my fasted race ever! probably... so genau chann me das ja nie säge. aber sicher isch...
dass ich am morge zersch no a de ETH mit em "wahrschienlichkeit und statistik"-skript
kämpft han und denn driekt an HB bin, zum mit de sabine uf bern z fahre. s wätter z züri
hät nid grad zum skate a gmacht und am abig isch s denn au no cho cho rägne. aber z bern isch
das ganz andersch gsi! wo mir acho sind, hät d sunne gschunne und es isch fasch scho heiss gsi. es
isch denn au liecht bedeckt worde und d temperature eher chüel, aber zum sport mache eigentlich agnehm.
i mim renne hät sogar mal no d sunne gschunne. das hät zumindest d sabine gseit. ich han nüt
devo mitübercho, im kampf um d sekunde bini so sehr uf d strass und d mitfahrer konzentriert gsi...
zersch isch ohnehin no d sabine uf d rundi gange. wo si a mir verbi cho isch, han ich probiert mit ihre
mit z skate, was guet gange isch, und e foti vo ihre z mache, was denn chli weniger glunge isch. drum git s
jetzt zu dem bricht kei foti vo de skatende sabine...
de staart vo de kategorie speed breitesport
|
ich bin für eimal recht früe am start gsi und han zersch denkt, ich seigi mega wiet vorne.
was ich au welle han, han mir nämlich für das renne einiges vorgno. han no e "rechnig offe
gha", vom letschte jahr. deht bini nämlich unter guete bedingigie langsamer gsi als im vorjahr.
das hät dringend korrigier wärde müesse! trotz de guete usgangsposition hani s gfühl gha,
bini am start nid so guet wäg cho. bin deht viellich chli zu vorsichtig und z wenig frech gsi um mini
position im gerangel z verteidige. trotzdem, wie sich denn use gstellt hät, isch di erschti rundi di
schnellschti gsi. han anschienend e gueti gruppe verwütscht gha. nach 10.47 hani d strecki scho es ersts
mal gseh gha.
uf de zweite und de dritte rundi isch alles bestens glaufe. es isch zwar hart gsi, aber nie so, dass i
drüber nadenkt hett, mich zrugg falle z la. mit 11.11 und 11.00 sind s au sicher z'fridestellendi
rundeziite gsi. afangs 4ti rundi hät sich denn aber dur es überholmanöver oder e unachtsamkeit
mienersiets e chlini lugge vo viellich ein, zwei meter zu minere gruppe uf tue. da denn grad d abfahrt cho
isch, isch das kapital gsi, e gruppe vo 10 lüt isch deht natürlich massiv schneller als ich ällei.
so hani de schnellzug leider verlore, i de ebeni une isch de abstand schlicht und eifach z gross gsi! defür
hani vo hine grad besti unterstützig übercho. so sind mir zersch z vierte wieter gfahre und ich han
mich debi im windschatte wo s mir gä händ, uf de brugg erhole chönne. uf em rückwäg
über d brugg, isch mir denn s tempo scho fasch z langsam gsi! aber wägfahre hetti natürlich
nüt bracht, wäri ällei es recht ussichtsloses unterfange gsi.
e usriessergruppe, de Roger Schneider a de spitze, im elite-renne
|
überhaupt isch es e gueti sach gsi, die neui gruppe: de eint hani nämlich i fasch jedem renne
troffe und in biel bini mit em no um d ehr gspurted. deht hani knapp verlore. dur das, dass i di schneller
gruppe zie la han müesse, isch di vierti rundi au grad chli langsamer gsi als di andere (11.47). di
letschti rundi isch denn wieder besser gsi (11.04), mit dene zwei bekannte gsichter sind mir bis viellich
zwei, drü kilometer vor em ziel unterwägs gsi, bevor s nomal zu me zämeschluss mit enere
grössere andere gruppe cho isch. i de stiegig hät sich d gruppe chli ufglöst. vo de grössere
gruppe sind einigi devo zoge. ich hetti au no chli me möge, aber han zersch nid welle eifach mini mitfahrer
sta la, wo mich netterwies ufgläse händ, nach dem mich de schnellzug abghänkt hät. später
hani denn s tempo doch no chli gsteigered, und mich für d niederlag vo biel grächt. :-) im ziel
händ mir d startnummere ustuscht, deht staht d adresse druf. viellich chönnd mir üs ja mal zu
me gmeinsame fährtlich treffe oder nächscht jahr wieder am SIC. also stephan: fliessig trainiere,
dass mir au 2005 wieder packendi fights händ! :-)
und da isch es denn doch no, s bild vo de (is bild) skatende sabine...
|
d bilanz vom renne fallt für mich üsserst positiv us. ich han s erschti mal das jahr mini ziitliche
vorgabe klar erfüllt (unter einere stund z bliebe). zudem isch es au mini zweitbesti klassierig sid ich
speed fahre und erst s zweiti mal unter de erschte 300. am SIC olte 2001 bini besser klassiert gsi, allerdings
händ deht au nur grad 307 s ziel erreicht... au wenn me de km/h-schnitt aluegt, isch s renne erschtklassig
gsi. falls es würklich 30km gsi sind, hani en schnitt vo 32.27km/h erreicht, was sogar no schneller isch als
im engadin! es bizli me wäri sogar a dem renne no drinne gläge, wenni deht nur a de andere gruppe dra
bliebe hetti chönne. im windschatte bi dene, bini nämlich noni ganz am aschlag gsi! so isch klar, dass
ich d ziel für di nächschti saison einiges höcher setze muen. bis zu de breitesportspitze füre
z fahre, sötti für mich möglich si!
nid nur schnell isch s renne, sondern denn au de abgang gsi. am viertel vor achti bini im ziel gsi, am
viertel ab isch de zug uf züri gfahre. ich han ebe no ad party vom serguei welle und deht verbie luege
hät sich au sehr glohnt! au wenn i früe wieder hei gange bin, leider no bevor em serguei sin geburtstag
agfange hät.
