summerferie 2021: i de schwiiz findet de summer nid würklich statt. aber wo chann me denn zu corona- und pandemieziite hi? und dörf me überhaupt no flüge?
fritig 27.8.21
mir händ üs für valencia entschiede und au für de flüger, trotz em schlechte umweltgwüsse, wil de zug mindestens 24 stund brucht hetti. de flüger isch am zwei am nomittag deht gsi, au wenn mir ersch no am morge frühe packt händ. bis mir im hotel marques house mitte i de altstadt acho sind, ichecked und uf churzi hose umgstiege sind, isch denn glich scho vieri gsi. aber in spanie fangt denn de tag ja ersch a und üse einzig programmpunkt isch de fuessballmatch am viertel ab zehni am abig gsi. so händ mir no gnueg ziit gha, zum chli dur d stadt spatziere, uf de ichaufsmeile dur es paar läde z striele und üs denn es resti für de znacht z sueche. am siebni am abig no gar nid eifach. vor em achti hät fasch nüt offe, mir aber hunger gha. i me italiener (hät‘s gfühlt meh als spanischi resti!) händ mir üs denn mit enere pizza gstärkt, bevor mir is Mestalla sind. deht händ mir über d maske-disziplin und d strengi mit dere die duregsetzt worde isch, gstuunt. wege de aktuelle situation sind kei ultras im stadion (händ mir später erfahre) und darum isch es erstuunlich ruhig gsi während em match. wenn aber mal so chli was wie stimmig ufcho isch, isch es schnell sehr luut worde. mir händ üs nur usmale chönne wie‘s vor corona i dem stadion tue hät. um mitternacht sind mir uf de heiweg, no immer i shorts und t-shirt und trotzdem am schwitze.
samschtig 28.8.21
zersch isch mal usschlafe agseit gsi. und denn s frühestück gnüsse. das isch hervorragend i üsem hotel! öppe am mittag sind mir denn los zottlet richtig Jardí del Túria. das isch s frühenere flussbett, wo jetzt trochegleit und zu me riesige, kilometer lange stadtpark umbaut worde isch. es git deht vieles z gseh: brunne, römischi süülegäng, x-mal gaht me unter brugge dure, de gulliver-park wo leider zue gsi isch und gege s endi chunnt me zum Ciutat de les Arts i les Ciéncies. zersch sind mir aber no is Museu Faller go di grettete ninot aluege. mir händ übrigens s glück dass mir falles no halbe mitüberchömmed. es isch wäge corona vom märz in september verschobe worde. überall sind’s am ufbaue vo riesige figure und skulpture.
nach em museum händ mir e stärkig brucht und sind go e Horchata trinke und schoggichueche ässe. und denn em Calatrava sini baute go bewundere. e riese alag mit viel wasser und di typische runde forme. eifach nur peinlich, dass s stadtzürcher stimmvolk s kongresszentrum vo ihm abglehnt hät zu gunste vo de sanierig vom alte, biedere bestehende bau.
wieter isch es in richtig hafe und strand gange. das isch aber weniger üsi welt gsi: di meiste resti händ en dj gha wo probiert hät lüter (aber nid besser) als de vo de nachbersbeiz z sie. im einzige resti wo kei luuti musik gha hät, händ‘s üs nid bedient und mir sind irgendwenn mit durscht wieder gange. mir händ denn es taxi zrugg id innestadt gno, wo mir nach wieterem umespatziere bi me inder glandet sind.
