt ja vor allem, dass ziit ume gaht. wie isch debi ziemlich egal.

dani Tue, 09/14/2010 - 22:00

Tags

letschte WK