es tagebuech vo mim bsuech mit de olivia in athen
dunnschtig, 22:43
Πεμπτη, pémpti, dunnschtig
de erschti tag isch mit areise druf gange. am nüni am morge bini di hei uf de zug, am nüni am abig sind mir da gsi, nach also elf stund reis (warum nid 12?). näbed de alitalia flugzüg, em mailänder flughafe und de metro in athen, händ mir vor allem e herrlichi ussicht über d schwiizer alpe gnüsse chönne. nach dem mir im hotel z athen acho sind, sind mir nur no gschnell am omoniaplatz gsi go was ässe. es isch chli en bessere macdonald's gsi. es hät au "goody's" gheisse. so händ mir en teller und bsteck übercho und es sind nid nur burger, sondern au clubsandwiches und grillierts uf em menuplan gstande.
samschtig, 00:45
Παρασκευη, paraskeví, fritig
de erschti usflugstag isch wohl de gsi, wo s bi ziemlich allne andere au isch: d akropolis! s wetter
 s dionysostheater |
isch super, mir ziitewies scho fasch z heiss gsi. vom hauptigang us chunnt me zersch zum dionysustheater, vo dem no immerhin öppe 20 sitzreihe erhalte sind. s herodestheater, wo mir grad nacher gseh händ, isch no fasch ganz erhalte. zum uf d akropolis ue z cho, mues me dur d propylaia. die isch leider vollständig igrüsted gsi, wege restaurationsarbeite. denn staht me vor em parthenon. das isch de tempel, wo me uf allne postchartene gseht. momentan fehlt i de mitti en stuck, deht sind s am restauriere. was au nid z verachte isch, vor luter tempel, me hät vo deht obe us e grandiosi ussicht über di ganzi, riesigi stadt. im akropolis-musem händ mir diversi griechischi jünglig, freske und vier vo de süületrägerinne gseh. die händ s vom erechtheion (au en tempel) wäg gno, deht stönd jetzt nur no kopie, was ich natürlich uf de erschti blick gad erkennt han. ;-)
denn händ mir di antiki agora besichtiged. am meiste hät mich d "stoa of attalos" beidruckt (wiederufbau 1953-56). wofür s die früener brucht händ, händ mir nid usegfunde, aber es hät en eeeeewig lange, schöne süülegang gha.
 de parthenon uf de akropolis |
d agora isch de alti marktplatz gsi. aber eigentlich wird de name dem gebiet nid ganz gerecht, denn es isch wesentlich me erhalte bliebe, als de marktplatz. so ebe d stoa und uf de andere siete de tempel vom hephaistos. was mich fasch am meiste beidruckt hät, hät mer nur no erahne chönne: d parlamentsgebäude! die händ tatsächlich scho es schwiizerisch, demokratisches regierigssystem gha! jedi familie hät 50 abgeordneti schicke chönne, und das scho vor 3000 jahr!
z letscht händ mir no d ruine vom alte stattor vo athen agluegt. deht sind allerdings die viele wilde schildchrötli fasch me vo interesse gsi, als die steihüfe, wo mir scho de ganzi tag me als gnueg devo gseh händ.
nach em nachtässe mit em reto und sinere fründin, wo mir zuefällig troffe händ, sind mir no zäme dur psirí spaziert und händ üs s athener nachtläbe agluegt, wo warlich sehr lebändig isch!
samstig, 22:15
Σαββατο, sávato, samschtig
de hütigi tag hät mit em bsuech im "roman forum" agfange. deht gseht me d ruine vom nachfolge marktplatz. de gester besichtigti isch ne anschienend irgendwenn z chli worde. de neui isch es gschenk vom julius cäsar und em augustus gsi. es isch ebe nid eifach nur en platz gsi, sondern er hät rundume grenzmuure und es dach mit me süülegang gha. viel devo isch au da nüme überig bliebe, obwohl de marktplatz bis is 19. jarhundert in betrieb gsi isch. es hät sich aber glohnt das a z luege, wil s gholfe hät, s puzzle zäme setzte, wo denn langsam chli es bild vom
 zeus tempel |
alte athen gä hät.
aschlüssend sind mir dur pláka, d altstadt, zoge. deht händ mir denn au no gyros zum z'mittag gässe. uf de andere siete vo pláka isch denn no de tempel vom zeus gsi. deht händ mir üs s letschte zetteli vom akropolis-ticket abriesse la. vo dem tempel sind nur no paar süüle am einte (ehemalige) ecke ume. es laht sich aber drus erahne, wie riesig das ding früener mal gsi si muen. die süüle raged wiet, wiet in himmel. wie händ die das dazumal nur baue?
nach dem de zeustempel gschlosse hät, sind mir zum alte olympiastadion gange. s Kallimarmaro isch für di erschte neuziitliche spiel 1896 wieder ufbaue worde. d bahn isch extrem schmal, es hetti niemals es fuessballfeld drinne platz, defür sehr lang. leider händ mir nid ine, bzw. uf tribüne ue chönne.