sunntig 29.8.21
de tag hät für mich mit me lange lauf agfange. de Jardí del Turia hät sich dadezue bestens geignet. und ich han so d glägeheit übercho, no s andere ändi vom park z gseh. bin denn aber froh gsi, händ mir üs de rescht vom tag mit em velo fortbewegt. wiederum zum hafe, wo mir üs zersch emal verirrt händ. defür es schiffswrak gfunde, wo d alinghi si het chönne. die millione türi yacht gammlet jetzt also eifach vor sich hi? und überhaupt, was isch vom dazumalige america‘s cup no überig? mir händ denn de weg ad stränd uf de andere siete vo de stadt doch no gfunde und sind nach längerem sueche (es händ üs wiederum es paar resti gar nid welle oder sind usbueched gsi) i me recht coole glandet und händ fisch und tintefisch gässe. nach em zmittag, wo öppe vo drü bis vier gsi isch, sind mir no chli am strand gsässe, bevor mir mit em velo wieder zrugg pedalt sind. uf em weg dur d altstadt vom velovermieter bis zum hotel händ mir no di übliche touri-shops beguetachtet (und espadrilles kauft) bis mir denn am siebi am abig total k.o. im hotelzimmer acho sind. nach enere erfrischende duschi hät d energie nur no für en bsuech i de hotelbar glanged. di ideali glägeheit agua valencia z trinke.
mäntig 30.8.21
mir händ en tag i de innestadt gmacht und sind z fuess los. de himmel isch bedeckt gsi und d temperature relativ agnehm. als erschts sind mir zum berüemte Mercat Central und händ s frische und grosse gmüess und di feine frücht bestuunt. aber mit vollem zmorgebuuch isch d chauflust nid sehr gross gsi. de plan, aschlüssend i di alti börse La Lonja z ga, isch dra gscheitered, dass die am mäntig zue hät.
mir sind wieter dur d altstadt gschlenderet, händ lädeli agluegt, em ufbau vo falles monument zuegluegt und i me kaffi halt gmacht. denn sind mir zu de grosse kathedrale, de hauptsehenswürdigkeit vo valencia gemäss reisefüherer. vom audioguide händ mir üs dur all die freske, kapelle und bilder führe la, bis mir de heiligi grahl gfunde händ.
später isch e pause und en snack i einem vo de viele resti uf em platz hinter de kathedrale agseit gsi. wieter isch es denn zum Porta dels Serans gange, einem vo de zwei übrig bliebene stadttor mit zwei mächtige türm. meh als vo usse aluege hät me aber nid chönne, au das hät am mäntig gschlosse.
ich han mich denn für de bsuech vom turm vo de kathedrale entschiede. zwei euro und 207 stägetritt hät d ussicht uf d stadt kostet. de ohrebetäubendi gockeschlag am sächsi inklusive. de blick id ferni hät mir erlaubt em ufziehende gwitter zue z luege. es isch denn au tatsächlich nüm lang gange, bis de räge igsetzt hät. wo di grössere tropfe cho sind, isch d ussichtsplatform ziemlich schnell leer gsi. dur di chline fensterschlitz händ mir de räge während em abstieg chönne gseh. sis usmass isch aber ersch am usgang vollumfänglich erfassbar gsi: es hät gschüttet wie us eimer, vo de dächer sind chlini wasserfäll cho. mir sind im turm bliebe, bis de turmwächter mit me schirm cho isch und üs chli schutz gä hät für di drü schritt vom turm id kathedrale. deht isch denn nomal warte (und es paar strasseverchäufer abwimmle wo schirm und rägepellerine verchaufe händ welle) agseit gsi. nach öppe enere halbe stund isch de spuk verbi gsi und es hät en rägeboge z bewundere gä. zum z‘nacht, e gueti stund später, sind mir bereits wieder verrusse gsässe.
zieschtig, 31.8.21
nach längerem hin- und her händ mir üs entschiede mit em bus uf El Palmar z fahre. velo wäri au e option gsi, aber für hüt isch wieder räge agseit gsi (aber denn nid cho). das örtli isch berüemt für feini paella und liet am see im Parc Natural de L'Albufera. und genau so händ mir‘s gmacht: i einem vo de unzählige resti paella gässe und aschlüssend es bootsfährtli uf em see. wahnsinnig spektakulär isch das alles nid gsi. de bootskapitän hät zwar di ganzi ziit verzählt, aber halt nur uf spanisch.
uf em rückweg sind mir bereits bim Ciutat de les Arts i les Ciències usgstiege, sind dur L’Umbracle spaziert und händ die Calatrava-baute nomal und us andere perspektive beäugt. denn sind mir dur de Jardí del Túria zum hotel gschlendered zum üs für de z‘nacht frisch mache. für de sind mir wieder is viertel Russafa. uf em weg hie und zrugg händ mir wieder diversi faller skulpture beguetachte chönne.
