nach fasch einem jahr pause hät‘s wieder emal es inline-renne gä. und quasi sgliche wie letscht jahr: mittellandrollt. es isch aber einiges andersch gsi als letscht jahr. vor allem s wetter und d strecki.
s wetter hät super mitgmacht: sunnig und warm, aber nid heiss. ideali sport-bedingige. und d strecki isch au andersch gsi. en chline teil hät sie sich überschnitte mit de vorherige. deht teil sind mir aber andersch ume gfahre. d rundi isch nur no vier kilometer gsi, drum händ mir sie acht mal gfahre. und sie hät‘s in sich gha! gfühlt isch es drüehalb kilometer je gange, zum nachher 500m abe fahre. in tag und wahrheit hät‘s aber no e chlini zwüsche-abfahrt gha, i dere me eimal hät chönne dureschnuufe.
nach me jahr pause isch es schwierig z wüsse, wo me staht. und ersch recht zum abschätze wie me sälber aber au alli andere mit dere strecki z recht chömmed. so han i am start nid so richtig gwüsst, a wem ich mich orientiere und festhebe söll. mini erschte beide ideä händ sich als falsch usegstellt. de einti händ mir scho uf de erschte rundi verlore, em andere han ich denn doch nid mitmöge und mich relativ bald bi me andere aghänkt, wo vielversprechene usgseh hät. und das isch es au lang gsi. ich bin zwar ziemlich am aschlag glaufe, han aber mit möge. mit de ziit sind i dem grüppli aber nur no sechs lüt gsi: vier mit enere gäle startnummere, und ich und en andere mir enere blaue. und genau de anderi hät churz bevor mir zoberscht acho sind, e chlini tempoverschärfig gmacht. ich han uf d spitzegruppe wo üs i dem moment überrundet hät glueged und es hät e lugge gä, wo ich nid sofort gschlosse han. i de abfahrt sind‘s so natürlich viel schneller gsi. ich han no denkt, er merkt denn scho, dass er bald ällei deht staht, wil di andere mit gäle nummere nur vier rundene fahred. nei, hät ihm nüt usgmacht und er hät durezoge. ich han ihn nur no ab und zue vo wietem gseh.
so bin i denn ei rundi ällei gfahre, bis sich es gspänli wo eigentlich au nur d churzstrecki gmacht hät erbarmt hät und no fasch e rundi mit mir gfahre isch. und es isch no besser cho: mir händ de eini igholt mit dem ich am afang han welle fahre aber nid mitcho bin. er heigi en defekt gha. aber uf dene zwei rundene wo mir denn no gha händ, hät er denn au kei strick me verrisse. ich bin aber glücklich gsi, han i wieder mit ihm skate chönne, mag ihn au susch guet. und so hät das renne denn glich es guet‘s endi gno.