während i de schwiiz im moment d frag churzstrecki oder langstreckei heisst, isch es in dütschland fitness oder speed.
das hät vor em start viellich chli für verwirrig gsorgt. denn speed bedüted normalerwies "elite" und fitness "breitesport". als "langstrecki" skater bin i aber automatisch bi speed gsi. di chli bangi frag, ob ich deht no mitfahrer finde, hät sich churz nach em start klärt gha. ich bin no lang nid de letschti gsi.
eigentlich han i mi sehr uf das renne gfreut, han gueti erinnerige as letschte jahr und es isch e strecki wo mir liet. aber ich han i de vergangene täg wohl z viel gmacht und bin mit ziemlich schwere bei agreist. so han i vo afang a wenig hoffnig gha. ilaufe isch au z churz cho, wie sich usegstellt hät, en fehler. wie so oft.
denn isch es los gange und ich han mich nach vorne orientiert. alli wo ich kennt han und in etwa uf minem niveau gsi sind, sind hinter mir gsi. aber ich han "vorne" nid e gruppe gfunde wo mir passt hät. viellich hett i no chli frecher sie müesse bim astah.
uf de dritte rundi han i denn definitiv uf die hinter mir gwarted. im windschatte vo dene, fasch alles schwiizer überigens und vieli bekannti, han i mi denn chli erholt und d bei sind denn mit de ziit doch no warm worde. je länger s gange isch, desto liechter isch es mir gfalle.
uf de sechste rundi hät üs d spitze s erschti mal überrundet. das grad i de enge kurve. das hät üsi gruppe teilt. ich bin im hintere teil gsi, was ich mir nid gfalle la han welle. ich han denn uf einere vo de nächste rundene bim astieg churz agrieffe und bin bald bi de vordere gsi. aber au deht händ d rundeziite amig nid so mine vorstellige entsproche. han je länger je meh d füherig überno. im zweitletschte ufstieg s letschti mal und han si di ganzi rundi ghalte. und au so hät d energie no für e wieteri tempoherschärfig i de letschte stiegig glanged. im schlussspurt hät nur no eine mitghebed. aber er isch nüme a mir verbi cho.
so richtig z'friede bin ich denn glich nid gsi. bin knapp schneller gsi als letscht jahr, das scho. aber ich han s gfühl gha, es wäri no chli meh drinne gläge, wenn ich am afang chli meh u f zäh bisse hetti. vieli wo üs scho frühe im renne überrundet händ, händ am schluss nur en vorsprung vo guet zwei minute gha, was nid ganz einere rundi entspricht. oder andersch gseit. vo deht a, wo's üs überrundet händ, sind's au nüme schneller gsi als mir. oder andersch ume, wenn ich uf de erschte rundene schneller gsi wäri, hett ich trotzdem i de zweite rennhälfti nid schneller fahre müesse, als ich's jetzt gmacht, und problemlos chönne han.