SIC Zürich 2009

zwei wuche wk, bluetspende und nur en churze wuchenendurlaub vo 24 stund sind kei gueti rennvorbereitig. aber immerhin händ die 24 stund glanged, zum am renne teil z nä.

s erschti mal i minere 12jährige "karriere" bin ich mit em velo an es renne gfahre. aber es isch nur durab gange und e kei usred für das wo gfolgt isch.

am 12:15 isch es uf di neui strecki gange. neu deshalb, wil wäge bauarbeite s start-ziel-gländ nüme am bellevue sondern i de engi gsi isch und d schlaufe dur s tunnel bi de tunnelstrass wäg gfalle isch. di abkürzti rundi hät s defür füf mal z befahre gä. (total 31.5km).

di erschti rundi han ich mit em markus vom ITL absolviert. wo si verbie gsi isch, han ich s gfühl gha "was scho dure?" trotzdem han ich nüme lang mit dere gruppe mithalte möge. irgendwo uf de lange gerade vom bellevue zum chinagarte han ich si ga la. weiss gar nüme genau wie s gange isch.

nach me wili "warte" isch denn wieder e grösseri gruppe cho. au i dere hät s öpper drin gha wo ich kennt han. es isch aber chli e chaos-gruppe gsi. kein rythmus, nid immer schön im reiheli und so wieter. es isch aber knapp ei rundi lang guet gange. i de langsame phase han ich mich erhole chönne, i de schnellere han i halt chli uf zäh bisse. wo mir zu beginn vo de dritte rundi über quai-brugg sind, isch vor mir eine usgstiege. ich hetti wieder es loch müesse "zuefahre". für das han ich deht denn aber kei biss gha. wieso eigentlich nid? jedefalls han ich denn scho zum zweite mal uf e "neui" gruppe gwarted. und wieder hät s es bekannts gsicht drinne gha: de erwin. han mi denn, wo ich mich hinter ihm igreiht gha han, gfröged, wie oft er mich am renne vo züri scho "ufgläse" und is ziel "gschleppt" hät. jedefalls isch es jetzt eimal meh worde.

ich bin denn nid di ganzi verbliebende, zweiti rennhälfti hinter ihm bliebe. ich han mich irgendwenn emal es paar plätz füre, und somit au vor ihn, kämpft. ich fahre nid gern z hinderst. denn han ich immer s gfühl, jede moment abghänkt z werde.

churz vor schluss han ich mich eigentlich recht guet gfühlt. doch denn isch di allgemeini hektik usberoche und die hät chraft kosted, wo ich anschienend nid gha han. im schlusspurt han ich jedefalls nüt me z mälde gha.

so bini denn nach 1:09.21,46 mit rekordverdächtig schlechtem resultat is ziel grollt. aber immerhin han ich dureghebed bis am schluss. das han ich aber nid lang chönne gnüsse, denn ich han scho am 4i wieder uf de weg zrugg in wk müesse.