sit de wiederbelebig vo dem alass han i sehr es zwiespältigs verhältnis dezue gha. einerseits de respekt vor de abfahrte, anderersiets s unglaublich spezielle erlebnis und d freud im ziel, wenn’s amig wieder gschafft gsi sich. so bin i nid unglücklich gsi, dass scho vor em start klar gsi isch, dass 2018 di letschti usträgig isch.
am start isch es no frisch gsi, wie me das i de berge um die jahresziit erwartet. langs liebli, uf jede fall, langi hose, viellich, aber glaub eher nid. ich han mi probiert guet uf z wärme, um nid scho wieder am start abghänkt z werde, was i s gfühl gha han, han i gar nid so schlecht gmacht. trotzdem bin i nid so richtig weg cho, aber letschtendlich glich am schluss vo de „spitzegruppe“ vo minem startblock mitgfahre. wenn‘s dezwüsche chli schneller oder liecht ue gange isch, han i müesse chli uf zäh biesse, dezwüsche hät‘s aber au immer wieder phase gä, wo ich fahre la han chönne. ich han denkt, mit dene chumm i hüt no wieter als vor em start denkt. aber leider denn doch nid so wiet wie erhofft. scho nach öppe sechs kilometer isch es loch vor dem vor mir ufgange, churz bevor‘s in a abfahrt gange isch. ich han chli zögered. mag i nomal ane? und wieviel trau i mir i de abfahrt zue? zweimal nei händ wohl ein fehler ergäh. es isch später nüm möglich gsi, die gruppe i z hole. und ich bin nachher au nur no eimal a mini grenze cho, was aber nüt mit de gschwindigkeit z tue gha hät. so gseh, wäri a dere stell wohl no chli meh drin gläge.
relativ bald nach dem mir, sind z vierte gsi, abghänkt worde sind, händ mir aber e zweite chance übercho, dur e grösseri gruppe wo üs igholt hät. und die chance han ich mir nüm entgah lah. ich bin mit dene bliebe, au i de abfahrt nach st. moritz und denn bim abstieg und de abfahrt vo pontresina. une a dem astieg isch di zweiti erwähnenswerti stell gsi: uf mehrere hundert meter händ‘s di oberschti schicht asphalt bereits abkrazt. durue isch das extrem müehsam gsi, über die holperpiste. aber durab isch no viel, viel schlimmer gsi! es hät enorm chraft kostet, de körper z stabilisiere und ich han mich tatsächlich gfräged, wie ich deht lebig une acho söll. schlussendlich isch es aber irgendwie gange und de lohn defür sind nomal 15km skate bi schönstem wetter, uf finstem asphalt (wo ich jetzt au so richtig gschätzt han) und mit guetem tempo gsi. so macht inline skate spass!