australie 2014

sydney

dani — Wed, 02 Jul 2014 14:44:16 +0000

sydney

am schluss vo de reis sind mir wieder am afang gsi: in sydney. das mal aber nur no zu ferie zwecke und ohni jetlag.

dennoch sind mir chli müed gsi nach de akunft, d nacht isch churz gsi und de business-class-flug zu sehr ufregend, um en z verschlafe. so sind mir ganz glücklich gsi, isch üses zimmer i de sydney city lodge scho parat gsi. au recht chli, aber e chli grösser als das im metro hotel am afang. und nüme ganz so im stadtzentrum. aber da mir jetzt ja d weg e chli kennt händ, isch das scho fasch eher en vorteil gsi.

nach dem mir üs startklar gmacht händ, sind mir zersch dur de hyde park und denn de botanische garte gschlendered. vo dem sinem endi us hät me en einmalige blick uf's operehuus und d harbour bridge. zum fötele isch d sunne aber falsch gsi: gegeliecht. dennoch sind mir deht vonere film-crew agsproche worde, wo en (interne) werbefilm dräht hät. mir händ ja ziit gha und drum üs es t-shirt vo ihne gä lah und sind dur ihren "shot" glaufe. sie händ üs au es dankeschön versproche, aber ob das jemals bis id schwiiz chunnt, wird sich no zeige.

mir sind denn wieter uf "the rocks", di eigentlichi altstadt vo sydney. deht isch am wuchenendi märt. de märtstand wo mir gsuecht händ, isch aber nüm deht gsi, pösteled händ mir aber dennoch. und wil denn bi ibruch vo de dunkelheit en sturm ufzoge isch, händ mir üs in es kaffi verzoge. nach dem mir üs chli gstärkt händ, sind mir dur de wind bis is ian thorpe hallebad glaufe und einigermasse verfroore acho. s wasser isch aber warm gsi. au deht hät's höchstens zwei persone pro 50m-bahn gha. das land isch de traum vo jedem schwümmer. und s hallebad mit sinem geschwungene dach isch au für anderi en blick wert.

uf em rückweg sind mir dur de darling harbour cho, wo's für mich es subway-sandwich gä hät (di einzigi konsumation inere internationale chetti i de ganze drü wuche) und, als ob mir's planed hetted, wieder s fürwerk. i grosse schritte isch es denn zrug id lodge gange, z'nacht isch es würklich chalt, im australische winter.

für de sunntig morge isch e operehuus-tour agseit gsi. di erschti, am 9i, mit earlybird-rabatt. naja, uf de eine siete isch das e gueti sach gsi, wil mir so i relativ churzer ziit i ziemlich all interessante rüüm inecho sind. vom informatiomsghalt her isch es aber eher mässig gsi. die frau wo d füherig gmacht hät, hät nid viel me z verzähle gwüsst, wie's wohl i jedem operehuus uf dere welt z verzähle gäb. di interessantischte informatione sind i de beide videos gsi, wo si zeiged hät. so zB, dass es statt drü, 14 jahr duured hät, sie z baue und statt siebe hät's über 100 millione dollar kostet. das kenned mir ja vo andere projekt au (operehuus hamburg lässt grüssen, neat ebefalls). interessant isch no gsi, dass de dänischi architekt zum tüfel gjagt worde isch, bevor de bau fertig gsi isch, und er nie meh uf australie zrugg cho isch, also sis werk nie vollendet gseh hät. aber wahrschienlich wäri au das uf wikipedia gstande. e opere oder es ballet isch i dere ziit wo mir in sydney gsi sind, aber nid glaufe wo üs zuegseit hetti, zum s opera house in action erlebe z chönne.

mir sind denn mit de fähre übere uf manly go em brunch näh. de restaurant tipp isch aber bloss medium gsi, was mich eimal meh a so restaurant-bewertigs-websites (urbanspoon i dem fall) zwiefle lah hät. de ässensgschmack isch eifach zu sehr individuell, als das me sich uf sotigi guides verlah chann. mir händ denn en spatziergang entlang de promenade vom manly beach gmacht. es isch e ziemlich frischi biese gange und mir sind i jagge verpackt gsi, während paar unverwegeni surf-lektione (wohl für afänger) gno händ. mir händ no zueglueged, und üs mit ihne gfreut, wenn's emal e welle verwürscht und uf em brett stah chönne händ. so lang, bis mir zu sehr chalt gha händ, und in es kaffi gange sind go brownie-pizza und frozen yoghurt mampfe. bevor's zrugg gange isch, hät's für de herr no zwei "land and water shorts" gä. genau s richtige, wil er nid gwüsst hät, ob sin chleiderschrank eher shorts oder badhose nötig hät...

