berlin marathon 2025: doppelstart

nach dem s vergangene jahr für mich en mega-erfolg gsi isch, bin ich mit viel hoffnig uf berlin greist. aber au mit viel respekt: ich han gwüsst, mini form isch nid ganz so guet, wie im vergangene jahr. ich bin im juni und anfangs juli viel z lang chrank gsi, han anderi (test-) läuf müesse uslah und ersch so quasi uf de zielgerade en guete trainingsrythmus gfunde und gueti läuf gha.

s inline-renne isch denn au ganz guet glaufe. ich han mit de sabine s erachte mal sit jahre wieder es vereinsgänli am start gha, wo öppe mis tempo gange isch. eigentlich isch sie sogar chli schneller gsi und so han ich mich denn chönne i ihrem windschatte installiere und praktisch bis is ziel ziehe lah. so hät denn am schluss e ziit resultiert, wo paar sekunde (genau gno: 24) besser gsi isch isch, als die vom vergangene jahr. allerdings hät's au ordentlich schweri bei gäh.

nach enere churze nacht, mit no immer schwere bei und enere guete portion nervosität, isch es am sunntig morgen bereits wieder is startgläng gange. d wetterprognose hät für d läufer nüt guet's versproche, um so meh für s publikum: erneut wunderbar schöns wetter, mit viel sunne und temperature jenseits vo de 20 grad. viel, viel z warm zum renne! kurzfristig han ich mich drum no für s träge vo me huet entschiede. eigentlich het me unter dene umstände au müesse sini ziel und d pace apasse. ich hab aber denkt, wenn ich's nid probiere, schaff ich's nid und han nid lang zögered, wo ich de 3:45-pacemaker am start gseh han. ich bin aber zersch nomal vo ihm weg gspüelt wurde und han denn zersch mal en schnelle erste kilometer (4:55min) anelege müesse, zum würklich direkt hinter de pacemaker z cho.

dass mir die pace a dem tag eigentlich z schnell isch, han ich scho ziemlich bald gmerkt. aber ich bin eifach dra bliebe, so lang und so guet's gange isch. und eigentlich isch es denn doch nid so schlecht gange. jedefalls bis öppe zum halbmarathon. relativ churz druf abe isch denn de tank leer gsi und und uf em 26. kilometer han ich de pacemaker gah la und s erschte mal en stuck laufe müesse. ab deht isch es denn en rechte kampf worde. ich han immer mal wieder e chli pause mache müesse, wenn ich denn aber wieder grennt bin, han ich no ganz e passabli pace chönne ufrecht erhalte. ersch nach 35 kilometer isch denn au immer mal wieder es 6i bi de minute-azeig uftaucht. und das isch denn gar nüm nach minem geschmack gsi. ich han denn denkt, wenn ich d 40km-marke passiert han, setz ich zum schlussspurt a. das isch bisher no immer gange. dasmal aber nüm! ersch uf de zielgerade, mit em brandenbuger tor vor auge, isch d pace denn nomal dütlich unter 6min pro kilometer gfalle. dank em schnelle start hät's aber no immer e ziit dütlich unter de vier stund gäh und somit hät sich de schade in grenze ghalte und s glück, s ziel erreicht z ha sowieso bi wietem überwoge.

dass ich würklich alles gäh han, hät sich denn au später zeigt. nach em dusche bin ich im hotelzimmer nomal ziemlich lang am bode gläge, bis mich vereinsgpänli mit farmer gfüettered und id hotelbar gschleppt händ. denn isch es aber schnell wieder aufwärts gange.