bevor's ganz vergässe gaht no e churzi zämefassig vo de drü inline-renne certina inline race, mannheim marathon und thuner skate day
certina inline race, fritig, 7. juni 2013en guete afang vo me voll packte wuchenendi. de halbmarathon über sechs rundene dur d blieler innestadt isch scho lang mis lieblings renne vo de swiss skate tour. und es isch au guet glaufe. bi summerlichem wetter hät e um fasch 2 minute besseri ziit use glueged als letscht jahr. allerdings nur handgstoppt, wil s ziitmesssystem usgfalle isch. de einzigi wermuetstropfe: de chräbu hät sich uf de zielgerade no a mir verbi gschobe. so isch d revanche vo niederbipp usgfalle.
mannheim marathon, samschtig, 8. juni 2013
es isch bereits min dritte alauf gsi, zum a das renne z ga. jetzt hät's also klapped. allerdings bin i scho uf de ganze hiifahrt extrem müed gsi. s wetter hät sich denn vor ort wieder vo sinere beste siete zeigt, obwohl's uf de hiefahrt churz vor mannehim no gregnet hät. s renne isch verhältnismässig gemächlich los gange, was super gsi isch für mich, en bekennende langsamstarter. ich han mich so problemlos i de spitzegruppe halte chönne, wo a de ronny mit debi gsi isch. di erschte 10km händ mir problemlos abgspuelt. nachher emal e chli e kriese. de ronny au en churze moment. aber mir händ's beidi gschafft i de gruppe z bliebe. bi knapp de hälfti han ich mich wieder erholt gha und recht guet gfühlt. de gnuss, endlich mal mit em ronny zäme es renne skate z chönne, isch aber vo churzer duur gsi: nach 23km isch en u-turn cho. ich han en nid richtig verwütscht und bin i de leitplanke glandet. ich bin relativ bald wieder gstande und mit de nächschte gruppe wieter. d schmerze sind aber höllisch gsi (rippe, aschlüssend 3.5 wuche velo- und inline-pause, 5 wuche schwümmpause und 6 wuche jogging-pause!). wenn ich s tempo gha han, han ich guet (mit-)skate chönne. aber wenn immer s nötig worde isch, z beschleunige sind d schmerze z gross gsi. so händ mi d grüppli immer mal wieder abghänkt und ich han's mit en mächschte probiert. aber immerhin, ich han's us eigener chraft is ziel gschafft.
s wuchenendi abgrundet hät denn überigens es die toten hosen konzert in st. galle. allerdings han i das denn nid ganz meh us de vorderste reihe verfolgt, um min körper chli z schone...
thuner skate day, samschtig, 17. juni 2013
das isch so z säge s heimrenne, da thunliners de event organisiered. hät aber i dem fall au de nachteil, dass de tag für üs (wenn ich mich i dem fall zu de thunliners zähle) scho am morge frühe mit ufstelle afangt und erscht lang nach em renne, wenn alles wieder verruumt isch, endet. immerhin, mir händ herrlichs, summerlichs wetter gha. di flachi und kurve-armi strecki (han mir mängi sprüch müesse alose, vowäge: es hät da kei kurve, leitplanke etc) hät schnelli ziite erlaubt. im unterschied zum letschte jahr hät's au nid ganz so tark gwindet und ich han vo afang a e gueti gruppe verwütscht. es sind zersch no füf thunliners i dene viellich öppe 15 skater gsi. uf de siebte(?) rundi hät's gruppe aber plötzlich teilt und us mir ungeklärte gründe, isch niemert me hinder mir gsi. so händ mir di letschte runde no öppe z füfte absolivert. mit nur no einem thunliner. und das mal isch mir d revanche glückt. das mal han ich mich uf de zielgerade no chönne am chräbu verbi schiebe und de "sieg devo träge".