københavn, 23 til 26 april 2011

københavn, fjerde dag

dani — Wed, 27 Apr 2011 21:18:24 +0000

københavn, fjerde dag

de tag hät leider scho wieder mit packe agfange. denn händ mir es velo für mich gmietet und sind im gliche kaffi wie am erste tag go brunche.

als erste programmpunkt isch ganz studente-like det kongelige bibliothek, au "schwarzer diamant" gnennt, agseit gsi. zur abwechslig emal en hoch moderne bau. über gschmack laht sich bekanntlich striete, aber sehenswert isch das gebäude in jedem fall. sowohl vo usse als au vo inne. architektonisch höchst spannend de schiefi bau, i dem am morge sich d sunne via wasser spiegled, was ihm de übername ibracht hät.

nachher isch d olivia uf shopping-tour gange und ich han endlich chönne mis velo benutze. mit dem bin ich über knippelsbro go christianshaven go erkunde. naja, so direkt drüber bin i nid cho. das isch nämlich e ziehbrugg und si händ si tatsächlich grad für es grosses schiff göffnet, wo ich cho bin.

uf de andere siete acho, bin ich zersch zu de "vor frelsers kirke". die hät en lustige turm, uf de me ue chann. es sind aber einigi schmali stege im innere z bewältige gsi. nüt für dicki lüt! under und zwüsche de verschiedene glogge vom gloggespiel dure bis uf s dach. deht isch de eigentlichi spass aber erscht los gange: es hät rund um de schmali spitz nomal e stege, wo me bis zu de weltchugle a de spitze vom turm ga chann. au nüt für dicki. aber no nüter für nid schwindelfreii.

nach e me velo-tourli dur de stadtteil, und em betrachte vom schwarze diamant vom "andere ufer" us, bin ich zrugg gradled, zum rosenborg slot. das liet recht unschienbar i me grosse park, wo mi ad rente-wiese z züri oder an central park z new york erinnered hät: paar kicker da, par bikini-belezzas deht und irgend sotigi wo a ihrem laptop schaffet dezwüsched. eigentlich han ich no is schloss ine welle. das hät aber scho zue gha. d öffnigsziite vo dene touriste-attraktione sind in kopenhagen würklich sehr beschränkt: vom zehni oder elfi, bis höchstens am vieri, i d hochsaison viellich emal bis am füfi. hüt jedenfalls, händ s mi scho am 20 ab drü nüme ine la. so han ich min plan müesse ändere und han mich für e wieteri velo-tour entschide.

s velo isch i dere stadt würklich s besti verchersmittel: schnell, flexibel und umweltfründlich. d velo-weg sind breit und guet usbaue, nid nur en gäl azeichnete streife. andersch ume haltet sich d kopenhager radler a d verchersregle wie s für zürcher nur vorbild si chann.

zersch bin ich nomal zum schloss amalienborg trampelt. deht han ich grad no e chlini wachablösig mitübercho. scho amüsant, das es das hützutag no so mached.

ein, zwei minute wieter fahre und ich bin bim kastellet gsi. e füfeckigi vefestigung us de ziite wo me no mit kanone de hafe verteidiged hät. aber d rüümlichkeite vo de gebäude drinne sind no immer im gebruch vom militär. nichts desto trotz dörf me dur s kastel dure fahre und uf em schutzwall spatziere oder jogge. s erschti devo han ich gmacht, nach dem ich mit em velo eimal usse rundume bin.

wo ich denn us em kastellet use bin und wieder uf d strass han welle, händ mi d poliziste aghalte. d strass isch en moment gsperrt gsi. en helikopter hät me scho lang ghört. nach me churze momentli isch s moderne rösslispieli denn cho: polizeitöff, polizeiauto, e limousine mit tönte schiebe und me russische und me dänische fähnli. es panzerfahrzüg, wieder polizeiauto und no me polizeitöff. chum dure händ s üs scho wieder uf d strass la. jedefalls i die richtig, wo s hercho sind. da de tross chli wieter une gstande isch, isch es deht nid dure gange... mir egal, ich bin langsam go s velo zrugg gä und denn is hotel. für en richtige spa-bsuech hät s nüme glanged, aber zum dusche. den han i d olivia i de lobby troffe und mir händ üs uf de heiwäg begä.

