mit em nass-chalte köln-marathon han i d saison irgendwie nid beende chönne. wieso au, wenn's wetter zwei wuche später nomal wie im summer gsi isch?
d bedingige für de glarner stadtlauf sind für inliner ideal gsi. bi fasch 20 grad und sunneschii isch es uf di churzi am knackigi rundi gange. uf 1575m hät's nid weniger als 15 zum teil scharfi kurve, zwei stiegige, eini extrem schteil, und zwei abfahrte z meistere gä. de rundkurs isch definitiv nüt für afänger oder grossi startfelder gsi. aber für die gschätzte 20 lüt am start isch es abgseh vo de erschte kurve nach wenige meter guet gange.
ich han mir min vordermaa und mitstrieter scho vor em renne usgwählt und schlussendlich wohl uf's richtige pferdli gsetzt. nach de erschte rundi sind mir zwar gfühlt bereits abgschlage und wiet hine gsi. uf de folgende rundene händ mir aber immer mal wieder lüt igsammled und zum teil denn au wieder hinter üs la. nur eine hät mit möge, wie er im ziel zue gäh hät, me schlecht als recht. nicht's desto trotz hät er aber im richtige, und für mich chli überraschende moment agriefe. nämmlich sehr früh: uf de letschte, de moderatere vo dene beide, stiegig. ich han nie me ganz ufschlüsse chönne. so han i mi vo ihm müesse gschlage gä. vor üs isch no eine gsi, wo di letschte zwei runde in sichtweiti gsi isch, mir aber au nüme gholt händ, sowie die drü, wo de sieg unter sich usgmacht, und sich dütlich abgsetzt händ.
fazit: au 12.6km chönnd extrem härt si. huuseggerenne händ ihren eigene reiz und chönnd durchus spass mache. meh zueschauer als a de meiste swiss-skate-tour-renne hät's au gha. 25:11 für 12.6km isch no immer über 30km/h! d reis is glarnerland isch es uf jede fall wert gsi.