paris, 13. bis 16. mai 2010

crêpe, grösswahn und di graui erinnerig as französischbuech.

premier jour
am halbi nüni isch de zug z bern gfahre. angesichts vom räge und de menscheleere stadt isch es mir vorcho, wie mitte i de nacht. im zug han i denn au nomal chli chönne schlafe. und paper läse. am eis sind mir denn im "gare de lyon" acho, was erinnerige ad schuelziit und s erschti kapitel vom franzbuech gweckt hät...
nach dem mir s hotel gfunde, icheckt und üs wieder parat gmacht händ, sind mir an place de charles de gaulles gfahre, wo mit di erschti sehenswürdigkeit vo paris gseh händ: de l'arc de triomphe. en mächtge chlotz!
denn sind mir zu la défense gfahre. en sehr modere stadtteil. auge defür händ mir aber zersch mal keini gha. es isch so chalt gsi, dass mir üs deht i me riesige ichaufszentrum zersch emal mit wärmere chleider ideckt händ. erscht denn händ mir üs vom grande arche und de andere gebäude veriinäh la. de grande arche isch no viel höcher (110m) als de arc de triomphe (50m). au d gebäude rundume sind ziemlich sehenswert. recht modern, hoch und mit viel glas. ich han ziemlich gstuuned, wo mir us em reisefüherer erfahre händ, dass das 50er-jahr baute sind. sind die ihrer ziit sosehr vorus gsi? oder hät sich d architektur sowenig wieter entwickled? oder bin ich so en banaus, wo 50 Jahr architekturgschicht nid usenand halte chann?
mit de metro sind mir zrugg zum place de charles de gaulles und em arc triomphe. vo deht us sind mir denn d champs-elysées durabe glaufe bis an place de la concorde, uf dem dereinst de louis XVI guillotiniert worde isch, mit sine brünne und de obeliske.
und denn isch es ziet zum z'nacht ässe gsi, was mir in montparnasse gmacht händ. allerdings bi me italiener, da d brasserie us em reisefüherer voll gsi isch.

deuxi?me jour
ich han frühe welle ufstah und ga, was aber us verschiedene gründ nid klapped hät. quittig defür isch prompt cho: vor em schloss versailles, resp. de kasse, han ich über 2(!) stund gwarted. wenn nid scho de zug deht use über e halbstund brucht hetti, wäri wohl angesichts der schlange direkt wieder umkehrt. bis ich den vorne gsi bin, hät s bereits de nach-15-uhr-rabatt gäh!
endlich drinne isch es genau so wieter gange wie dusse. me hät sich zietewies fasch nid umchere chönne i de rüüm. japanischi und indischi reisegruppe sind sich gegesietig uf de füess ume tramplet, was d eltere mit ihrne chlichind denkt händ, wo s de usflug planet händ, isch mir genau so es rätsel gsi, wie warum s e schuelklass deht gha hät. jedefalls isch nid viel mit genau luege oder em audio-guide zue lose gsi. de berühemti spiegelsaal isch so vollgstopft mit lüt gar nid richtig zur geltig cho. de rescht vom schloss han au nid so speziell gfunde, nach em bsuech vo schlösser in berlin, münche und wien, wo wohl all versailles als vorbild gha händ. in es paar pünkt händ s versailles wohl au übertroffe. aber so viel gold wie am schloss versailles han ich no a keinem gseh.
nach dem de ober stock gschafft gsi isch, sind im untere stock no d rüüm vom dauphin und de dauphine dra gsi. die sind anschienend bi keinere reisegruppe uf em programm gsi. ebesowenig bi de gstresste asiate. so hät me chli besser de jetzt au chli längere usfüherige vom audio-guide lose chönne. aber au d rüüm sind e chli chliner gsi. ohni uf d uhr z luege bini churz vor de 6e im innehof gstande. das han i aber erscht gmerkt, wo s mi nieneds me händ inelah welle. ob i vom schloss jetzt alles gseh han, weiss i aber nid. zuwenig klari und genaui infos sind ume gsi. es schient scho chli en unterschied zwüsched dütscher oder schwiizer und de französische mentalität z gä.
wenn am 6i s schloss offiziell zue gaht, heisst das für de park lustigerwies genau s gegeteil: wärend me de tag dur au für de itritt zahlt, werded am abig d kassehüüsli gschlosse und d türe göffnet. so han ich denn zum spartarif vo 0? no en churze blick chönne erhasche. leider hät s nid für meh glanged, wil ich mit de olivia zum z'nacht abgmacht gha han. de garte wäri aber definitiv no es längers bliebe wert gsi. deht han ich s gfühl, hetti s no sehr, sehr viel z gseh gä. zudem chann me wohl sini dimensione au erscht denn richtig erfasse, wenn me si unter de eigene füess gspürt hät.

troisi?me jour
zu beginn isch de wörtlichi höhepunkt uf em programm gstande: la tour eiffel! zum glück händ mir üsi tickets online reserviert gha. das hät üs wohl zwei (oder meh?) stund astah erspart. dennoch händ mir zweimal müesse warte: um uf de lift z cho und zum vom zweite in dritte "stock" z fahre. es hät sich aber glohnt. d ussicht vo deht obe isch herrlich. uf de zweite etage händ mir no en kaffi gno, bevor mir denn nach guet zwei stund uf dem stahlbau s werch vo une bestuuned händ.
da s wetter endlich emal guet gsi isch, händ mir s velouslehnsystem velib chönne usprobiere. e gueti sach mit no chli verbesserigspotential. uf em zweirad isch es denn dur de pariser vercher zum louvre gange. de händ mir nur vo usse aglueget. bin ja bekanntlich nid so de kunstliebhaber. aber es nimmt mich wunder, wie de igang zum new yorker apple store a de 5th avenue würkt im verglich zu de glaspyramide vom louvre.
wieter isch es denn vorerst z fuess uf de rue st. honoré gange. a dere liet au de place vend?me mit sinem colonne vend?me mit napoléon, de türe juwlier, em hotel ritz und em justizministerium.
denn händ mir wieder uf s velo umgsattlet und sind richtig montmartre ue trampled. wieder z fuess isch es di viele stäge ue bis zum sacré-cœure gange. s erklimme vo de stufe und s abschüttle vo de zig souvenierhändler hät sich aber glohnt. d ussicht vo deht obe isch einmalig. es liet einem würklich ganz paris z füesse. au d chile sälber isch lohnenswert. mit ihrne helle muure würkt si direkt fründlich im verglich zu so vielne andere.
denn sind mir änere spatzier-route us em reiseführer gfolgt, wobi sich d olivia zu beginn nomal mit enere crêpe gstärcht hät. de spaziergang hät bim moulin rouge gändet. das isch hüt zu tag also "nur no" e touriste attraktion.

quatri?me jour
s wetter hät sich nomal z steigere gwüsst. schad, das mir ga händ müesse! aber zersch sind mir nomal mit em velo am tour eiffel verbie, de seine entlang uf d ile de la cité gfahre. deht hät s d notre-dame z gseh gä. natürlich nur vo usse, schlange stah händ mir nid welle. us em gliche grund händ mir d saint-chapelle uslah, deht git s vo usse gar nüt z gseh.
uf em velo händ mir denn no d ile saint-louis erkundet. warum die zu de top-10-sehenswürdigkeite vo paris ghöre sötti, isch mir aber debie nid ganz klar worde.
denn sind mir no uf st. germain gvelöled, wo s im ladurée no en dessert gä hät. denn händ mir chli schnell radle müesse, zum rechtziitig im hotel s gepäck z hole und uf de heiwäg z ga.