zrugg in sydney sind mir no i de "o bar and dining", im 47. stock vo me hochhuus am hafe gsi. wo mir deht am Fenster platz gno händ, han i zersch denkt, ich seigi scho betrunke, bevor ich was bstellt han. denn han i aber gmerkt, dass sich s restaurant drähet. i einere stund eimal rund ume. d ussicht uf s liechtermeer isch herrlich gsi, d drinks fein und d rechnig gsalze. aber sowas gönnt me sich ja nid jede tag.

de letschti ganzi tag händ mir nomal mit me sight seeing run gstartet. meh denn je zuvor hät de begriff zuetroffe. mir händ diversi knips-stopp igleit. de erschti nomal am ussichtspunkt nach em botanische garte, zum bi jetzt richtigem liecht no e foti z mache, wo sowohl operehuus als au harbor bridge druf sind. zum die in chaste z kriege, händ mir aber en car voll asiate abwarte müesse. wieter isch euse run um's operehuus ume gange (endlich mal no d sicht vo vorne), dur the rocks uf d harbour bridge ufe (die stäge sind asträngend gsi!) und über di ganzi brugg ine, mit chline ussichts-pause. aber immer nur churz, für de wind deht obe sind laufchleider denn doch chli wenig gsi. uf de andere siete händ mir üs überleit, ob mir grad wieder zrugg sölled oder nid. zum glück sind mir nid! grad unter de brugg hät's no en chline park, vo dem us me die viellich besti sicht uf d skyline vo sydney hät: operehuus, hafe mit CBD-hochhüser de hinter und de brugg. alles uf ein blick. und ganz ohni grossi touri-masse. genau zwei anderi hät's gha, eine devo ebefalls en "touri-runner". denn händ mir natürlich alles wieder zrugg müesse. am hafe (circular quay) händ mir aber no was luschtigs erlebt: deht hät d aktion "dry july" joghurtsrinks mit beeri und kokosnuss verteilt. genau s richtige für zwei müedi jogger. und sehr fein isch de drink au no gsi!

frisch dusched händ mir üs uf gmacht zu de swiss bakerz, dasmal nid uf grund vonere online-empfehlig, sondern wil d yasmin es brot vo dene i de lodge umeliege gseh hät. und es hät sich glohnt, isch würklich feins brot gsi, wo s deht bached. und au de ganzi rescht vom Sandwich, inklusive heisser schoggi dezue und em muffin zum dessert sind lecker gsi.

denn händ mir üs uf gmacht id innestadt. händ no chli usschau nach souveniers ghalte, aber so richtig glücklich sind mir niened worde. d starbuckstasse isch eifach total übertüred gsi und zudem hät s operehuus druf gfählt. mir händ denn no s alti postgebäude, a offizielli zentrum vo sydney am martin place aglueged und briefmarke kauft. d post beansprucht hützutag aber nur no en sehr chline teil vom gebäude. eher tür ussehendi boutique, restaurant und es hotel bsetzted de grössti teil. vom eine edle gebäude sind mir zum andere cho: is victoria building. deht händ zwar d läde scho langsam gschlosse, isch üs aber recht gsi. mir händ üs es tischli gschnappt, di letschte postcharte gschriebe, zwei asiatische hochziitspaar zueglueged, wie's vonere professionelle crew sich abliechte lah händ (mindestens drü crew members pro paar) und no chli plaudered. die hochziitsfotene schiened scho fasch chli volkssport z sie in sydney, gseht me das doch a jedem halbwegs schöne ort. bsunders beliebt isch de hyde park.

de letschti morge isch denn wenig spektakulär gsi. nach dem mir packt händ, händ mir no macademias kauft für s eine oder andere familiemitglied di hei und denn hät's nomal brunch bi de swiss bakerz gä, zur istimmig uf's läbe di hei. am flughafe händ mir no probiert tax refunds z kriege. d freud über di churzi schlange (mir sind vor lange queus gwarnt worde) isch aber schnell verbi gsi: es git nur rückerstattig, wenn me für mindestens 300$ i einem lade ichauft. so türi sache händ mir aber keini gha. so sind mir denn schneller als planet am gate ghöckled und händ uf d verpackig inere sardinebüchs für etlichi stunde gwartet. dasmal isch leider nüt me mit free upgrade id business class gsi.

dani Wed, 07/02/2014 - 16:44

Tags

australie 2014

Add new comment

Kommentare

So ihr zwei Reisefüdli. Auch hier werden Erinnerungen wach. Das sich drehende Restaurant oder die weltberühmte Oper und natürlich der botanische Garten. Auch nach 35 Jahren gibt es alles noch. Nun seid ihr aus der Sardinenbüchse befreit und wir für die Schnappschüsse bereit, die im Text immer wieder erwähnt werden. Wir freuen uns. Papi u Mami

Add new comment

brisbane

dani — Sat, 28 Jun 2014 13:32:15 +0000

brisbane

d akunft in brisbane isch chli e odyssee gsi. sie hät sich aber glohnt!

