die vierti etappe vo de swiss skate tour isch bereits di letschti gsi, vo dere minimal-usgab 2019.
nach de vergangene drü eher eher weniger erfolgrieche renne und zwei wuche chrank si, sind d erwartige nid sehr höch gsi. ich han mich hine igreiht, aber de start isch nid zu schnell gsi und ich bin einem von dene gfolgt, wo mit mir am linthmarathon gfahre isch. mir sind so no chli füre gfahre, irgendwo i de stiegig. inne, han i denn aber nüm mit ihm mitgehalte und bin inere andere gruppe bliebe. isch en guete entscheide gsi. die grossi gruppe isch vor allem uf de zweite hälfti vo de rundi schnell gsi.
uf de zweite und dritte rundi sind mir d stiegige fasch eher no z langsam gsi und d abfahrt nachher locker. so han i gege schluss vo de dritte rundi denn mal no denkt, ich hetti viellich doch am afang no chli meh riskiere chönne. doch grad i dem moment hät s tempo azoge und di ganzi letschti rundi isch denn no recht härt gsi, au wenn nie würklich gfahr bestande hät, dass i de aschluss verlüre chönnti. und denn, churz vor em ziel händ mir sogar no es grüppli vor üs igholt, i dem wieder de drinne gsi isch, wo ich am afang man nid mithebe möge han. also, alles richtig gmacht!
nei, z frühe gfreut, uf em letschte liecht abschüssige kilometer, wo mir richtig ziel grast sind, hät‘s e unsicherheit gä und ich bin - ich weiss scho gar nüm wie - us de gruppe cho. ich han denn de moment verpasst, zum wieder afange schrittle und nüm de istieg id gruppe gfunde. so isch die ganzi gruppe a mir verbi und ich denn eher locker no is ziel grollt. für ziit hät‘s kein ifluss me gha, die isch dütlich über em 30er-schnitt ganz zfriedesrellend gsi. aber für d rangliste isch das natürlich de super GAU gsi. aber irgendwie han i im moment eifach ab me gwüsse tempo z viel respekt und z’wenig sicherheit. da merk i glaub scho chli di fehlende schnelle training.