di füfti etappe vo de swiss skate tour hät in frankriech, i me ussequartier vo strassburg, statt gfunde.
nach me herrliche summertag mit schwümme im zürisee, hät sich s wetter, je wieter mir gfahre sind, desto schlechter zeiged. wo mir z Schiltigheim acho sind, händ mir nassi strasse und nieselräge vorgfunde. s renne hät i me büroviertel statt gfunde, wo am sunntig mausetot isch. d stimmig isch ziemlich trischt gsi und mir händ üs nach em abhole vo de startnummere wieder im auto verkrümeled.
am halbi drü, plus ordentlichi verspätig, isch es denn los gange. und es sind doch no einigi am start gsi. aber wenigi wo ich kennt han. trotz em räge isch es recht schnell los gange und mini bei händ da nid mitmache welle. scho uf de zweite rundi han ich di avisierti gruppe müesse ga la. e chli wieter hine sind denn nomal welchi cho, wo ich kennt han. für wieteri zwei rundene isch es mit dene mitgange. dezwüsched han i mi sogar scho fasch mal chli glangwieled, und trotzdem han igehend endi vo de vierte rundi, wo's e lugge gä hät, die nüme schlüsse chönne. jetzt bin i plötzlich wiet hinter lüt gsi, wo i de rangliste meist klar hinter mir sind, und ich han druf gwartet, bis vo no wieter hine lüt chömmed, mit dene ich skate han chönne. ällei no wieteri 12 rundene drähe, wäri kei option gsi. es isch denn zum Glück aber eine cho, und nach fasch enere rundi s zweite, isch nomal e gruppe cho. ich bin mir zwar im erschte moment nid sicher gsi, ob die würklich no vo hinter üs sind, oder scho überrundet. aber es isch wohl ersteres de fall gsi. mit dene sind mir denn mitgfahre, buechstäblich bis zum bittere endi.
ich han eigentlich denkt, ich erhole mich und langwiele mich i dere gruppe irgendwenn. das isch scho oft vorcho und wohl resultat vo schlechtem ufwärme und am start nid parat si. i dem fall isch aber nüt me gange. d bei sind eifach leer gsi und ich bin trotz em wohl schlechtischte resultat sit langem mit muskelkater hei...
am schluss hät üs no chli d sunne usglacht, die isch denn au no füre cho, grad wo di letschte au no im ziel gsi sind. sie hät üs i dem fall aber wohl eher usglacht statt aglacht. sie hät aber au zeiged, dass de grossi teich, um de mir umegfahre sind, durchus schön sie chann.