s feld für die volli distanz über drü rundene isch in zwei blöck iteilt worde. die schnelle und di chli langsamere. de grund isch de bahnübergang gsi, wo mir insgesamt drü mal passiere händ müesse. zu wellne ghör ich ächt? mini zielziit isch genau die ziit gsi, wo s feld teilt hät.
am start han i drü vo dene vom linthmarathon gfunde und schnell isch klar gsi: mit dene möcht i wieder fahre, egal wo's startet. mir sind denn bi de schnelle gstartet und eis vorweg: de plan isch ufgange.
mir sind natürlich im schnelle starterfeld die langsamschte gsi das hät aber de vorteil gha, dass die andere schnell weg sind, und mir so vo afang a händ chönne üses eigete grüppli mache. z vierte händ mir so anderthalb mal de see umrundet, bis mir de erschti "ufgläse" händ wo mit de langsamere, vor üs gstartet isch. e grossi hilf isch er aber nid gsi, und er hät au s ziel nid mit üs erreicht. di erschti rundi händ mir i 25:30 absolviert und sind so guet im soll (26min) gsi.
au di zweiti rundi isch guet glaufe und vo zämearbeit prägt gsi. bin gar nüm sicher, ob mir deht scho, oder erscht später no zwei wieteri skater igholt händ. uf jede fall isch au di zweiti rundi mit 25:45 im georderte tempo absolviert worde und mir händ de bahnübergang ohni warte z müesse chönne quere.
uf de dritte rundi hät me denn d müedigkeit doch da und deht gmerkt. a tempo hät au e chli nahlah, wie d rundeziit vo 26:22 klar zeigt hät. d wechsel händ vor allem uf de zweite seesiete nüme richtig klapped. gwüssi lüt sind chli übermüetig worde und händ vo hine nach füre gwechslet um denn vorne s tempo trotzdem nid halte z chönne. so bin ich denn au fasch di ganzi längi uf de zweite position gsi und han zwar nie richtig tempo mache müesse, aber au nid würklich erhole. churz vor schluss sind mir denn uf zwei ufgahre wo nur zwei runde gmacht händ und jetzt no chli am usfahre gsi sind. die händ üs denn no em stuck zoge, sind mir defür denn im schlussspurt chli in weg cho. so han i nid so e grossi chance gha, die zwei chli frühe usgrissene nomal z stelle. das isch chli schad gsi, wil so s tüpfli uf em i vo me fasch perfekte renne gfehlt hät.