im moment sind d landschafte wiess, s wetter chalt und de grösseri teil vom tag isch es nacht. eigentlich de richtigi ziitpunkt zum, wenn überhaupt vom skate, denn vom harte wintertraining z schriebe.
aber ich reise grad vo einem wiehnachtsschmaus zum nächste. da lueg ich grad lieber nomal zurugg uf es highlight vom jahr, als an harte trainingsalltag z denke. was s skate anbelangt, hät s i dere truurige saison genau drü gä. vo einem han i noni gschriebe.chum us de USA zrugg, wo s drü wuche lang kei sport aber viel z ässe gä hät, händ mich drü vo mine ITL-gspänli (use)gfordered. mit em jan, em roman und em markus händ sich di gliche z meile troffe, wie scho s letschti jahr. mit e chli verspätig sind mir i di dunkli nacht is abentür gstartet. es isch e schöni summernacht gsi. aber ob das langed? und han ich di richtigi rolle-wahl troffe? s erschti mal überhaupt sind s 110er gsi.
bis uf rappi isch alles guet gange. bim wasserfläsche fülle de blick uf d uhr: ziemlich genau wie letscht jahr. und das unter viel schlechtere vorussetzige. sind mir z schnell los?
nach em seedamm s erschti missgschick. de roman isch binere baustell uf de falsche siete dra verbie und hät sich uf me chiesweg wieder gfunde. zum glück isch nüt passiert usser, dass wertvolli sekunde verlore gange sind. wieviel? 30? 60? 90?
s zweiti missgschick isch öppe bi richterswil passiert. es klirrt uf de strass und sofort isch klar gsi, de schrubeschlüssel vom markus, de einzig wo mir debi gha händ, isch abegheit. de jan und de roman sind umkehrt, ich han mich für d erholig bedankt. d USA-pause hät sich afage bemerkbar mache. eigentlich han ich das ding sueche als ussichtloses unterfange im dunkle agluegt. aber sie sind bald mit de "trophäe" zrugg cho. wieviel ziit hät ächt das koschted? e minute? meh?
denn sind di dunkle, würklich abentürliche abschnitt cho, bevor üs vor horge nomal e rechti stiegig gfordered hät. d'obe isch d wahrheit vo de zwüscheziit cho: ziemlich glich wie im vorjahr. de roman hät dezue gmeint "nur han ich s letschti jahr da noni so schweri bei gha". ich bin also nid de einzig, wo meh müe hät als im vorjahr.
uf em weg uf züri han ich immer mal wieder chli biesse müesse. dezwüsche isch es au wieder guet gange. trotzdem isch sofort klar gsi, wo de roman churz vor züri e wc-pause gfordered hät, dass ich das unterstüze. bi de landiwiese händ mir de boxestopp denn igleit. während er hinter em nächste busch verschwunde isch, han ich mir am theaterspektakel es wc gsuecht. wo isch das letscht jahr nume gsi? gfühlti ewigkeite sind vergange, bis d reis fortgsetzt werde hät chönne. denn sind mir aber zackig am bellevue gsi. und was hät d uhr gseit? glich viel wie letscht jahr?! isch das möglich!? schnell sind mir wieter, mit de letschtjährige sensationsziit im hinterchopf. deht sind mir allerdings super-schnell gsi uf em letschte abschnitt.
mir isch es grad e chli zu schnell los gange, han nämlich no en farmer ässe welle. das gaht bedütend weniger guet, wenn me bim bisse no nach luft schnappe müsst. zudem händ mir im seefeld di falschi strass gno. d seefeldstrass statt de dufourstrass. ob d dufourstrass würklich viel schneller gsi wäri, isch schwierig z säge. ich glaube aber scho chli.
ab em tüfebrunne isch es denn aber wieder rund glaufe und mini gspänli händ mächtig gas gä. wohl öppe z erlebach isch es gsi, wo n i denkt han ich schaffe's nüme. de jan hät aber es abfalle oder usstiege z verhindere gwüsst. interessanterwies han ich vo deht a bis is ziel nid eimal me mühe gha. ob's de adrenalinschub oder em jan sini schübsli gsi sind? oder sind di andere drü ab deht chli langsamer gfahre?
schlussendlich sind mir nach 2 stund, 28 minute und 14 sekunde über ziellinie am fähresteg grollt. genau 111 sekunde langsamer als letscht jahr. allerdings isch es deht ohni missgschick gange.