dani Wed, 04/27/2011 - 23:18

Tags

københavn, 23 til 26 april 2011

Add new comment

københavn, tredje dag

dani — Mon, 25 Apr 2011 20:57:09 +0000

københavn, tredje dag

obwohl de tag im gliche resti agfange hät wie de gestrig, isch er ziemlich abentürlich los gange.

zwei komischi type sind uftaucht und händ chli umegluegt und denn üs öppis gfräged. de einti hät sich chli sehr wiet bi de olivia ihrem stuel abebückt. wo s abzoge sind, han ich si gfräged, wo si ihri täsche hät. wo nur? ich bin denn de andere zweine nahgrennt. sehr ehrgiezig sind s nid gsi, wo ?s gmerkt händ, das ich ne nahrenne, händs täsche an bode grüert. es isch no alles drin gsi. glück gha!

nach dem mir de polizei alles erklärt und fertig gässe händ, sind mir zum rundetårn gange. e me grosse runde (chile-) turm. s spezielle dra, er hät kei stege, sondern e rampe bis fasch z'oberst ue. nur di letschte meter macht me uf enere stege. vo obe hät me en schöne rundumblick über ganz kopenhagen. und am horizont gseht me sogar no d øresund-brugg.

denn sind mir wieder dur d fuessgängerzone gschlendered, händ üs inere konditorei öppis süesses gönnt und sind denn is tivoli, en 1843 erbaute vergnüegigspark. er hät au würklich viel charme, grüenfläche und d bahne und attraktione gsehnd durchwegs im stiel vo anno-dazumal ghalte. aber im geld nä, sind s ganz vo hüt: 75 chrone itritt, jedi bahn chosted denn nomal zwüsched 25 und 75, s aquarium hät 20 chrone kosted und di zahlrieche restis sind natürlich au nid gratis. mir händ üs für es päuseli uf em pirateschiff und en bsuech im aquarium entschiede. und d olivia hät sich no e achterbahnfahrt gönnt.

uf em heiwäg sind mir endlich emal no us de andere richtig as hotel here cho. bi herrlicher abigsunne sind mir so no de promenade emtlang de "peplinge sø" spatziert. im hotel wäri eigentlich nomal em spa-bsuech uf em programm gstande. das hät aber wege de ostere frühener zue gmacht. so händ mir üs mit enere duschi müesse z ?friede gä, bevor mir mit jagge usgrüstet in e bretonischi crêperie ?gange sind.

dani Mon, 04/25/2011 - 22:57

Tags

københavn, 23 til 26 april 2011

Add new comment

Kommentare

Ui, ui. Polizeieinsatz, Ueberfall, romantische Stimmung, viel bestaunen und auch geniessen - alles in 4 Tagen. Bravo! Ich mag euch das von herzen gönnen und freue mich auf unser Treffen.

Add new comment

københavn, anden dag

dani — Mon, 25 Apr 2011 08:19:49 +0000

københavn, anden dag

hüt hät s chli es bescheideners aber nid weniger guets z'morge gä. wiederum verusse a de scho fasch summerliche mittagssunne.

nach me bummel dur di hüt (ostersunntig) relativ menscheleeri fuessgänger zone, i dere paar läde offe gha händ und paar nid, sind mir in "Nyhaven". das isch frühener de hafe vo kopenhagen gsi. hüt isch es d usgehmeile nummer eins vo kopenhagen: beiz a beiz, restaurant a restaurant. es isch aber au startpunkt vo de bootsfahrte, wo de touriste abote werded. so eini händ mir denn au gmacht. wärend enere gute stund händs üs unter super tüfe brüggli dure, verbie a vielne sehenswürdigkeite chauffiert. dezue hät s erklärige uf dänisch, englisch und dütsch gä. entlang de kanäl hät s praktisch überall lüt gha, wo s schöni wetter gnosse händ uf ihrne böötli, i kaffis, uf bänkli oder eifach uf em rand vo de muur.

