SIC Bern 2005

en wietere tüfpunkt als schlusspunkt

vor genau einem jahr han ich a dere stell gschriebe "my fasted race ever! probably...". das "ever" duret jetzt also nomal mindischtens wieteri acht monet lang, bis es nächschte mai mit em erste renne vo de saison 2006 wieder los gaht. bis deht hie warted aber wohl ziemlich viel arbet uf mich. vorallem müend d bei de winter und vor allem im früehlig wieder besser und härter trainiert wärde. und denn möcht ich mir ja scho lang en neue skate poste. da am jetzige schue spätistens sid em engadin s unglück chli hafted, erscht recht! nur was für eine? tatsächlich en türe massschue?

aber bliebed mir zersch mal i de gegewarte. die heisst verarbeitig vom SIC bern. nach fasch zwei wuche chrank si und füf extrem unsportliche wuche, han ich mich natürlich nid sehr guet gfühlt, wie hettis au andersch chönne si. trotzdem hofft me ja insgeheim glich immer chli uf es chlises wunder. die hoffnig hät sich aber scho nach de kurve um d nationalbank und de bundesplatz zerschlage. deht han ich scho müe gha, am stephan dra z bliebe. i de erschte abfahrt han ich en denn verlore und i de ebeni une hät s mich s erschti mal so richtig agschisse. ich bin deht ällei gfahre, han recht viel gruppe a mir verbi zie la, ich han eifach nid möge oder welle uf zäh bisse und dra bliebe. vor de stiegig han ich mir überleit, s renne uf z gä. d stiegig isch denn nid so es problem gsi, isch si für mich no nie. scho gar nid z'oberst, wo de fan-club vom stephan und mir gsi sind (danke olivia, sabine und yvonne!). de härtischti teil isch aber zielgerade: nach de stiegig uf schlechtem asphalt wieder z beschlünige müesse gaht recht id bei und ad moral. wo ich bim ITL-zelt acho bin, han ich denkt, ich giebe uf. han eigentlich scho aghalte. aber deht isch grad niemert ume gsi, dem oder dere ich mis leid chlage hetti chönne. irgendwie hät s das usgmacht, dass ich denn halt ebe doch wieter gfahre bin. sälber kämpfe und nid uf d unterstützig vo andere zehlä!

so bin ich denn au bis auf wieteres eher ällei unterwägs gsi. i dene regione vo de "ranglischte" sind au die skater, wo sich i de gruppe fahre nid gwohnt sind, di taktische und technische spieli nid kenned. wo ich denn gege s endi vo de zweite runid es paar gfunde han, wo in etwa s glichi tempo gfahre sind wie ich, bin ich bi dene bliebe. aber vonere zäme schaffende gruppe hät me nie richtig rede chönne. i de abfahrt händ di eine überholt statt hinterenand fahre und so a tempo gwünne, i de ebeni händ mir enand wieder zrugg igholte und so wieter. ich han mich denn schön immer im windschatte vom eine oder em andere versteckt und eifach chli vo dene gschmarrozt. so händ mir üs rundi um rundi vorwärts kämpft. für mich isch es immer besser worde, fasch jedi rundi isch besser gange. nach de letschte spitzcheri wo mir mit tempo uf d brugg und über d brugg gfräesed sind, han ich s erschti mal s wunderbari speed-gfühl i dem renne gha. au s einzige mal, denn es isch ja scho wieder de übli ufstieg cho und di no viel härteri zielgerade. wohl s erschti mal sit langem wo ich uf dere nüme gstresst han. mini gruppe us em ufstieg han ich eifach fahre la, ich han gwüsst, dass ich mit minem hütige resultat so oder so nid z'friede si wirde - warum denn no die quale?

es isch also s schlechtischti resultat wo ich in bern je gfahre bin. punkte, ziit und natürlich au km/h-mässig. ein chline liechtblick git's aber no, am truurige SIC 05-himmel. i de gsamtwertig bin ich 73. worde, was glaub es mü besser isch, als s letschti jahr. das isch wohl de lohn, für de start im engadin trotz gwitter. und vergässed mir nid ganz, nach dene beide sehr schlechte renne, immerhin ei glanzleischtig isch au 2005 mit debi gsi und das erscht no im wichtigste renne: züri.

bilder: sind offesichtlich vo AlphaPhoto gmacht worde. uf ihrer homepage chönnti me die bstelle. si sind alli im steile ufstieg gmacht worde, drum gsehnd mir so langsam us. d lüt sind überigens alphabetisch gordnet, und zwar wäred das: dani (ja ich...), erwin olivia, sabine, stephan.