eigentlich wär's andersch plant gsi: de laufstartplatz isch bueched und de siebti doppelstart plant gsi. aber mis chnü hät nid welle. sit em frühelig han ich problem mit de patellaspitze, nach em inline-renne vo einsiedle han ich s training igstellt und mich probiert uf d erholig vom chnü z konzentriere. bis dato aber noni mit durchschlagendem erfolg. ich laboriere no immer dra umenand.

nach meh als zäh jahr isch das inline-renne wiederbelebt worde. zäh runde, uf de guete, alte panzerpiste sind z absolviere gsi. fasch topf ebe, eigentlich ohni kurve, für min gschmack nid wahnsinnig spannend. dass es frühener andersch gsi isch, han i aber erst später gmerkt.

für mich hät s renne denkbar schlecht agfange: mit halsweh und gwschwullne lymphdrüese. eiditügi zeiche, dass ich uf bestem weg bin, chrank z werde. bin denn aber trotzdem uf schaffhuuse, genauer neukirch greist. d bedingige für es inline-renne sind schliesslich perfekt gsi: sunne aber noni zu heiss und e grossi mengi lüt am start. einerseits em umstand gschulded, dass das renne nid nur zu de swiss skate tour, sondern au zum german inline cup, em bade würteberg cup und sogar zum world inline cup zählt hät.

leider bin i recht lang nach em renne nid dezue cho, mini website z aktualisiere. darum han i nur no wenig erinnerige a das erste renne vo de de saison 2025. ich bin nid emal sicher, ob's uf de zweite oder dritte rundi gsi isch, wo ich em dani vom ITL nüme hinterher möge han. sicher isch, es hät sich nachher es ganz agnehms grüppli mit vier oder füf skater bildet. wobi immer di gliche zwei d füherigsarbeit gmacht händ. und hine dra no zwei, drü anderi mit-gsurft sind. und tatsächlich isch eine vo dene denn am schluss los gspurtet, was ich recht nervig und frech gfunde han.

nach dem ich letscht jahr es persönlichs jubiläum gha han mit de teilnahme 19 und 20 hät das jahr de berlin marathon es offiziells jubiläum gfiired: sini 50. usträgig. es hät aber für d skater no meh änderige gä. d strecki isch nüm di originali, sondern jetzt au en rundkurs. sie händ, obwohl letscht jahr s erschti mal sit langem teilnehmerzahl wieder gstiege isch, gemeint, es lohnt sich nüm für d skater 42km strass z sperre. das hät für mich für das jahr s inline-renne e chli interessanter - will irgendwie neu - gmacht.

nach füf jahr hät's endlich mal wieder klapped mit em triathlon vor minere huustüür und uf mine trainingsstreckene. dass für jahr e langi pause isch und d routine fählt, hät sich scho vor em start bemerkbar gmacht: so nervös bin i scho lang nüm vor em start gsi. ich han jedenfalls mich i ziemlich jedi wc-schlange wo's gha hät, eimal irgreiht. au han i nid gwüsst, wie s neue startprozedere, mit individuellem start gaht. isch aber eigentlich e gueti sach. usser dass me lang uf sin start wartet und im wörtliche sinn chalti füess überchunnt.

eigentlich han ich das renne scho vor em start verlore. nid nur isch di vergangeni wuche e schwierigi und chräfteraubendi gsi, au han ich glaub nid ganz s richtige mind-set mit an start bracht. wil mit me rägerenne grechnet, obwohl d wetterprognose trocheheit vorhergseit hät, bin i mit altem material ufkürzt. di guete rädli und vor allem chugellager han ich welle spare. schlecht entscheiden gsi.