au bim dritte mal hät's es paar erschti mal gä. so zum biespiel, dass mir i me car agreist sind. dä händ mir üs teilt mit zwei teams vom inline club griefesee, einem vo de speed skates zug, me duo und me teil vom team chauvin arno
was d fahrt aber zerscht recht unagnehm gmacht hät, isch s wetter sowie d ussetemperaturazeig gsi: die zahle sind nämlich immer einstellig gsi. und das im mai! so isch es denn au bim usstiege gsi: iischalt. de räge hät netterwies e pause gmacht, bis mir zelt ufgstellt gha händ.
wo ich am samschtig morge völlig verknittered und durchfrore us em zelt kroche bin, han i mi gfräged, was ich da eigentlich mache. und wieso ich nid eifach im warme di hei bliebe bin. erscht wo mit uf d "parade" sind und sich s erschti mal chli d sunne zeiged hät, isch sowas wie vorfreud ufcho. wo's am vieri denn losgange isch, isch es immer no ziemlich frisch, aber troche gsi. ich han dennoch bis auf weiteres uf d rägerolle gsetzt.
mir händ mit zwei runde pro isatz agfange. zweimal uf de dunlop-hill ue. s schwere dra isch aber gsi, dass me ziemlich us em chalte (wobi, chalt da wortwörtlich isch!) use direkt uf 100% ue hät müesse. weniger als drü minute han i brucht, bis ich amig uf em hügel gsi bin und de maximali puls erreicht han.
wo's denn langsam uf d nacht gange isch, isch es nid nur chalt, sondern iischalt worde. bis uf zwei grad abe, i de frühne morgestunde! mini letschti vo drü nachtschichte, wo jewiels über 3 runde gange sind, isch denn au de schwächsti und au härtischsti isatz gsi. zwei vo dene drü rundene sind über zäh minute gsi, statt unter nün. argh!
wo denn aber de sunntig langsam abroche isch, isch denn alles besser worde: d sunne isch ufgange und d temperature sind bald agnehmer, und vor allem endlich emal zweistellig gsi. richtig warm isch es aber meistens doch nid gsi, da fasch immer en frische wind gange isch. nichts desto trotz han ich s gfühl gha, dass es je länger desto besser gange isch. mir sind denn au bald uf ei rundi pro iisatz abe gange. eimal de hügel uf, und denn di langi, mehrheitlich abwärts gehend, i restlichi rundi schön ziehe. immer mit vollgas.
nid zum erschte mal, han ich am schluss, quasi mit em ziel vor auge, nomal energie freisetze chönne. die rundi wo ich gmeint han, seigi mini letschti, isch nomal e richtig schnelli worde. und die, wo denn di würklich und definitiv letschti gsi isch, isch denn die klar schnellschti gsi.
am schluss sind mir alli z'friede gsi und händ üs sälber gfiired. mit me 32. rang händ mir nid grechnet. und nach em wettermässig harzige start, isch d tatsach, dass es während em ganze renne troche gsi isch und am schluss sogar d sunne gschunne hät, älleige scho fiirenswert gsi.
nach me feine z'nacht wo üs nomal euses hälferteam koched hät, händ mir um di 7i de car bestiege und sind d nacht dure zrugg gfahre. das isch sehr agnehm gsi. dank de grosse müedigkeit isch s schlafe au keis problem gsi und ziit in nu vergange.
zahle und fakte:
over all rang: 32
kategorie (prestige): 15
gfahrni runde: 152
gfahrni km: 636.1
gschwindigkeit (km/h): 62.4
totali laufziit: 24:09.13,317
puls und gps date vo mine runde:
runde 1 & 2
runde 3 & 4
runde 5-7
runde 8-10
runde 11-13
runde 14 & 15, kei ufzeichnig
rundi 16
rundi 17
rundi 18
rundi 19
rundi 20