nach em lange und relativ grade baldeggersee sind dasmal sprinter-qualitäte und kurvetechniger gfräged gsi.
bi ankunft und de kartbahn z lass hat sich de summer vo de beste seite zeiged. sunne und gueti 30 grad! nach paar runde ilaufe, ufwärme isch bi dem wetter definitiv nid nötig gsi, isch es denn es warte lange, bis jede einzelni sini quali-rundi absolviere hät chönne. bis ich dra cho bin, isch nüme viel vom ilauf-effekt ume gsi, aber i dem fall egal, bin ohnehin devo usgange, id B-serie z cho.
i de folgende semifinals isch es denn drum gange platz zwei z erziele, oder uf e gueti ziit z hoffe, für de final. ich bin di beide rundne e chli z locker agange und drum chli wiet hine gsi, und han nach öppe einere rundi müsse en zwüschespurt ilege, zum mich bi de vordere vier z positioniere. es isch aber grad no gange. us de vierte position bin i au in schlussspurt gstartet. öpper han i no chönne überhole, aber für di erschte beide plätz hät's nid glanget.
dank me schnelle vorlauf hät's glich in final vo de B-serie glanged. au de bin ich eher chli z'wenig aggressiv agange und ich han mich bald im hintere teil vom feld wieder gfunde. will's relativ schwierig isch gsi zum überhole, han i leider mit em sieg vo der serie nütz z tue gha.
s bild hat sich denn im massestart nomal wiederholt. ich bin a de startlinie nid i de erachte reihe gsi, und han wo's los gange isch, schon mal müesse überhole. bin denn wohl eher i de mitti vom lang sehr kompakte feld skated. überhole isch sehr schwer gsi, es paar plätz guet mache han i aber glich chönne. alles i allem isch s renne aber bi mittlerwile fluetliecht und agnehme temperature recht lang friedlich verlaufe. dur di relativ schlechti position han i denn aber, wo sich vorne es paar abgsetzt händ uf öppe de sechste rundi, nid mit chönne. ich bin zwar überzügt, dass ich ihres tempo au mitgah hetti chönne, aber zum füre fahre sind zu viel anderi im weg gsi und es isch zu schwer zum überhole gsi. im schlussspurt han i denn no paar plätz guet gmacht.
alles i allem hät's aber extrem spass gmacht uf de enge und kurvenrieche bahn z skate. für besser platzierige hett i vor allem am start meh müesse "ellbögle". das isch es mir aber nid wert gsi.