de erschti tag isch en shopping-day gsi. aber nid im klassische sinn. mir sind zersch mal nid ad hauptflaniermeile, sondern chli us em CBD (central business destrict) use in en triathlon-lade. für mich isch er zwar nid so sehr triathlon gsi, sondern meh schwümme und tauche. das hät aber üsi bedürfnis fasch vollständig abdeckt. hei sind mir mit me neue neopren und badchleid für d yasmin und schwümmbrülle und anti-fog-mittel für mich. i de stadt hät's denn a de klassische flaniermeile no badhose für mich und neui laufschuhe für d yasmin gä. di "alte" sind dummerwies in alice springs vergässe gange.

dass di neue sache usprobiert werde händ welle, isch klar gsi. darum sind mir am abig denn no in es bad gange. ähnlich wie z cairns es 50m becki mit acht bahne. immerhin hät's da aber pro bahn ein bis zwei persone gha. aber ebefalls keis dach. hät scho vorteil, wenn's nie richtig chalt wird. mitte im winter da, chann me am tag immer no guet im t-shirt umelaufe. mir händ a jedem tag 20 oder meh grad warm gha.

z'nacht gässe händ mir denn di hei. mir händ üs bis brisbane wohnigs- bzw. hotel-mässig langsam ue gschafft. s apartment da isch riesig, mit chuchi, stube/esszimmer, separatem schlafzimmer und balkon mit ussicht. allerdings isch de balkon ussichtsmässig uf di falschi siete gange. aber dennoch hät's guet tue, mal wieder chli "di hei" z sie und "sälber z läbe". im pyjama z'morge oder z'nacht z ässe. mir sind drum überhaupt nur eimal uswärts go ässe i dere stadt.

am zweite tag händ mir denn üsi eigeti sight seeing tour gmacht. di agstürete sights händ mir us enere app gha. gstartet sind mir natürlich am fluss, wo mir mal di berüemti story bridge bestuuned händ. wieter gange isch es zum customs house, wo hüt de uni gehört und für represäntativi zweck brucht wird. denn isch d st. john?s cathedal dra gsi. di erschti kathedrale mit chinderspielplatz wo ich je gseh han. nach me bsuech bim anzac square und em war memorial, wo a di gfallne soldate i de beide weltchrieg erinnered, isch es wieter gange zu de city hall. vo dere ihrem turm obe abe (10. stockwerk) händ mir en schöne überblick über d stadt übercho.

uf em post office square händ mir denn e längeri pause igleit mit smoothie, salat, kaffi und FaceTime aruef (s public Wi-Fi isch besser gsi als s türe, hinzuekaufte i üsem luxus-apartment!). meh zuefällig händ mir denn no de apple store bsuecht, es bootstüürli mit em cityhopper händ mir uf "morn" verschobe, wil mir en grad verpasst händ und d luscht uf e halb stund warte nid sehr gross gsi isch. da's im moment sehr frühe dunkel wird, sind mir denn hei üs für de mexikaner go frisch mache. wäri zwar nid nötig gsi, denn bsunders stilvoll isch de nid gsi. defür sehr, sehr fein.

de dritti tag händ mir mit enere sight seeing jogging tour gstartet. als erschts isch es über d story bridge gange, und denn entlang em andere flussufer. vo deht us händ mir besti ussicht uf d skyline vo de stadt gha, sind dur schöni pärk und de künstlichi aber schöni strand grennt. zrugg isch es über d kurilpa bridge gange, wo mir denn no e rundi dur s roma street parkland gmacht händ. wil mir eimal falsch abboge sind, händ mir no e chlini extraschleife mache müesse, um zur windmühli, em ältischte no erhaltene gebäude vo ganz queensland z cho. vo deht us isch es denn via wolwoorth hei gange. de brunch händ mir üs würklich verdient.

mit volle büch sind mir denn wieder is CBD, wo mir no zum parliament house sind. uf e tour händ mir deht denn aber verzichtet, wil mir dasmal de citiyhopper nid händ welle verpasse und no vor sunneuntergang chli schiffli fahre händ welle. drü statione später, uf de andere flusssiete, sind mir usgstiege und zum känguru point gange. vo deht us hät me e gueti sicht uf d innestadt mit ihrne glasige hochhüser. ideal zum bi sunneuntergang und ibrechender dunkelheit fotine vo de brisbane skyline z knipse.

