ironman 70.3

s letschti mal, wo ich am viertel ab 5i am morge ufgstande bin, muss bestimmt im militär gsi si. wie chann me nume!? am schluss vom tag hät sich's aber glohnt.

uf em 6i-zug hät's genau zwei sorte lüt gha. die wo nach sportler usgseh händ, oder die wo uf em heiweg vom usgang gsi sind. di eine händ s letschte bier, die andere s erschte isostar trunke.

z rappi denn scho emsiges treiben. i de wechselzone händ d velo- und laufuntensilie welle richtig versorged si, denn in neopren inequetsche und no d strassechleider versorge. WC gäng, und langsam am start ga. der marsch der lemminge... de sprung is chüele, trüebe wasser, de neo füllt sich langsam demit, und denn s paddle an start. d sunne hät bereits gschunne, wo de countdown glaufe isch, denn isch es los gange. im gwühel am afang chli chaotisch und mit em eine oder andere ungewollt usteilte oder igsteckte schlag. bald aber isch s wasser klar worde und es hät platz zum schwümme gä. fasch scho en gnuss. wo ich mich s erschti mal orientiert han, sind scho 650m hinter mir gsi. denn han i afange müesse chli genauer luege. wo isch d wendi? wo gaht's dure? wo die gschafft gsi isch, isch eifach wieder gschwumme worde. mit de ziit isch es denn zwar nüme so en gnuss gsi, 1.9km chönnd doch no cheibe lang si. aber alles i allem isch es doch recht schnell gange, und ich han wieder feste bode unter de füess gha.

i de wechselzone isch min sack schnell gfunde gsi. alles mal uslehre. mit em tüechli chli abtröchne, velohose, socke und schuhe aziehe. sunnecreme dörf nid fehle. und no e zweiti schicht. es unterliebli oder nid? ja. s veloliebli drüber, esse ipacke. d ärmling bruch i glaub nid. denn? isch eigentlich no gmüetlich da uf dem bänkli i dem festzelt. aber nei, muss ja wieter. uf's velo. nur wo isch das?

de göppel mal gfunde, isch d reis wieter gange. zersch mal flach, und nach me wili sogar no herrlich em see entlang. plötzlich gaht's vom see weg und direkt in en steile ufstieg ine. schnell abeschalte. und sich für di zweiti rundi merke. überhaupt han i mir probiert alles z merke für di zweiti rundi. immer wieder isch es duruf gange, zum teil recht steil. aber es hät vor allem a de steile stelle au lüt gha, wo glueged und klatsched händ. super atmosphäre! hät spass gmacht, und mich chli ad fernsehbilder vo de tour de france erinnered. dazumal, wo ich no ziit zum fernseh luege gha han.

irgendwenn isch es denn wieder abe gange. ich han probiert mis biberli us de packig z zwinge und z ässe, bi über 50km/h, während anderi mit ihrne ärodynamische lenker a mir verbie sind. händ die en dachschade? fieserwies hät's nomal e stiegig, denn nomal abe und am see entlang uf rappi zrugg. aber ebe, nüt mit fertig, eimal um de chreisel ume, und s ganzi nomal vo vorne. obwohl d bei jetzt nüme frisch gsi sind, isch es gfühlt eher schneller gange, obwohl's objektiv gseh länger gsi isch. s wüsse, was mich erwartet hät gholfe und nach 3 stund bin ich wieder zrugg i de wechselzone gsi. wo nur muss i jetzt scho wieder s velo parkiere?

jetzt isch s roti säckli dra gsi. laufschuhe use, liebli wechsle, au en huet dörf nid fehle und nach me wietere WC-bsuech bin i plötzlich, am renne gsi. oder wenigstens am jogge. ähnlichs bild da: ich han mir probiert z merke, wo's dure gaht, was ich gsehne und so wieter. bim erschte verpflegigsposte han i müesse feststelle, dass i bim jogge nid trinke chann. so isch d taktik schnell z recht gleit gsi: bim poste bewusst "walke", und nachher wieder renne, oder wenigstens jogge. nach öppe 8 km han i mi mal gfräged, ob ich was falsch gmacht han, wil irgendwie han ich no immer keis so es armbändeli gha. aber denn isch si no cho, d "lap control" und es hät es gäls bändeli gä. nomal en essensposte und scho bald isch de richtig ziel gange. eigentlich alles relativ mühelos. jetzt isch es aber andersch gsi, als uf em velo: plötzlich isch es nid eifacher gange, sondern schwerer. d müedigkeit han i jetzt würkich gspürt. und ich han mi chli zwinge müesse z renne. ich han mir vorgno, bis zum nächste poste dure z hebe. de isch nach de 4km marke cho. endlich wieder spatziere. wasser trinke, en schwamm mit wasser zum mich chüele und de huet neu "tränke" nach dem poste isch es denn aber lang echt schwer gsi, z renne. ich hab's nomal probiert, bin aber au en stuck eifach spatziert. ersch wo s endi vo de lange gerade under see in sicht cho sind, han i d motivation zum renne wieder gfunde. grad no im richtige moment, am nächste egge sind mini eltere gsi. gfühlt isch es ab deht nomal ganz guet gange. aber di offizielli ziitmässig hät das andersch gseh. wie au immer, ich han's nomal d stäge ue richtig schloss gschafft und denn im schatten dessen rund ume. bi de lap control s zweiti bändeli gholt (blau) und am letschte essensposte nomal zueglanged. denn ab richtig ziel. je nächer das cho isch, desto eifacher isch es gange.

nach 6h isch es gschafft gsi! obwohl i nid ei sekunde dra zwiefled han, han ich's glich chum fasse chönne. 1.9km schwümme: easy, mach i i jedem training. 90km velo: han i scho längeri toure gmacht. aber denn no en halbmarathon? so wiet z fuess, wie ich no nie vorher bin? und das nach allem andere? aber es isch irgendwie gange!

danke melanie und felix, ihr händ mir de flo is ohr gsetz!
danke simon und lisbeth für die viele schwümmtrainings.
danke allne "mine" indoor cyclerInne, für die coole velo-trainings.
danke peppo und stefi, für di so wichtige lauftrainings.
danke yasmin für de super support vor ort!