eigentlich händ mir am mäntig, 31. juli welle go. aber da d wetterprognose für de mäntig so schlecht gsi sind, händ mir üs churzfristig entschiede, üsi rundfahrt uf de sunntig vor z verschiebe.
es hät sich ohnehin scho di ganzi klötzli-familie am seeplatz troffe. zäme händ mir grilliert und üs d büch voll gschlage, bis d olivia uf de zug hät müesse. ich han denn mal d skates di hei gholt, de urs hät s velo scho am seeplatz gha.um di elfi starte wäri eigentlich planet gsi. das hät aber s wetter verhindered, und grad alles chli in frag gstellt. d sturmwarnig hät blinked und en starke wind isch ufzoge. tatsächlich hät s später au no afange regne und alli no am seeplatz awesende händ is hüsli müesse. de summersturm isch aber nur vo churzer dur gsi. bereits am ziwölfi isch d strass obe am seeplatz wieder troche gsi. fasch jedefalls. so händ mir üs zum starte entschiede.
bis alles parat und mir uf em weg gsi sind, isch es halbi eis gsi. so spat bini no nie gstarted. es hät natürlich vor- und nachteil gha. uf de obere hälfti vom see händ s am eis scho a einige ort d strasselampe abgstellt gha und es isch no a viel me stelle stockdunkel gsi als erwarted. defür hät s fasch kei vercher gha.
de start isch chli harzig gsi. uf de strecki bis rapperswil hät s immer wieder sehr nassi stelle gha und ich han extrem müesse ufpasse, wil de bode teilwies rutschig gsi isch. z männedorf han ich de schue neu binde müesse. zu sehr hät er une druckt ?und isch er obe locker gsi, han ich s gfühl gha. z stäfa händ üs denn beat, brigitte und de marcel überholt und e laola-welle gmacht. si sind uf em heiwäg gsi. anschienend händ s d seeplatzrundi nach üsem start ufglöst.
z feldbach isch denn au no en pinkelhalt nötig worde. ziit z rappi, 45 minute, isch natürlich nid so berauschend gsi. nacher sind mir aber immer besser in fahrt cho, han ich s gfühl gha. eimal aber hät mini skates plötzlich es komisches grüsch gmacht. ich han aghalte und mal d rolle agluegt. di erschti isch okay gsi. aber i de zweite isch en postitsch gsteckt! de hani denn usezoge und wieter isch es gange. na 97 minute sind mir z horge gsi, was kei schlechti ziit gsi isch. deht sind mir denn froh gsi, dass mir kei autos gsi sind. für die isch d seestrass i üsi fahrtrichtig gsperrt gsi, wäge bauarbeite...
di schmerzende chnöchel händ mittlerwile gsellschaft übercho. uf de linke siete hät mir de aduktor afange weh tue. aber das hät üs nid ufghalte. ich han i 33 minute welle z züri si, damit ich no e halbstund für de letschti teil ziit han, um im bereich vo de topziite z liege. das hani au gschafft. 2:12 hät d uhr zeigt, wo mir am bellevue gsi sind. also sind no 33 minute bliebe. d wasserfläsche han ich nomal fülle müesse und denn han ich uf em weg vom bellevue an tüfebrunne no en farmer gässe. das wäri wohl nid nötig gsi, nach dem fette z?nacht wo mir gha händ. und es hät chli ziit kosted. bim ässe chann ich nid so schnell fahre. je nächer meile cho isch, je besser isch es denn aber wieder gange. und vor allem schneller. am schluss hät glaub sogar de urs no chli pedale müesse. im flug sind mir am seeplatz verbie grast und, uf de jetzt absolut 100% trochne strass uf de fährestäg zue gstürmt. uf de ziellinie han ich denn aber de falschi chnopf a de stoppuhr verwütscht. jedefalls hät si no chli wieterticket und ich han no es paar anderi chnöpfli drucke müesse, bis si endlich aghalte hät. das isch schad gsi, denn am schluss hät d uhr exakt zeh sekunde nach de bestzieht aghalte...
das isch natürlich nur en chline schönheitsfehler, denn uf e so e langi ziit (10018 sekunde) sind zeh sekunde ja kei differenz me, wo me vo schneller oder langsamer rede chann. und wenn me no di dür churze stopps iberechnet und di z spat abgstellti uhr... jedefalls bin ich z friede mit dem resultat und es passt sehr guet zu allne andere renne wo ich de summer gfahre bin.