zytturm triathlon

so näch wie hüt morge, han ich's glaub no nie an start vo me wettkampf gha. und das isch au mit en grund, warum ich mich no churzfristig (bester nomittag!) zum mittmache überrede la han. scho umzoge und mit em sportgrät sälber bin ich de knappi kilometer bis an start pedalt. ich han sogar no e chili extrarundi gmacht, wil i erscht gester no de schluch vom hinterrädli sälber gwechslet han und dere sach nid so traut gha han.

d wechselzone isch denn schnell igrichted gsi und denn isch es an start gange. angesichts vom 20 grädige see und de churze schwümmdistanz (500m) han i mi gege de neopren entschiede. viellich falsch gsi, d schwümmziit vo üner 10 minute isch recht enttüschend gsi. viellich wäri i glich gnueg viel schneller gsi mit neo, als dass sich di zuesätzlichi wechselzoneziit glohnt hetti.

mit em wasser han i denn au i de wechselzone nomal kämpft, wo ich s velotrikot nid über min nasse oberkörper bracht han. mit chli würge und risse isch es denn doch gange und s velofahre hät chönne afange. han natürlich, mit mine viele bike-to-work-km mir scho chli was vo dere disziplin versproche. isch denn aber recht härt worde. vor allem uf em "zruggweg" zwüsched küsnacht und hühneberg hät's enorm gegenwind gha. zudem han i fasch uf de ganze velostrecki problem mit em buch gha. trotzdem isch es irgendwie nid gange, locker z fahre, en gang abeschalte oder so. es isch härt und "gib-alles-modus" bis zum schluss gsi.

uf de laufstrecki denn s umgekehrte bild: die bin i zwar i me für de aktuelli lauf-form-stand guete 5er glaufe. und han di ganzi ziit s gfühl gha, es wäri no chli meh drinne. han aber de schalter wieder nid gfunde und bin so die ganze 5km konstant und ohni schlussspurt grennt. im ziel bin i denn doch sehr usgnockt gsi. zwei becher cola und ziemlich viel feinsti melone händ s energie-level wieder ue bracht.