mir sind denn richtig "dockside" wieder an brisbane river, wo mir denn d citiyhopper fähre gno händ. bi dunkelheit sind mir unter de schön belüchtete story bridge dure gschipperet, um wieder am pier 1 quay mitte i de stadt und em night life a z cho. nach me erneute wolwoorth bsuech hät's nomal z'nacht i üsem apartment gä, und denn packe und frühe fiirabig. schliesslich isch am nächste morge erneut frühe ufstah und uf de flughafe fahre agseit gsi. das mal hät sich aber s frühne ufstah glohnt. irgend öppis isch bim ichecke schief gange: wo mir, als fasch letschti, boarde händ welle, händ's gmeint, üsi plätz seiged scho bsetzt. anschienend sind mir us em ticketing-system, trotz ticket i de hand, usegheit. so sind mir denn nach me wili id business class upgraded worde, deht händ's no platz gha. mir sind di einzige "business-reisende" gsi und händ somit ein steward für üs ällei gha. de hät sich's nid näh la, üs es feins frühestück z serviere. das händ mir natürlich z schätze gwüsst, und zwüsched de einzelne bisse d ussicht uf australie abe gnosse.

dani Sat, 06/28/2014 - 15:32

Tags

australie 2014

Add new comment

Kommentare

Eindrücklich und neugierig machend dein Bericht über Brisbane. Das ist doch die extra gebaute Hauptstadt, nach dem sich das Volk nicht einigen konnte? Euch einen tollen Schluss, damit ihr auf der Heimreis gut schlafen und ausruhen könnt.
Papi Meilen

...und das mit dem upgradete Businessflug find i scho de bsunderi Hit, näbed allem andere, wo au spannend tönt. Jetzt sind ihr wohl scho wieder in Sydney, bald chönnted ihr so en padänte upgradete Platz für de langi Heimflug bruche. Händs wiiter guet und bis gli wieder i de Schwyz! Mami

Add new comment

cairns

dani — Wed, 25 Jun 2014 13:47:40 +0000

cairns

vom chalte, trochne landesinnere direkt a di füecht-warmi, nördlichi küste isch scho chli e umstellig gsi. das händ mir scho nach de akunft, bi me spatziergang rund um's motel gmerkt.

nach dem mir üs usgibig mit toast, cornflakes und touri-infos ideckt händ, sind mir mal chli uf cairns ine. s motel isch en schöne fuessmarsch usse dra gläge. d lagoon, d badi hafe, isch zue gsi. mir sind trotzdem chli am hafe ghöckled und händ di diverse touri-Angebot und tour-variante diskutiert. schwierig! später sind mir no bis ganz zum hafe, wo mir es schöns restli entdeckt händ, und chli id stadt. die hät üs aber nid so us de schuhe ghaue. alles sehr, sehr touristisch. souvernir-shop an souvenir-shop... i me wolwoorth händ mir denn z'ässe kauft und üs uf de langi heiweg de strandpromenade entlang gmacht.

nach dem mir am zweite morge üsi toure für di nächste beide täg am tour-desk im motel bueche la händ, sind mir id badi, wo näch bim motel gsi isch. i me freiluft 50m-becki händ mir üsi bahne zoge, jedes hät eini für sich gha, wil für öppe füf bis sechs lüt acht zur verfüegig gstande sind. und das a me samschtig nomittag. isch es für di iheimische tatsächlich z chalt, oder hät's immer so wenig lüt? für üs isch es uf jedefalls en agnehme, aber nid heisse summertag gsi.

nach dem mir im motel no d reschte vom abig devor zum z'nacht gässe händ, sind mir no id stadt, genau gno an hafe i di cooli bar zwei drinks und es mövepick glacé uf em heiweg händ de ferietag abgrunded.

am nächst morge hät's denn aber gheisse frühe ufstah. am zeh ab siebni sind mir vom tour-bus abgholt und wieder nördlich gfahre worde. d erkundig vom rägewald isch agstande. ich bin aber irgendwie sehr, sehr müed gsi und han vom ganze tag recht wenig mitübercho, wie ich später han müesse merke, wenn mi d yasmin amig öppis gfräged hät. nach me wili fahre händ mir en halt für en walk gmacht. dadezue sind mir vom tourbus in en shuttel-bus umgstiege, bis an afang vom pfad. de guide hät unterwegs no paar interessanti sache verzählt, über Pflanze und tier. aber susch han i für mich denkt, hett i grad so guet id masoala halle im zürizoo ga chönne.

denn isch es im bus wieter gange, lang und nid sehr spannend. usser, wo mir mit de fähre über de daintree river sind. d strass isch aber schmal gsi und kurvig, so sind mir denn glich froh gsi, händ mir nid es auto gno und sind sälber gfahre. nach gfühlte ewigkeite händ mir denn mitte im busch ghalte und sind usgstiege. nach paar fuessminute (über betonierti strass) sind mir zu me resti cho, wo's z'mittag gä hät. das isch no lässig gsi. und was me deht fasch nid gmerkt hät, quasi um d egge isch s meer und en schöne sandstrand gsi. usser de lüt vo üsem tourbus, isch wiet und breit niemert gsi. dass de strand aber zu de sehenswürdigkeite ghört het, wo de tourbus agstüred hät, han i ersch später checked. so stränd git's doch no a meh ort uf de welt, nid?

