wenig schlaf defür viel wasser
ich bin gester am halbi eis is bett und hüt am achti ufgstande. natürlich nid grad super, für das wo ich vor gha han. scho gar nid mit de müedigkeit, wo ich us em WK mirbtacht han. aber ich han müesse so füre ufstah: am 9i isch de zug gfahre und ich han d sabine in pfäffike troffe. das hät also das jahr klapped. zäme sind mir is engadin greist, beidi tot müed und ohni viel z schwätze.
am eis sind mir dobe gsi und händ üsi startnummere gholt, denn sind mir mit de sthuttlbebus uf maloja is start-gländ wieter greist. ich han wieder mal denkt, wie fasch jedes jahr, "mann, isch das wiet!". die busfahrt chunnt mir jedes mal ewig vor. vor allem, wenn me no sta muss und de bus total überfüllt isch. aber irgendwenn isch es denn gschafft gsi, die schlappe 14km.
mir sind scho um di 2 in maloja gsi. s warte, chille und vorbereite
hät füre agfange. de startschuss isch erscht am füfi gsi. nach em
vieri händ mir üs effektiv bereit gmacht, für mich viellich fasch
chli z spat. ich bin nämlich, nach de ufwärmrundi erscht am viertel
vor 5i in startblock cho. de isch deht längschtens gfüllt gsi und
ich han recht hine asta müesse. chli wieter vorne wäri sicher au nid
falsch gsi. bim ufwärme bini recht nervös und au chli unsicher gsi
nach em sturz vo züri. ich han uf kein fall me uf s rechti bei gheie
welle und au de chopf isch "tabu" gsi, da ich nid so genau weiss,
wieviel de helm no ushalte würdi. im renne isch aber alles schnell
vergässe gsi.
zersch sind tops gstarted, fraue und manne und denn no d fitness-spitze. denn hät s für üs gheisse, laaaaaaaaaaaangsam uf d startlinie zuerolle und deht nomal halte. bi dere glägheheit han ich mich denn no chli fürezwängt und han sicher kei schlechti startposition gha. han jedefalls uf de erschte rennkilometer nid so hammermässig viel überholt und bin au nid so sehr überholt worde. han mich recht vo afang a a irgend eine aneghefted und han so sehr schnell en guete rythmus gfunde. nur nach de erschte wasser-abgab bin ich es wili "ällei" udnerwägs gsi. scho inere gruppe, aber nid gordned, so hät s ebe glich kei windschatte gha.
i de abfahrt d "charnadüra", oder wie si heisst, han ich de bremsteppich gno und mich chli gfröged, ab einige, wo en nid gno händ! guet, im nachhinein gseh... ich weiss nid. letschtendlich muss ich aber säge, hät sich s risiko nid glohnt, denn die gruppe i dere ich vor de abfahrt gsi bin, wo mehrheitlich nid uf dem teppich gsi isch, han ich bald und ohni grosse kampf zrugg gholt gha. und i de stiegig uf pontresina ue au bald wieder hinder mir gla! afangs stiegig sind üs uf de andere strassesiete no di letschte team-fahrer entgege cho. so hät s es guets gfühl vo me chline rückstand gä. überhaut han ich i dere stiegig einigi "abtröchnet". i de abfahrt hät sich e relativ gueti gruppe formiert. s zweite sind mir gstarted, händ nomal zwei ufgläse und sind une am chreisel nomal uf es paari ufgfahre. mit dene hät s guet harmoniert, ziemlich bis am schluss. bi kilometer 30 hät mini uhr 55 minute azeigt und ich han mir scho d traumziite usgrechnet. aber eigentlich fangt s renne erscht deht a. und überhaupt han ich d rechnig ohni de petrus gmacht! de hät s nämlich es paar kilometer spöter übelscht gwittere cho la! uf de letschte kilometer han ich zum teil gar nüt me gseh: d sunnebrülle isch beschlage gsi und abzie han ich si nid welle, damit mir d tropfe nid id aufe chömmed. nach me stuck räge, händ sich d chugellager mit wasser gfüllt und stellewies isch s wasser uf de strass gläge und mir händ gege bächli und seelit akämpft. so isch s tempo denn natürlich chli langsamer worde. zudem isch es au plötzlich sacke chalt gsi! deht hani denn es wili lang würklich müesse kämpfe und mir immer und immer wieder müesse säge, "nur no es paar kilometer", "nach de nächschte kurve isch s ziel" etc. wo ich denn würklich gmeint han, jetzt seigi s ziel denn grad hinder em hügel, bini sogar no uf en "zug" ufgsrupnge, wo am überhole gsi isch. aber s ziel isch nomal ein "hügel" spöter gsi und ich bin denn spöter nomal uf en langsamere zug umgstiege.
di bösischti überraschig, wobi s eigentlich absehbar gsi isch,
han ich denn im ziel erläbt: d transportfirma isch so behämmered gsi,
dass si eifach üsi täsche uf de platz kipped hät. und deht sind s
denn gläge, im räge. ich han zersch no recht lang uf d sabine
gwarted aber ich han so gfrore, dass ich mich entschide han, id
garderobe z ga. und denn isch s würklich übel zum tag cho: mini
täsch isch bis inne dure total durchnäss gsi! mis "frische" t-shirt
und d hose wo für de heiwäg bestimmt gsi sind, sind pflatsch nass
gsi. ebeso de trainer-pulli. und s tüelich, wo zum abtröchne nach
de duschi gsi wäri, han ich chönne uswinde! denn han ich aber
glück gha: han mir nämlich scho vorgstellt, wie s isch, mit dene
nasse chleider vier stund hei z reisse und di nächschti wuche
chrank z sie. aber nei, es hät eine tatsächlich no trochni sache
debi gha, und er hät d nettikeit gha, mir en trainer und es
t-shirt us z lehne. so han ich denn doch warmi chleider für de
heiwäg gha. zum grosse, grosse glück. es hät nämlich no ein,
zwei ganz erbärmlichi gstallte im zug nach landquart gha. ich
denke, ich hetti ebeso gschlottered wie die, wenn ich nüt trochnigs
agha hetti.
schlussendlich es wieters "abentür" inline-cup guet z end gange. ohni sturzt aber mit viel wasser. d ziit isch mit 1:18.20,92 au nid schlecht. immerhin ganzi 2 minute besser als letscht jahr. und das mit dem wenige schlaf und training! und wenn s nid grägnet hetti? oder ich mir id e abfahrt me zuetraut hetti? oder wenn ich d stiegig nach pontresina no chli härter gno hett? oder am schluss nid nomal uf en langsamere zug umgstiege wäri? e ziit under 1:15 isch möglich! aber ich wirde nomal es jahr warte müesse...
anderi meinige:
sunntigsziitig check it out!
){kind=link}