s thuner inline renne hät für mich scho frühe am morge agfange.
am 8i sind thunliners zum hälfe ufbaue bstellt gsi. wil ich en falsche treffpunkt im chopf gha han, bin i chli später cho. nichts desto trotz sind no es paar festbänk und es paar pilone vo mir ufgstellt worde.
gege de mittag hät sich denn so langsam d schwiizer inline szene uf de thuner allmend igfunde und ich han mich nach enere pasta portion afange für s renne parat mache. ei rundi ifahre isch uf em programm gstande. die hät eigentlich scho alles vorusgseit: es wird verdammt härt! uf em "undere teil" vo de rundi hät's massive gegewind gha. deht isch me schier stah blibe. was hinzue cho isch, ich aber scho vorus gwüsst han, wäge de flache strecki git's praktisch nie erholigsphase. me muss immer gas gä.
denn isch es los gange. erstuunlich lang isch s ganzi feld zäme gsi. so han ich no mitverfolge chönne, wie d spitze am afang vom renne no chli spieli spielt, schlangelinie fahrt und sich gegesietig beschnuppered. erscht nach meh als enere halbe rundi hät sich afange e chlini lugge uftue und e gruppe vo siebe bis acht fahrer isch abgfalle. i dere gruppe sind verschiedeni lüt gsi, wo ich kennt han und ich als chli stächer als mich igschätzt han. aber au nid total usser riechwieti. mit dene fahre, han ich denkt, wäri super. es isch denn aber scho uf de zweite rundi härt worte, dene ihri pace z halte. ich han im gegewindteil füherigsarbeit müesse mache. deht han ich viellich chli en falsche ehrgiz an tag gleit. jedefalls isch es denn genau deht, ei rundi später gscheh: im gegewindteil hät sich e lugge uftue. die zue z fahre isch unmöglich gsi. tja, denn bin ich ällei deht gstande.
ich han mich afange fräge, was das eigentlich alles söll und ob hinter mir no öpert chunnt und ob das ganzi so no sinn macht. doch denn tauched zwei am horizont uf. wo's mich denn igholt händ, han ich gmerkt, dass ich eine devo sogar guet kenne. und de normalerwies schneller isch als ich. so han ich mich dene denn aghänkt. vo deht a sind mir praktisch ununterbroche es drüer-team gsi. nur, wo eus uf de öppe nünte rundi e grösseri gruppe überrundet hät, händ min mitschtrieter versuecht, mit dene mit z fahre. zu minem glück händ's das unterfange bald abbroche. ich hetti a dere stell keis schnellers tempo ga chönne.
uf de zehnte rundi händ mir nomal en bekannte ufgabled. de hät gmeint, er seigi jetzt x runde ällei gfahre, er höri uf. alli überredigskünscht händ nüt gnützt, er isch nüme mit üs uf di letschti rundi cho! so händ mir denn die (wieder) z dritte absolviert und mit me chline schlussspurt em liede es endi gmacht.
es isch würklich es sack-härts renne gsi. ob ich mit em resultat z friede sie chann oder nid, bin ich mir irgendwie nid so im klare. es git ja keis verglichsresultat us em vorjahr und au chum bekannti referenzwert. die händ nämlich ziemlich alli ufgä, usser dem, wo mit mir is ziel cho isch. oder sie sind gar nid erscht gstartet. oder nur über di halbi distanz...