wil paar lüt (native speakers!) zeh vor und zeh ab nid unterscheide chönnd, sind mir ziemlich z spat uf de rückweg und mir händ am nächste ussichtspunkt nid viel ziit gha. getreu em motto "take a picture and watch it at home" sind mir nach nur paar minute wieder wieter gfahre. mir sind fäng chli enttüscht gsi vo de tour, aber s wahri high-light isch no cho: uf em daintree river hät's no es boots- und nid nur es führefährtli gä. und de kapitän hät sich echt guet uskennt. ziemlich zielgrichtet isch er i gwüssi sietekanäl gfahre, wo mir richtigi läbigi krokodil gseh händ. zersch e drü meter langi dame, denn es zwei bis drü jährigs, und es ganz es chlises, wo das jahr uf d welt cho isch. au vögel händ mir no gseh, aber d krokodil händ dene chli d show gstohle.

de abig händ mir denn mit flüg und hotel bueche verbracht. nach dem mir townsville, darwin und sogar melbourne in betracht zoge händ, händ mir üs für brisbane als letschti station entschiede.

erneut isch es frühe los gange. dasmal an hafe, uf d seastar, mit schwiizer crew-mitglied. e gueti stund sind mir quer über s meer gfahre, bis zunere sand-insle, mitte im greate barrier reef. die insle ghört offensichtlich vögel. die isch total voll gsi. aber mir sind nid deswege deht use gfahre, sondern zum schnorchle. mit brülle, schnorchel, flosse, wetsuit, pool noodle und uf wunsch no life West sind mir usgstattet worde. dass deht öpper unter gaht, isch praktisch unmöglich. scho mit em wetsuit ällei bin ich uf em salzwasser obe ufgschwumme, ohni selber aktiv schwümme z müesse. öppe anderthalb stund händ mir d umgebig vom reef chönne erkunde. e bunti und ganz anderi welt! fisch i allne farbe und grösse sind z bestuune gsi. isch mir chli vorcho wie im zoo. und das, obwohl deht täglich ganzi bootsladige a touriste uskippt (und denn wieder igsammled) werded. mir sind um di 11i uf's boot zrugg beorderet worde, wo's z'mittag gä händ. erneut relativ gsund, was d yasmin und mich dezue veranlasst hät, z witzle, dass es z australie nur uf touri-tours gsunds esse git.

nach em ässe sind mir no zu me zweite teil vom riff gfahre, em hastings reef. s wasser isch deht chli tüfer aber au klarer. mir händ eigentlich sehr lang ziit gha, zum deht z schnorchle. aber irgendwenn isch es üs z chüel worde, und mir händ uf's glasbodeboot umstiege müesse. vorher aber händ mir nomal unzähligi fisch und als highlight vom tag e riesigi turtle gseh. so e grossi wasserschildkrot han i glaub no nie i minem läbe gseh! leider nid gseh händ mir en chline hai. und zum glück au kein grosse.

s reef, oder besser gseit d küste, händ mir denn uf em flug nach brisbane no vo obe chönne gnüsse. de fensterplatz hät sich definitiv glohnt! knütschbaus wasser, dezwüsche immer wieder insle und am strand en schöne hellbeige sandstreife.

dani Wed, 06/25/2014 - 15:47

Tags

australie 2014

Add new comment

Kommentare

ui, das sich fascht Natur puur. Alles es bitzeli grösser als bi üs in der Schwiiz oder am Mittelmeer. Krokodil sind au miar noch 35 Johr wieder in Sinn choo. Und denn Brisbane, e planti und schnell bauti Statt. Do bin i gschpannt, was iar zwei derzue meinet.
Gruess us ere ehrer kühele Schwiiz.
Papi

Add new comment

outback

dani — Thu, 19 Jun 2014 07:25:56 +0000

outback

de nomittag in alice springs händ mir für's vorbereite vo üsere drütägige camping-tour is outback brucht.

mir händ im wesentliche wasser und warmi chleider kauft, gwäsche und gepäck umglade, da mir di grosse koffere nid händ chönne mitnäh. ä xs-north face täsche hät müesse usreiche. für e laufrundi hät's aber au no glanged. zwüscheziitlich isch si zu me ol ohni bruchbari charte worde. aber am schluss händ mir de heiweg wieder gfunde und ersch no es känguru in wildnis troffe.

erneut isch frühe ufstah agseit gsi, die vo de emu run tours hetted üs am 5:35 abhole sölle, sind aber ersch gege di 6i cho und bim erschte stopp uf enere "camel farm" händ mir denn no s büsli wechsle müesse.

de nächsti halt händ mir bi me ussichtspunkt uf de ?fuluru? (oder eher fooluru?) gmacht. de nenned d tour guides so, wil di meiste touris meined, das seigi de ayers rock (uluru). er gseht aber eher us wie de table mountain und isch au e foti wert gsi.

