saisoneröffnig voller überraschige. und mit hohem spassfaktor.
s erschti swiss skate tour renne vo de saison 2014 hät uf de kartbahn lyss statt gfunde. was mich/üs deht erwartet, hät niemer so richtig gwüsst. vor ort isch aber denn bald klar worde. die 750m langi, kurvigi kart-bahn isch d rennstrecki gsi. uf dere hät's zersch mal es qualiyfing gä, wie i de formel 1. jede hät ei schnelli "flügendi" rundi chönne fahre. später nomal. uf grund vo dem isch me denn in A- resp. B-block iteilt worde. mir hät's knapp nid is A glanged. bin aber sicher, dass i einigi vom A i "normale" renne hinter mir la würdi. schlussendlich isch es aber guet gsi so. denn es hät definitiv meh spass gmacht, im B vorne mit z fahre, als im A hinedri z hase!
d blöck sind gviertled worde. so dass denn jewiels öppe 10 am start gstande sind. vo jedem vo dene "heat" händ sich jewiels di erschte zwei sowie die total acht ziitschnellschte für s "final" qualifiziert. di andere sind platzierigsläuf gfahre. ich han drum vo afang a i minem "heat" glueged, dass i platz 2 han. und das isch au guet ufgange. eine hät meh als anderthalb rundene gfühert, bevor ich denn us position zwei use i de letschte kurve zum spurt agsetzt han. es sind no anderi mit cho, de plan isch aber ufgange, bin uf de ziellinie no überspurtet worde, han aber min 2. platz und d finalqualifikation gha.
im final han i ebefalls defensiv gstartet. sind öppe 5,6 vor mir gfahre. uf de zweite rundi han i denkt, müsst i eigentlich i de s-kurve agriefe, dur die bin i immer guet cho. han mi denn aber nid getraut, s sturzrisiko isch mir z gross gsi. so han i ersch i de letschte kurve chönne lossprinte und das hät denn wohl nüme ganz glanged. sind vier, oder füf skater öppe glich uf gsi. glaube aber dass drü devo vor mir über ziel linie sind. argh!!
nach dene sprints isch no es renne über 10 runde, wo's jewiels di ganze 45 skater vom block los la händ, agstande. das wäri denn meh mini sach gsi. bin aber ebefalls chli defensiv gstartet. isch aber scho guet gsi so. nach zwei oder drü rundene hät s mi dur d wechsel vorne automatisch "füre gspüelt". deht hät denn eine gmeint, er müessi agriefe. de thomas (ott) und ich sind hine na und bald weg gsi. han aber nid ganz am thomas dra bliebe chönne und müesse igseh, dass i mit ihm nid mithebe mag. hm... im nachhinein ärgere ich mich chli, s nid no chli meh oder länger probiert h ha. er isch denn ällei vorne weg und isch e me klassische solo-sieg entgege gfahre. ich han mich vom feld hine dra bald ihole la. dezwüsche hät sich denn no eine positioniert. im feld han i mi denn chli erholt. eine vo de thunliners hät recht lang gfühert. wieso han i nid verstande. ich han mich schön im windschatte ghalte und denn uf de letschte rundi i de letschte kurve agrieffe. und das mal isch ufgange. han de spurt vom feld locker gunne und de eini dezwüsche hetted mir au no fasch gholt. aber ebe nume fasch gholt.
schlussendlich muss i säge, bin halt kein sprinter, aber dank ordentlicher kurvetechnik trotzdem guet um d rundene cho. d taktik isch au jewiels ufgange und spass ebefalls gmacht. a de platzierig chönnt me no chli schaffe...