d frag nach de rädli isch schnell beantwortet gsi. d stroms sind scho di hei montiert worde.
d lüt händ sich alli vor em start so guet wie möglich im trochne versteckt. ich han eigentlich s gfühl gha, chli spat dra z sie, bin aber eine vo de erste gsi, wo uf de startlinie gstande isch. mit enere chline verstpätig isch s chline speed-feld denn uf de weg gschickt worde. ich han scho am start gwüsst, wer mini mitstrieter si wärded. es sind eigentlich num zwei in frag cho. d uswahl under 30 lüt isch allerdings au nid gross...
s renne isch relativ schnell los gange, han ich s gfühl gha. jedefalls han ich es ziemlich es komisches problem gha: normalerwies rennt me quasi di erschte paar schritt und fangt denn a richtig skate. nur isch mir das irgendwie nid glunge. ich bin buechstäblich em feld hinterher grennt, statt skated. i de erschte kurve hät's mich denn chli wiet use gno, isch wohl de respekt vor em nasse terrain gsi. deht hät's e lugge gä, wo ich denn nid richtig schlüsse han chönne. debi wär's ziel fasch gschafft gsi. i dere kurvekombination (rechts, lins, rechts) hät sich nämlich s feld zerstückled und die beide, mit dene ich ursprünglich han welle skate, wäred s zweite e chli vor mir gsi. de abstand isch aber scho z gross gsi, zum en ufhole. ich han's es wili probiert, aber isch nid gange. sie sind halt s zweite gsi.
nach dem ich das unterfange igstellt han, isch vo hine eine cho. ich han denn d hoffnig gha, dass wenn mir au wieder s zweite sind, mir viellich wieder ufhole chönnd. aber us dem isch nüt worde. nach guet einere rundi mit dem, hät üs d spitze vo de fraue, wo nach üs gstartet sind, igholt. si sind relativ langsam a üs verbi. ich bin han mich denn dene aghänkt. zwar chli halbherzig, wil ich gwüsst han, dass das mindistens nid erwünscht, wenn nid grad verbote isch. aber d hoffnig, dass die mini andere beide companions bald iholed, isch grösser gsi als d bedenke. so richtig vo ihrem windschatte profitiere han ich aber nid chönne, wil ich bewusst immer en chline abstand la han. wo's denn zu me zwüschesrpint agsetzt händ, han ich s ga la. de wo vorher mit mir gfahre isch, isch aber au scho lang weg gsi. so isch wieder e rundi ällei fahre agseit gsi. ich han mich eigentlich scho uf es füf runde langs technik- und mentaltraining igstellt gha, wo plötzlich gege s endi vo de dritte rundi wieder zwei uftaucht sind. unmittelbar vor de stiegig händ's mi igholt. s eini isch de vorher abghänkti gsi, s anderi e frau. mit dene bin ich denn de berg ue, wobi mir dobe wieder s zweite deht si sind. de wo ich scho mal abghänkt han, hät das leider nomal über sich erga la müesse.
dass mir nur es zweier und nid es drüergrüppli gsi sind, händ mir aber bald nüme gstört. denn mir händ relativ guet harmoniert. ähnlichi schrittlängi, es tempo wo mir passt hät und e einigermasse fairi ufteilig mit de füherigsarbeit. ich han jedefalls zu keinere sekunde zwiefled, dass ich ihre nid nah mögti, und andersch ume isch es mir au nie z langsam gange. dezwüsche isch sogar no luft für churi unterhaltige bliebe. so hät si gmeint, dass sie nid vo de fraue überrundet werde möchti, und ich eigentich d rundene unter 13 minute fahre han welle. nach de sechste zieldurchfahrt isch sie glaub ziemlich z'friede gsi, dass mir ihres ziel erreicht händ. sie hät denn gmeint, "und jetzt mached mir nomal e rundi unter 13 minute" und isch los zoge. uf dere rundi isch denn d füherigsarbeit nüme fair verteilt gsi! ziemlich überrascht bin i denn aber gsi, wo si nach öppe de halbe rundi plötzlich stah blibe isch und wechlse hät welle. das händ mir natürlich gmacht. und denn isch es au bald no es letschts mal über de hügel gange. i de abfahrt han ich s einzigi mal en moment lang dnekt, jetzt fahrt si mir doch no devo, um denn im flache s gfühl z ha, es würdi jetzt au schneller ga.