nach dem mir no "fire wood" gsammled händ, hät's denn lunch im camp vor em nationalpark gä. denn isch es in park (offiziell: uluru - kata tjuta national park) gange, zersch in es museum über d kultur vo de aborigines, entschuldigung anangu, und denn uf en walk rund um de ayers rock ume. nach es paar unterhaltende erklärige zum rock und de aborigines und dene ihrem frühenerige läbe, isch es zum sunset gange. anschienend DIE touri-attraktion: tour-büs händ sich in reih und glied ufgstellt. alli händ, näbed de touris, no es tischli mit snacks und champagner usglade. naja. s naturschauspiel hät mi denn nid so sehr us de socke ghaue und isch für mich fasch d näbeattraktion gsi.

zrugg im camp händ mir d swags und d schlafsäck usgrollt und de guide hät koched. bald sind mir am wärmende füür ghocked. d wettervorhersag für die nacht isch bi drü grad celsius gsi. dementsprechend guet hät di warmi duschi tue. und entsprechend chalt isch es denn i de nacht gsi, wo'n'i uf's wc müesse han. und mit in schöne stärnehimmel lüge bim ischlafe isch au nüt gsi, d chappe han i lieber bis wiet über d auge is gsicht zoge.

di klirrendi chälti isch natürlich au i de frühene morgestunde nid weg gsi, wo mir no im dunkle z'morge gässe händ, um denn zum sunrise z ga. de händ mir a me ort gnosse, wo me glichziitig de uluru und de kata tjuta gseh händ. minere meinig nah isch es schöner gsi, als de sunset am abig vorher. und es hät ersch no viel weniger lüt gha.

wieter isch es uf en hike dur's valley of the winds, wo sinem name alli ehr gmacht hät, gange. de hike isch au würklich en hike gsi. es isch über stock und stei, steil ue und wieder abe gange. aber d natur, dur die me sich bewegt hät, isch de hammer gsi. unterwegs hät üs de guide erklärt, wie d berge da entstande sind, wieso s i dere wüesti trotz sältenem rege wasser hät und no chli über d bemalig vo de aborgines. aschlüssend isch es zrugg zum camp gange, wo's z'mittag gä hät, bevor mir alles ufglade und d region verla händ.

de nomittag isch hauptsächlich mit auto fahre druf gange, abgseh vo wc-stopps und neuerlichem "fire wood kollekte". um di füfi sind mir im nächste camp gsi. das mal händ mir de luxus vo zelt und enere art feldbett gha, uf das mir de swag mit em schlafsack gleit händ. definitiv wärmer, als i de nacht vorher. während mir uf enere erhöhig grad näbed em camp de sunneuntergang aglueged händ, hät de guide wieder koched. es "aussie bbq?: würschtli, poulet spiessli und känguru plätzli. dezue mashed potatos und es frisches, über em füür gmachts brot und salät. erneut sehr fein gsi und definitiv s besti brot vo australie!

de dritti tag hät "ersch" am füfi am morge agfange. am sechsi sind mir los gfahre um üse canon rim walk z starte. als ziemlich erschts isch es steil de berg uf gange. isch eigentlich e art stäge gsi. de rescht vom weg isch mehrheitlich entlang em "top" vom kings canyon gange. natürlich nid immer entlang de klippe. aber me isch immer wieder a ort cho, wo me id schlucht abe luege hät chönne. aber au susch isch das gestei absolut sehenswert und de walk es erlebnis. de guide hät zudem au immer wieder interessanti sache über d pflanze wo's gha hät, z verzähle gwüsst. hauptsächlich, wie d aborigines die frühener (oder au hüt no?) z nutze gwüsst händ. au en chline abstecher in garten eden händ mir gmacht. das isch eis vo vier(?) permanente wasserlöcher i dere wüesti. wie viecher zu dem chömmed, isch mir aber chli es rätsel, usser natürlich de vögel. denn de garten eden isch inere tüfe, steile schlucht, wo's für touris zum teil extra stäge und holzweg hi baut händ. susch würd me als mensch, als mitteleuropär sowieso, deht gar nid ane cho.

nach öppe drü stund sind mir rund ume gsi, und es isch fäng agnehm warm gsi. nüt me ume, vom skiferie-feeling, wo mir am morge frühe d chappe, d sunnecreme und de iisigi wind gä händ. druf abe sind mir is camp go ufruume und z'mittag ässe. und denn scho vor em mittag im eigentliche sinn wieder los. für gueti vier stund isch wieder busfahre agseit gsi, alles a einem riehme, abgseh vo me wc-halt und me stopp, wil mir en riese eagle a de strass gseh händ. das viech heigi e flügelspannwieti vo bis zu drü meter, hät de guide gmeint. bim igang zu alice springs händ mir denn au nomal gstoppt. deht händ mir no es gruppefoti gemacht, und denn sind alli ?hei? bracht worde, und händ under d duschi chönne und frischi chleider aziehe. es hät sich tatsächlich e chli wie ?heicho? agfühlt. nach dem mir ?laundary? gmacht händ, sind mir normal is städli, zum mit de andere vo de gruppe, inklusive guide, i me pub z ässe und bier (ich natürlich nid) z trinke. zudem isch no s origin game (rugby) glaufe, was da e diese sach isch. de guide isch würklich en guete typ gsi, und d tour hät sich glohnt und isch z empfehle. da sind sich alli einig gsi.

