köln marathon 2011

eis vorus: trotz em oktobertermin isch s wuchenendi gsi wie im summer. d jagge han ich vergebens mitgno!

s ilaufe gaht z köln weniger guet wie z berlin rund um d siegessüüle. ob's a dem gläge isch? jedefalls bin ich eifach kein guete starter und han immer scho sehr frühe schweri oberschenkel. ich bin di erschte paar kilometer em chräbu hinterher gseckled, aber irgendwie hät's glich nid ganz glanged. ich han denn abriesse la und uf di nächste gwarted. deht han ich aber e chli z lang gwarted mit tempo mache und so isch denn au d gruppe mit em markus a mir verbie zoge.

mit de nächste han ich problemlos mit möge. das isch e riesegruppe gsi, später isch no vo hine e zweiti hinzue cho, agfühert vom inline-team furttal. ich han denn mich a die ghalte, han zersch no d hoffnig gha, dass es a de andere gruppe verbie ziend und viellich gar no bis zum markus ufholed, das isch aber nid de fall gsi. viel meh sind die zwei gruppene denn irgendwenn zu einere worde.

für mich isch es deht eigentlich scho z langsam gsi. ich bin recht relaxed i de gruppe mit gfahre. bi de halbziit han i mi scho so sehr erholt gha, dass i s gfühl gha han, no am iwärme z sie.

de relativ kurveriechi zweiti teil isch denn mir eher entgege cho, immer wieder han ich inere kurve chönne innerhalb vo de gruppe füre fahre.

mit de furttaler isch es recht de plausch und au taktisch no spannend gsi. nach chli me als 30 kilometer händ sie sich vo de spitze total zrugg zoge und sich hine im windschatte chli usgruebed. nach em rudolfplatz sind s denn wieder füre gfahre. chli später isch denn de agriff erfolgt. e chli z frühe, minerer meinig na, aber ich han guet mit möge, im astieg über d deuzerbrugg händ mir en spurt anegleit und de rescht isch weg gsi. i de aschlüssende abfahrt und uf em weg is ziel isch mir d luft chli usgagne, resp. wil di andere soweit wäg gsi sind, hät's gar kein areiz meh gä, zum spurte.

so ganz z'friede bin i im ziel nid gsi. a minerer start-schwächi muss i in jedem fall schaffe! s gfühl, no di einti oder anderi gruppe wieder vorne mit fahre z chönne, bin i jedefalls di ganze 5h heifahrt nid ganz los worde. als chline troscht: dank em neue, wesentlich schnellere kurs, bin i au mit enere viel schlechtere platzierig fasch zwei minute schneller gsi, als letscht jahr.