au das jahr wieder strahlender sonnenschein. trotz neuer, 3km längerer strecki.
ich bin da uf de halbi vieri zug in HB und denn dur de neui tunnel, wo vom HB bis uf thalwil gaht. in zug bin ich zersch no chli i de stadt ume girrt. obwohl ich scho zum dritte mal deht gsi bin. ich han dasmal nid bis an see abe wellä um denn wieder ue is village z müesse. isch schlussendlich denn aber doch so cho. uf em heiwäg hani denn aber de wäg gno, wo ich welle han und ich denke, ich finden s nächschti jahr denn wieder.
das ich da immer in ich-form schriebe hät weder mit miner egozentrik no mit arroganz z tue. d sabine und de silvan sind nämich grad beidi, aber nid zäme, i de ferie gsi. so hani ganz ällei as lieblingsrenne vo de sabine ga müesse...
bim astah, zum d startnummere abhole, isch es mega heiss gsi. d sunne hät nur so abebrennt, so bin ich schnell in schatte, nach dem ich d nummere gha han. und deht hani denn no chli ziit gha. han zwar es buech debi gha, bin aber schlicht und eifach nur ghängt. denn bini no uf s WC zum überflüssigi kilos ab z rüere und ich han mich für s race bereit gmacht. han denn no chli müesse sueche, wo s depot für d effekte isch und denn hani no e chlini ufwärmrundi gmacht. wobi wärme isch nid nötig gsi. besser: e "ad-skates-gwönigs-rundi".
am viertel ab sechsi bini im startblock gsi. de isch scho recht voll gsi. han denn nid de richtigi igang benutzt, susch wäri chli sehr wiet hine gstande. bin irgendwo über d abstschrankig klättered und han mich nacher no chli füre zwängt. de start hät sich chli verzörered, wil d strecki nid frei gsi seig. aber am 18:37 isch es denn los gange.
di erschte kilometer sind natürlich schlimm gsi, wie immer wenn so
e masse underwägs isch. eis chaos. alli wänd schnäll si und chum wird
s äng mached alli id hose und bremesd wie di hole. au bilded sich
chum reieli und gruppe. und wo s denn so erschti "fahrgmeinschafte"
gä hät, sind au di schnellschte fitness-skater füre cho und es hät natürlich
sotigi gha, wo gmeint händ, si müessed mit dene mithebe. so isch wieder
alles durenand cho. und di meischte speed-skater händ mir denn au wieder
igsammled, da die mit de fitness-spitze nid mithebe händ chönne.
denn isch nach ca. 20 kilometer e happigi stiegig cho. mini wasserfläsche isch leer gsi, aber obe, a dere stiegig hät s denn getränk gä. ich han gmeint, dass es getränk erscht nach 28km git, so hani nid schlecht gstuunt, wo d uhr grad mal 45min azeigt hät. nacher isch es logischerwies durabe gange und es händ sich gueti gruppe formiert. überhaupt isch s renne deht richtig geil worde! ich han min rythmus gfunde und han s gschaffd d 4-rolle-skater vo mir fern z halte. die sind müesam, wil die eifach en andere schritt-rythmus händ und me so nur schwer "im takt" fahre chann.
nach dere abfahrt isch s gländ chli hüglig, und mir händ nomal zwei, drü stiegige gha, jedes mal aber au wieder abfahrte und de speed händ mir chönne is flachi mitnä. überhaupt isch deht s strecki ziemlich schnell. das isch würklich geil: skatisch über fiine asphalt, fasch widerstandslos, mit viellich 35km/h, oder me. jedefalls: eifach zum gnüsse!
öppe 2km vor em ziel sind denn wieder verschideni gruppene zäme cho. und damit nonig gnueg: d juniore, wo viel spöter in risch gstarted sind (die händ nur 11km gha) händ üs überholt. scho no beidrucked, was die i dem alter scho für es tempo händ! natürlich händ wieder einigi gmeint, si müessed mithebe. di meischte händ s aber nid gschafft. zum glück, denn ich bin de meinig, die händ ihres eignigi race und sötted lerne, um d positione z kämpfe am schluss. und da störed so plauschfahrer und breitesportler doch nur!
schad isch gsi, dass sich so churz vor em ziel üse schnellzug wieder total ufglösst hät. ich han mich denn aber zweine ad ferseh ghefted, wo au kein schlechte speed gha händ. und uf de letschte paar hundert meter, hani denn die no sta la und bin no gspurted. aber hät alles nüt gnützt: di 80 minute han ich klar verpasst und so au de 30er schnitt. aber isch no interessant, dass ich i gwüsse renne am schluss, churz vor em ziel nomal so energie frei mache chann, i andere weniger. im engadin oder in züri zum biespiel. wobi, deht zielgerade viellich au länger isch.
nach dem dass ich denn min chip abgä und ziemich viel rivella bächered han, (han im allgemeine unterwägs chli knapp getränk gha), hani mini täsche us em "depot" gholt und d duschene gsuecht. hät guet tue, s frischi wasser. aber zersch hani no chli anesitze müesse. ich bin nach em hütige (eigentlich geschrtige...) renne so kapput gsi, wie scho lang nüm. d wädli und de rugge händ mir gseit, dass ich hüt (endlich) mal wieder ziemlich am limit graced bin.
di offizielli ziit isch no chli schlechter gsi als di hang-gstoppti vo minere swatch-chrono. aber nach em usrechne vo de pünkt (relativ zum sieger) und de km/h muss ich säge, so schlecht isch es nid. ich han es dütlich höchers stundemittel gha gegenüber em letschte jahr und das uf e chli enere längere strecki. und mit 707 pünkt han ich diesbezüglich au eis vo de bisher bessere resultat gha. allerdings isch sieger nid gleich sieger. in zug isch nur salomon vo de world-teams am start gsi. so isch klar, dass deht s tempo weniger höch isch, wie zb in züri (685 pünkt) oder em engadin (655), wo di ganzi weltelite um WIC-pünkt kämpft.
denn bini zrugg uf de bahnhof. uf em direkte wäg und einiges schneller. vo di hei bis di hei, hani mir denn i de s-bahn usgrechnet, han ich über drüehalb liter trunke. und di hei han ich mir denn ebefalls wieder es fläschli wasser gfüllt, bevor ich an computer bin go unter anderem de bricht da z schriebe.