linthmarathon

s letschti renne i de schwiiz isch wieder es alt-bekannts gsi: de linthmarathon.

d strecki isch en 6km lange rundkurs, wo alles drinne hät: geradene mit und ohni gegewind, kurve, siegig, abfahrt, holperstelle und viel guete asphalt. zudem hät d sunne abebrennt, eigentlich wäri alles agrichtet gsi für e richtigi inline-party.

denn isch es los gange, und das grad recht. s tempo isch ziemlich hoch gsi und i minere, glaub letschte, grosse gruppe sind thunliners defür besorget gsi. ich han mir afangs wenig sorge gmacht, obwohl ich gwüsst han, dass s gefahrene tempo am obere endi vo minem leistigsbereich isch. ich bin mir sehr sicher gsi, dass das no für anderi i dere gruppe gültig isch. s einzigi problem isch s extremi handorgele gsi. immer wieder seckle und denn wieder fahre la. das han ich denn gege endi vo de zweite rundi welle umga, i dem ich i de stiegig, em einzige teil, wo'n i uf de erschte rundi locker mit möge han. ziemlich am afang vo de chline stiegig bin ich links use gfahre und han eigentlich zum überhole agsetzt gha. anderi händ anschienend di glich idee gha, sind au uf di linki strassesiete cho und händ mir so de weg abgschnitte. ich han rechts uswieche chönne, bin einem an schue cho, de hät usgrüeft, ich bin chli gstolpered, us em schritt cho und han tempo und de aschluss verlore. so locker isch de zweiti ufstieg denn anschienend nüme gsi, obe am berg händ's en vorsprung vo paar meter gha, nid sehr viel, aber glich scho z'viel. unmittelbar nachher isch es abe gange, deht han i kei chance gha zum ällei uf z hole. e gruppe vo viellich 20 persone isch eifach um welte schneller. mir isch nur de fruscht und s zueluege, wie de abstand grösser wird bliebe...

di dritti rundi han i wietgehend ällei dräht. han nid gwüsst, ob no öpper hinter mir isch oder nid, ob sich s warte lohnt oder ob i jetzt alles ällei fahre muss.

gege s endi vo de dritte rundi han i aber no en andere einzelkämpfer gfunde. zäme mit dem bin i denn bis am schluss gfahre. aber so richtig erholt han i mi nüme und es isch meh oder weniger en kampf bliebe bis zum schluss.

später händ mir no zwei anderi skater ufgläse, wobi eine devo au wieder verlore gange isch. zu beginn vo de letschte rundi sind mir no uf eine vom team liechtestei und e frau gstosse. so sind mir denn doch no als e chlini gruppe is ziel cho. au en schlussspurt hät nid gfehlt. aber s resultat hät niemert me chönne beschönige.