nach enere nacht i me richtige, warme bett sind mir nomal uf d laufrundi, das mal händ mir de weg kennt, und denn no id stadt go postcharte chaufe, chilled choc mint und chilled choc mud mocca trinke. s wetter isch mittlerwiele wieder ziemlich summerlich (t-shirt) für üsi verhältnis, und wohl e gueti aklimatisierig für cairns.

dani Thu, 06/19/2014 - 09:25

Tags

australie 2014

Add new comment

Kommentare

Hey in Alice springs. Einfach super eueri Iidrück ts läse und wieder in die Wält i tauche. Au schön ts läse, wie gut eu das alles tuet und wie niar das knüsse chönd. Do sind miar bescheide am Zürisee am grilliere und am Papibarbeque ts schmause. Wiiterhin gute Reis mit vielen wertvolle Erläbnis.

Add new comment

sydney

dani — Sun, 15 Jun 2014 02:05:31 +0000

sydney

ein tag in sydney händ mir nach de konferenz no gha und e touri-tour gmacht.

am morge händ mir zersch müesse us em hotel uschecke. da mit mir dem nur mässig z'friede gsi sind, händ mir kei wieteri, als di ohnehin scho zahlte nächt, bliebe welle. zudem isch es relativ tür gsi.

nach dem mir es ziemlich guets z'morge gnosse händ, sind mir aber leider chli z spat gsi, zum sowohl e operehuus- als au en "free tour" z mache. mir händ üs für's verschiebe vom gepäck is hostel (au nid besser als s hotel vorher, aber extrem viel günstiger) entschiede und sind denn no e stund lang sälber chli i de stadt spatziert. im wesentliche sind im queen victoria building gsi. es schöns, alts ichaufszemtrum, wo mal churz vor em abbruch gstande isch. unglaublich, wenn me jetzt drinne staht. und ebefalls sehr speziell: es hät deht en brief vo de queen elisabeth ad bewohner vo sydney drinne, wo ersch im jahr 2085 göffnet werde dörf. was deht wohl drin staht?

d free tour, wo me am schluss so viel zahlt, wie me möchti, isch denn uf de kippi gstande. es sind nur sechs lüt deht gsi, und sie hät gmeint es müessed mindestens acht si. aber sie hät sich umstimme la und isch mit üs zweiehalb stund dur d stadt gschuened und hät üs diverses zeigt und verzählt, vom hydepark us, am erste spital vo sydney verbie, dur de botanischi garte und via circular quai uf the rocks, de eigentliche altstadt vo sydney. am hafe hät tour geendet und mir sind wieder uf üs ällei gstellt gsi. mir händ no es paar fotene gmacht vom operehuus bi abigsunne und sind dur de märt im the rocks gschlendered. denn zrugg is hostel, vo wo us mir no go schwümme händ welle im ian thorpe hallebad. aber das hetti sich nüme glohnt, wie mir grad no usegfunde händ, dank de hostel reception. mir hetted chum me e halbstund schwümme chönne.

mir händ üs denn für s sydney night life entschiede, da's ja samschtig gsi isch. dank em tipp vonere vorherige tour wo d yasmin gmacht hät, sind mir uf surrey hills. deht gönd au di iheimische in usgang. zersch sind mir üs chli falsch vorcho, wil's wie usgstorbe gwürkt händ. denn händ mir aber d party meile no gfunde und sind in e schöni, lauschigi wine bar go en apero nä.

uf di 20:30 sind mir denn an darling harbour, deht wo mir scho am banquet vo de konferenz gsi sind. es git deht, info vo de tour guide, jede samschtig es fürwerk. und das zieht! es isch nid es riesigs gsi, im verglich zB zu me zürifest oder so. und au relativ churz (5min), aber es hät d masse im hafe bracht. das isch fasch s idrücklichere dra gsi. wenn scho deht, händ mir üs au no chli deht umgseh. also hät schlussendlich au bi üs d werbig gwürkt. mir sind im hard rock cafe gsi, wo's aber ziemlich voll und lut gsi isch, und mir bald wieter sind. gässe händ mir denn no verusse und so chli d atmosphäre gnosse. aber mit de ziit isch es trotz wärmepilz chalt worde und mir händ zahlt und üs uf de weg is hostel gmacht.

