24 heures du mans rollers

am 7i am morge händ mir üs in bade troffe, s persönlichi material iglade und üs uf de 880km langi weg in nordoste vo frankriech gmacht.

bi de akunft um di 5i am abig isch zersch emal üsi geduld uf prob gstellt worde. öppe drü viertelstund sind mir agstande, bis mir in zeltplatz ine cho sind. deht hät aber üses hälfer-team scho ganzi arbet gleistet gha. chuchi und "ässzimmer" sind wietgehend scho ufgstellt gsi. mir händ "nur" no üsi schlafzelt ufstelle müesse. nach de erfahrig vom letschte jahr händ mir denn uf em zeltplatz gässe. es sind denn no wieteri lüt itroffe: d susann wo es comeback im ITL gä hät, und s team cho chauvin arnoux, wo de robert managed.

di erschti nacht im zelt isch mir nid so guet becho. genauer gno, rugge. aber schlussendlich hät das nüt usgmacht. es isch nur chli lang gange, bis de einigermasse "beweglich" worde isch.

am endi vo de parade hät's e chli tröpfled. das isch verbie gsi, bevor de aslphalt richtig nass gsi isch. wo pünktlich am vieri am nomittag de start erfolgt isch, s erdbebe uf de tribüne noni ganz abbebt und d läufer uf di zweiti rundi sind, isch denn de rege doch no cho. für mich, vierte läufer, hätt's grad no glanged, zum d regerädli montiere. ob's viel gholfe hät? d abfahrt nach em "dunlop-hill" isch dennoch e rechti rutschpartie gsi. s einzige mal i dene ganze 24h, wo ich je bremesed han. so isch denn di erschti rundi wohl au mini langsamschti überhaupt gsi.

bis fasch am elfi z'nacht händ mir nach jedere rundi gweched. us minere sicht isch das e gueti entscheidig gsi. so isch viel meh glaufe, d pause zwüsched de isätz sind nid eso ewig lang gsi und wenn me nur ei rundi hät, chann me recht gedankelos gas gä.

erscht i de nacht, nach für mal komplet "dureweche" , sind mir uf drü runde pro isatz ue gange. so händ mir fasch drüehalb stund pause gha, zwüsched de isätz. so händ alli dezwüsched is zeltlager go chli pfuuse chönne. ich bin für zwei mal anderthalb stund zum liege cho. ob i gschlafe han, weiss i nid. aber e chli erholt han i mi sicher.



dass es nid so heiss gsi isch wie im vergangene jahr, isch tagsüber no ganz agnehm gsi. z'nacht aber isch es recht chalt gsi. viellich isch das aber au chli mis glück gsi. es hät mi quasi zwunge, zum chli ilaufe, das de körper wieder uf "betriebstemperatur" cho isch. es sind aber alli glücklich gsi, wo sich am morge denn bald wieder d sunne zeigt und e chli gwät hät. es isch nämlich en starche und ziemlich frische wind gange. de hät sicher au e rolle gspielt, dass mir einiges langsamer gsi sind, als letschts jahr. s "verwütsche" vo guetem windschatte nach em astieg isch daher enorm wichtig gsi, aber leider nid ganz immer glunge. uf de zweitletschte rundi isch es am ärgerlichste gsi: deht han ich uf en 4er-zug glueged gha, de schlussendlich aber verpasst. schad, das hätti susch sicher e schnelli rundi gä.

di härtischte rundene sind für mich aber die am sunntig morge gsi. deht händ mir nach de zwei "drüer zykle" no zwei zweier gmacht. deht isch di zweiti rundi ziemlich hart gsi. und natürlich di vorher agsprochni zweitletschti. defür isch di letschti eini gsi, wo in gueter erinnerig bliebe wird: grad under em dunlop-boge han i zwei franzose, wo zäme skated sind, aghänkt. die häng guet zämegschafft, sich uf em letschte teil im wind regelmässig abgewechselt und mich trotzdem nie füre la. so han ich immer windschatte gha.

de zieliilauf isch au das jahr wenig fiirlich gsi, wil en grosse teil vo dem team scho am ufruume gsi isch. immerhin hät's de vorteil gha, dass scho um di sechsi alles abgruumt, iglade und alli dusched gsi sind. di erschte sind bereits uf de heireis gsi, mir sind no uf le mans ine, go pizza ässe und em-final luege. hunger händ alli gha. und müend sind mir au gsi. so sind mir scho i de 80. minute gange. mit 2:0 für spanie händ mir d sach als glaufe aglueget und nid schlecht gstuuned, wo mir am nächste morge erfahre händ, dass mir nur d hälfti vo de goal gseh händ.

d rückfahrt isch mir chürzer vorcho als d hiefahrt, was wohl dra gläge isch, dass ich en grosse teil devo gschlafe han. am viertel vor füfi sind mir denn wohlbehalte wieder z bade am bahnhof acho.

puls- und gps-date:
rundi 1 bi garmin connect
rundi 2 bi garmin connect
rundi 3 bi garmin connect
rundi 4 bi garmin connect
rundi 5 bi garmin connect
rundene 6 bis 8 bi garmin connect
rundene 9 bis 11 bi garmin connect
rundene 12 und 13 bi garmin connect
rundene 14 und 15 bi garmin connect
rundi 16 bi garmin connect
rundi 17 bi garmin connect
rundi 18 bi garmin connect