agnehmi temperature und sunneschie sind em abschluss vo de swiss skate tour guet becho. und s ITL hät s erschti mal chönne vier startendi i de hauptkategorie stelle.
wie immer i de schwiiz isch s renne für mini verhältnis los gange wie d fürwehr. liet halt dra, dass s ganze (chline) feld zäme startet. und d elite-skater und halbprofis händ da vom tempo halt e anderi vorstellig wie... ich. mis ziel isch gsi, mir em ronny z skate, so z säge d revanche vo mannheim. also han ich mich ihm ad ferse ghängt. und er isch au ab wie e ragete. zum glück hät er denn nach enere halbe rundi e chli tempo use gno. es hät sich denn schnell e grossi gruppe bilded, wo ziemlich zackig unterwegs gsi isch. ich han vo einige i dere gruppe gwüsst, dass die öppe uf minem niveau sind. vo andere aber au, dass die mir normalerwies mehreri minute, im extremfall bis zu zäh, uf d marathondistanz abnämed.
s tempo isch also z hoch gsi, aber viel anders als mit z ga hät's nid gä. de glaube, dass es mit de ziit langsamer wird, oder d hoffnig, dass sich d gruppe irgendwo mal ufteilt in e schnelleri und e langsameri, händ denn de afang prägt. wieter han ich probiert z luege, nie z vorderscht z si, damit ich mich schön im windschatte verstecke chann. im zweite astieg han ich mich denn gschickt zrugg falle la und han mir vorgno, das au uf de nächste rundine z mache. sowiet isch es aber nid cho. ich han mich wohl z'wenig wiet hine igreiht und ich wäri scho nach drü viertel vo de rundi in ussichtsriecher position gsi, zum z vorderst fahre. aber wil i scho so mühe gha han zum mithebe, han i mi entschiede zum use z ga. han ghofft, z hinderscht nomal ahänke z chönne. isch aber nid ufgange. d strass isch schmal gsi und ich han bim zrugg falle la nid skate chönne. nur no rollend isch es unmöglich gsi, hine wieder uf de zug uf z springe, und nomal ane z cho bi me tempo wo scho im sog vo de gruppe eher z schnell isch, isch no weniger möglich.
ich han denn e ganzi rundi ällei skate dörfe, so gross isch de abstand zu de nächschte hintere gruppe gsi. i dere sind denn aber nid weniger als vier bekannti gsichter gsi. mindeschtens zwei devo hett ich als stärker igschätz als mich. aber entweder han ich es falsches bild vo ihrem formstand oder sie händ nid so en guete tag gha. uf jede fall isch die gruppe mir am afang wahnsinnig langsam vorcho. je länger, je meh hät si mir aber guet passt. d rundeziite sind au schneller worde! ich han mich jedefalls nid glangwieled, aber au zu keinere ziit um de aschluss kämpft. und siehe da: zu beginn vo de letschte rundi isch plötzlich de ronny am strasserand! er hät s tempo vom afang au nid halte chönne und hät uf eus gwartet. so hät sich's am schluss denn doch no ergä, dass mir mal meh oder weniger zäme is ziel cho sind.
da de schlussspurt flach oder gar liecht abfallend isch, was nid mis terrain gsi isch, han i mir scho länger vorher gedanke gmacht, wie das problem a z ga isch. de chlini berg wo's z überwinde git, isch eigentlich viel, viel z wiet vom ziel entfernt. dennoch han ich deht en chline energieafall gha und bin als erschte obe am hügel gsi. und denn? i d abfahrt sind mir z dritte. das isch eigentlich ussichtlos, wenn di andere mindestens dopplet so viel sind. aber ich han mir denkt, jetzt git's nüt anders meh, als z probiere. meh als üs ihole chönnd's ja nid. vo mine beide mitfahrer han ich kei hilf übercho. die sind schön i minem windschatte bliebe, zum mich churz vor em ziel no z überspurte. was nur einem vo beide glunge isch. danke denn! defür händ mir mini zwei team-kollege im feld hine dra en gfalle gmacht: nämlich das eher bremsed. dank dem händ mir no knappi drü sekunde is ziel rette chönne. so hät de tag nach em fruscht vo de dritte rundi doch no es guets endi gno.