als dritts renne innerhalb vo zwei wuche isch no s CIR uf em programm gstande. für mich immer es highlight vo de saison.
wie immer isch es los gange wie verruckt. wenn mi das uf längere distanze und a andere renne eher stört, ghört's zu dem eher churze renne (21km) und kurveriechi stadtkurs eifach dezue. trotzdem isch es mir letschtendlich e chli z schnell los gange. di erschti rundi händ mir nach exakt 7 minute absolviert gha. das wäri eigentlich genau super gsi, aber ich han mir das tempo nid richtig zuetraut. so han i denn uf de zweite rundi churz vor em u-turn ufgäh, wo ich mal wieder es loch schlüsse hetti müesse. die vor mir isch nid so regelmässig gfahre und au nid so guet um kurve cho, drum sind deht immer wieder sprintli agseit gsi.
uf di nächsti gruppe han i recht lang gwartet, was sich au inere 8 minute rundeziit usgwirkt hät. es sind deht viel lüt debi gsi, wo ich kennt han und au scho schneller gsi sind als ich. vo dem her, han ich s nid bereut "ufgäh" z ha. im windschatte vo dere gruppe isch denn d useforderig für mich aber nüm so gross gsi und ich bin guet mitcho. bin aber recht wiet hine i de gruppe gsi, was mi chli gstört hät. füre fahre wäri eigentlich easy gsi, wil i meistens besser dur d kurve cho bin als di andere. das usnütze han i mi aber glich nid getraut, wil i nid so gern ellbögle, was me aber immer chli muen.
uf de letschte rundi isch es denn aber nomal chli hektischer worde. d lüt händ allgemein deht chli afange um positione z kämpfe und es isch no es guet's wettkampffeeling ufcho. s glück hät denn au no chli mitgespielt, und ich bin de thunliners nächer cho, wo afangs ganz vorne i de gruppe gsi sind. und da ich, im unterschied zum sempachersee, no chli saft i de bei gha han, han i im schlussspurt au no es wörtli mitrede chönne. alli han i nüm chönne überhole, aber deht han sicher no einigi plätz guet gmacht.
im ziel isch denn d luune super gsi. es hät eifach wieder mega spass gmacht. s renne hät ghalte, was es besproche hät. einzige wehrmuetstropf, viellich hett i mit dere gruppe, wo ich am afang mal gsi bin, doch no chönne mithalte. so viel schneller sind's am schluss au nid gsi und es sind no lüt debi gsi, mit dene ich letscht wuche am sempachersee mit möge han. aber es isch immer schwierig ab z schätze, wieviel luft nach obe würklich no gsi wäri. d bei fühled sich am "tag danach" uf jede fall au so schwer a. :-)