 mir vor em panathinaikos stadion, au bekannt als kallimarmaro (= schöne marmor) |
grad vis-à-vis vom stadion fangt de zápiogarte a. s zápio hät kei festi nutzig, es wird für verschiedeni repräsentativi sache verwendet. so isch zum biespiel s hauptquartier vom olympia-ok drinne gsi und es isch de hauptsitz vom griechische eu-präsident gsi. no im gliche garte staht s parlamentsgebäude. allerdings isch deht d asicht vom sýntagmaplatz us di schöni. grad devo wäg, gaht d ermou, e strass voller läde, wo mir natürlich abklappered händ. vor allem d schaufenster mit schue sind vo bsunderem interesse gsi. :-) z'mizt ine staht denn no s chileli kapinkaréa, wo mir mitte i dere eher moderne hüserschlucht chli verlore vor cho isch.
sunntig, 19:34
Κυριακη, kyiakí, sunntig
nach dem mir gester s alti olympiastadion gseh händ, sind hüt di neue dra gsi. mir sind mit de grüene metrolinie nach irini gfahre, vier statione vor de endstation. deht isch de bekannti
 agora im olympiapark |
olympiapark, wo zu grosse teil vom calatrave baue worde isch. wenn me vo de metrostation chunnt, chunnt me direkt id agora, de langi, gschwungnigi gang, wo me us ziitige und em fernseh kennt. uf de eine siete hät s riesigi wasserbecki, wie überhaupt viel uf em gländ. nach dem mir dur de gang glaufe sind, sind mir zum eigentliche olympiastadion cho, em spiros louis stadion. uf de rücksiete händ mir au tatsächlich es paar offni tor gfunde, so händ mir das vo inne gseh. nach dem mir um fasch s ganzi stadion ume glaufe sind, sind mir zu me riesige gebäude cho, wo eigentlich us drüne gebäude bestaht, mit schrägem dach. deht händ mir irgendwo e caffeteria gfunde, wo offe gha hät. vo dere us händ mir au is stadion ine chönne, es isch wohl für basketball brucht worde.
wieter isch es bim wasserballstadiönli gange, das isch open air gsi und hät für gschätzi 900 lüt platz gha. denn sind mir zum warm up pool und id schwümm- und turmspringalag cho. deht sind mir aber wieder usegrüert worde: "it's closed". händ mir doch halbe denkt, nur wenn türe offe sind... als letschts händ mir nomal es highlight beguetachted: s velodrome. das stadion gseht vo usse us, wie en riesige chäfer mit flügel. wenn me s vo de richtige siete aluegt. über de grossi park mit de "wall of nations", wo unspektakulär grad gsi isch, händ mir s gländ wieder richtig metro verla.
 velodrome: de chäfer im olympiapark. |
mit de metro sind mir denn quer dur athen gfahre, bis fasch as andere endi vo dere linie. bi de zweitletschte station sind mir usgstiege und vor em nächschte stadion gstande. das isch ziemlich sehr in rot ghalte gsi und isch offesichtlich d heimstätte vo me lokale fuessballclub (olympicas piräus). grad uf de andere siete vo de metro station, isch s "friedens- und fründschaftsstadion" gsi. au deht drinne wird hützutag basketball gspielt. em meer entlang sind mir denn bis zum beach volley centre cho. das isch gege s meer hi offe, aber grosrüümig abgsperrt gsi. sehr schad, ich hetti doch de ort, wo heuscher/kobelt ihri medaille gholt händ, gern genauer beguetachted. nur no en chatzesprung isch es zum faliro sport pavillon gsi. vom bau her, erinnered s es bizeli as "friedens- und fründschaftsstadion". mit em tram sind mir zrugg zu de metro. mir sind denn aber müed gsi und hei, statt no wieter gfahre. piräus wäri nur no ei station entfernt gsi, lueged mir aber übermorn no a.
mittwuch, 12:41
Δευτερα, dheftéra, mäntig
s nationale archäologische museum händ mir natürlich au no besichtige müsse, obwohl mir beidi nid so
 d zeus- oder poseidonstatue |
museums-freak sind. aber es ghört doch zu de highlights, wo athen de touriste z büte hät. das hät jedefalls de reisefüer gmeint. also sind mir los zoge und am viertel vor eis deht gsi. aber es hät erst am eis göffnet. so händ mir nid ganz alles so genau studiere chönne. aber das isch üs beidne au recht gsi. immerhin händ mir doch d bronze statue vom poseidon gseh, wo viellich au de zeus darstellt. und natürlich no ganz viel anderi nakedeie in marmor und di goldigi totemaske wo vom agamemnon sie söll.
