berlin marathon 2010

am halbi nüni bini s erschti mal verwached. han aber denkt, ich bliebe no chli liege. um di elfi sind mir denn bi me italiener i de nächi vo eusere wohnig go di letschti pasta-ladig ineschufle. i mim fall in form vo lasagne.

wo mir so langsam as ga denkt händ, händ mir di erschte regetropfe zur kenntnis mä müesse. so händ mir de plan gändered und sind nid an start skatet, sondern mir de s-bahn in hauptbahnhof. und deht händ mir denn zersch emal lang gwartet.

nach dem mir no unter em schützende bahnhofsdach üs startklar gmacht händ, sind mir is startgländ go de chleidersack abgä und direkt wieter uf d ifahrstrecki und churz vor em startschuss in startblock.

bi rennbeginn han ich mich druf konzentriert, hinter em markus bliebe z chönne. alles i allem isch de start gemächlich gsi und a dem han ich mich au bald chönne ufbaue. vor allem wo d stell, a dere ich letscht jahr umgheit bin, verbie gsi isch, han ich mir säge chönne: immerhin scho mal wieter cho als letscht jahr.

de markus isch offesichtlich mit üserer startpositon nid ganz z'friede gsi. er hät immer wieder überholt was mich zuehnehmend energie kosted hät. scho vor de hälfti han ich ihm nüme locker chönne folge und bin denn inere gruppe bliebe. die hät sich aber mit dere gruppe wo de markus mittlerwile agfüert hät vereiniged. so sind mir denn glich wieder glich wiet gsi. in etwa deht händ mir au de paul ufgläse, wo vo dem moment a nüm us minem windschatte use isch. und de thomas isch churz druf abe min windschattespender worde. er hät mir aber nid so en starche idruck gmacht. inere kurve han ich ihn denn überholt.?

so nach em km 25 isch de rege richtig starch worde und s liede isch komplett gsi. d bei händ würklich weh tue und ich han mich bi fasch jedem schritt müesse quälä. mängisch isch das besser und mängisch weniger guet gange. aber immer isch es gange.?ich han d kilometertafle am strasserand z gseh probiert, zum so immer z wüsse won i bin.

wie bisher egentlich immer im berlin, gaht di zweiti rennhälft gfühlsmässig schneller ume als di erschti. und au das jahr isch plötzlich de potsdamerplatz uftaucht. no vier kilometer. denn isch chli e schnelleri gruppe a üs verbie und de paul isch uf die umgstiege. er hät no grüeft "chum au", aber es isch im moment grad nid gange. ich han au denkt, dass wie so oft, mini gruppe dere denn folgt. dem isch aber nid so gsi, ich han jedefalls bald keis zuger dress me gseh.

denn e scharfi links kurve. isch es das scho gsi? wenn s da vorne wieder links ume gaht scho. und würklich isch es nomal links ume gange. aber wo isch s brandenburger tor? es hät sich hinter em räge und im dunscht versteckt. mit de ziit isch es füre cho. ebefalls isch nomal en zuger am horizont uftaucht. er hät aber irgendwie nid wie de paul usgseh. ich han nomal alles gä und praktisch uf de ziellinie han ich denn de kurt no überholt.

de zielauf, scho de letschti kilometer mit de viele lüt, isch in berlin immer e emotionali sach. das jahr bini aber ziemlich z friede gsi. natürlich isch es schad gsi, han ich em paul nid chönne folge und isch es chli dumm glaufe, dass i de markus verlore han. aber ich bin dennoch z'friede gsi. immerhin bin ich in gueter gsellschaft is ziel cho. sowohl de thomas als au de kurt sind meistens schneller als ich. s wichtigsti aber: es isch s erschti renne wo voll im räge statt gfunde hät, i dem ich nid ufgä und bis z letscht uf zä bisse han.

erscht nach em zielilauf isch mir bewusst worde, dass s wetter nid nur nass, sondern au arschchalt gsi isch. so sind mir denn schnurstracks in bahnhof, wo mir trochni chleider azoge händ. jedefalls soviel mir debi gha händ. uf em weg vom bahnhof zu de wohnig han ich dennoch s gfühl gha, es seigi winter und de rege gängi jetzt denn grad in schnee über.

nach enere wärmende duschi (han ich ächt meh regewasser oder meh schweiss abgwäsche?) und em skates mit ziitige usstopfe isch es zum gemeinsame nachtesse mit de andere ITLer gange. deht sind die schlimmste schauergschichte vo üble stürz verzählt worde. zum glück han ich nid mitrede chönne. wobie au alli andere ITLer einigermasse heil devo cho sind.