nach enere stärchig us em baresso, eme starbucks-klon, sind mir z fuess dur de ganzi Nyhaven, bis zum Skuespilhuset (Schauspielhaus) am endi vom kanal. denn sind mir em meer entlang zum schloss amalienborg gschlendered. das isch genau vis-à-vis vo de neue und umstrittene opere uf de andere siete vom meer(?) vor em schloss hät s traditionell kleideti wachpöste mit total überdimensionierte hüet. ziemlich amüsant. aber die bruchts wohl au, wohnt doch immerhin di königlich familie deht.

denn isch es wieter gange dur de park vom kastel zu de berüemte chline meerjungfrau. und deht sind mir s erschti mal vor enere richtige touri-attraktion gstande: ziemlich viel lüt, alli mit irgendwasem i de händ, wo de moment "festhalte" hät chönne. vom billige handy bis zu de türe dslr-kamera.

z'nacht hät s denn i einem vo dene zahlrieche restis im nyhaven gä, bevor mir mit grosse schritt heiwärts sind. denn staht d sunne emal tüf, wird s sehr schnell mega chalt.

dani Mon, 04/25/2011 - 10:19

Tags

københavn, 23 til 26 april 2011

Add new comment

københavn, første dag

dani — Sat, 23 Apr 2011 20:45:31 +0000

københavn, første dag

am 5i hät de wecker gschälled. z'mizt i de nacht! am 7i isch de flüger gange und am 9i sind mir scho in kopenhagen gsi.

d metro vom flughafe isch ziemlich näch as hotel anegfahre. mit me (gps, offmaps) oder weniger (stadtplan) händ mir s schöni hotel au bald gfunde. leider händ s üses zimmer aber noni fertig gha. so isch nüt gsi mit chli nahschlafe. aber es badzimmer händ s für üs gha...

mir sind denn z fuess id innestadt, wenn me so will. eigentlich isch s hotel scho ziemlich i de innerstadt. aber ebe, mir sind denn halt noch chli "ine". Wer die Wahl hat, hat die Qual hät s denn gheisse. schlussendlich händ mir üs für s Café G. entschide, wo für 150 dänischi chrone es exquisits brunch-buffet abote hät. 100 chrone sind ca. 17.30 franke. me chann also dur 5.5 teile und denn no chli abrunde. denn chunnt me bi me pries uf zürcher niveau use. aber di grosse zahle sind scho chli gwöhnigsbedürftig.

denn händ mir üs uf en spatziergang dur d stadt begä. di erschti station isch den grad s schloss ?christiansborg gsi. deht sind mir, under em schloss, go d ruine vo sine vorgänger go aluege. vor allem vo zweine sind nur muurfragment vorhande gsi. s "aktuelli" schloss isch aber bereits s sibti. di andere sechs sind entweder abbrennt, i me chrieg zerstört worde und "wegen nicht gefallen" abgrisse...

wo mir wieder zrugg am tagesliecht gsi sind, hät sich bi mir d müedigkeit bemerkbar gmacht. mir sind zwar no gueti zwei stund wieter gschuened, d ufnahmefähigkeit vo mir isch aber gege null gange...

zrugg im hotel händ mir no s spa, genau gno s jacuzzi gnosse. denn sind mir no schnell um de husegge i me chli bessere italiener go z'nacht ässe. und jetzt gheied mir d auge scho fasch bim schriebe zue...

dani Sat, 04/23/2011 - 22:45

Tags

københavn, 23 til 26 april 2011