inline one-eleven

die bisher sportlich gröschti challange!

mittlerwile sind 24h vergange, sid ich s olma-messegländ z st. galle erreicht han. aber ganz erholt bin ich au nach enere lange nacht nid. muskalkarter hani zwar i de bei keine! defür schmerzed d chnü, zum erschte mal vom skate(!) und natürlich de rugge. und d fuessglenk sind no zeichnet vo de riebige vom schue...

aber de reihe na: de prilly, wo mit mir is MNG gange isch, hät d nettigkeit gha, mit mir am samschtig abig uf st. galle z ga und mich i siner wohnig übernachte z la. die isch ganz näch bim start/ziel-gländ gsi und so e optimali usganglag. praktisch vor sinere huustür isch d "noch 500 Meter"-tafle gsi.

streckecharte

streckeprofil

bereits am samschtig abig händ mir mini startnummere abgholt, so han ich am morge vo "di hei" us grad mit de skates ga chönne. ich han nid schlecht gstuunt, wo ich am halbi 7i deht gsi bin, und sich no niemert gross um de start kümmered hät. d céline weiss han ich no i de turnschue gseh sich chli warmhüpfe, viel anderi sind no am cho gsi oder chli am ufwärme. nüt ume vowäge "früe im startblock si". so han ich denn au no es paar rundene dräht, bevor ich mich am 10 vor 7i mal irgendwo anegstellt han. wo s gege di 7i gange isch sind d lüt denn eifach je länger je nächer zäme gruckt, und am 7i isch es relativ gmüetlich los gange.

am afang isch es mehrheitlich abwärts gange und mir händ es flotts tempo gha. aber nie so, dass ich am limit gsi bin. d 30km-marke händ mir nach guet einere stund passiert. nach guet zwei stund sind mir bi viellcht 55 kilometer gsi. bis zum wändepunkt isch es ganz es agnähms renne gsi, de han ich überigens nach 2:27,28.12 passiert. nach em wändepunkt hät sich ganz e gueti gruppe formiert. mit fraue-power a de spitze! wenn s gange isch, sind mir uf de überholspur gsi. en stuck händ mir aber au chli warte müesse, da d strass eifach z schmal gsi isch, zum zwei reiheli näbedenand z fahre. wo mir denn aber wieder uf richtigi strasse cho sind, das isch irgendwo zwüsched 70 und 80 kilomter gsi, händ mir wieder gas gä chönne. deht bin denn ich no recht lang für s tempo besorgt gsi, han mich denn mal vo de bolnde bernerin ablöse la und han s ganz agnehm zum fahre gfunde. de blick nach hine es paar kilomtere spöter hät e chini überraschig bereit ghalte: mir sind nur no z vierte underwägs gsi, und das no immer uf de überholspur. zig fahrer händ mir deht abtröchned, und churz vor kilomter 90 isch us üsem vierer-grüppli gar nur no es drüer worde. vorher sind mir eimal falsch abboge. das brems- und chermanöver uf chlinschtem ruum isch recht id fuessglänk igfahre, ab deht han ich die denn jedefalls gmerkt. aber bis zum kilomter 90 würd ich säge, isch es ganz es agnehms renne gsi. halt es bizeli länger als susch, aber das han ich ja welle. defür bini nie so am limit gsi, dass ich nüme rede hetti chönne und so hät me ab und zue sprüch klopft und chlini konversatione mit de mitfahrer und fahrerinne gha.

au das schient zum one-eleven z ghöre. ich han aber nid warte müesse. :-)

churz nach de 90er-talfe isch cho, was s streckeprofli vorusahne la hät: es isch nur no durue gange! scho i de erschte stiegig isch us de drüergruppe e zweier gruppe worde. und nomal es paar stiegige spöter han au ich s tempo vo dere lady nüme mitga chönne. es isch überhaupt ziemlich s ändi vo mine chräft gsi. vo deht a, hät me (bi mir) nüme vo skate rede chönne. es isch wohl me es laufe oder es sich "irgendwie vorwärts quäle" gsi. so isch nüt me ume gsi vo schönem fahrtwind. und das bi de mittlerwile glühende hitz vo de brennende sunne. jedefalls gseht me jetzt a de bei und de oberärm genau, wo s tricot gändet hät.

dur jenschti buuredörfli und käffli isch es gange, immer wieder chlini astiegige und wieder chli flach. diversi mal han ich müesse stah bliebe und mich denn wieder in a... chlübe und chli wieter ga. eine überhole und vo me andere überholt wärde. d talfe 100km händ s glaub vergässe uf z stelle, die wäri viellich no hilfriech gsi! jedefall isch denn irgenwänn emal d talfe "noch 5km" cho, was mich nomal chli ufläbe und wieter kämpfe la hät. churz druf abe sind mir denn au i de stadt gsi und händ üs deht, no immer liecht berguf, dur de stadtvercher kämpft. siete a siete mit de autos. für üs händ s de velostreife plus en stuck strass gsperrt gha. aber au das liede hät emal es ändi gha: plötzlich e talfe "noch 1km" und denn dur die breiti, schattigi quartierstrass, mit me letschte energieafall, verbi am prilly sinerer wohnig, a de "noch 500 Meter"-tafle und no eimal es chlises bizeli durue is messegländ, dur e mässehalle und denn under all dene ufblasbare werbe-böge dure, vo helvetira-partra, mirgros, rivella und was es no so alles gha hät. bis zum bescheidene balke wo datasport ufgstellt hät wo d uhr drin ticket hät: 4:43.31.40!!