nach enere churze (und bi mir erneut schlaflose) nacht, sind mir jetzt mit de australische/asiatische version vo easyjet uf em weg nach alice springs, wo's morn denn für drü täg is richtige outback gaht.

dani Sun, 06/15/2014 - 04:05

Tags

australie 2014

Add new comment

CGI'14

dani — Fri, 13 Jun 2014 21:20:26 +0000

CGI'14

d konferenz, de grund warum mir uf australie/sydney greist sind, isch verbi.

ich han einigi spannendi vorträg ghört, aber au vieli wo härt a de grenze zur ziitverschwändig gsi sind. leider hät's nid all zu viel direkt zu minem thema gha. aber es paar paper han ich mir zum läse vorgemerkt. au s vortragsniveau isch ziemlich durchzoge gsi. es hät sehr gueti präsentatione gha, aber au sotigi wo chum jemals güebt worde sind. sotigi vo asiate, wo grad so guet chinesisch oder koreanisch hetted rede chönne und ich hetti glich viel verstande, sotigi wo scho nach de halbe ziit fertig gsi sind und sotigi wo nach de hälfti vo ihrne slides abgwürgt werde händ müesse.

min vortrag sälber isch ziemlich i de ziit gsi und ich han au positivs feedback gha. sälber bin i aber nid so z'friede gsi, ich finde er hetti flüssiger chönne, nei müesse, laufe. schlussendlich han i en wohl eifach z'wenig güebt und bin i zu nervös gsi. aber "dank" de vielne schlechte vorträg, isch er no lang uf de siete vo de guete gsi.

erwähnenswert isch no s banquet vom dritte abig gsi. im star room am darling harbor händ mir herrlichi ussicht uf de nächtliche, belüchteti hafe gha, fein gässe, und in form vom manuel oliveira, em session chair vo "minere" session und en co-author vo me für üs wichtige paper, en hervorragende unterhalter gha. es isch würklich extrem luschtig gsi und (er) wird mir no lang in gueter erinnerig bliebe. er hät übrigens au no e arbeit präsentiert und defür de award für's second best paper übercho. muss i denn no läse.

wo ich am fritig abig vo de konferenz hei cho bin, händ mir zwar schöni plän gha, aber ich bin so müed gsi, dass i higläge und igschlafe bin. mit de eine oder andere chline wc-unterbrechig han i fasch 12h gschlafe und fühle mich jetzt chli um mini sydney-ziit betroge. mir händ ja scho de mäntig nach de reis grossteils verschlafe.

dani Fri, 06/13/2014 - 23:20

Tags

australie 2014

Add new comment

Kommentare

Liebe Dani. Sydney sich eifach uf der andere Siite vo der Erdkugel. Das merkt au der Körper. Bis dä sich ii- und umgschtellt hät isch die Konferenz bald verbii gsii. Und das isch ebe auch geschafft und streng. Ruebe und nüd tue isch zerscht aagseit.
Grüssli Papi

Lieber Dani, freut mich sehr, dass es für dich gut gelaufen ist und du zufrieden bist. Hast ja auch fast Tag und Nacht dafür gearbeitet! Geniesse noch was zu geniessen ist! Freue mich, wenn du wieder bei uns bist. LG, Dragana

tag und nacht gschaffed isch echo chli übertriebe. aber es isch viel gsi, wo mir gmacht händ, bis das paper zäme gsi isch, das stimmt!

Add new comment

flug uf sydney

dani — Mon, 09 Jun 2014 13:18:42 +0000

flug uf sydney

wenn einer eine reise tut... denn chann das ganz schön lang dure.

de erschti flug uf london isch no ganz lustig gsi. deht händ mir üs denn ganz englisch mit fish and chips und reiseadapter für ideckt. denn isch es wieter gange nach singapur. über 12 stund lang ipfercht i me enge sitz. schlafe isch fasch es kunststück, aber dezwüsche hät's au ganz guet klapped. jededefalls sind mir nid unglücklich gsi, wo mir z singapur händ chönne für drü viertel stund usstiege und chli d füess verträtte. wieteri siebenehalb stund sardinebüchs händ uf üs gwartet.

z sydney isch es füfi am morge gsi, wo mir acho sind. und acht grad chalt. nach em erledige vo de zollformalitäte isch es mit em zug id stadt zum hotel gange. am morge am achti sind mir denn glücklich und total k.o. nach öppe 36h wieder mal i me bett gläge.

ersch am nomittag, no immer noni ganz wach, sind mir go d umgäbig aluege. als ob mir's planet hetted, sind mir am sechsi z'abig im hafe gsi, wo mir d "vivid sydney" liechtshow, wo hüt zum letschte mal stattgfunde hät, händ chönne bestuune.

dani Mon, 06/09/2014 - 15:18

Tags

australie 2014