wo ich zum huus us bin für mis erschti inline renne vom jahr, hät's gregnet und ich han mich scho d regerolle montiere gseh. aber es isch andersch, besser gho: in wange isch blaue himmel und sunneschii gsi.
nach einere rundi ufwärme isch es los gange. vom start us um e kurve und denn en churze, knachige hügel durue. de hät scho selektioniert und s feld in zwei teilt. ich bin i dem zweite teil aber recht wiet vorne gsi. han aber immer no s gfühl gha, dass das für mich z schnell isch. so han ich mich entschiede, bim nächste ufstieg innerhalb vo de gruppe mich mal chli zrugg falle z lah. da de ufstieg für mich immer de eifachsti teil gsi isch, han i deht am beste mit em tempo spiele chönne.
d rechnig isch denn aber uf de erschti blick nid ufgange. d gruppe isch riesig gsi, und hät sich i de abfahrt teilt. ziemlich churz vor mir. und so, dass die lüt, wo ich als "uf minem niveau" igschätzt han, vorne weg gsi sind. en chli spätere versuech, nomal zu dene uf z schlüsse, isch gscheiterd. so han i mi müesse demit abfinde, i dem füfeegrüppli z fahre.
han mi druf igstellt, dass es wie so oft, später für mich langwielig wird und ich mich drüber ärgere, am afang nid meh uf zäh bisse z ha. es isch aber andersch cho! ich han's eigentlich nie easy gfunde, und es hät für de ganzi rescht vom renne immer wieder moment gä, wo ich um's "drabliebe" kämpfe han müesse. han gluegt, dass ich viel windschatte han und wenig fühere muen. und irgendwenn sind mir denn so doch uf de zweitletschte rundi acho. und plötzlich taucht vor üs es grüppli vo drü bis vier lüt uf. drinne eine oder zwei, wo ich am afang verlore han und a dene ich mich orientiere welle han! später händ mir no meh ufgläse. so isch also am schluss das gar nid schlecht gsi. ich han e gruppe mit me relativ konstante tempo gha (runseziite immer um 4:30) und bin am schluss glich nid entscheidend langsamer gsi, als die wo ich als ähnlich schnell igschätzt han.
ende gut, alles gut? das gilt sicher für s wetter und de rennverlauf. nid aber für d form insgesamt. es fähled mit ziemlich sicher di (härte) laiftrainings, bedingt dur d achillessehne- und wadeproblem. aber au deht schient besserig in sicht z si. aber das dörfti sich frühestens im herbscht afange uswirke. nichts desto trotz, wenn s wetter guet wird, freu i mi uf de nächsti sunntig und a renne am sempachersee.