mittwuch, 1.9.21
de letschti tag hät nomal mit me lauf agfange. ich bin natürlich in Jardí del Túria und deht bis zum liechtathletikstadion (Estadi del Túria). bis ich usegfunde han, wie me deht inechunnt und wenn‘s uf gaht, isch denn au scho tatsächlich türöffnig gsi. da d bezahlig mit garmin pay nid tue hät, händ‘s es aug zuedruckt und ich han mini runde chönne gratis drähe. di letschte zwei 400er han i denn uf em rückweg gmacht: es hät im Jardí del Túria au e offizielli laufstrecki mit täfeli all 100m. später händ mir usegfunde, dass die strecki füf kilometer lang isch und me druf en zwölfminutelauf chönnti mache. e tafle hät agäh, was di erreichti distanz je nach alter und gschlecht für de fitnessstand bedütet.
nach me usgiebige frühestück im hotel isch nomal chli stadtbummel agseit gsi. ziel händ mir keini gha, mir händ ja s meiste gseh, wo üs interessiert hät. mir sind no go Porta dels Serrans aluege, jetzt hät‘s offe gha und mir händ uf d platform ue und dur d schüssscharte useluege chönne. das hät chli es gfühl gäh, wie‘s frühener d stadt verteidiged händ. de bau insgesamt isch aber ersch vor knapp 80 jahr zum letschte mal im isatz gsi. im bürgerchrieg 1936 bis 1939 händ‘s deht drin wichtigi museumsstück us em madrider Museo del Prado versteckt gha.
mir sind wieder dur de Jardí del Turiá spatziert, bis uf höchi vom operehuus und denn deht aber uf de andere siete use, is Dulche de Leche go tee trinke und chueche ässe. isch s einzige lokal, i dem mir zweimal gsi sind.
wieter isch üse spatziergang zum hafe gange, wo mir plötzlich en huufe lüt in fäststimmig und zum teil traditionelle chleider gseh händ. es sind all die gruppe gsi, wo Ninots für Faller bastled händ. es isch wohl grad d usstellig und d prämierig z end gange. sie händ gfäschted und ihri Ninots sorgfältig i di bereitstehende transporter verlade.
mir sind nach me wili luege wieter zum strand. de isch ziemlich leer gsi, es hät au recht gwinded und dunkli wulche gha. mir händ üs devo aber nie abhalte lah und sind en stuck barfuess dur de sand spatziert. denn isch es mit em bus zrugg id innestadt und s hotel gange.
ich han leider e riese blatere a de füess gha, zudem isch s wetter recht unsicher gsi. mir sind denn nüm wie plant uf Russafa, sondern i de nächi bliebe. a lokal wo me bis spat am abig dusse sitze chann mangleds dere stadt ja nid. mir sind denn eher frühe hei, händ scho chli packt und bald gmerkt, dass mir glück gha händ: chum im zimmer isch en richtige wolkebruch cho.
dunnschtig, 2.9.21
de wecker hät scho fasch wieder zu alltagsziite gschälled. nach enere duschi und em packe vom rescht no churz zum zmorg. es hät um die ziit ja no kei lüt und mir nämed nur zwei statt drü gäng: frücht mit joghurt und denn ei, aber kei brot. aber schnell git‘s da anschienend nid. mir sind no am zmorge gsi, wo mir eigentlich scho us em hotel si welle händ. so sind mir denn chli in stress cho: zäh putze, uschecke und schnurstracks zu de metro. deht händ mir grad eini verpasst und e halbi ewigkeit uf di nächsti gwartet. und am flughafe denn üs über d langsamkeit am check-in-schalter gärgered. alles für nüt, es hät vorig uf de flüger glanged. de isch halbleer und mir sitzed am notusgang mit viel beifreiheit. so isch am schluss au d heireis genau so relaxed gsi, wie di ganzi wuche in valencia.