s finale vo de swiss skate tour isch ironischerwies in dütschland gsi. allerdings sehr näch a de schwiizer grenze. und dank de schwiizer invasion hät me sich au wie a me schwiizer renne gfühlt.
d ITL-delegation isch mit drü skater ziemlich bescheide usgfalle. defür händ mir's gschafft, gemeinsam hie und zrugg z rise. uf em weg händ sich zwei entschiede, id fitness-kategorie z wechsle, de dritti isch vo afang a deht gsi. ich bin zwar wenig begeistered gsi devo, es hät sich denn aber als guete move zeigt.
nach em erledige vo de formalitäte, enere streckebesichtigung und diverse "hallos" mit troffene lüt, isch chleiderverteilig agseit gsi. es sind nid alli glich vollständig usgrüschted deht gsi. am start sind denn aber alli klar als limmattaler kennzeichnet gsi.
mir sind recht lang iglaufe und zwar im sinn vo laufe. gar nid mini lieblingsdisziplin. und scho gar nid guet han i gfunde, dass denn nur no sehr wenig ziit zum ifahre bliebe isch. für e chlini streckebesichtigung hät's aber no glanged.
denn isch es los gange und ich bin für eimal guet weg cho. isch. natürlich au chli eifacher im fitness-feld. es isch liecht abwärts gange, und denn isch e scharfi linkskurve choerbe feld isch no s ganzi binenand gsi und es hät es ziemliches gedränge. es isch sogar bremsed worde. scho ei rundi später sind mir aber e einigermasse schöni kolone gsi. mich hät's aber e chli wiet use gno i dere kurve. ab deht han i denn gwüsst, wie ich si fahre muen und si isch für mich keis problem me gsi.
gfühlsmässig sind mir recht schnell unterwegs gsi. au di erschte zwüscheziite händ das gmeint. ich han mit rundeziite gege di 3min grechnet, sie sind aber eher bi 2:30 gsi. i de gruppe um mich sind vieli bekannti gsi. lüt wo ich als schneller igschätzt han, genau so wie sotigi wo ich in jedem fall hinder mir la han welle. bald isch es mir i dere gruppe fasch chli z langsam worde. au d rundeziite händ sich gege di 2:40 bewegt. ich bin drum chli aktiver worde und han mich au a de spitze zeigt. scho vorher emal, und öppe uf de zehte rundi han i gfühert. i de stiegig bin i ungewollt devo gfahre. ich han churz mit em gedanke gspielt, s ällei z probiere. bin denn aber doch froh gsi, wo's wieder ufgschlosse händ.
es muss denn wohl endi zwölfter rundi gsi si, wo drü a de gruppe verbie sind und au weg z cho droht händ. da de ufstieg unmittelbar bevor gstande isch, bin ich na nahgsprinted. i dere passage isch es mir immer bsunders guet glaufe.
obe a de stiegig han ich denn au tatsächlich ufgschlosse. und es hät sich glohnt, wie de blick zrugg e halbi rundi später zeigt hät. di andere händ nüme ufgholt.
nachher hät's aber keis zruggluege me gä. nur no uf zäh biesse isch agseit gsi. de effort hät chraft koschted. dass mir jetzt d rundene klar unter 2:30 glaufe sind, han i erscht bim uswerte vo de pulsuhrdate gmerkt. han kei ziit me gha, zum druf luege.
e schrecksekunde hät's vor em zweitletschte ufstieg gä: es hät de aschie gmacht, als würded's zum schlussspurt asetzte. ich han scho angst gha, dass die üs überrundet händ, und ich nach em ziel no ällei e rundi fahre muen. so isch es denn aber nid gsi, sie sind alli nomal mitcho.
im letschte ufstieg han ich us position vier use nüt me riesse chönne. bin zwar am chreisel no dra gsi. uf de abfallende zielgerade sind aber di vorderschte beide wäg gfahre. de dritti han i aber no churz vor em ziel päckle chönne.