denn händ mir aber würklich renne müesse. mir sind mit em bus as kap soúnio, em südlichste punkt vo dem zipfel uf dem athen liet. deht händ di alte grieche ihrne wichtigste götter wieder je en tempel errichted. de athena und em poseidon. de vom poseidon isch no relativ guet erhalte, uf de eine siete stönd no ganzi nün vo ehemals 13 süüle. de tempel isch uf me berg baut,
 em poseidon sin tempel in soúnio |
d ussicht vo deht isch würklich atemberaubend! leider isch s wetter nid so guet gsi, de himmel isch total verhange gsi, so händ mir de versprochnigi, schöni sunneuntergang nid chönne bewundere. es hät sich aber erahne la, dass de würklich grandios si muen. vo deht, wo wohl mal de athina ihren tempel gsi isch, gaht nämlich d sunne genau hinter de tempelruine vom poseidon unter.
zrugg i de stadt sind mir no im "Daphne's" gsi. das isch s wohl bekanntisti und schönschti restaurant vo de pláka. üs hät s jedefalls gfalle und diverse andere berüemtheite au. e ganzi lieschte vo prominente, wie di norwegische royals, d hillary clinton, d angela jolie oder de roger moor händ deht scho diniert.
mittwuch, 13:01
Τριτη, triti, zieschtig
üse letschti tag isch au üse erschti regetag gsi. de lykavitós isch no uf em programm gstande. vo deht us hät mer wiederum e traumhafti ussicht über ganz athen. me gseht d akropolis, s
 d akropolis vom lykavitós us |
panathinaikos stadion, s regierigsgebäude, de zeustempel und sogar s meer. vor allem aber machts nomal d grössi vo de stadt dütlich! wägem räge und de chätli sind mir wieder mit de standseilbahn (genau wie s polybähnli) abe. aschlüssend sind mir dur kolonáki gschlendered, was grad am fuess vom lykavitós liet. das gilted als s nobel-ichaufsviertel. so speziell han ich s aber nid gfunde. mir sind denn in attica gange, de jelmoli vo athen. tatsächlich isch d olivia deht fündig worde: e jeans.
nach dem mir d ichäuf im hotel deponiert händ (es hät au no de vorgester gsehni schue gä), sind mir mit de metro no uf piräus. deht isch definitiv d metro-endstation: wenn me hine am bahnhof use lauft, staht me direkt am hafe, wieter hetteds die linie würklich nüme baue chönne! s wetter hät sich mittlerwile überigens chli bessered, es hät ufghört rägne und dezwüsche hät gar d sunne chli duredruckt. d fahrt uf piräus hät zersch chli zum reinfall z wärde droht: im grosse hafe hät s nüt z gseh gä und wo mir d piräushalbinsle überquert händ, sind mir dur en huufe griechischi wohnblöck glaufe. wahrlich kei sehenswürdigkeit. uf de andere siete vo de halbinsle hät s denn aber zwei chli
 euse tisch mit sicht uf de have |
schöneri touristischeri buchte gä. zersch sind mir uf pasalímano, da de reisefüerer deht chli di billigere restis akündet hät. deht isch aber grad gar nüt los gsi. also sind mir denn zu de mikrolímanobucht und das hät sich glohnt: jenschti restis direkt am meer. natürlich isch es wieder en kampf gsi, wil s vor jedem lokal eine gha hät, wo grad afange hät wie wild uf einem ischwätze, wie guet s seigi, was er alles heigi und überhaupt, me söll doch eifach bi ihm ässe. schlussendlich händ mir eis gfunde, wo üs passt hät. mir händ en tisch direkt am wasser gha und händ de blick id bucht, wo en chline hafe gsi isch, chönne gnüsse. nach dem mir üs shrimps zur vorspies teilt händ, hät s für d olivia denn au no de gwünschti fisch gä, für mich poulet. ganz so guet wie am abig vorher isch es nüme gsi, aber d ambiance isch mindistens so toll gsi, wenigstens bis d reisegruppe cho isch, wo am gliche ort gässe hät.
 s friedens- und fründschaftsstadion |
uf em rückwäg sind mir denn de waterfront entlang uf faliro spaziert, statt quer dur piräus, und händ nomal de schöni usblick gnüsse chönne und z letscht no e foti vom "friedens- und fründschaftsstadion" mache chönne. das isch aber wohl s einzigi sehenswerti gebäude in ganz athen, wo z nacht nid belüchted isch. so wäri die foti am tag wohl grad so guet usecho...
dunnschtig, 23:18
Τεταρτη, tetárti, mittwuch
de rückflug isch gfühlsmauml;ssig einiges schneller verbi gange, als de hieflug. chunnt wohl devo, dass mir uf em rückflug e stund gunne händ und s no hell gsi isch, wo mir z chloote acho sind. ansunschte git s aber wenig devo z brichte. s abflüge in athen hät chli weh tue, wil deht nach em regnerische tag devor wieder prachtswetter gsi isch und me wohl bald wieder im t-shirt hetti chönne umelaufe. in mailand isch es denn recht hässlich und chalt gsi. defür hät s di hei nur no halbe so schlimm usgseh. soviel also zu de verregnete schwiiz und em "bella italia"...